Wãwen Iroij eo an Jeova Ej Bõk Anjo!

“Eor an Anij Lablab kajur ion ailiñ ko an armij.”​—DAN. 4:​17, UBS.

1, 2. Ta jet un ko unin wãwen iroij eo an armij ear jab lo tõbrõk?

 EJELOK berre bwe wãwen iroij eo an armij ear jab lo tõbrõk! Unleplep in men in ej kinke ejabwe jelalokjen eo iben armij ñõn air lo tõbrõk ilo wãwen air iroij. Ranin elukkun alikar an likjõp wãwen iroij eo an armij kinke elõñ dri tel ro rej ‘anij lo burueir, dri arõk mweiuk, im dri jualõñlõñ, dri nana, re lej, rej kennan nan in riõp, re jab kamanwa, r’awia, rej drike emõn, dri ketõk im dri kimjãje.’​—2 Tim. 3:​2-4.

² Ilo ran ko etto, ro jemer im jiner moktata rar kejekron wãwen iroij eo an Anij. Ilo air kar kõmõne men in, remaroñ kar lemnok bwe rar kãlet ñõn anemkwoj. Bõtab, ilo mol rar kõtãik ir mõke ñõn iomin iroij eo an Setan. Jiljino tausan yiõ in an armij likjõp ilo air iroij ioir mõke im air ber iomin ijjibed eo an Setan, “iroij in lõl in,” ear bõktok kij ñõn juõn wãwen mour enana kiõ ilo bwebwenato an armij. (Jon 12:31) Juõn buk ej kemelele kin ber eo an armij ranin, ej ba bwe ejelok tokjen ñõn “bukot juõn lõl emõn. Reban baj loe wõt ak air kate in ejaake ej tellok ñõn jorran, lej, im tõrinae eo ekanuij nana.” Elap an mol nan kein bwe wãwen iroij eo an armij ejamin lo tõbrõk!

3. Ta eo jemaroñ ba kin wãwen naj kar iroij eo an Anij elañe Adam im Iv rar jab jerawiwi?

³ Inem, ekaburomõjmõj bwe ro jemer im jiner moktata rar kejekron wãwen iroij eo  me eor tõbrõkin, ej iroij eo an Anij! Emol, jejjab lukkun jela jejit in wãwen Jeova enaj kar karõk wãwen an iroij ion lõl elañe Adam im Iv rar drebij wõt air tiljek ñõn e. Bõtab, jemaroñ tõmak bwe wãwen iroij an Jeova ion armij ro enaj kar or yokwe im ejelok kaljiklok ie. (Jerb. 10:34; 1 Jon 4:8) Ñe jej lemnok kin meletlet eo an Anij ejelok joñõn, jemaroñ bareinwõt liki bwe elañe armij ro rar berwõt iomin iroij eo an Jeova, aolep bwir ko me rar walok jen ro rej rejetake wãwen iroij eo an armij reban kar walok. Wãwen iroij eo an Anij enaj kar lo tõbrõk ilo an kabwe “kõnan [an] men otemjej remour.” (Sam 145:16) Ilo tukaru, enaj kar emõntata wãwen iroij eo an. (Dut. 32:⁠4) Ekaburomõjmõj bwe armij ro rar kejekrone!

4. Ewi joñõn maroñ eo kar lelok ñõn Setan bwe en iroij?

⁴ Meñe eindrein, ej juõn men emõn ñõn kememej bwe meñe Jeova ear kõtlok bwe armij ro ren iroij ioir mõke, ejañin kar or ien ear kejekron maroñ eo an ñõn iroij ion menin kõmõnmõn ko an. Bareinwõt kar kõmõn bwe kiñ eo ekajurtata an Babilõn en kile ilo jemlokõn bwe “eor an Anij Lablab kajur ion ailiñ ko an armij.” (Dan. 4:​17, UBS) Ejjabto jen kiõ, Ailiñ eo an Anij enaj kajejit ankilan Anij. (Mat. 6:10) Emol bwe iomin jidrik ien, Jeova ear kõtlok bwe Setan en “anij in lõl in” ñõn lelok juõn uak ejejit kin aituerõk ko dri jumae eo ear bũkmantak. (2 Kor. 4:⁠4; 1 Jon 5:​19) Mekarta, ear ejelok an Setan maroñ ñõn ellã ion men ko Jeova ear kõtlok bwe en kõmõni. (2 Kron. 20:6; keiri Job 1:​11, 12; 2:​3-6) Im ien otemjej ear or jet armij ro me rar kãlet ñõn kõtãik ir ñõn Anij, meñe rar mour ilo lõl in ej ber iomin iroij eo an dri Kijirãt eo elap an Anij.

