Messaia Eo! Jeova Ear Letok ñõn Lomoren Armij

“Bwe einwõt ilo Adam ro otemjej rej mij, ein drein bareinwõt ilo Kraist ro otemjej re naj mour.”​—1 KOR. 15:22.

1, 2. (a) Ewi wãwen an kar Andru im Pilip emakõt ke rar iion Jisõs? (b) Etke jemaroñ ba bwe elõñlok kein kamol ko iber bwe Jisõs ej Messaia eo jen kar dri Kristian ro ilo ebeben eo ken kajuõn?

 “KIM ar lo Messaia” eo, Andru ear ba nan kein ñõn Piter, leo irro ej jimjãn jimjãtin, kin an kar tõmak bwe Jisõs dri Nazeret eo, ej Eo Emwij an Anij Kabite. Pilip ear tõmak im ear bukot leo mõtõn, Natanael, im ba ñõn e: “Kim ar lo E, eo Moses ilo kien, im ro dri kanan r’ar je kake, Jisõs dri Nazeret, nejin Josep.”​—Jon 1:​40, 41, 45.

² Kwoj ke lukkun tõmak bwe Jisõs ej Messaia eo me kar kalimur kake, im “Dri Tel in lomor eo” an Jeova? (Hib. 2:​10) Ranin, elõñlok kein kamol ko iber jen dri kalor ro an Jisõs ilo ebeben eo ken kajuõn bwe e eo ej Messaia eo. Jen ien eo Jisõs ear lotak ñõn ien eo ear jerkakbiji, Nan eo an Anij ej letok kein kamol ko remol bwe e eo ej Kraist. (Riit Jon 20:30, 31.) Baibel eo ej bareinwõt kwalok bwe ilo lõñ, Jisõs enaj wõnmanlok wõt ñõn kajejit jerbal eo an einwõt Messaia eo. (Jon 6:​40; riit 1 Dri Korint 15:22.) Ranin kwomaroñ bareinwõt ba bwe emwij am “lo Messaia” eo ikijen men ko kwar katak jen Baibel eo. Bõtab, mokta jen etale ewi wãwen dri kalor ro ilo jinoin rar bõk lemnok eo ejime bwe rar lo Messaia eo.

Jidrik kin Jidrik “Men eo Etino” kin Messaia eo Ear Alikarlok

3, 4. (a) Ewi wãwen an kar dri kalor ro ilo ebeben eo kein kajuõn maroñ “lo Messaia” eo? (b) Etke kwomaroñ ba bwe Jisõs wõt emaroñ kar kajejit aolep kanan ko kin Messaia eo?

³ Ewi wãwen an kar dri kalor ro an Jisõs ilo ebeben eo ken kajuõn lukkun jela bwe Jisõs ej Messaia eo? Jidrik kin jidrik Jeova ear kalikarlok kakõle ko kin Messaia eo enaj itok ikijen dri kanan ro. Juõn dri meletlet me ear etale Baibel eo ej keiri men in ñõn wãwen rej kakobaik juõn ekjõp me kar ejaake jen elõñ mõtõn in dreka ko retibrikrik. Pijaik an elõñ eman ro me rejañin kar konono iben dron bõktok juõn mõtõn dreka ñõn loan juõn rum. Elañe mõtõn kein remaroñ koba iben dron ñõn ejaake ekjõp eo, kwoban kar lemnok bwe men in ear jidre im walok bõtab eor juõn ear tel men in, eo me ear katibrikrik ekjõp eo im jilkinlok mõtõn ko ñõn aolep eman ro. Einwõt mõtõn ko kajjojo jen ekjõp eo, eindrein kanan ko kajjojo kin Messaia eo remaroñ kwalok juõn melele eaurõk kin Messaia eo.

⁴ Juõn wõt armij emaroñ ke jidre im kajejit aolep kanan ko kin Messaia eo? Juõn dri etale ear ba bwe ñõn an juõn armij maroñ jidre im kajejiti aolep kanan ko kin Messai eo, ejamin lo tõbrak. Ilo bwebwenato ko an armij, Jisõs wõt ear maroñ kajejit men in.”

5, 6. (a) Ewi wãwen naj bõktok ekajet eo nae Setan? (b) Ewi wãwen Anij ear jidrik kin jidrik kalikar menmenbwij eo an “ine” eo kar kalimur kake?

