Jibõñ Ajiri ro Nejõm ñõn Anjo Ion Melejoñ Ko

JODRIKDRIK ro nejir rej ber iomin ijjibed ko relap. Rej iion menin kareelel ko ilo lõl in enana an Setan, im rej aikwij tõrinaek “mõm ko an likao” ak jodrikdrik. (2 Tim. 2:​22; 1 Jon 5:​19) Bareinwõt, kinke rej kate ir ñõn “kememej Eo Dri Kõmõnmõn” ir, rej aikwij kijenmij ñe dri jumae ro rej kajirere kake ir im kabnõnõik ir kin tõmak eo air. (Ekk. 12:1) Juõn brother etan Vincent me ej reiliklok ñõn ien eo ke ear drik, ej ba: “Aolep ien eor jet rar kabnõnõik iõ, kamijõk iõ, ak kajeoñ ire iba kinke iar juõn ian Dri Kennan ro an Jeova. Elõñ ien kin an lukkun lap air kabnõnõ im kamijõk iõ, iar jab kõnan etal ñõn jikuul.” *

Kobalok iben ijjibed ko jen lõl in, ladrik im ledrik ro nejir remaroñ aikwij bar tõrinaek kõnan eo ñõn einwõt ajiri ro ridtair wõt. Juõn sister jodrikdrik etan Cathleen ej ba: “Ejjab biruru  ñe ro jet rej watõk yuk bwe kwoj oktõk jen ir.” Juõn brother 21 an yiõ etan Alan, ej ba: “Ekkã an kar dri jikuul ro kir iõ ñõn jambo ibeir ilo Jãdede im Jabõt im iar lukkun kõnan etal ibeir.” Bareinwõt, emaroñ kajur kõnan eo an jodrikdrik ro ñõn bõk kwonair ilo ien jiai ikkure ko an jikuul me emaroñ biruru an tellok ñõn kõmao ko renana. Juõn sister jodrikdrik etan Tanya ej ba: “Elukkun emõn iba ikkure. Aolep ien coach ro ilo jikuul rej kajeoñ in kõmõn bwe ij ikkure iben team eo. Ear bin ñõn aõ ba jab.”

Ewi wãwen kwomaroñ jibõñ ajiri ro nejõm anjo ion melejoñ ko? Jeova ear lelok erro eo ñõn ro jemen im jinen bwe ren katakin ajiri ro nejiir. (Ken. 22:6; Ep. 6:4) Mejenkajik eo an ro jemen im jinen me rej mijõk Anij ej ñõn kadrek ilo buruen ajiri ro nejiir juõn kõnan ñõn bokake Jeova. (Ken. 6:​20-​23) Wãwen in enaj kamakõt ajiri ro ñõn jumae ijjibed ko an lõl in meñe jemeir im jineir rejjab ber ibeir.

Ej juõn men ebin iben ro jemen im jinen ñõn kabwe aikwij ko, kejbãrok baamle eo, im kõmõni makõtkit ko an congregation eo ilo juõn wõt ien. Jet rej aikwij kõmõn eindrein meñe ejelok rejetair ak ñe rej iion jumae jen eo beleir ejjab juõn dri tõmak. Meñe eindrein, Jeova ej kõtõmene jen ro jemen im jinen bwe ren kajenolok ien ñõn katakin im jibõñ ajiri ro nejiir. Inem, ta eo kwomaroñ kõmõne ñõn jibõñ ajiri ro nejõm kejbãrok ir mõke jen ijjibed ko jen ro ridtair wõt, menin kabo ko, im men ko renana rej iioni jen ran ñõn ran?

Juõn Kõtan Ebak Iben Jeova

Moktata, aolep jodrikdrik ro nejir rej aikwij jela kajen Jeova einwõt juõn Eo emol an ber. Jej aikwij jibõñ ir ñõn “lo Eo re ban lo E.” (Hib. 11:27) Vincent, eo me kar konono kake ilo jinoin, ej kememej wãwen an kar jemen im jinen jibõñ e ñõn kadrek juõn kõtan ebak iben Jeova. Ej ba: “Rar katakin iõ aurõkin jar. Ij kememej bwe jen ke iar lukkun drik, iar jar ñõn Jeova aolep boñ mokta jen aõ kiki. Iar lukkun tõmak bwe emol an Jeova ber.” Kwoj  ke jar iben ajiri ro nejõm? Etke kwojjab roñjake men ko rej ba ñõn Jeova ilo jar ko air? Rej ke eliji ejja nan ko wõt ñe rej jar? Ak rej ke kwalok lukkun iñjake ko air kin Jeova ilo jar ko air? Ilo am roñjake jar ko air, kwomaroñ kile ewi joñõn an ebak kõtan eo air iben Jeova.

