Kõmõn bwe Am Wõnmanlok En Alikar

“Kwon owõn ilo men kein, im mõke lelok yuk ñõn ir, bwe am wõnmanlok en alikar ñõn ro otemjej.”​—1 TIM. 4:​15.

1, 2. Ta eo jejela kin mour eo an Timote ke ear juõn jodrikdrik, im kin oktõk eo ear walok ke ear 20 jima an yiõ?

 TIMOTE ear ridtolok ilo Galetia (me ej ber ilo ailiñ in Turkey ilo ran kein), im ear ber iomin kajur eo an ailiñ in Rom. Iomin elõñ yiõ ko elikin mij eo an Jisõs, ear jino jutõk jet congregation ko an Kristian ilo jikin in. Ilo juõn ien iomin yiõ kein, jodrikdrik eo Timote, jinen im jibwin rar erom dri Kristian ro rekijejeto ilo juõn ian congregation kein. (2 Tim. 1:5; 3:​14, 15) Ealikar bwe Timote ear mõnõnõ kin mour eo an einwõt juõn Kristian jodrikdrik iomin wãwen ko ear iminene kaki. Bõtab, ilo idriñ, men ko rar jino oktõk.

² Oktõk ko rar jino walok ilo ien lotok eo kein karuo an dri jilik Paul ñõn jikin eo. Ilo ien eo, Timote emaroñ kar 20 jima an yiõ. Ilo lolok eo an Paul, bwelen ñõn Listra, ear kile bwe ilo congregation ko ijo, ro ‘jimjãn jimjãten . . . rar nebar’ Timote. (Jerb. 16:2) Meñe Timote ear juõn jodrikdrik, emaroñ kar kwalok an lukkun ridto ilo jitõb. Kin men in, iomin tel eo an jitõb kwojarjar eo, Paul im kumi in elder ro rar likit peir ion Timote ñõn kajenolok e kin juõn jerbal ejejuan ilo congregation eo.​—1 Tim. 4:​14; 2 Tim. 1:6.

3. Ta jerammõn eo ejejuan Timote ear bõke?

³ Timote ear bõk juõn nan in kir ejejuan ñõn kobalok iben dri jilik Paul ilo jerbal in itoitak eo an! (Jerb. 16:3) Lemnok kin joñõn an kar Timote lukkun bwilõñ im mõnõnõ! Iomin elõñ yiõ ko, Timote ear itoitak iben Paul im jet ien iben ro jet, im ear kajejit aolep jerbal ko me dri jilik ro im elder ro rar lilok ñõn e. Paul im Timote rar bõk kwonair ilo jerbal in itoitak eo me ear lap an kõkãtõk dri Kristian ro jeir im jãtir. (Riit Jerbal 16:​4, 5.) Kin men in, elõñ dri Kristian ro rar jela kajen Timote kin wõnmanlok ko an ilo jitõb. Elikin an kar dri jilik Paul jerbal iben Timote iomin joñoul yiõ ko, ear jeje ñõn dri Pilippai ro: “Ejelok armij iba ein buruen wõt [Timote], eo e naj kanuij lemnok kin men ko ami ilo mol. . . . A kom jela karkarin, bwe einwõt ajiri iben jemen, ein drein e ar jerbal iba ilo driõklok gospel.”​—Pil. 2:​20-​22.

4. (a) Ta erro eo elap kar lelok ñõn Timote? (b) Ta kajitõk ko jemaroñ kajitõk kaki kin nan ko an Paul ilo 1 Timote 4:​15?

