Kaurõk Dri Jaroñroñ ro Jeõm im Jãtõm!

ARMIJ ro an Anij ranin rej juõn baamle elap me rej jimjãn jimjãtin ilo tõmak, im jemaroñ etale liklok ñõn man im kõra ro ilo ien ko etto. Rein rej kitibuj Samuel, Devid, Samsõn, Rehab, Moses, Ebream, Sera, Noa, im Ebel. Ian dri korijer ro retiljek an Jeova, elõñ iair rejaroñroñ. Ñõn wanjoñok, armij ro ruo moktata ilo Mongolia im rar erom Dri Kennan ro an Jeova, kar ruo dri belele me rejaroñroñ. Im tokjen tiljek eo an dri tõmak ro jeer im jãter rejaroñroñ ilo Russia, jar wini juõn case ilo Jikin ekajet eo elap ilo Europe kin Jimwe im Maroñ ko an Armij.

Ilo ran kein, “dri korijer e tiljek im meletlet” ear kõmõn video ak DVD ko ñõn dri jaroñroñ ro im ear karõk bwe en or congregation ko im bareinwõt kwelok ko relap ilo kajin eo an dri jaroñroñ ro. (Mat. 24:45) Men kein elap air kar jibõñ ro jeer im jãter rejaroñroñ. * Ak kwonañin ke lemnok kin ewi wãwen an kar ro jeer im jãter katak mol eo kin Anij im kõmõn wõnmanlok ko ke ear ejelok kein jibõñ kein? Kwoj ke lemnok kin ta eo kwomaroñ kõmõne ñõn jibõñ ro rejaroñroñ me rej jokwe ilo bukwon eo am?

Mokta jen an kar Or Kein Jibõñ Kein Ranin

Ta elañe kwoj kajitõk iben jet dri rejaroñroñ ro reridto kin wãwen eo rar jino jela kajen Anij? Remaroñ jiroñ yuk kin iñjake eo air ke rar jino katak bwe eor etan Anij im kin ewi wãwen men in ear ukot mour eo air. Im remaroñ bareinwõt bwebwenato kin wãwen eo men in ear kakajur ir iomin aolep yiõ ko ke ear ejelok video ak DVD ko ñõn jibõñ ir kamulõllok melele eo air kin mol eo ilo Baibel. Remaroñ kwalok kin iñjake ko air ke ear ejelok kwelok ko ak juõn eo ej ukot katak ko ilo kajin eo an dri jaroñroñ ro. Jen air kõmõne men in, juõn emaroñ kar jijõt ituriir im je melele ko remõn ilo juõn peba ñõn jibõñ ir melele kin katak eo. Juõn jeer im jãter man ejaroñroñ ear katak mol eo ilo Baibel eo ilo wãwen in iomin jiljilimjuõn yiõ ko mokta jen an kar or juõn eo me ear maroñ ukot katak ko ñõn kajin eo an.

Ridto ro me rejaroñroñ im rej uan Dri Kennan ro an Jeova, rej kememej kin wãwen kar iñjake eo air ke rar kwalok nan ñõn armij ro me remaroñ “roñjake.” Ke rej kwalok nan jen im ñõn im, rej jibwe juõn peba jidrikdrik me kar je ennan eo air ie im ilo pã eo juõn rej jibwe Imõniaroñroñ im Ruj! (Awake!) ko rekãl. Ear lukkun bin ñõn katak Baibel iben bar juõn dri jaroñroñ kin buk ko me irro jimor rejjab lukkun melele kaki. Dri kwalok ro reridto im rejaroñroñ remaroñ kememej ien ko rar buromõj im ilo ejja ien eo wõt illu jidrik ke armij rar jab melele kin ta eo rej ba, im kin men in, rar jab maroñ lukkun konono kin mol eo ilo Baibel eo. Bareinwõt, rejela kin wãwen iñjake eo ñe juõn armij ej lukkun yokwe Jeova bõtab rejjab maroñ kwaloke ilo beran, kinke rar jab lukkun jela elañe melele eo air kin juõn katak ejime.

