Wãwen eo ñõn Drebij Wõt Jimjera eo Am ilo Juõn Lõl Ejelok Yokwe Ie
Wãwen eo ñõn Drebij Wõt Jimjera eo Am ilo Juõn Lõl Ejelok Yokwe Ie
“Men kein Ij jiroñ kom, bwe komin yokwe dron.”—JON 15:17.
1. Etke dri Kristian ro mokta rar aikwij ebake wõt dron?
ILO boñin eo eliktata in an ber ion lõl, Jisõs ear rejañ dri kalor ro an retiljek ñõn drebij wõt jimjera eo air iben dron. Moktalok jen joten eo, ear ba bwe yokwe eo rej kwaloke ñõn dron enaj kalikar bwe rej dri kalor ro an. (Jon 13:35) Dri jilik ro rar aikwij ebake wõt dron elañe rar kõnan kijenmij iomin melejoñ ko reber imair im ñõn kõtõbrõk jerbal eo Jisõs enaj lelok ñõn ir. Emol, dri Kristian ro jinoin rar buñbuñ kin tiljek eo air ebin ñõn Anij im ñõn dron.
2. (a) Ta eo jar beek ilo buruer ñõn kõmõne, im etke? (b) Ta kajitõk ko jenaj etali?
2 Ranin, elap an kalõñliñ kij ñõn koba iben juõn rolul in jimjãn jimjãtin ibelakin lõl me rej lor joñok eo an dri Kristian ro jinoin! Emwij ar beek ilo buruer ñõn bokake nan in jiroñ eo an Jisõs ñõn yokwe dron. Bõtab, ilo ran kein eliktata, enañin aolep armij rejjab tiljek im rejjab kwalok air yokwe. (2 Tim. 3:1-3) Jimjera ko rej ejaake iben ro jet ekkã wõt air jab mol im ilo kibbon. Ñõn kalikar bwe jej dri Kristian ro remol, jej aikwij kejbãrok bwe en jab or iber lemnok rot in. Inem, jen etale kajitõk kein: Ta berberin jimjera ko remõn? Ewi wãwen jemaroñ ejaak jimjera ko remõn? Ñãt eo jej aikwij kajemlok kõtan eo ar iben juõn mõtar? Im ewi wãwen jemaroñ drebij wõt jimjera ko me rej kõkãtõk dron?
Ta Berberin Jimjera ko Remõn?
3, 4. Ta berberin jimjera ko rebintata, im etke?
3 Jimjera ko rebintata rej berber ion ar yokwe Jeova. Kiñ Solomon ear je: “Elañe juõn armij e kõnan bõk anjo ion eo e mõke ian, irro re naj jumae e; im juõn ekwoljil e jamin mõkõj air mijkõk e.” (Ekk. 4:12) Ilo kõkkar, ñe Jeova ej to eo kein kajilu ilo jimjera eo, kõtan eo enaj to an ber.
4 Emol, ro rejjab yokwe Jeova remaroñ bareinwõt ejaake jimjera ko me rekamõnõnõ. Ak ñe rej druaklok ñõn dron kin air yokwe Anij, jimjera eo air enaj bin. Elañe abañ ko rej walok, ro emol jimjera eo air renaj jerbal iben dron ilo juõn wãwen ej kamõnõnõik Jeova. Elañe dri jumae ro an Anij rej kajeoñ in kõmõn jibil ikõtan jimjera ko an dri Kristian ro remol, dri kijirãt rein rar kile bwe rar jab maroñ kokkure kõtan eo an dri Kristian ro. Ilo bwebwenato in armij, dri korijer ro an Jeova rar mõnõnõ in mij jen air ketõk bar juõn.—Riit 1 Jon 3:16.