Ekkeini riiti Baibel eo ej bar juõn wãwen eaurõk me emaroñ kadruaklok jodrikdrik ro ñõn Jeova. Cathleen, eo me kar konono kake moktalok, ej ba: “Riiti aolepen Baibel eo jen ke iar drik ear jibõñ iõ. Ear kõmõn aõ liki bwe meñe armij ro rar jumae iõ, Jeova ear rejetake iõ.” Ajiri ro nejõm eor ke air mõke lajrõk in riit Baibel?​—Sam 1:1-​3; 77:12.

Emol, ajiri ro eoktõk wãwen air emakõt ñõn nan in tel ko an jemeir im jineir. Bareinwõt, air wõnmanlok ilo jitõb emaroñ wawa ion joñõn ridtair. Bõtab, elañe jejjab tel ir enaj bin an jodrikdrik ro jela kajen Jeova einwõt juõn Eo emol an ber. Ro jemen im jinen rej aikwij lukkun katakin ajiri ro nejiir kin Nan in Anij bwe ren maroñ jela lemnok eo an Jeova kin men eo rej jelmae ilo jabrewõt jikin rej ber ie. (Dut. 6:​6-9) Ajiri ro nejõm rej aikwij tõmak bwe elap an Jeova kea kake ir.

Wãwen eo ñõn Kõmõn bwe Konono Iben Dron En Or Tokjen

Konono iben dron ej bar juõn wãwen eaurõk ñõn jibõñ ajiri ro nejõm. Emol, konono iben dron ej kitibuj elaplok jen am baj konono wõt ñõn ajiri ro nejõm. Ej kitibuj am kajerbal kajitõk ko im roñjake uak ko air ilo meanwõr meñe uak ko air remaroñ oktõk jen wãwen eo kwokõnan roñ. Juõn kõra me eor ruo nejin ladrik etan Anne, ej ba: “Ij kajitõk wõt mae ien ij melele men eo rej lemnok kake im men eo rej jelmaiki ilo mour ko air.” Ajiri ro nejõm rej ke kile bwe kwoj lukkun roñjake ir ñe rej konono? Tanya, eo me ear konono moktalok ej ba: “Jema im jinõ rar lukkun roñjake iõ im kememej wõt bwebwenato ko am. Rar jela etan dri jikuul ro ilo class eo aõ. Rekin  kajitõk kin ir im kin bar men ko jet kimar konono kaki.” Roñjake im kememej rej lukkun aurõk ñõn ar lo tõbrõk ñe jej konono iben dron.

Elõñ baamle rar lo bwe mõña iben dron ej kebellok ien ko remõn ñõn konono iben dron. Vincent ej kemelele: “Mõña iben dron ear juõn men ekanuij aurõk ilo baamle eo am. Kar kõtõmene bwe kimin ber ilo tebel eo iben baamle eo enañin aolep ien. Kar jab kõtlok bwe kimin aluij TV, roñjake al in kajõñjõñ ko, ak riit ilo ien mõña. Kinke enañin aolep ien kimar bwebwenato bajjek iben dron, men in ear kõmõn bwe en or mejatoto in ainemõn me ear jibõñ iõ ñõn kijenmij iomin men ko renana im ijjibed ko iar jelmaiki ilo jikuul.” Ej wõnmanlok wõt im ba: “Aõ kar iminene in konono iben jema im jinõ ilo ien mõña ear bareinwõt jibõñ iõ ñõn jab mijõk in konono ibeir ke iar aikwij jibõñ kin abañ ko relap.”

Kajitõk ibõm mõke, ‘Jete alen ilo kajjojo wik kimij mõña iben dron einwõt juõn baamle?’ Kõmõn oktõk ko ilo wãwen in emaroñ ke kebellok ien ñõn kalaplok im kakõmõnmõnlok am konono iben ajiri ro nejõm?

