Kwonañin ke Kajenolok Ien ñõn Am Katak Baibel?

ILO yiõ eo lok, Governing Body eo ear kajela kin juõn oktõk ilo lajrõk in ien kwelok ko an congregation eo me enaj kalaplok ien ñõn an juõn baamle katak Baibel iben dron. Elañe kwoj bõran juõn baamle, kwon kõmõn bwe en ekkeini am katak Baibel iben lio beleõm im ajiri ro nejimiro, im karõk bwe katak eo en jejit ñõn aikwij ko an baamle eo. Dri belele ro me ejelok nejiir renaj kõnan kajerbal ien in ñõn katak Baibel iben dron. Ro me rejañin mare im ejelok erro ko an juõn baamle ibeir renaj bareinwõt kõnan kajerbal ien in ñõn katak ibeir mõke.

Elõñ rej kwalok air kamolol kin jotenin kar karõk bwe en Ien an juõn Baamle Kabuñ. Ñõn wanjoñok, juõn elder etan Kevin ear je: “Nan eo ‘kommol’ ejabwe ñõn kwalok iñjake ko am ilo congregation eo. Einwõt elder ro, kimar bwebwenato kin ewi wãwen kimij kajerbal boñin eo ejelok kwelok ie ñõn katak iben baamle ko am, einwõt an Governing Body eo rejañ kim ñõn kõmõne.”

Jodi, me leo iben ej juõn elder, ear je: “Eor jilu nejimro ledrik, me rej 15, 11, im 2 air yiõ. Kimij kab emakõt ñõn juõn congregation me armij ro rej kajerbal peir ñõn konono. Elap an bõk ien im am kate ñõn kapojõk ñõn aolep kwelok ko. Kiõ, kin oktõk in, ear kebellok bar juõn ien ñõn am katak Baibel einwõt juõn baamle!”

John im JoAnn, ruo dri belele me rej jerbal einwõt pioneer ro, rar je: “Ekkã am jakkeini am katak iben dron einwõt juõn baamle kinke kimij aikwij kõmõn ien ikõtan makõtkit ko an congregation eo. Karõk in ekãl ej juõn menin letok jen Jeova me ej kaimololoik kim ilo jitõb, elañe kimij kajerbal ien in ekkar ñõn wãwen eo kar karõke.”

Tony, eo ej 20 jima an yiõ im ejañin mare, ear karõk jotenin Juje ñõn an katak iben mõke. Ej kajerbal ien ko jet ilo wik eo ñõn kapojõk ñõn ien kwelok ko an congregation eo. Bõtab, Tony ear ba, “Elap aõ reimanlok ñõn ran in Juje.” Etke? “Kinke ej ien eo eaurõk ij kajerbale iben Jeova.” Tony ej kemelele: “Iomin ruo auõ, ij katak kin men ko me rej kakajurlok kõtan eo aõ iben Jeova. Kin an laplok ien ñõn aõ katak, imaroñ kalomõnlokjen kin eon ko ij riiti ilo Baibel.” Ta tokjen eo ej walok? “Nan in kakabilek ko an Jeova elaplok air tõbar buruõ jen kar mokta.” Ta wanjoñok eo Tony ear kwalok kake? “Iar kõmõn etale ko ilo buk eo, Melele kin Jeje ko ilo Baibel (ejelok ilo kajin Majõl), im iar riit kin jimjera eo an Devid im Jonetan. Elap aõ kar katak jen karkar ko ejelok jitõbõn kibbon ie me Jonetan ear kwaloke. Joñok eo an ear jibõñ iõ ñõn kile ta melelen ñõn erom juõn jeran emol. Ij lukkun reimanlok ñõn kabukot elõñlok point ko raurõk ilo boñin Juje otemjej!”

Ejelok berre bwe aolep dri korijer ro an Jeova enaj lap air bõk tokjen ilo air kajerbal ien eo kar karõke ñõn katak Baibel im kabuñ iben dron einwõt juõn baamle.