Wãwen Iroij eo an Anij Ion Israel

5. Ta kalimur eo dri Israel ro rar kõmõne ñõn Anij?

⁵ Jen ien eo an Ebel ñõn ien eo kar kajutõk ailiñ in Israel, elõñ ian ro retiljek rar kabuñ ñõn Jeova im bokake kien ko an. (Hib. 11:​4-​22) Ilo ran ko an Moses, Jeova ear kõmõn juõn bujen iben ro inen Jekõb, im rein rar erom ailiñ in Israel. Ilo yiõ eo 1513 mokta jen ien ko an Jisõs, dri Israel ro im ro nejiir rar kalimur bwe renaj lor Jeova einwõt dri Tel eo air, ke rar ba: “Men otemjej Jeova e ar konono, kim naj kõmõni.”​—Ex. 19:8.

6, 7. Ewi wãwen kar kalikar wãwen an Anij iroij ion ailiñ in Israel?

⁶ Ear or unin an Jeova kãlet dri Israel ro bwe ren armij ro an. (Riit Duteronomi 7:​7, 8.) Jokãlet in ear kitibuj elaplok jen an baj kabwe wõt aikwij ko an dri Israel ro. Ear  bareinwõt kitibuj men ko elaplok air aurõk, ãt eo etan Anij im iroij potata eo an. Naj kar kajerbal ailiñ in Israel ñõn kamol bwe Jeova ej Anij eo wõt emol. (Ais. 43:10; 44:​6-8) Inem, Jeova ear ba ñõn ailiñ eo: “Kwe dri ailiñ e kwojarjar ñõn Jeova am Anij, im Jeova e ar kãlet yuk bwe kwon juõn ailiñ ñõn E wõt, ian ailiñ otemjej ion mejen lõl.”​—Dut. 14:2.

⁷ Wãwen an kar Anij iroij ion dri Israel ro ear kwalok bwe Jeova ear melele bwe rar jab wãppen. Ilo ejja ien eo wõt, kien ko an rar wãppen im rar kwalok kin karkar ko karkarin eo ej dri Letok men otemjej. Kien ko an Jeova me ear lelok ikijen Moses rar lukkun kalikar kwojarjar eo an Anij, yokwe eo an kin ekajet jime, an mõnõnõ in jeorlok bwir, im an meanwõr. Tokelik, ilo ran ko an Joshua im ebeben eo an, ailiñ in Israel ear bokake kien ko an Jeova im ear ber ilo ainemõn im bõk jerammõn ko ilo jitõb. (Josh. 24:21, 22, 31) Ilo ebeben in kin bwebwenato an dri Israel ro ear kwalok bwe wãwen an kar Jeova iroij ear lap tõbrõk.

Wãwen an Armij Iroij Ej Bõktok Tokjen ko Renana

8, 9. Ta kajitõk eo ebwir dri Israel ro rar bõkmantak, im kar ta jemlokõn?

⁸ Bõtab, tokelik ear emakijkij an kar dri Israel ro illok jen kien ko an Anij im rar luji kejbãrok eo an. Ilo jemlokõn, dri Israel ro rar akwelap ñõn Jeova ikijen dri kanan Samuel ñõn kãlet juõn armij bwe en kiñ ioir. Jeova ear ba ñõn Samuel bwe en kõtõbrõk kõnan eo air. Bõtab, Jeova ear bar ba: “Rar jab jolok yuk, a rar jolok Iõ, bwe In jab kiñ ioir.” (1 Sam. 8:7) Meñe Jeova ear kõtlok bwe en or juõn an dri Israel ro kiñ, ear kakkil ir bwe wãwen an armij iroij enaj bõktok tokjen ko renana.​—Riit 1 Samuel 8:​9-​18.