Unin Elap An Aurõk Kamelmel

Ien Kabuñ an Baamle eo ilo jota ilo kajjojo wik ej bareinwõt jibõñ ro uan baamle eo ñõn jab ãliklik in kwalok burueir ñõn dron im ej jibõñ jodrikdrik ro ñõn kamarmir abañ ko air. Alan me kar konono kake ilo jinoin, ej ba: “Jema im jinõ rar kajerbal ien katak an baamle eo bwe ren jibõñ kim ñõn kwalok buruem. Rar kajerbal katak ko me rej ekkar ñõn abañ ko kimij iioni.” Jinen Alan ej ba: “Kimar kajerbal jimõtõn in ien katak eo ñõn kamelmel. Ien katak kein rar jibõñ ajiri ro nejim ñõn jela ewi wãwen ñõn jojomare tõmak eo air im kamol bwe men ko rej tõmak kaki remol. Men in ear kaberan ir ñõn kamarmir abañ ko me rar iioni.”

Emol ñe rej jelmae ijjibed jen ro ridtair wõt, ekkã an ajiri ro aikwij kõmõn men ko elaplok jen air baj ba wõt jaab im etal jen ir. Rej aikwij maroñ uak kajitõk kein einwõt etke im etke ijjab. Rej bareinwõt aikwij jela ta eo ren  kõmõne ñe rej kajirere kin tõmak eo air. Elañe rejjab maroñ jojomare tõmak eo air, enaj bin air jutõk bin kin kabuñ eo emol. Ien kamelmel emaroñ kaberan ir.

Box eo ilo peij 18 ej kõlajrõk jet ian wãwen ko me jemaroñ kamelmel ilo Ien Kabuñ an Baamle eo ilo jota. Kõmõn bwe ien kamelmel eo en einwõt ñe emol ikijen am melejoñ ajiri ro nejõm ñe rej kwalok uak ko air. Kobalok iben ien kamelmel kein, etale jet ian katak ko rekeie ikijen joñok ko an ro jet ilo Baibel eo. Ejelok berre bwe katak rõt kein ilo mweo enaj kapoje ajiri ro nejõm ñõn namejelan abañ ko ilo jikuul im jikin ko jet.

Mweo Imõm Ej ke Jikin Kone?

Mweo imõm ej ke juõn jikin me ajiri ro nejõm rej kijorur in jeblak ñõne ñe emwij jikuul ilo kajjojo ran? Elañe ej juõn jikin kone, men in enaj jibõñ ajiri ro nejõm ñõn anjo jen melejoñ ko rej iioni jen ran ñõn ran. Juõn sister me ej jerbal ilo Betel, ej ba: “Ke iar drik im ridtolok, juõn ian men ko raurõktata iba ej bwe mweo imwem ear juõn jikin kone. Jekron ewi joñõn an nana men ko rej walok ilo jikuul, iar jela bwe ñe ij rol ñõn mweo, aolep men renaj emõn wõt.” Kain mejatoto rõt ej ber ilo mweo imõm? Ej ke juõn jikin me ekkã an walok “illu ko, wãlok ko, limõjnonu ko,” ak ej juõn jikin “yokwe, lõñliñ, [im] ainemõn”? (Gal. 5:​19-​23) Elañe ejeja an or ainemõn, kwoj ke kajeoñ in lale ta oktõk ko kwoj aikwij kõmõni bwe mweo imõm en juõn jikin kone ñõn ajiri ro nejõm?

