Kaurõk Ijo Kwonam ilo Congregation Eo
Kaurõk Ijo Kwonam ilo Congregation Eo
“Anij e ar likit ra ko, ir otemjelok ilo enbwin, einwõt E buñburuen kake.”—1 KOR. 12:18.
1, 2. (a) Ta eo ej kwalok bwe emaroñ or kwonan aolep ro ilo congregation eo me remaroñ kaurõke? (b) Ta kajitõk ko jenaj etali ilo katak in?
JEN ien ko etto an dri Israel ro, Jeova ear kajerbal congregation eo ñõn lelok ekan ko ilo jitõb im nan in tel ko ñõn armij ro an. Ñõn wanjoñok, elikin an kar dri Israel ro anjo ion jikin kwelok eo ilo Eai, Joshua ear “konono nan otemjej ilo kien eo, nan in kejerammõn im nan in kalia, ekar ñõn men otemjej emwij jeje ilo buk in kien . . . iman aolepen jar an Israel, im kõra ro, im ajiri ro, im ro drua maijet rar etallok ibeir.”—Josh. 8:34, 35.
2 Ilo ien ko an dri Kristian ro mokta, dri jilik Paul ear jiroñ Timote, juõn Kristian elder, bwe Kristian congregation eo ej “imõn Anij” im juõn “jurõn im loñtak in mol.” (1 Tim. 3:15) Mweo “imõn” Anij ranin ej rolul in Kristian ro remol ibelakin lõl. Ilo japter 12 in letter eo moktata an Paul ñõn dri Korint ro me Anij ear kakõrmole, ej keiri congregation eo ñõn enbwinin juõn armij. Ej ba bwe aolep ra ko raurõk meñe ekajjo jerbal ko air jen dron. Paul ej jeje im ba: “Anij e ar likit ra ko, ir otemjelok ilo enbwin, einwõt E buñburuen kake.” Ej bareinwõt kalikar bwe “ra’n enbwin, ko jej lemnok eriklok air aibujuij, jej koorlok air aibujuij.” (1 Kor. 12:18, 23) Kin men in, jerbal eo an juõn eo ewãnik ilo rolul eo an Anij ejjab emõnlok ak nanalok jen bar juõn dri Kristian etiljek. Men eo wõt ej bwe jerbal ko air rekajjo jen dron. Inem, ewi wãwen jemaroñ jela kin ijo kwonad ilo karõk eo an Anij im kaurõke? Ta men ko remaroñ jelet jerbal eo ar ilo congregation eo? Im ewi wãwen jemaroñ kõmõn bwe ‘ar wõnmanlok en alikar ñõn ro otemjej’?—1 Tim. 4:15.
Ewi Wãwen Jemaroñ Kaurõk Ijo Kwonad?
3. Ta juõn wãwen jemaroñ jela kin ijo kwonad ilo congregation eo im kalikar bwe jej kaurõke?
3 Juõn wãwen jemaroñ jela kin ijo kwonad ilo congregation eo im kalikar bwe jej kaurõke ej ilo ar jerbal ilo burukuk iben “dri korijer e tiljek im meletlet” im Kumi eo ej tel rolul in, ak Governing Body eo. (Riit Matu 24:45-47.) Jej aikwij etale ewi joñõn ar bokake nan in tel ko jej bõki jen kumi in dri korijer eo. Ñõn wanjoñok, iomin elõñ yiõ ko, jar bõk nan in tel ko ralikar ikijen wãwen ballir im baotokir, menin kamõnõnõ ko, im ar kajerbal Internet elã jen joñõn im lali men ko rejakkar. Jej ke tiljek in bokake nan in kakabilek in bwe jen maroñ kejbãrok kõtan eo ar iben Anij? Ak ta kin nan in rejañ eo ñõn kõmõn bwe en keini ar katak Baibel einwõt juõn baamle? Jej ke bokake nan in rejañ in im kajenolok juõn jota bwe jen maroñ kõmõne men in? Elañe jejañin mare, jej ke kõmõn ien ñõn ar katak Baibel iber mõke? Jeova enaj kejerammõn kij kajjojo im aolep baamle ko elañe jej lor nan in tel eo an kumi in dri korijer eo.