⁵ Kanan ko kin Messaia eo rej ekkeijaklok wõt ñõn “men eo etino” me ekitibuj elõñ mõtõn ko raurõk ie. (Kol. 1:​26, 27; Jen. 3:​15) Ekajet eo nae Setan Devil eo, “serpent e ridto,” eo ear tel armij ro ñõn jerawiwi im mij, ear mõtõn men eo etino. (Rev. 12:9) Ewi wãwen naj bõktok ekajet in? Jeova ear kanan bwe juõn “kõra”  enaj kar keutak juõn “ine” me enaj kokkure bõran Setan. “Ine” eo kar kanan kake enaj kar kokkure bõran serpent eo, im jolok eo ej unjen jumae, nañinmij, im mij. Bõtab, Anij enaj kar kõtlok bwe Setan en mokta kokkure jimwin neen “inen” kõra eo ilo kõkkar.

⁶ Jidrik kin jidrik Jeova ear kalikarlok wõn eo enaj kar “ine” eo me kar kalimur kake. Anij ear kalimur ñõn Ebream ke ear ba: “Ilo ineõm dri ailiñ otemjej i lõl re naj jerammõn; bwe kwar bokake ainikiõ.” (Jen. 22:18) Moses ear kanan bwe Armij in enaj kar “juõn Dri Kanan” elaplok jen Moses. (Dut. 18:18, 19) Kar kalimur ñõn Devid bwe Messaia eo enaj kar itok jen menmenbwij eo an im enaj kar jolit tron eo an ñõn indrio im tokelik dri kanan ro rar kamol men in.​—2 Sam. 7:​12, 16; Jerm. 23:​5, 6.

Maroñ ko an Jisõs Einwõt Messaia Eo

7. Ilo wãwen it eo Jisõs ear itok jen “kõra” eo belen Anij ilo kõkkar?

⁷ Anij ear jilkintok Nejin, menin kõmõnmõn eo an moktata, jen rolul in jitõb ro ilõñ me ej kõkkar kin lio belen, bwe en erom “ine” eo kar kalimur kake. Men in ear kitibuj an Jisõs “likiti mour eo an” ilõñ im lotak einwõt juõn armij ewãppen. (Pil. 2:​5-7, UBS; Jon 1:​14) An kar jitõb kwojarjar “kalur” Meri, ear kamol bwe ajiri eo ekwojarjar me enaj kar lotak jen e naj naetan “Nejin Anij.”​—Luk 1:​35.

8. Ewi wãwen Jisõs ear kajejit kanan ko kin Messaia eo ke ear kwalok e mõke ilo ien eo ear baptais?

⁸ Kanan ko kin Messaia eo rar kwalok kin ia eo Jisõs enaj kar itok jene im ñãt eo Jisõs enaj kar walok. Jisõs ear lotak ilo Betleem einwõt kar kanan kake. (Maik. 5:2) Ilo ebeben eo ken kajuõn, ear lap men ko dri Ju ro rar kõtõmene kaki kin Messaia eo. Joñõn an lap air kar reimanlok ñõn ien eo Messaia eo enaj kar walok, jet rar kajitõk kin Jon dri Baptais: “E dri Kraist ke jab ke?” Ak Jon ear uak: “A ej itok Eo ekajur jen iõ.” (Luk 3:15, 16) Ilo an kar kebake Jon ilo jemlokõnlok yiõ eo 29 bwe en baptais ke ear 30 yiõ ridtõn, Jisõs ear kwalok e mõke ilo ien eo ejejit bwe e eo ej Messaia eo. (Dan. 9:​25) Inem ear jino an kwalok nan, im ba: “Ejejit ien, im ebak ailiñ in Anij: komin ukwelok ibemi, im tõmak ilo gospel.”​—Mark 1:​14, 15.

9. Ta eo dri kalor ro an Jisõs rar lukkun tõmake meñe rar jab lukkun melele kin tibrikin wãwen iroij eo an Jisõs?

⁹ Bõtab, men ko armij ro rar kõtõmene kaki rar aikwij oktõk. Meñe ejime an kar armij ro watõk Jisõs einwõt juõn Kiñ, rar jab lukkun melele ilo ien eo bwe enaj kar iroij ilañ ilo ran ko rej ber iman. (Jon 12:12-​16; 16:12, 13; Jerb. 2:​32-​36) Bõtab, ke ear kajitõk, “Wõn Nejin armij, ilo an armij ba?” Piter ear uak ilo mõkõj: “Kwe Dri Kraist, Nejin Anij emour.” (Mat. 16:13-​16) Piter ear uak ilo ejja wãwen eo wõt ilo ien eo ke elõñ rar illok kin air kar lõkatip kin juõn ian katak ko an Jisõs.​—Riit Jon 6:​68, 69.