⁴ Ilo ien eo ke Paul ear jeje ñõn dri Pilippai ro, ear lelok ñõn Timote juõn erro elap ñõn jitõñ jet brother ro ñõn air jerbal einwõt elder im ministerial servant. (1 Tim. 3:1; 5:​22) Alikar, Timote ear erom juõn Kristian overseer eo me rar liki. Ak, ilo ejja letter eo wõt, Paul ear rejañ Timote ñõn kõmõn bwe ‘an wõnmanlok en alikar ñõn ro otemjej.’ (1 Tim. 4:​15) Bõtab, ejjab rerelok ke an Timote kalikar ñõn aolep bwe ear kõmõn wõnmanlok ko ilo  juõn joñõn elap? Inem, ta melelen nan kein an Paul, im ewi wãwen jemaroñ bõk tokjen jen nan in kakabilek in an?

Karkar ko Karkarin Kristian Ren Alikar Iber

5, 6. Ewi wãwen erreo eo an congregation eo ilo Epesõs ear ber ilo kauwatata, im ewi wãwen an kar Timote maroñ kejbãrok congregation eo?

⁵ Jen etale eon ko ibelakin eon in ilo 1 Timote 4:​15. (Riit 1 Timote 4:11-​16.) Mokta jen an kar jei nan kein, Paul ear etal ñõn Masedonia ak ear kajitõk iben Timote ñõn an berwõt ilo Epesõs. Etke? Kinke ilo jikin kwelok in ear or jet ro me rar kõmõn jibil ilo congregation eo ilo air kwalok katak ko rewan. Timote ear aikwij kejbãrok erreo eo an congregation eo. Ewi wãwen ear maroñ kõtõbrake men in? Ilo juõn wãwen, kar ikijen an likit juõn joñok emõn bwe ro jet ren anõke.

⁶ Paul ear jeje ñõn Timote: “Kwon juõn joñok ñõn ro rej tõmak, ilo nan, ilo kõmõnmõn, ilo yokwe, ilo tõmak, im ilo kwojarjar.” Im ear wõnmanlok im ba: “Kwon owõn ilo men kein, im mõke lelok yuk ñõn ir, bwe am wõnmanlok en alikar ñõn ro otemjej.” (1 Tim. 4:​12, 15) Wõnmanlok in an Timote ear ikijen an kwalok karkar ko karkarin Kristian im jab kin an bõk juõn jerbal eutiej. Eñin ej kain wõnmanlok eo me aolep dri Kristian ro ren kar kõnan kwaloke.

7. Ta eo aolep ro ilo congregation eo rej aikwij kõmõne?

⁷ Ranin elõñ kain jerbal ko ilo congregation eo einwõt kar eindrein ilo ran ko an Timote. Jet rej bõk jerbal in elder ak ministerial servant. Im ro jet rej lõñliñ in bõk kwonair ilo jerbal in regular pioneer, jerbal in itoitak, jerbal ilo Bethel, im mejinede. Elder ro rej bõk kwonair ilo elõñ kain brokraam in katakin ko, einwõt ilo ien kwelok ko relap. Bõtab, aolep dri Kristian ro, me ej kitibuj man ro, kõra ro, im ajiri ro, eor air maroñ ñõn kõmõn bwe air wõnmanlok en alikar. (Mat. 5:​16) Ilo mol, einwõt kar iben Timote, dri Kristian ro ranin me rej bõk jerbal ko relap rej aikwij bareinwõt kalikar ñõn armij ro otemjej bwe rej kwalok karkar ko karkarin Kristian.

Kwon Juõn Joñok Emõn ilo Wãwen Am Konono

8. Ikijen wãwen ar konono, ewi wãwen ej jelet wãwen ar kabuñ?

⁸ Juõn ian wãwen ko me Timote ear juõn joñok emõn kar ikijen wãwen an konono. Ewi wãwen jemaroñ kõmõn bwe ar wõnmanlok ilo wãwen in en alikar? Wãwen ar konono ej kalikar kin kain armij rõt kij. Men in ej alikar ilo nan ko an Jisõs ke ear ba: “Bwe loñi ej konono kin men ko buru eobrak kake.” (Mat. 12:34, UBS) Jemes, leo jãtin Jisõs, ear bareinwõt kile bwe wãwen ar konono ej jelet wãwen ar kabuñ. Ear je: “Elañe jabrewõt armij ej lemnok eor men in kabuñ iben, ke e jab drebdribije loin a ej mõke etaoik buruen, ejelok tokjen men in kabuñ eo iben.”​—Jem. 1:​26.