4. Ñe jej kõmõn jokãlet ko kin men ko ej ar mõke bebe, ta eo jej aikwij lemnok kake?
4 Jet remaroñ lemnok bwe ej bebe eo an dri Kristian eo mõke ñõn kãlet kin wãwen ballin, baotokin, im kain menin kamõnõnõ rot ko ekõnan kõmõni. Ak, ñõn juõn dri Kristian me emwij an wujleplok mour eo an im ej kaurõk jerbal eo an ilo congregation eo, ej aikwij kõmõn bwe bebe ko an ren jab berber wõt ion kõnan ko an mõke. Men eo eaurõktata ej bwe en bõk lemnok eo an Jeova me Nan eo An, Baibel eo, ej kwalok kake. Ennan eo ie ej aikwij einwõt ‘lamp ñõn neer, im maram ñõn ar ial.’ (Sam 119:105) Bareinwõt, ej juõn menin meletlet ñõn lemnok kin ewi wãwen bebe ko ar remaroñ jelet ar jerbal in kwalok nan, ro jeer im jãter ilo congregation eo, im ro ilikin congregation eo.—Riit 2 Dri Korint 6:3, 4.
5. Etke jej aikwij kejbãrok bwe jen jab kwalok jitõbõn anemkwoj?
5 Joñõn an jededlok “jitõb eo ej jerbal ilo ro dri kiblia,” ej einwõt kõto eo jej menonoiki. (Ep. 2:2) Jitõb in emaroñ kõmõn ar lemnok bwe jejjab aikwij bõk nan in tel jen rolul eo an Jeova. Emol, jejjab kõnan bwe jen einwõt Diotrepis, eo ear ‘makoko in roñjake men eo dri jilik Jon ear ba.’ (3 Jon 9, 10, UBS) Jej aikwij kejbãrok bwe jen jab kadrek jitõbõn anemkwoj. Jen jab ba ak kõmõn jabrewõt men me ej kwalok ar jab koutiej wãwen eo Jeova ej kajerbale ranin ñõn an konono ñõn kij. (Bwin. 16:1-3) Jen men in, jej aikwij kaurõk jerammõn eo eor iber ñõn jerbal iben kumi in dri korijer eo. Im jej aikwij kate kij ñõn bokake im kõtãik kij ñõn ro rej tel congregation eo.—Riit Dri Hibru 13:7, 17.
6. Etke jej aikwij etali wãwen ko iber?
6 Bar juõn wãwen jej kwalok bwe jej kaurõk ijo kwonad ilo congregation eo ej ikijen ar lukkun etali wãwen ko iber im kõmõn joñõn wõt ar maroñ ñõn ‘kaibujuij jerbal eo ar’ im bõktok koutiej ñõn Jeova. (Rom. 11:13) Jet remaroñ bõk kwonair ilo jerbal in regular pioneer, im ro jet rej bõk jerbal in mejinede, overseer ro rej itoitak, im ro rej jerbal ilo ra ko ibelakin lõl. Elõñ ro jeer im jãter rej jibõñ kin jerbal in kalek Imõn Kwelok ko. Im enañin aolep armij ro an Jeova rej kate ir joñõn wõt air maroñ ñõn jibõñ baamle ko air ñõn wõnmanlok im korijer ñõn Jeova im rej bõk kwonair kajjojo wik ilo jerbal in kwalok nan. (Riit Dri Kolosse 3:23, 24.) Jemaroñ liki bwe ilo ar mõnõnõ in lelok kij mõke ilo jerbal eo an Anij im kate kij joñõn wõt ar maroñ ñõn korijer ñõn e kin aolepen buruer, ien otemjej enaj or kwonad ilo karõk eo an.