 Roñjake Messaia Eo

10. Etke Jeova ear kalikar aikwij eo ñõn roñjake Nejin?

¹⁰ Eo ej mõke wõt Nejin Anij ear juõn jitõb ekajur ke ear ber ilo lõñ. Ke ear ber ion lõl, Jisõs ear jutõk ikijen Jemen. (Jon 16:27, 28) Ear ba: “Nan in katak eo Aõ, e jab Aõ, a an Eo e ar jilkintok Iõ.” (Jon 7:​16) Ilo ien eo Jisõs ear ukot nememen, Jeova ear kamol bwe Jisõs ej Messaia eo ilo an ba: “Komin roñjake e.” (Luk 9:​35, UBS) Aet, jej aikwij roñjake im bokake Eo Emwij Kãlete. Men in ej kitibuj tõmak im jerbal ko remõn. Men kein jimor ekanuij lap air aurõk bwe jen maroñ kabuñburuen Anij im bõk mour indrio.​—Jon 3:​16, 35, 36.

11, 12. (a) Ta un ko unin an kar dri Ju ro ilo ebeben eo ken kajuõn karmijete Jisõs einwõt Messaia eo? (b) Wõn ro rar tõmak Jisõs?

¹¹ Meñe ear lukkun kanuij lõñ men ko Jisõs ear kõmõni me rar kamol bwe ej Messaia eo, enañin aolep dri Ju ro ilo ebeben eo ken kajuõn rar karmijete e. Etke? Kinke ear or air mõke lemnok kin ta ko Messaia eo enaj kar kõmõni, ekoba lemnok eo bwe enaj kar erom kiñ eo me enaj kanemkwoj ir jen air iñtan iomin iroij eo an ailiñ in Rom. (Riit Jon 12:34.) Kin men in, rar jab maroñ tõmak Messaia eo me ear kajejit kanan ko me rar ba bwe armij ro renaj kar kejekron e im jolok e, enaj kar iion iñtan im metõk, jela kin nañinmij ko an armij, im eliktata renaj kar mõne. (Ais. 53:​3, 5) Bareinwõt jet ian dri kalor ro retiljek an Jisõs rar buromõj kin an kar jab kanemkwoj ir jen ailiñ eo ear iroij ioir. Bõtab rar tiljek wõt, im tokelik, kar lelok ñõn ir melele eo ejime.​—Luk 24:21.

¹² Bar un eo juõn unin an kar armij ro karmijete Jisõs einwõt Messaia eo kar kalimur kake, ej kin katak ko an me ear bin an elõñ tõmaki. Ñõn dreloñ ilo Ailiñ in Anij juõn ear aikwij “mõke karmijete,” ‘mõña kõniekin im irak bõtõktõkin Jisõs,’ “bar lotak,” im ‘jab mõtõn lõl.’ (Mark 8:​34; Jon 3:3; 6:​53; 17:14, 16) Ro eutiej burueir, ro remweie, im ro rejela mon rar watõk bwe ebin ñõn lori men kein me rar aikwij in kõmõni. Bõtab, dri Ju ro me etã burueir rar tõmak bwe Jisõs ej Messaia eo, im bareinwõt jet ian dri Sameria ro me rar ba: “Emol E in Dri Lomoren lõl.”​—Jon 4:​25, 26, 41, 42; 7:​31.