9. Ilo wãwen it ko jej aikwij kõmõn bwe wãwen ar konono en juõn joñok emõn ñõn ro jet?

⁹ Wãwen ar konono emaroñ kwalok ñõn ro jet ilo congregation eo kin ewi joñõn ar kõmõn wõnmanlok ko ilo jitõb. Kin men in, ijellokin an dri Kristian ro reridto ilo jitõb konono ilo wãwen eo me ejjab kwalok koutiej, ekõmetak, im ejjab joij, rej kate ir ñõn kwalok nan ko rekainemõn im kõkãtõk. (Ken. 12:18; Ep. 4:​29; 1 Tim. 6:​3-5, 20) Ar pojõk in konono ilo beran kin kien ko an Anij ñõn ro jet im kin kõnan eo ar ñõn bokake ej kalikar yokwe eo ar ñõn Anij. (Rom. 1:​15, 16) Ro emol burueir renaj lale wãwen ar kajerbal menin letok eo ñõn konono im remaroñ lor joñok eo ar emõn.​—Pil. 4:​8, 9.

Jen Juõn Joñok Emõn Ikijen Wãwen Mwilid im Mour Erreo

10. Etke juõn tõmak emol eaurõk ñõn ar kõmõn wõnmanlok ko ilo jitõb?

¹⁰ Ñõn an dri Kristian ro likit juõn joñok emõn, men in ejjab kitibuj wõt air kwalok  nan ko rekõkãtõk. Juõn eo ej ba nan ko rejime ak ejjab jerbali, ej juõn dri jela mon. Paul ear lukkun jela bwe dri Parisi ro rar ro dri jela mon im kin jorran eo ej walok jen air eindrein. Elõñ alen, ear kakkil Timote bwe en kejbãrok e jen jerbal ko retao im reriõp. (1 Tim. 1:5; 4:​1, 2) Ak Timote ear jab juõn dri jela mon. Ilo letter eo an kein karuo ñõn Timote, Paul ear je: “Ij kememej tõmak emol ej ber ibõm.” (2 Tim. 1:5) Meñe eindrein, Timote ear aikwij in kalikar ñõn ro jet kin jerbal ko an remol einwõt juõn Kristian. Ear aikwij likit juõn joñok emõn ikijen mwilin.

11. Ta eo Paul ear jeje kake ñõn Timote kin arõk mweiuk?

¹¹ Ilo letter ko ruo an Paul ñõn Timote, ear lelok nan in kakabilek ko kin jet wãwen ko ikijen mwilin armij. Ñõn wanjoñok, Timote ear aikwij bõprae an jibarek mweiuk ko. Paul ear je: “Bwe arõk mõnni ej okran nana otemjej, eo ke jet r’ar arõk r’ar jebwãbwe jen tõmak im mõke wie ir kin elõñ men in kaburomõj.” (1 Tim. 6:​10) Arõk mweiuk ej kakõlen an juõn armij mõjino ilo jitõb. Ilo okõtõn, dri Kristian ro me rej juburu kin juõn wãwen mour elamwan me ‘eor mõña im nuknuk ko ibeir,’ rej kalikar air wõnmanlok ilo jitõb.​—1 Tim. 6:​6-8; Pil. 4:​11-​13.