5. Etke jimjera eo ikõtan Rut im Neomai ear to an ber?
5 Ejelok berre, jimjera ko me elaptata air kajuburu rej iben ro rej yokwe Jeova. Lemnok kin joñok eo an Rut im Neomai. Rar ejaake juõn jimjera me ej juõn ian jimjera ko elaptata an emõn me kar jeje kake ilo Baibel eo. Etke jimjera eo airro ear bin im to an ber? Rut ear kwalok un eo ke ear ba ñõn Neomai: “Dri ailiñ ro am, re naj aõ dri ailiñ, im am Anij aõ Anij; . . . Jeova en kõmõn ein drein ñõn iõ, im kalaplok, elañe jabrewõt, a mij wõt ej kijbil kijro.” (Rut 1:16, 17) Alikar, Rut im Neomai rar lukkun yokwe Jeova, im rar kõtlok bwe yokwe in en jelet wãwen airro kar jerbal iben dron. Tokjen men in, Jeova ear kejerammõn ir.
Wãwen eo ñõn Ejaak Jimjera ko Remõn
6-8. (a) Ta eo ej kõmõn bwe jimjera ko ren bin im to air ber? (b) Ewi wãwen kwomaroñ bõk buñten ne eo moktata ñõn ejaak jimjera ko?
6 Joñok eo an Rut im Neomai ej kwalok bwe jimjera ko remõn rejjab jirullok im walok. Yokwe eo ar ñõn Jeova ej berber eo. Ak jimjera ko eto air ber rej itok jen ar kate kij im ilo ar karmijete kõnan ko ar mõke. Ro rej jimjãn dron ilo juõn baamle me ej kabuñ ñõn Jeova, rej aikwij bareinwõt ebake dron. Inem, ewi wãwen kwomaroñ ejaak jimjera ko remõn?
7 Bõk buñten ne eo moktata. Dri jilik Paul ear rejañ dri Kristian ro mõtõn ilo congregation eo ilo Rom ñõn “lelok ñõn ro remõn men ko rej aikwij kaki; lorlok kajijõtarmij.” (Rom. 12:13) Ñe jej etetal ilo juõn ial, men in ej kitibuj ar bõk elõñ buñten ne ko redrik. Eindreinlok wõt, ar kwalok karuwainene ej kitibuj elõñ kõmõn ko redrik me armij eo mõke ej aikwij kõmõne. (Riit Jabõn Kennan Ko 3:27.) Juõn wãwen kwomaroñ kwalok karuwainene ej ilo am kirtok kajjojo ian ro ilo congregation eo ñõn mõña ibõm. Kwomaroñ ke kõmõn bwe men in en juõn mõnit ibõm ñõn kwalok karuwainene ñõn ro uan congregation eo am?
8 Bar juõn wãwen kwomaroñ bõk buñten ne eo moktata ñõn kõmõn ro mõtõm ej ilo am kõmõn karõk iben kajjojo dri kwalok ro ñõn kwalok nan ibõm. Ñe kwoj jutõk iturin kejem eo an juõn dri mweo im kwoj roñjake an eo mõtõm konono jen buruen kin yokwe eo an ñõn Jeova, kwonaj iñjake am ebakelok e.
9, 10. Ta joñok eo emõn Paul ear likiti, im ewi wãwen jemaroñ kajeoñwe?
9 En laplok buruemi. (Riit 2 Dri Korint 6:12, 13.) Kwonañin ke kar iñjake bwe ejelok juõn ilo congregation eo am me kwomaroñ ebake? Elañe aet, bwelen ej kinke kwoj kãlet wõt wõn ro kwomaroñ jimjera ibeir. Dri jilik Paul ear likit juõn joñok emõn kin an kõmõn bwe en laplok buruen. Kar or juõn ien ear jab lemnok in ejaak juõn jimjera iben ro rejjab dri Ju. Bõtab, ear erom “dri jilik ñõn dri ailiñ ko.”—Rom. 11:13.