Men ko me Rej Jelet Jerbal eo Ar ilo Congregation Eo
7. Ikijen wãwen ko iber, kemelele kin ewi wãwen remaroñ jelet jerbal eo ar ilo congregation eo.
7 Elukkun aurõk bwe jen etali wãwen ko iber kinke jet ien remaroñ jelet men eo jemaroñ kõmõne ilo congregation eo. Ñõn wanjoñok, jerbal eo me juõn brother ej bõk ilo congregation eo emaroñ oktõk ilo jet wãwen ko jen jerbal eo an juõn sister. Joñõn ridtar, ejmour eo ar, im men ko jet rej bareinwõt jelet men eo jemaroñ kõmõne ilo jerbal eo an Jeova. Jabõn Kennan Ko 20:29 ej ba, “Aibujuij an likao ro, kajur eo air; im men in kalitlit lõlap ro, bõrair re uõn.” Jodrikdrik ro remaroñ kõmõni jerbal ko ilo congregation eo einwõt karreo, kwotak men ko reddo, im men ko eierlok wõt kinke eor air kajur im maroñ ñõn kõmõni, ijo turãjet, congregation eo ej bõk elap tokjen jen ridto ro kin meletlet im iminene ko air. Jej aikwij bareinwõt kememej bwe jabrewõt jerbal eo jemaroñ bõk kwonad ie ilo rolul eo an Jeova ej wawa ion joij eo an Anij.—Jerb. 14:26; Rom. 12:6-8.
8. Ewi joñõn an kõnan eo ar jelet men eo jej kõmõne ilo congregation eo?
8 Bar juõn men me emaroñ jelet jerbal eo ar ilo congregation eo ej alikar ilo wanjoñok eo kin ruo jiroñ me rej jimjãn jimjãtin. Irro jimor rar kadrioijlok jen high school im wãwen ko ibeirro rej einlok wõt juõn. Jineir im jemeir rar kate ir joñõn wõt air maroñ ñõn rejañ irro bwe ren bõk jerbal in regular pioneer elikin wõt airro kadrioijlok. Elikin airro kar kadrioijlok, juõn iairro ear dreloñ ilo jerbal in pioneer, ak eo juõn ear jino jerbal full-time ilo juõn jikin jerbal. Ta kar oktõk eo? Kar kõnan eo airro. Ilo jemlokõn, irro kar kõmõne men eo me rar kõnan. Ejjab ke eindrein iben kij aolep? Jej aikwij lukkun lemnok kin ta eo jekõnan kõmõne ilo jerbal eo an Anij. Jemaroñ ke kalaplok ijo kwonad, meñe ej melelen bwe jej aikwij kõmõn oktõk ko ilo wãwen ko iber?—2 Kor. 9:7.
9, 10. Ta eo jej aikwij kõmõne elañe ejelok ar kõnan ñõn kalaplok ijo kwonad ilo jerbal eo an Jeova?
9 Ta elañe ejelok ar kõnan ñõn kalaplok ijo kwonad ilo jerbal eo an Jeova im jej kõmõni wõt men ko jej aikwij kõmõni ilo congregation eo? Ilo letter eo an Paul ñõn dri Pilippai ro, ej ba: “Anij ej jerbal ien otemjej ilo kom bwe komin mõnõnõ im maroñ in bokake ankilan ñõn kom.” Aet, Jeova emaroñ jerbal ilo kij im kamakõt kij ñõn kajime kõnan ko ar.—Pil. 2:13, UBS; 4:13.
10 Inem etke jejjab kajitõk iben Jeova ñõn kamakõt kij bwe jen kõnan kõmõnmõn ankilan? Kiñ Devid ilo Israel eo etto ear kõmõn eindrein. Ear jar: “Kwon kwalok ñõn iõ ial ko Am, O Jeova, kwon katakin iõ kin ial ko Am. Kwon tel iõ ilo Am mol, im katakin iõ; bwe Kwe Anij ej lomor iõ. Ij kõtar Yuk iomin aolepen ran.” (Sam 25:4, 5) Jemaroñ kõmõn eindrein ilo ar jar bwe Jeova en kamakõt kij ñõn ejaak juõn kõnan ñõn kõmõni men ko rej kabuñburuen. Ñe jej kalomõnlokjen kin iñjake eo an Jeova Anij im Nejin kin joñõn eo jej kõmõne ilo ar korijer ñõn ir, buruer enaj obrõk kin kamolol. (Mat. 26:6-10; Luk 21:1-4) Iñjake in enaj kamakõt kij ñõn akwelap ñõn Jeova bwe en kadrek ilo buruer juõn kõnan ñõn kalaplok ijo kwonad ilo jerbal eo an. Dri kanan Aiseia ear likit juõn joñok emõn kin kain lemnok rot eo jej aikwij kadreke. Ke ear roñ an Jeova kajitõk: “Wõn eo In jilkinlok e, im wõn eo e kõnan ilok kin Kim?” dri kanan eo ear uak im ba: “Ña e; Kwon jilkinlok iõ.”—Ais. 6:8.
