Kajitõk ko jen Ro Rej Riit

Ekkar ke bwe juõn kõra jeer im jãter en kalibubu bõran ñe ej ukoti katak ko iman ñõn ro rejaroñroñ ilo kwelok ko kajjojo wik, im kwelok ko relap?

Ekkã an juõn kõra jeer im jãter kalibubu bõran ñe ej kõmõni men ko me rej erro ko an leo belen ak an juõn man jeer im jãter ilo congregation eo. Men in ej errã iben nan in kaiñi eo dri jilik Paul ear je, “jabrewõt kõra ej jar ak drikanij, im e jab libubu bõran, ej kajok bõran” kinke “bõran kõra man.” (1 Kor. 11:​3-​10) Elañe kõra eo ej kalibubu bõran ilo wãwen kein, ej kakõlen an kõtãik e ñõn lajrõk eo an congregation eo an Kristian.​—1 Tim. 2:​11, 12.

Ak, ta elañe juõn kõra jeer im jãter ej ukok ñõn ro rejaroñroñ ñe juõn jeer im jãter man ej kwalok juõn an katak? Emol, bwe kõra eo ej baj ukoti melele ko jen katak eo an dri konono eo ñõn dri roñjake ro. Melelen bwe katak eo ejjab an kõra eo ej ukok ak ej an eman eo jeer im jãter me ej kwaloke katak eo. Bõtab, ukok ñõn ro rejaroñroñ elap an oktõk jen ñe jej ukok ñõn ro rej konono bar juõn kajin. Ñe juõn ej ukok ñõn ro rej konono bar juõn kajin, dri roñjake ro remaroñ roñjake an ukok ak ilo ejja ien eo wõt remaroñ reilok ñõn eo ej kwalok katak eo. Bareinwõt, ekkã an walok bwe kõra ro jeer im jãter me rej ukok ñõn bar juõn kajin, rejjab ber ak jutõk ilo juõn jikin ak wãwen bwe armij ro ren reilok wõt ñõn ir im jab ñõn eman eo jeer im jãter ej kwalok katak eo. Jet ien, remaroñ jijõt, ak elañe rej jutõk im ukok, ren jitlok ñõn dri konono eo, ejjab dri roñjake ro, im air kõmõn eindrein rejjab aikwij kalibubu bõrair.

Bareinwõt, ilo ran kein ekkã air kajerbal video ak TV ñõn ukok ñõn ro rejaroñroñ, im jerbal eo an dri ukok eo emaroñ aurõklok. Inem, ekkã wõt an dri ukok eo walok ilo TV  eo, ak eo ej kwalok katak eo emaroñ jab walok ñõn rej aluije video kein. Kin men in, ekkar bwe kõra eo ej ukok ñõn dri jaroñroñ ro en kõtãik e ikijen an kalibubu bõran.

Ewi wãwen oktõk in ej jelet dri ukok eo ñõn ro rejaroñroñ ilo Jikuul in Kwalok Nan eo an Kristian, demonstration ko, im uak ko an dri kwelok ro ilo kwelok in Katak Baibel an Congregation eo, Kwelok in Ar Jerbal ñõn Ailiñ Eo im Katak in Imõniaroñroñ eo? Ñe kõra eo jeer im jãter ej ukok ñõn ro rejaroñroñ ilo kwelok kein, ej ke aikwij kalibubu bõran? Jet ien ejjab aikwij, kinke aolep dri kwelok ro rejela bwe ejjab e eo ej tel kwelok kein. Eindrein bareinwõt ñe ej ukoti uak ko an dri kwelok ro, katak ko an kõra ro ilo jikuul eo, ak demonstration ko. Bõtab, ñe ej ukok ñõn man ro jeer im jãter me rej kwalok katak in Imõniaroñroñ, ak eo ej tel kwelok in Katak Baibel an Congregation, ak ñe ej tel ilo ien al ko ñõn ro rejaroñroñ, ej aikwij kalibubuik bõran. Elañe juõn jeer im jãter kõra ej ukot katak ko an juõn kõra, man, ajiri im elder ro ilo juõn kwelok, emõn bwe en kalibubu bõran jen jinoin ñõn jemlokõn kwelok eo.