10 Bareinwõt, Paul ear jab kabuk ro mõtõn jen ro rej ridtõn wõt e. Ñõn wanjoñok, irro Timote ear ebake dron meñe ear oktõk ridtair im iminene ko air. Ranin, elõñ jodrikdrik ro rej kaurõk jimjera ko air iben ridto ro ilo congregation eo. Vanessa, eo ej 20 jima an yiõ, ear ba: “Eor juõn mõta me ej 50 jima an yiõ im imaroñ ba ñõn e jabrewõt men ko me ij konono kaki iben ro me rej ridtõn wõt iõ. Im elap an kea kake iõ.” Ewi wãwen kar ejaake kain jimjera rot in? Vanessa ej ba: “Iar aikwij lukkun kate iõ ñõn ejaake juõn jimjera rot in.” Kwoj mõnõnõ ke in ejaak jimjera ko iben ro rejjab ridtõn wõt kwe? Elañe aet, Jeova enaj lukkun kejerammõn yuk kin jibarbar ko am.
11. Ta eo jemaroñ katak jen joñok eo an Jonetan im Devid?
11 Kwon tiljek. Solomon ear je: “Juõn jeran ej yokwe ien otemjej; im juõn jein im jãtin, e ar lotak bwe en dri jibõñ ilo ien jorran.” (Ken. 17:17) Ke ear je nan kein, Solomon emaroñ kar lemnok kin jimjera eo an Devid, jemen, im Jonetan. (1 Sam. 18:1) Kiñ Saul ear kõnan bwe Jonetan, leo nejin, en jolite tron in Israel. Bõtab Jonetan ear kile bwe Jeova ear kãlet Devid bwe en kiñ. Ilo an jab einwõt Saul, Jonetan ear jab ebanbane Devid. Ear jab illu kin an Devid bõk nebar, im ear jab tõmak nan in ruruwe ko Saul ear kajededlok kin Devid. (1 Sam. 20:24-34) Jej einwõt ke Jonetan? Ñe ro mõtar rej bõk jerammõn ko ilo congregation eo, jej ke mõnõnõ kake ir? Ñe rej iñtan kin abañ ko, jej ke kainemõn im jibõñ ir? Elañe juõn ej ñiremij nae eo mõtar, jej ke mõkõj im tõmak e? Ak, jej ke jojomar e, einwõt an kar Jonetan kõmõne?
Ñe Jej Aikwij Kajemlok Jimjera ko Ar
12-14. Ta aituerõk eo ebin jet dri katak Baibel ro rej jelmae, im ewi wãwen jemaroñ jibõñ ir?
12 Ñe juõn dri katak Baibel ej jino kõmõn oktõk ko ilo mour eo an, emaroñ jelmae juõn aituerõk ebin ikijen jimjera ko an. Emaroñ or ro mõtõn me ej mõnõnõ in ber ibeir ak rejjab mour ekkar ñõn kien ko ilo Baibel. Ilo ien ko remotlok, emaroñ kar emakijkij an kobalok ibeir. Ak, kiõ, ej kile bwe men ko rej kõmõni remaroñ jelet e ilo juõn wãwen enana, im ej kile aikwij eo ñõn kadriklok an kobalok ibeir. (1 Kor. 15:33) Meñe eindrein, emaroñ iñjake bwe ejjab tiljek ñõn ro mõtõn elañe ejjab kobalok ibeir.
13 Elañe kwoj juõn eo ej katak Baibel im kwoj iion wãwen in, kememej bwe juõn mõtõm emol enaj mõnõnõ ñe kwoj kajeoñ in kakõmõnmõnlok wãwen mour eo am. Emaroñ kõnan koba ibõm ñõn katak kin Jeova. Ijo turãjet, ro mõtõm rejjab mol renaj “konono nae” yuk kinke kwojjab kobalok ibeir ilo “mour awia im etton ko air.” (1 Pit. 4:3, 4, UBS) Ilo mol, ej armij rein mõtõm me rejjab kwalok air tiljek im jab kwe.
14 Ñe armij ro me ejelok air yokwe Anij im rar mõtõn dri katak Baibel ro rej jolok air kõmao ibeir, inem ro uan congregation eo remaroñ bõk jikiir einwõt ro mõtair. (Gal. 6:10) Kwojela ke kajen dri katak ro me rej ber ilo kwelok ko? Jet ien kwomaroñ ke kõkãtõk ir ilo am kõmao ibeir ilo ien kwelok ko ak ilo ien kamõnõnõ ko?