Ewi Wãwen Jemaroñ Kõmõn Wõnmanlok Ko?
11. (a) Etke eor juõn aikwij elap bwe brother ro ren jibarek erro ko ilo rolul eo? (b) Ewi wãwen juõn brother emaroñ jibarek jerammõn ko ilo congregation eo?
11 Ilo yiõ eo 2008, ear or 289,678 armij ro me rar baptais ibelakin lõl, men in ej kalikar bwe eor juõn aikwij elap kin brother ro me remaroñ tel. Ewi wãwen juõn brother en emakõt ñõn aikwij in? Ilo tukaru, ej ilo an kate e bwe en tõbar aolep menin aikwij ko me Baibel ej kalikar bwe ministerial servant ro im elder ro rej aikwij kajejiti. (1 Tim. 3:1-10, 12, 13; Tait. 1:5-9) Ewi wãwen juõn brother emaroñ kate e ñõn kajejit aolep aikwij ko ilo Jeje ko? Ej ilo an keini an bõk kwonan ilo kwalok nan, kajejit aolep erro ko an ilo congregation eo, kakõmõnmõnlok wãwen an uak ilo ien kwelok ko an Kristian, im kwalok an itoklimo kin ro jein im jãtin. Ilo an kõmõni aolep men kein ej kalikar bwe ej kaurõk ijo kwonan ilo congregation eo.
12. Ewi wãwen ro emõn dred remaroñ kwalok air kijejeto kin mol eo?
12 Ta eo brother ro me emõn dred, elaptata jodrikdrik ro, remaroñ kõmõne ñõn kõmõn wõnmanlok ko ilo congregation eo? Remaroñ kate ir bwe ren edreklok ilo “meletlet otemjej im lolãtãt jen Jitõb” ilo air bõk jelalokjen eo jen Baibel eo. (Kol. 1:9) Elañe rej niknik ilo air katak Nan eo an Anij im rej bõk kwonair joñõn wõt air maroñ ilo kwelok ko, men in emol an naj jibõñ ir kõtõbar mejenkajik in ñõn kõmõn wõnmanlok ko ilo congregation eo. Remaroñ bareinwõt kate ir ñõn kajejit aikwij ko bwe ren dreloñ ilo ‘aur eo elap’ me ej tellok ñõn elõñ kain jerbal in full-time ko ilo rolul eo. (1 Kor. 16:9) Ilo air kõmõn bwe jerbal ñõn Jeova en jerbal eo air elaptata, men in enaj tellok ñõn juõn wãwen mour emol an kajuburu im bõktok jerammõn ko relap.—Riit Ekklisiastis 12:1.
13, 14. Ilo wãwen it ko sister ro remaroñ kwalok bwe rej kaurõk ijo kwonair ilo congregation eo?
13 Sister ro remaroñ bareinwõt kwalok bwe rej kaurõk jerammõn eo eor ibeir ñõn bõk kwonair ñõn kajejit nan ko ilo Sam 68:11. Ej ba: “Iroij ej letok nan eo; kõra ro rej kwalok e, juõn jar elap.” Juõn ian wãwen ko remõntata me sister ro remaroñ kwalok air kamolol kin ijo kwonair ilo congregation eo ej ilo air bõk kwonair ilo jerbal in kõmõn dri kalor ro. (Matu 28:19, 20) Kin men in, ilo an sister ro bõk kwonair joñõn wõt air maroñ ilo jerbal in kwalok nan im mõnõnõ in karmijete ir mõke kin jerbal in, rej kamol bwe rej kaurõk ijo kwonair ilo congregation eo.