⁹ Bwebwenato in dri Israel ro rar kwalok bwe emol nan in kakkil in an Jeova. An juõn armij kiñ ej tellok ñõn an walok abañ ko relap ñõn dri Israel ro, elaptata ñe kiñ eo ejjab tiljek. Ñe jej lemnok kin wanjoñok eo an dri Israel ro, ejjab menin bwilõñ bwe iomin elõñ yiõ ko, kien ko an armij ro me rejaje Jeova rar likjõp in bõktok tõbrõk ko remõn me rej ñõn indrio. Emol, jet dri kien ro rej kajitõk bwe Anij en kejerammõn jibarbar ko air ñõn bõktok ainemõn im jokõne, ak ewi wãwen Anij emaroñ kejerammõn ro rejjab kõtãik ir ñõn wãwen iroij eo an?​—Sam 2:​10-​12.

Juõn Ailiñ Ekãl Iomin Iroij eo an Anij

10. Etke kar binej jenkwon ailiñ eo Anij ear kãlete, Israel?

¹⁰ Ailiñ in Israel ear kamol an makoko in korijer ñõn Jeova ilo tiljek. Ilo jemlokõn ear karmijete Messaia eo me Anij ear kãlete, inem Jeova ear karmijete Israel, im karõk bwe juõn kumi in armij me enaj ejaake juõn ailiñ ekãl en binej jenkwon. Tokjen men in, ilo yiõ eo 33, congregation eo an dri Kristian dri kabit ro an Jeova ear ejaak. Ilo mol, congregation in ej juõn ailiñ ekãl me ej ber iomin tel eo an Jeova. Paul ear konono kake einwõt “Israel an Anij.”​—Gal. 6:​16.

11, 12. Ta men ko reinlok wõt juõn ikijen tel ikõtan ailiñ in Israel eo mokta im “Israel an Anij” ekãl?

¹¹ Eor men ko reoktõk im men ko reinlok wõt juõn ikõtan ailiñ in Israel eo mokta im “Israel an Anij” ekãl. Einjuõn jen Israel eo mokta, ejelok an congregation eo an dri Kristian kiñ im ejjab aikwij katok kin menin mour kin dri jerawiwi ro. Juõn men me einlok wõt juõn ikõtan ailiñ in Israel eo mokta im congregation eo an dri Kristian ej lajrõk eo kin man ro reridto, ak elder ro. (Ex. 19:​3-8) Kristian elder rein rejjab iroij ion bwij eo. Ak, rej lale congregation eo im mõnõnõ in tel makõtkit ko an Kristian. Rej jerbal ilo yokwe ñõn armij ro kajjojo ilo congregation eo im kwalok koutiej im nebar ñõn aolep.​—2 Kor. 1:​24; 1 Pit. 5:​2, 3.

 ¹² An ro uan “Israel an Anij” im ‘s̃ip ro jet’ mõtair kalomõnlokjen kin kõmõn ko an Anij iben Israel eo mokta, ej kalaplok air kamolol kin Jeova im wãwen iroij eo an. (Jon 10:16) Ñõn wanjoñok, bwebwenato ko rej kwalok bwe elap an kar iroij ro an armij in Israel jelet armij ro air ilo juõn wãwen emõn ak juõn wãwen enana. Men in ej kakememej ro rej tel dri Kristian ro bwe meñe rejjab iroij einwõt kar kiñ ro ilo ien ko etto, rej aikwij likit juõn joñok emõn kin tõmak ien otemjej.​—Hib. 13:7.

