“Jime im Maroñ eo an Juõn Ajiri ñõn Kalek Tõmak eo An Mõke”

ILO kar Tijemba 9, 2008, Jikuul eo ilo Sweden im ej kowõnmanlok jime im maroñ ko an ajiri, ear kõmõne juõn kwelok im ej wawa ion unin tel eo “Jime im Maroñ eo An Juõn Ajiri ñõn Kalek Tõmak eo An Mõke.” Elõñ dri konono ro jen kabuñ ko einwõt kabuñ in Sweden, kabuñ ko rej ba rej Kristian, kabuñ in Islam, bareinwõt kumi ko rej tõmak bwe armij remaroñ lo mõnõnõ meñe rejjab tõmak ilo Anij, rar kwalok lemnok ko air rekajjo wãweir ikijen katak in.

Juõn ian dri tel in kabuñ rein ear ba: “Armij ro rejjab jela bwe bwebwenato ko ilo Baibel elap air aurõk ñõn jibõñ ajiri ro kalek tõmak eo air mõke.” Ewi wãwen nan in katak ko ilo Baibel remaroñ jibõñ ajiri ro ñõn kalek tõmak eo air mõke?

Ejja dri tel in kabuñ in wõt ear ba, “Jeje ko im bwebwenato ko ilo Baibel rej lelok katak ko me ajiri ro remaroñ lemnok im kalomõnlokjen kaki.” Ear kwalok kin bwebwenato ko ilo Baibel kin “Adam im Iv, Kein im Ebel, Devid im Golaiat, lotak eo an Jisõs, dri teltel owõj eo Zakkiõs, parebõl eo kin likao eo ejerwan, im dri Sameria eo emõn.” Ear ba bwe bwebwenato kein rej jet joñok ko “remõn ñõn jibõñ ajiri ro ñõn air lemnok kin men ko raurõk ilo mour an armij einwõt men kein, jela mon, jeorlok bwir, binmour eo, kijirãt, an nanalok jukjuk im ber, kajime kõtan eo air iben Anij im jeblak ñõn e, im kwalok yokwe eo emol ñõn ro jeir im jãtir.” Ear bareinwõt ba: “Jeje kein rej letok joñok ko remõn im elañe ajiri ro rej kajerbali ilo mour ko air, remaroñ bõk tokjen ko rekeie.”

Emol jej aikwij rejañ ajiri ro bwe ren riiti Baibel eo. Bõtab, ajiri ro remaroñ ke “mõke kalomõnlokjen” kin ta ko rej riiti jen Baibel eo im melele kaki?

Ridto ro bareinwõt rej aikwij jibõñ ñõn melele kin ta eo Baibel ej ba. Ñõn wanjoñok, Baibel eo ej kwalok ñõn kij kin juõn eman eo ear jab melele kin mol eo meñe ear “mõke lemnok im kalomõnlokjen” kin men ko ear riiti. Lein ear juõn dri utiej jen Itiopia, ear riiti nan ko an dri kanan Aiseia ak ear jab lukkun melele kaki. Inem ear mõnõnõ in roñjake Pilip, kinke ear kõnan jela melelen men ko ej riiti. (Jerb. 8:​26-​40) Ejjab dri Itiopia eo wõt ear aikwij jibõñ ñõn bõk melele ko. Kij aolep elaptata ajiri ro, jej aikwij bwe juõn en kemeleleik ñõn kij kin katak ko ilo Baibel.

Baibel eo ej kakkil kij: “E lukjõk men in bwebwe ilo buruen juõn ajiri.” (Ken. 22:15) Ajiri ro rej aikwij bwe juõn en tel im katakin ir, im ej erro eo an jemeir im jineir ñõn katakin ir bwe ren mour ilo erreo ekkar ñõn katak ko rej bõk jen Baibel eo im bareinwõt jen congregation eo. Im ejime bwe ajiri ro ren bõk katak kein. Jen ien eo rej drik wõt, ajiri ro rej aikwij jibõñ ñõn kalek juõn tõmak ebin eo ej berber ion Baibel eo bwe ren maroñ erom “ro re ridto, aet . . . ro kin air minene rej maroñ in jela kajen emõn im nana.”​—Hib. 5:​14.