13. Ewi wãwen Jisõs ear iñtan ke kar kokkure jimwin neen ilo kõkkar?

¹³ Jisõs ear kanan bwe pris ro renaj kar liakelok e im dri ailiñ ko renaj kar dilaik e ion alal eo, ak ilo ran eo ken kajilu, enaj kar jerkakbiji. (Mat. 20:17-​19) Kar ekajete bwe ear blaspim kin an kar ba iman dri bebe ro relap bwe ear “Dri Kraist, Nejin Anij.” (Mat. 26:63-​66) Pailat ear lo bwe “ejelok men eo E ar kõmõne bwe En mij kake,” bõtab kinke dri Ju ro rar naruõn im ba bwe ear jumae kien, Pailat ear “ketõk Jisõs ñõn ankil air.” (Luk 23:13-​15, 25) Kin men in, rar “karmijete” im karõk ñõn mõn eo ej “Iroij in mour,” meñe ear lukkun kanuij lõñ men ko ear kõmõni me rar kamol bwe Anij ear jilkintok e. (Jerb. 3:​13-​15) Einwõt kar kanan kake, rar “mõn” Messaia eo ikijen air kar dilaik e ion alal eo ilo Ran in Kijone eo ilo yiõ eo 33. (Dan. 9:​26, 27, UBS; Jerb. 2:​22, 23) Ikijen air kar mõn e ilo wãwen in elej, Jisõs ear iñtan ke kar kokkure “jimwin neen” einwõt kar kanan kake ilo Jenesis 3:​15.

Unin Messaia eo Ear Aikwij Mij

14, 15. (a) Ta un ko ruo unin an kar Jeova kõtlok bwe Jisõs en mij? (b) Ta eo Jisõs ear kõmõne elikin an kar jerkakbiji?

¹⁴ Jeova ear kõtlok bwe Jisõs en mij kin ruo un ko raurõk. Moktata, an Jisõs tiljek ñõn mij ear uake juõn ian wãwen ko raurõk ilo “men eo etino.” Ear kamol ilo juõn wãwen elap bwe juõn armij ewãppen emaroñ drebij wõt an tiljek im rejetake iroij potata eo an Jeova meñe ej jelmae melejoñ ko relap jen Setan. (1 Tim. 3:​16) Ken karuo ej kin men eo Jisõs ear ba, ‘Nejin armij e ar itok bwe en lelok An mour bwe En binmour ñõn ro relõñ.’ (Mat. 20:28) “Binmour” eo an ear kõllã wõnan jerawiwi, eo me ro nejin Adam rar jolite im ear maroñ lelok mour indrio ñõn aolep ro rej tõmak bwe Jisõs ej e eo Anij ear letok ñõn lomoren kij.​—1 Tim. 2:​5, 6.

¹⁵ Elikin jilu ran in an kar ber ilo lũp, Kraist  ear jerkakbiji, im ear waloklok ñõn dri kalor ro an ñõn kamol bwe ear mour im bar lelok nan in jiroñ ko ñõn ir iomin 40 ran. (Jerb. 1:​3-5) Inem ear wõnliñlok ñõn lõñ bwe en kwalok ñõn Jeova aurõkin menin katok eo an im kõtar ien eo ejejit ñe enaj ijjino ber eo an einwõt Kiñ eo ej Messaia. Ilo kõtan ien in, ear lõñ men ko ear aikwij kõmõni.

Kamwijlok Jerbal eo An Einwõt Messaia Eo

16, 17. Kemelele kin jerbal eo an Jisõs elikin an kar wõnliñlok ñõn lõñ.

¹⁶ Iomin elõñ buki yiõ ko jen ien eo ear jerkakbiji, Jisõs ear tiljek wõt ilo an lolorjake makõtkit ko an congregation eo an Kristian me ej iroij ion. (Kol. 1:​13) Ilo ien eo ejejit, enaj kar jino an kajerbal kajur eo an einwõt Kiñ in Ailiñ eo an Anij. Kanan ko ilo Baibel eo im men ko rar walok ilo lõl in rej kamol bwe “ien eo eliktata” im ber eo an einwõt Kiñ eo, ear ijjino ilo 1914. (Mat. 24:3; Rev. 11:15) Ejjabto tokelik, ear tel enjel ro ñõn jolõltak Setan im dimõn ro an jen lõñ.​—Rev. 12:​7-​10.

¹⁷ Jerbal in kwalok nan im katakin eo me Jisõs ear jino kõmõne ilo yiõ eo 29 ej ebak jemlokõn. Mõtõn jidrik enaj ekajete aolep armij ro. Inem Jisõs enaj jiroñ ro einwõt s̃ip me rej tõmak bwe Jeova ear letok e ñõn lomoren armij ñõn “jolit ailiñ eo e ar pojõk ñõn [ir] jen jinoin lõl.” (Mat. 25:31-​34, 41) Ro rej kejekron Jisõs einwõt Kiñ eo renaj joko ñe enaj tel jarin tõrinae eo ilõñ nae ro renana. Inem Jisõs enaj liabe Setan im jolok e im dimõn ro an na ilo “abys eo.”​—Rev. 19:11-​14; 20:​1-3.