12. Ewi wãwen jemaroñ kõmõn bwe wõnmanlok eo ar en alikar ilo mour eo ar?

¹² Paul ear kalikar ñõn Timote kin aurõkin an Kristian kõra ro aikwij “kõnõk nuknuk ko re karbõp, im ren kõkõmõnmwin im jejairunoij.” (1 Tim. 2:9) Kõra ro me rej kwalok eta buru im lemnok ko rejime ikijen jokãlet ko air kin ballir im baotokiir, im bareinwõt ilo wãwen ko jet ilo mour eo air, rej likit joñok ko remõntata. (1 Tim. 3:​11) Men in ej bareinwõt jerbal ñõn Kristian man ro. Paul ear kakabilek overseer ro bwe ren ‘jadõr, ren kõkõmõnmwin, im en emõn mwiliir.’ (1 Tim. 3:2) Ñe jej kwalok karkar kein ilo makõtkit ko ar  kajjojo ran, jenaj kõmõn bwe ar wõnmanlok en alikar ñõn aolep.

13. Einwõt Timote, ewi wãwen jemaroñ likit joñok ko remõn ikijen mwil erreo?

¹³ Timote ear aikwij bareinwõt likit juõn joñok emõn ikijen kwojarjar ak mwil erreo. Ilo an kajerbal nan in, Paul ear jitõñlok ñõn mwil erreo ikijen belele. Elaptata, ke Timote ear jerbal iben kõra ro ear aikwij kejbãrok mwilin bwe en ejelok ruõn. Ear aikwij watõk ‘lilap ro einwõt kar jinen; kõra re jab kanuij ridto einwõt kar ro jein im jãtin kõra ilo kwojarjar otemjej.’ (1 Tim. 4:​12; 5:2) Kõmõn ko retton me juõn armij ej lemnok rittino, rej alikar iman mejen Anij im tokelik ro jet renaj jela kaki. Bareinwõt jerbal ko remõn an juõn Kristian rejjab maroñ ber ilo ittino. (1 Tim. 5:​24, 25) Aolep ro ilo congregation eo eor air maroñ ñõn kõmõn bwe wõnmanlok eo air en alikar ikijen mwiliir im air kwojarjar.

Yokwe im Tõmak Raurõk

14. Ewi wãwen an Jeje ko ilo Baibel eo kwalok kin aikwij eo ñõn yokwe dron?

¹⁴ Yokwe ej karkar eo elaptata an kabuñ eo emol. Jisõs ear jiroñ dri kalor ro an: “Ilo men in armij otemjej re naj jela bwe komij dri kalora, elañe komij yokwe dron.” (Jon 13:35) Ewi wãwen jemaroñ kwalok yokwe rõt in? Nan eo an Anij ej rejañ kij ñõn “meamiwõr ñõn dron ilo yokwe,” ñõn ‘joij ñõn dron, en emõn buruer, jolok nana jen dron,’ im ñõn kwalok karuwainene. (Ep. 4:​2, 32; Hib. 13:​1, 2) Dri jilik Paul ear je, “Kin yokwe jimjãn jimjãten, komin menoan dron.”​—Rom. 12:10.

15. Etke eaurõk bwe aolep ren kwalok yokwe, elaptata Kristian overseer ro?

¹⁵ Elañe Timote ear jab kwalok joij ilo wãwen an jerbal iben dri tõmak ro mõtõn, men in emaroñ kar jelet men ko remõn ear kõtõbraki einwõt juõn dri katakin im juõn overseer. (Riit 1 Dri Korint 13:​1-3.) Ijo turãjet, yokwe eo emol me Timote ear kwalok ñõn ro jein im jãtin, ekoba an kwalok karuwainene im kõmõn jerbal ko remõn ñõn ir, rar kalikar an wõnmanlok ilo jitõb. Kin men in, ilo letter eo an dri jilik Paul ñõn Timote, ear jejit an kalikar bwe yokwe ear juõn ian karkar ko me Timote ear aikwij emõn an kwaloke.