Meñe rar iion aolep abañ kein, rein jeer im jãter rejaroñroñ rar drebij wõt air tiljek. (Job 2:3) Rar kõtar wõt Jeova. (Sam 37:7) Im kiõ Jeova ej kejerammõn ir ilo joñõn eo me elõñ iair rar jab kõtõmene kake.

Lemnok mõk kin kate eo an juõn jeer im jãter man ejaroñroñ me ej juõn dri belele im juõn jemen. Mokta jen an kar or video ko ilo kajin eo an dri jaroñroñ ro, ear tiljek wõt in tel baamle eo an ñõn katak Baibel. Leo nejin ej  kememej im ba: “Aolep ien ear bin ñõn an jema katak iben baamle eo, kinke men eo wõt ear maroñ kajerbale ñõn katakin kim kake kar buk ko me ekkã an jab lukkun melele kaki. Bareinwõt, kim ajiri ro kimar jab lukkun jibõñ e kinke ear mõkõj am kajimeik e ke ear jab jime an kemelele kin men ko. Meñe eindrein, aolep ien ear katak Baibel iben baamle eo. Ear kile bwe eaurõklok ñõn am katak kin Jeova jen an jok jen ien ñõn ien kin an jab lukkun melele kajin Belle.”

Bar juõn joñok emõn ej kin juõn brother ejaroñroñ im bilo, etan Richard, me ej jokwe ilo Brooklyn, New York, ilo Amerika im 70 jima an yiõ. Aolep ro ilo congregation eo rejela kajen Richard kin an keini an ber ilo kwelok ko an Kristian. Ñõn an ber ilo kwelok eo, ej uwe ilo train eo im bwine jete alen an bwijrõk ñõn an maroñ jela ñãt eo ej aikwij to. Ilo juõn ien bio, kin an kar lukkun lap an sno, rar kajelaik aolep ro uan congregation eo bwe ejelok kwelok, bõtab rar likjõp in kajelaik Richard. Ke brother ro rar kile ta eo ear walok, rar itoitak im bukote Richard im rar loe ke ej jutõk inabijin Kingdom Hall eo im ej kõtar ñõn an bellok kejem ko. Ke rar kajitõk iben etke ear drioij ke elap an sno, ear uak im ba, “Ij yokwe Jeova.”

Ta eo Kwomaroñ Kõmõne?

Eor ke dri jaroñroñ ro rej jokwe ilo bukwon eo am? Kwomaroñ ke katak jidrik kin kajin eo air bwe kwon maroñ konono ibeir? Ekkã an armij ro rejaroñroñ lukkun kwalok joij im meanwõr ñe rej katakin ro jet kin kajin eo air. Kwomaroñ iion juõn eo ejaroñroñ ñe kwoj kwalok nan jen im ñõn im ak ilo ien ko jet. Ta eo kwomaroñ kõmõne? Kwon kajeoñ in bwebwenato ibeir ilo am kajerbal peõm, jeje, jiña pija ko, ak kajerbal aolepen men kein. Meñe eo ejaroñroñ emaroñ ba bwe ejjab itoklimo kin mol eo, kwon kajelaik juõn jeer im jãter me ejaroñroñ ak juõn eo ejela kajin eo air im kwalok ñõn e kin lolok eo am iben armij eo ejaroñroñ. Ennan eo emaroñ laplok an kaitoklimoen juõn eo ejaroñroñ ñe rej kwaloke ilo kajin eo an.

Bwelen kwoj katak kajin eo an dri jaroñroñ ro im kwoj kobalok iben congregation eo air. Ewi wãwen kwomaroñ kalaplok am kabel ilo am kajerbal peõm ñõn konono im melele kajin eo air? Meñe emaroñ or ro ilo congregation eo me remaroñ roñjake, emõnlok bwe kwon kajeoñ konono ibeir kin peõm, kinke men in enaj jibõñ yuk ñõn lemnok einwõt dri jaroñroñ ro. Jet ien, kwomaroñ kõnan kajerbal ainikiõm ñõn am konono iben ro remaroñ roñjake kinke men in emaroñ laplok an biruru ñõn kwe. Bõtab, einwõt ñe kwoj katak kajin ko jet, ñõn am maroñ lukkun jela kajin eo, kwoj aikwij kijenmij wõt im kate yuk meñe ebin.