15, 16. (a) En ewi wãwen ar emakõt ñe juõn mõtar ej bwijrõk jen an korijer ñõn Jeova? (b) Ewi wãwen jemaroñ kamol yokwe eo ar ñõn Anij?
15 Ak, ta elañe juõn mõtar iloan congregation eo ej bebe ñõn ilok jen Jeova, im ej menin aikwij ñõn air bukwelok e? Wãwen in emaroñ lap an kaburomõj kij. Juõn jeer im jãter kõra ej kemelele kin iñjake eo an ke eo mõtõn me ear ebake e ear bwijrõk jen an korijer ñõn Jeova, ilo an ba: “Ear lukkun lokjenaõ. Iar lemnok bwe ear lukkun kajur ilo tõmak, ak ear jab. Ijjab jela elañe unin an kar korijer ñõn Jeova ej kin an kar kõnan kamõnõnõik baamle eo an. Inem iar bar etale buruõ kin unin ij kõmõni men ko. Ij ke korijer ñõn Jeova kin un ko rejime?” Ewi wãwen kõra in jeer im jãter ear kamarmire abañ in? Ej ba, “Iar jolok inek eo aõ ion Jeova. Iar beek ilo buruõ bwe inaj kwalok aõ yokwe Jeova kin kain Anij rot e im jab kin wõt an letok ñõn iõ ro mõta ilo rolul eo an.”
16 Jejjab maroñ drebij jimjera eo ar iben Anij elañe jej kãlet bwe jen jeran lõl in. Dri kalor eo Jemes ear je: “Ta, komij jab jelã bwe eo ej jeraik lõl in ej kijdrate Anij? Eo ekõnan jeraik lõl in ej ri jumae Anij.” (Jem. 4:4, UBS) Jemaroñ kamol yokwe eo ar ñõn Anij ilo ar liki bwe ilo ar tiljek wõt ñõn Anij, enaj jibõñ kij ñõn kijenmij ñe juõn mõtar ej ilok jen E. (Riit Sam 18:25.) Kõra eo jeer im jãter, me kar elij nan ko an ilo pãrokõrããp ko lok iman, ear kajemlok im ba: “Iar katak bwe jejjab maroñ kõmõn bwe juõn en yokwe Jeova ak yokwe kij. Ilo mol, ej bebe eo an armij eo mõke.” Ak, ta eo jemaroñ kõmõne ñõn drebij wõt jimjera eo ar iben ro iloan congregation eo?
Drebij Wõt Jimjera ko Remõn
17. Ewi wãwen an ro rej mõtõn dron konono iben dron?
17 Ilo ar konono iben dron ilo juõn wãwen emõn ej karuaklok kij ñõn dron. Ñe kwoj riiti bwebwenato ko ilo Baibel kin Rut im Neomai, Devid im Jonetan, im Paul im Timote, kwonaj kile bwe ro rej mõtõn dron rejjab ãliklik in kwalok burueir ñõn dron ak rej kõmõne men in ilo juõn wãwen rej kwalok koutiej. Ikijen wãwen eo jej aikwij konono iben ro jet, Paul ear je: “Ami konono, en ien otemjej ilo joij, im en emwij kejãtok e kin salt.” Paul ear konono elaptata kin wãwen eo jej aikwij konono iben “ro ilikin,” melelen ro rejjab dri tõmak ro jeer im jãter. (Kol. 4:5, 6) Emol, elañe ej tellokin ar konono iben ro rejjab tõmak ilo juõn wãwen ej kwalok ar koutiej ir, ej aikwij laplok ar kõmõne iben ro mõtar iloan congregation eo!
18, 19. En ewi wãwen ar watõk jabrewõt nan in kakabilek ko jej bõki jen dri tõmak eo mõtar, im ta joñok eo elder ro ilo Epesõs rar likit ñõn kij?