16. Etke Timote ear aikwij kwalok juõn tõmak ekajur?

¹⁶ Ke Timote ear ber ilo Epesõs, kar melejoñwe tõmak eo an. Ear or jet armij ro me rar kowõnmanlok katak ko rejjab errã iben katak ko remol an Kristian. Ro jet rar kajededlok ‘bwebwenato ko rewan’ ak etali melele ko me rar jab kakajurlok tõmak eo an congregation eo. (Riit 1 Timote 1:​3, 4.) Paul ear kwalok kin rein einwõt ro ‘rejua, rejajelokjen, im rekanuij yokwe kajitõk ko im akwail in nan ko.’ (1 Tim. 6:​3, 4) Ear emõn ke ñõn an Timote lemnok kin katak ko rewan me rar jededlok ilo congregation eo? Jaab, kinke Paul ear rejañ Timote ñõn an “tõrinae tõrinae emõn eo an tõmak” im “illok jen bwebwenato wan, im men in jumae an eo naetan jelalokjen, im riõp.” (1 Tim. 6:​12, 20, 21) Ejelok berre bwe Timote ear bokake nan in rejañ eo an Paul.​—1 Kor. 10:12.

17. Ewi wãwen tõmak eo ar emaroñ ber ilo melejoñ ranin?

¹⁷ Ej juõn men ekaitoktoklimo bwe kar jiroñ Timote: “Ilo ien ko elik, jet re naj buñ jen tõmak, im eoroñ jitõb ro rej mon ir, im katak ko an dimõn rõn.” (1 Tim. 4:1) Inem aolep ro ilo congregation eo, ekoba ro rej bõk jerbal ko relap, rej aikwij einwõt Timote ilo air kwalok  juõn tõmak ekajur im bin. Ilo ar jutõk bin nae im karmijete katak ko an ro rar buñ jen tõmak, jemaroñ kalikar ar wõnmanlok im erom juõn joñok emõn ikijen tõmak.

Kate Yuk ñõn Kõmõn bwe Am Wõnmanlok En Alikar

18, 19. (a) Ewi wãwen kwomaroñ kõmõn bwe am wõnmanlok en alikar ñõn aolep? (b) Ta eo jenaj etale ilo katak eo tok juõn?

¹⁸ Ealikar bwe wõnmanlok eo ilo jitõb an juõn Kristian ejjab ekkejellok iben baotokin, kabel ko an, ak an buñbuñ. Im bareinwõt joñõn yiõ ko in an jerbal ilo congregation eo ejjab melelen bwe ej kõmõn wõnmanlok ko ilo jitõb. Jen men in, wõnmanlok eo emol ilo jitõb ej alikar ilo ar bokake Jeova ilo wãwen ar lemnok, konono, im mwilid. (Rom. 16:19) Jej aikwij bokake kien eo ñõn yokwe dron im kadrek juõn tõmak ekajur. Aet, jen kalomõnlokjen kin nan ko an Paul ñõn Timote im jerbali bwe ar wõnmanlok en alikar ñõn aolep.

¹⁹ Bar juõn karkar me ej kwalok ar wõnmanlok im ridto ilo mour in Kristian ej lõñliñ, eo ej mõtõn leen jitõb eo an Anij. (Gal. 5:​22, 23) Katak eo tok juõn enaj kwalok kin ewi wãwen jemaroñ kadrek im drebij ar lõñliñ iomin ien ko jej ber ilo abañ.

Ewi Wãwen Kwonaj Uak?

• Ta eo ro jet remaroñ katak kin kij jen wãwen ar konono?

• Ewi wãwen ar wõnmanlok ej alikar ilo wãwen mwilid im ar kwojarjar?

• Etke dri Kristian ro rej aikwij likit juõn joñok emõn ikijen yokwe im tõmak?

[Kajitõk ko ñan katak]

[Pija eo ilo peij 11]

Jodrikdrik eo Timote ear kwalok an lukkun ridto ilo jitõb

[Pija ko ilo peij 13]

Am wõnmanlok ej alikar ke ñõn aolep?