Ilo ar kate kij ñõn kajerbal kajin eo an ro rejaroñroñ, jej kwalok ar yokwe im koutiej dri jaroñroñ ro jeer im jãter. Lemnok kin joñõn an dri jaroñroñ ro inebata im buromõj aolep ran kin air jab maroñ melele armij ro ilo jikin jerbal im ilo jikin jikuul. Juõn brother ejaroñroñ ear ba: “Aolep ran, armij ro ibelakõ rej konono.  Elõñ alen iñjake ko kin aõ mõke iaõ im an ro jet kejekron iõ rej walok iloa, im men in ej kõmõn aõ ebwer im illu. Jet ien, ejelok nan ko me remaroñ lukkun kemelele kin wãwen aõ iñjake.” Eñin unin ien kwelok ko ar rej aikwij ien ko rekaemololo ñõn dri jaroñroñ ro jeer im jãter, ijo rej bõk katak ko jen Baibel eo im mõnõnõ kin kõmao ko me rej kõkãtõk aolep.​—Jon 13:34, 35.

Ñõn jab kejekron ak meloklok kumi in dri jaroñroñ ro reiet me rej koba iben congregation ko rejjab jaroñroñ, rej karõk bwe ren ukoti katak ko ñõn kajin eo air ilo ien kwelok ko. Im bwe ren maroñ lukkun melele katak ko im jela ta eo ej walok, rej jijõt ilo jea ko imantata. Kinke ilo wãwen in remaroñ lo dri ukok eo im dri konono eo ej kwalok katak eo. Ekkã an ro jet ilo congregation eo mõkõj air iminene kin air lo men in im jab kõtlok bwe en kamad ir. Karõk kein rej bareinwõt kõmõni ilo kwelok ko relap me eor dri ukok ñõn dri jaroñroñ ro. Ro elap air kate ir ilo congregation eo rej tellokin bõk nan in nebar eo emãnãn kin air kajeoñ in ukote katak ko ilo wãwen eo me juõn eo ejaroñroñ emaroñ kar kwaloke.

Bwelen kwoj ber ilo juõn congregation me ej jibõñ juõn kumi in dri jaroñroñ ro ak eor jet wõt dri jaroñroñ ro ie me rej ukot katak ko ñõn ir. Ta eo kwomaroñ kõmõne ñõn kalikar am itoklimo kin dri jaroñroñ rein jeer im jãter? Bwelen kwomaroñ kir ir ñõn mweo imõm. Ak elañe eor am maroñ, kajeoñ in katak jet wãwen ko ñõn konono kin peõm. Kwon jab kõtlok bwe kwon ebwer kin an bin am bwebwenato ibeir. Kwonaj lo juõn wãwen ñõn konono ibeir, im ilo am kwalok yokwe rõt in enaj or ien ko rekalõñliñ me kwonaj kememeji tokelik. (1 Jon 4:8) Elõñ men ko me jemaroñ katak jen ro jeer im jãter rejaroñroñ. Relukkun jela kilen bwebwenato, relolokjen, im rejela kilen kõmõn kejak. Juõn brother me jinen im jemen rejaroñroñ ear ba: “Ilo aolepen mour eo aõ iar ber ibwiljin ro rejaroñroñ, im elõñ men ko iar katak jen ir.”

Jeova ej yokwe dri korijer ro an retiljek, ekoba ro me rejaroñroñ. Joñok eo air kin tõmak im kijenmij ej mõtõn men ko me rej kõmõn bwe rolul eo an Jeova en juõn rolul ejejuan. Kin men in jen kaurõk ro jeer im jãter me rejaroñroñ!

[Kamelele eo itulal]

[Pija eo ilo peij 31]

Ennan eo an Ailiñ eo emaroñ laplok an kaitoklimoen juõn eo ejaroñroñ ñe rej kwaloke ilo kajin eo an

[Pija ko ilo peij 32]

Ien kwelok ko ar rej aikwij ien ko rekaemololo ñõn dri jaroñroñ ro jeer im jãter, ijo rej bõk katak ko rekõkãtõk