18 Ro rej mõtõn dron rej kaurõk lemnok ko an dron, inem ñe rej konono iben dron rej aikwij kõmõne ilo joij im mol. Kiñ eo emeletlet Solomon, ear je: “Oil im ñõj rej kamõnõnõik buru; bareinwõt bebe emõn im tõñõl an juõn jeran.” (Ken. 27:9) Eñin ke wãwen am watõk jabrewõt nan in kakabilek ko kwoj bõki jen eo mõtõm? (Riit Sam 141:5.) Elañe eo mõtõm ej kwalok an inebata kin juõn men kwoj kõmõne, ewi wãwen am emakõt? Kwoj ke watõk nan ko an einwõt juõn wãwen ej kwalok joij ñõn yuk, ak kwoj lõkatip kaki?
19 Dri jilik Paul ear lõñliñ kin juõn kõtan ebak iben elder ro ilo congregation eo ilo Epesõs. Bwelen ear jela kajen jet ian eman rein jen ke rar erom dri tõmak ro. Ak, ilo kwelok eo an eliktata ibeir ear lelok ñõn ir jet nan in kakabilek ko rekajur. Ewi wãwen rar emakõt? Ro mõtõn Paul rar jab lõkatip. Jen an eindrein, ear or air kamolol kin an kar kwalok an itoklimo kake ir, im rar bareinwõt jõñ ke rar lemnok bwe rejamin naj bar lo e.—Jerb. 20:17, 29, 30, 36-38.
20. Ta eo juõn jeran eyokwe enaj kõmõne?
20 Ro mõtar remõn rejjab bõk wõt nan in kakabilek ko ak rej bareinwõt lilok. Emol, jej aikwij kile ñãt eo jen “lale men ko [ar]” mõke. (1 Tes. 4:11) Im jej aikwij bareinwõt kile bwe kij kajjojo jenaj “lelok nan kin e mõke ñõn Anij.” (Rom. 14:12) Ak ñe ej menin aikwij, juõn jeran eo eyokwe, ilo joij, enaj kakememej eo mõtõn kin kien ko an Jeova. (1 Kor. 7:39) Ñõn wanjoñok, ta eo kwonaj kar kõmõne elañe kwar lo bwe eo mõtam me ejañin mare ear jino jeraik juõn eo ejjab dri tõmak? Kwonaj ke ãliklik in kwalok am inebata kin am mijõk in kokkure kõtan eo amiro? Ak ta eo kwonaj kõmõne elañe eo mõtõm ear kejekron nan in kakabilek ko am? Juõn jeran emõn enaj kar kajitõk jibõñ jen elder ro reyokwe ñõn jibõñ eo mõtõn me ear bõk ial eo ebwir. Ej aikwij beran ñõn an kõmõne men in. Ak, ejamin to an jorran jimjera eo elañe ear berber ion air yokwe Jeova.
21. Ta eo kij aolep ekkã ar kõmõne jet ien, ak etke eaurõk bwe jen drebij wõt jimjera ko ar rebin ilo congregation eo?
21 Jet ien, jenaj kõmõn bwe en ‘or ruõd’ iben ro mõtar, im ir bareinwõt renaj kõmõn ak ba men ko me renaj kaillu kij. Jemes ear je: “Jej otemjej tibñil.” (Kol. 3:13; Jem. 3:2) Bõtab, men eo ej joñe jimjera eo, ejjab kin ewi emakijkij in ar kõmõn bwir nae dron ak ej kin ewi joñõn ar jeorlok an dron bwir. Elap an aurõk bwe jen ejaak jimjera ko rekajur ilo ar jab ãliklik in konono iben dron im ilo ar mõnõnõ in jeorlok an dron bwir! Elañe jej kwalok yokwe rot in, enaj juõn “ken lukwõj ej kowãppemi.”—Kol. 3:14.
Ewi Wãwen Kwonaj Uak?
• Ewi wãwen jemaroñ ejaak jimjera ko remõn?
• Ñãt eo emaroñ menin aikwij ñõn kajemlok jimjera eo ar?
• Ta eo jej aikwij kõmõne ñõn drebij wõt jimjera ko rebin im to air ber?
[Kajitõk ko ñan katak]
[Pija eo ilo peij 18]
Ta kar berberin jimjera eo eto an ber ikõtan Rut im Neomai?
[Pija eo ilo peij 19]
Emakijkij ke am kwalok karuwainene?