Wãwen an Jeova Iroij Ranin

13. Ta men eo ekanuij aurõk ear walok ilo 1914?

¹³ Dri Kristian ro ranin rej keañ ñõn armij ro ibelakin lõl in bwe mõtõn jidrik ien iroij eo an armij enaj jemlok. Ilo 1914, Jeova ear kajutõk Ailiñ eo an ilo lõñ iomin Kiñ eo emwij an kabiti, Jisõs Kraist. Ilo ien in, ear lelok maroñ eo ñõn an “bõk anjo im wõnmanlok bwe En bõk anjo.” (Rev. 6:2) Kar jiroñ Kiñ in ekãl: “Kwon iroij ilo bwiljin ro dri kijirãt Yuk.” (Sam 110:2) Ekaburomõjmõj bwe ekutkut an ailiñ ko makoko in kõtãik ir ñõn iroij eo an Jeova. Rej wõnmanlok wõt im kõmõn einwõt ñe “ejelok [Jeova] Anij.”—Sam 14:1.

14, 15. (a) Ewi wãwen Ailiñ eo an Anij ej iroij ior ranin, im ikijen men in, ta kajitõk ko jej aikwij kajitõkin kij mõke kaki? (b) Ewi wãwen jemaroñ lo bwe iroij eo an Anij ej emõntata ranin?

¹⁴ Jet ian dri kabit ro an “Israel an Anij” rej mour wõt im einwõt ro jãtin Jisõs, rej wõnmanlok wõt im jerbal einwõt “dri keañ kin Kraist.” (2 Kor. 5:​20) Emwij kãlet ir einwõt dri korijer etiljek im meletlet ñõn kejbãrok im letok ekan ko lor jitõb ñõn aolep dri kabit ro im jar eo elap an dri Kristian me ej laplok wõt, im kiõ eor million orair im eor air kejatrikrik ñõn mour indrio ion lõl in. (Mat. 24:45-​47; Rev. 7:​9-​15) Ealikar an Jeova kejerammõn karõk in kin jerammõn ko ilo jitõb me dri kabuñ ro remol ranin rej lõñliñ kaki.

¹⁵ Kajjojo iar en kajitõk iber mõke: ‘Ij ke lukkun jela kin erro ko ij aikwij ineki ilo congregation eo an dri Kristian? Ejime ke wãwen aõ rejetake iroij eo an Jeova? Ij ke loudiñdiñ bwe ij mõtõn ro rej uan Ailiñ eo an Jeova? Ij ke bebe ilo buruõ ñõn wõnmanlok im kwalok kin Ailiñ eo an Anij ñõn ro jet joñõn wõt aõ maroñ?’ Einwõt juõn kumi, jej mõnõnõ ñõn kõtãik kij mõke ñõn Kumi eo Ej Tel Dri Kennan ro an Jeova im burukuk  iben elder ro ilo congregation ko. Ñe jej kõmõni wãwen kein, jej kwalok bwe jej kõtãik kij ñõn wãwen iroij eo an Anij. (Riit Dri Hibru 13:17.) Ar mõnõnõ in kõtãik kij ej kõmõn bwe en or burukuk ibelakin lõl in im men in ejejuan kinke lõl in ejjab burukuk. Ej bareinwõt kõmõn ainemõn im wãnik im ej kaibujuij Jeova, men in ej kwalok bwe wãwen an iroij ej emõntata.

Iroij eo an Jeova Ej Bõk Anjo

16. Ta jokãlet eo me aolep rej aikwij kõmõne ranin?

¹⁶ Ebaktok ien eo ñe naj kajemlok aituerõk ko kar bõkmantak ilo jikin kallip in Iden. Kin men in, kiõ ej ien ñõn an armij ro kõmõn juõn jokãlet. Kajjojo ej aikwij kãlet elañe enaj kõtãik e ñõn wãwen iroij eo an Jeova ak edrep ñõn wãwen iroij eo an armij. Ej juõn ar jerammõn ñõn jibõñ ro etã burueir bwe ren kãlet bebe eo ejime. Mõtõn jidrik, ilo Armagedõn, iroij eo an Jeova enaj binej jenkwon wãwen iroij eo an armij me ej ber iomin kajur eo an Setan im naj kajeebeploke ñõn indrio. (Dan. 2:​44, UBS; Rev. 16:16) Wãwen iroij eo an armij enaj jemlok, im aolepen lõl in enaj ber iomin Ailiñ eo an Anij. Ilo aolep wãwen ko, wãwen iroij eo an Jeova enaj bõk anjo.​—Riit Reveles̃õn 21:​3-5.