14 Ke Paul ear jeje ñõn Taitõs, ear ba: “Bwe ro lilap bareinwõt ren ekar ñõn kwojarjar ilo air kõmõn, . . . ren dri katakin kin men ko remõn; Bwe ren maroñ in katakin kõra re jañin lilap kin air yokwe ro beleir im ro nejiir, im bwe en emõn mwiliir, bwe ren erreo, im dri jerbal ilo jikiir, im joij, im etã jen ro beleir, bwe armij ren jab blaspim nan in Anij.” (Tait. 2:3-5) Sister ro rekajur ilo tõmak remaroñ juõn kilan emõn ilo congregation eo! Ilo air koutiej brother ro rej tel im air kõmõn bebe ko remeletlet ikijen balliir, baotokiir, im men in kamõnõnõ ko, rej likit juõn joñok emõn ñõn ro jet im rej kwalok air kaurõk ijo kwonair ilo congregation eo.
15. Ta eo juõn sister me ejañin mare emaroñ kõmõne ñõn kijenmij kin buromõj eo ej iñjake kin an mõke ian?
15 Jet ien, emaroñ bin ñõn an juõn sister me ejañin mare jela kin ijo kwonan ilo congregation eo. Juõn sister me ear iione men in, ear ba: “Ñe ejelok rejetõm, jen ien ñõn ien, emaroñ kõmõn bwe kwon lukkun buromõj.” Ke kar kajitõk iben kin ewi wãwen ej kijenmij kin abañ in, ear ba: “Ilo aõ jar im katak, men kein rej jibõñ iõ ñõn bar jela ijo kwonaõ. Ij katak kin ewi wãwen Jeova ej watõk iõ. Inem ij kate iõ ñõn jibõñ ro jet ilo congregation eo joñõn wõt aõ maroñ. Men in ej jibõñ iõ ñõn lemnok kin ro jet im jab kin ña mõke.” Ekkar ñõn Sam 32:8, Jeova ear jiroñ Devid: “I naj bebeik yuk ke meja ej lo yuk.” Aet, Jeova ej itoklimo kin aolep dri korijer ro an, ekoba sister ro me rej lejenono wõt, melelen rejañin mare, im enaj jibõñ aolep ñõn jela ijo kwonair ilo congregation eo.
Kejbãrok Ijo Kwonam!
16, 17. (a) Etke ej bebe eo emõntata ñõn bõk nan in kir eo an Jeova ñõn erom mõtõn rolul eo an? (b) Ewi wãwen jemaroñ kejbãrok ijo kwonad ilo rolul eo an Jeova?
16 Ilo yokwe, Jeova ear ibertok kajjojo ian dri korijer ro an ñõn ejaak juõn jimjera iben. Jisõs ear ba: “Ejelok armij ej maroñ itok ñõn iba elañe Jema eo E ar jilkintok Iõ E jab ibertok e.” (Jon 6:44) Jen ian elõñ billion armij ro ion lõl, Jeova ear kir kij bwe jen mõtõn rolul eo an ranin. Bebe eo ñõn bõk nan in kir in kar jokãlet eo emõntata jar kõmõne. Men in ear kõmõn bwe en or melelen mour eo ar. Im jej lo elap lõñliñ im mõnõnõ kinke eor ijo kwonad ilo congregation eo!
17 Dri jeje sam ear al im ba: “O Jeova, ij yokwe mweo imõm, . . . Neiõ ej jutõk ilo jikin jeban wõt juõn; ilo jar ko I naj nebar Jeova.” (Sam 26:8, 12) Anij eo emol ear kõmõn bwe en or ijo kwonad kajjojo ilo rolul eo an. Ilo ar wõnmanlok im lor nan in tel ko jen rolul eo im boub wõt ilo jerbal eo an Anij, jenaj maroñ kejbãrok ijo kwonad ilo congregation eo.
Kwoj Kememej Ke?
• Etke jemaroñ ba bwe aolep Kristian ro eor ijo kwonair ilo congregation eo?
• Ewi wãwen jej kalikar bwe jej kaurõk ijo kwonad ilo rolul eo an Anij?
• Ta men ko remaroñ jelet ijo kwonad ilo congregation eo?
• Ewi wãwen Kristian jodrikdrik im ridto ro remaroñ kwalok bwe rej kaurõk ijo kwonair ilo congregation eo?
[Kajitõk ko ñan katak]
[Pija ko ilo peij 16]
Ewi wãwen brother ro remaroñ jibarek jerammõn ko ilo congregation eo?
[Pija eo ilo peij 17]
Ewi wãwen sister ro remaroñ kwalok bwe rej kaurõk ijo kwonair ilo congregation eo?