18, 19. Ta eo Jisõs enaj kõtõbrake ilo an kajejit jerbal eo an einwõt Messaia eo, im ta tokjen ko enaj bõktok ñõn armij ro rej bokake?

¹⁸ Iomin Juõn Tausan Yiõ in Iroij eo an, Jisõs enaj lukkun kajejit aolep jerbal ko an einwõt “Ri Bebe Emeletlet, Anij Ekajur, Jemed Indrio, Iroij in Ainemmõn.” (Ais. 9:​6, 7, UBS) Iomin Iroij eo an ilo Ailiñ eo, armij ro renaj wãppen, ekoba ro rar mij me renaj jerkakbiji. (Jon 5:​26-​29) Messaia eo enaj tel armij ro rej bokake ñõn “unin dren ko dren in mour,” im kamaroñ ir ñõn bõk juõn kõtan eainemõn iben Jeova. (Riit Reveles̃õn 7:16, 17.) Elikin melejoñ eo eliktata, naj jolok aolep dri jumae ro ekoba Setan im dimõn ro an “ilo lomalo in kijeek,” ilo wãwen in naj kokkure bõran “serpent eo.”​—Rev. 20:10.

¹⁹ Elap wõt an emõn im ejelok likjõp ilo wãwen Jisõs ej kajejit jerbal eo an einwõt Messaia eo! Paredais eo ion lõl enaj obrõk kin armij ro kar lomoren ir me renaj mour indrio ilo mõnõnõ im renaj ejmour. Naj karreoik ãt eo  ekwojarjar etan Jeova jen nan in riõp otemjej im naj kamol an jime maroñ eo an ñõn iroij potata ijoko otemjej. Juõn jerammõn elap ej ber iman aolep ro rej bokake Eo Emwij an Anij Kabiti!

Emwij ke Am Lo Messaia Eo?

20, 21. Ta un ko unin am aikwij jiroñ ro jet kin Messaia eo?

²⁰ Jen 1914 ñõn kiõ, jej mour ilo ien ber eo an Kraist me etan ilo kajin Grik pa·rou·siʹa. Meñe armij ro rejjab kile ber eo an einwõt Kiñ in Ailiñ eo an Anij, ak ej alikar jen kanan ko emwij air jejit kitieir. (Rev. 6:​2-8) Mekarta, enañin aolep armij ro ranin rej kejekron kein kamol ko kin ber eo an Messaia eo einwõt kar dri Ju ro ilo ebeben eo ken kajuõn. Rej bareinwõt kõnan juõn kiñ ak juõn dri tel me enaj jerbal iben dri tel ro an lõl. Bõtab, emwij am jela bwe Jisõs ej kiõ iroij einwõt Kiñ eo an Ailiñ in Anij. Kwar ke mõnõnõ ke kwar jela kin men in? Einwõt dri kalor ro ilo ebeben eo ken kajuõn, kar lujur yuk ñõn ba: “Kim ar lo Messaia.”

²¹ Ranin, ñe kwoj jiroñ ro jet kin mol eo, kwoj ke kwalok kin jerbal eo an Jisõs einwõt Messaia eo? Am kõmõne men in enaj kalaplok kamolol eo am kin ta eo ear kõmõne ñõn yuk, ta eo ej kõmõne kiõ, im ta eo mõtõn jidrik enaj kajejite. Einwõt Andru im Pilip, ejelok berre bwe emwij am jiroñ ro nukõm im ro mõtõm kin Messaia eo. Etke kwojjab bar kebak ir ilo kijejeto im kwalok ñõn ir bwe Jisõs Kraist ej Messaia eo kar kalimur kake im E eo Anij ear jilkintok bwe en lomoren kij?

Kwomaroñ ke Kemelele?

• Ewi wãwen an kar dri kalor ro ilo ebeben eo ken kajuõn maroñ lo Messaia eo?

• Ta un ko ruo raurõk unin an kar Jisõs mij?

• Ta eo mõtõn jidrik Jisõs enaj kõmõne ñõn kajejit jerbal eo an einwõt Messaia eo?

[Kajitõk ko ñan katak]

[Pija ko ilo peij 21]

Ewi wãwen an kar armij ro ilo ebeben eo ken kajuõn maroñ kile bwe Jisõs ej Messaia eo kar kalimur kake?

[Pija eo ilo peij 23]

Ñe kwoj konono iben ro jet, kwoj ke kwalok kin jerbal eo an Jisõs einwõt Messaia eo?