17. Ta jerammõn ko me remaroñ jibõñ armij ro kajjojo ñõn kõmõn juõn bebe emõn ikijen wõn eo rej aikwij lore?

¹⁷ Ro rejañin lukkun kõmõn juõn bebe ñõn kõtãik ir mõke ñõn Jeova rej aikwij jar im lemnok kin jerammõn ko wãwen iroij eo an Anij enaj bõktok ñõn armij ro. Wãwen iroij eo an armij ejjab maroñ namejelan abañ ko kin kõtõrãi kien im jerbal ko relej im kamijõk ñõn jibed armij ro ak kien ko. Wãwen iroij eo an Anij enaj jolok aolep nana ko jen lõl in. (Sam 37:​1, 2, 9) An armij Iroij ej bõktok tõrinae ko ejelok jemlokiir, ak wãwen iroij eo an Anij enaj “kejemlok tõrinae ko ñõn jemlokõn lõl.” (Sam 46:9) Bareinwõt, wãwen iroij eo an Anij enaj bar bõktok ainemõn ikõtan armij im menin mour ko! (Ais. 11:​6-9) Jeramel im kwuli rej mõtõn men ko rej walok iomin wãwen iroij eo an armij, ak ilo naj wãwen iroij eo an Anij enaj jolok men kein. (Ais. 65:21) Meñe elukkun emõn jibarbar ko an dri tel ro an armij ak rejjab maroñ jolok nañinmij im mij, ak ilo naj iomin iroij eo an Anij, ro reridto im nañinmij renaj lõñliñ bwe renaj bar jeblak ñõn inono. (Job 33:25; Ais. 35:​5, 6) Emol, lõl in enaj erom juõn paredais im ilo ien in ro remij renaj jerkakbiji.​—Luk 23:43; Jerb. 24:15.

18. Ewi wãwen jemaroñ kwalok bwe jej tõmak bwe wãwen iroij eo an Anij ej emõntata?

¹⁸ Aet, wãwen iroij eo an Anij enaj jolok aolep jorran ko Setan ear kõmõni ke ear kareel ro jemer im jiner moktata ñõn air illok jen Dri Kõmõnmõn eo air. Im baj lemnok mõk, Setan ear kõmõn jorran iomin 6,000 yiõ, ak Anij, ikijen Kraist, enaj jolok aolep jorran kein iloan wõt 1,000 yiõ! Ej juõn kein kamol ekanuij emõn kin wãwen iroij eo an Anij bwe ej utiejtata! Einwõt Dri Kennan ro an Anij, jej watõk e einwõt dri Tel eo ar. Inem, jen kwalok kajjojo ran, ilo mol, kajjojo auõ ilo mour ko ar bwe jej dri kabuñ ro an Jeova, ro uan Ailiñ eo an, im loudiñdiñ bwe jej Dri Kennan ro an. Im jen kajerbal jabrewõt ien emõn ñõn jiroñ jabrewõt eo enaj roñjake bwe wãwen iroij eo an Jeova ej emõntata.

Ikijen Iroij eo an Anij, Ta eo Jar Katak jen Ar Riiti . . .

• Duteronomi 7:​7, 8?

• 1 Samuel 8:​9-​18?

• Dri Hibru 13:17?

• Reveles̃õn 21:​3-5?

[Kajitõk ko ñan katak]

[Kamelele in juõn pija ilo peij 29]

Jeova ej iroij ien otemjej

[Kamelele in juõn pija ilo peij 31]

Ar mõnõnõ in kõtãik kij ñõn Jeova ej kõmõn bwe en or burukuk ibelakin lõl