Bar juõn wãwen ñõn jibõñ ajiri ro nejõm ñõn anjo jen melejoñ ko ej ikijen am bõk buñten ne eo moktata ñõn bukot ro me kõmao ko air remaroñ kõkãtõk ir. Ñõn wanjoñok, kwomaroñ ke kirtok jet ian brother im sister ro me reridto ilo jitõb ilo congregation eo ñõn ien kamõnõnõ ko an baamle eo am? Ak kwomaroñ ke karõk juõn ien kejota ilo mweo imõm iben overseer eo ej ito-itak ak ro jet me rej bõk kwonair ilo jerbal in full-time kwalok nan? Kwojela ke kajen jabrewõt mejinede ak ro rej jerbal ilo Betel me ajiri ro nejõm remaroñ ejaak jimjera ko ibeir, ak baj jeje letter ko, ak e-mail ñõn ir, ak konono ibeir ilo telephone jen ien ñõn ien? Kain jimjera rõt kein remaroñ jibõñ ajiri ro nejõm ñõn etal ilo ial eo ejime im kõmõn mejenkajik ko ilo jitõb. Lemnok kin wãwen joñok eo emõn an dri jilik Paul ear jelet likao eo Timote. (2 Tim. 1:​13; 3:​10) Kõtan eo ebak an Paul iben Timote ear jibõñ e ñõn lemnok wõt kin mejenkajik ko an ilo jitõb.​—1 Kor. 4:​17.

Nebar Ajiri ro Nejõm

Jeova ej buñburuen ñe ej lo an jodrikdrik ro jutõk bin wõt kin men eo ejime meñe rej jelmaik ijjibed ko jen lõl eo an Setan. (Sam 147:11; Ken. 27:11) Ejelok berre, kwe bareinwõt kwoj lõñliñ ñe kwoj lo an jodrikdrik ro nejir kãlet ial eo jime. (Ken. 10:1) Kwalok ñõn ajiri ro nejõm kin iñjake eo am kin ir, im aolep ien kwon nebar ir. Jeova ear likit juõn joñok emõn ñõn ro jemen im jinen. Ilo ien eo Jisõs ear baptais, Jeova ear ba: “Kwe Nejiõ jitenburu iba, Ij mõnõnõ kake Yuk.” (Mark 1:​11) Elap wõt an kar nan ko an Jemen Jisõs kakajur e ñõn anjo ion melejoñ ko ear pojõk in jelmaiki! Eindrein, kwon kwalok ñõn ajiri ro nejõm bwe kwoj yokwe ir, im kile tõbrõk ko rej kõmõni.

Emol, kwojjab maroñ kejbãrok ajiri ro nejõm jen aolep ijjibed ko, kabnõnõ, im kajirere ko. Bõtab, elõñ men ko kwomaroñ kõmõni ñõn jibõñ ir. Ilo wãwen it? Jibõñ ir ñõn ejaak juõn kõtan ebak iben Jeova. Ejaake juõn mejatoto me ej kamakõt baamle eo ñõn konono iben dron ilo juõn wãwen eor tokjen. Kõmõn bwe Ien Kabuñ an Baamle eo ilo jota en or tokjen, im kõmõn bwe mweo imõm en juõn jikin kone. Ejelok berre bwe am kõmõn eindrein enaj kapoje ajiri ro nejõm ñõn anjo jen melejoñ ko.

[Kamelele eo itulals]

[Kamelele in juõn pija ilo peij 18]

KAMELMEL EMAROÑ JIBÕÑ

Erkein jet ian wanjoñok ko kin men ko ajiri ro nejir rej jelmaiki. Etke kwojjab kajerbal jet ian men kein ñõn kamelmel iben baamle eo am ilo ien Kabuñ an Baamle eo ilo jota?

▸ Juõn coach ej kajitõk iben ledrik eo nejõm ñõn kobalok iben team in ikkure eo ilo jikuul.

▸ Rej lelok jikka ñõn ladrik eo nejõm ke ej rol ñõn mweo jen jikuul.

▸ Jet ladrik rej kamijõk ladrik eo nejõm im ba renaj mõne ñe rej loe an bar kwalok nan.

▸ Ke ledrik eo nejõm ej kwalok nan jen im ñõn im, ej iion juõn ian dri jikuul ro ilo class eo an.

▸ Rej kajitõk iben ledrik eo nejõm iman mejen aolep dri jikuul ro jet kin etke ejjab koutiej flag eo.

▸ Juõn ladrik ej aolep ien kajirere kin ladrik eo nejõm kin an juõn ian Dri Kennan ro an Jeova.

[Kamelele in juõn pija ilo peij 17]

Ajiri ro nejõm eor ke air mõke lajrõk in riit Baibel?

[Kamelele in juõn pija ilo peij 19]

Kwoj ke kirtok ro reridto ilo jitõb ilo ien kamõnõnõ ko an baamle eo am?