Kajitõk ko jen Ro Rej Riit

Ta ko rej kamakõt juõn ñõn an lemnok bwe ej aikwij bar baptais alen ruo?

Kin jet un ko, juõn eo me emwij an kar baptais emaroñ etale e mõke im lale eor ke berber in an kar baptais im bwelen emaroñ lemnok bwe ej aikwij bar baptais alen ruo. Ñõn wanjoñok, ilo ien eo juõn ej pojõk in baptais, bwelen ej kõmõne juõn men ejakkar ak juõn mõnit enana ilo ittino me elañe ear mwij an kar baptais inem enaj kar bukwelok. Armij in emaroñ ke kar wujleplok mour eo an ñõn Jeova ñe ear kõmõni men kein? Jaab, kinke ñõn an juõn armij wujleplok mour eo an ñõn Jeova, ej aikwij bwijrõk jen mõnit ko retton. Kin men in, juõn armij eo ear kõmõni mõnit kein ilo tõre eo ear baptais, ej aikwij lukkun etale im lale elañe ekkar bwe en bar baptais.

Ak ta kin armij eo im ear jab kõmõn jerawiwi ilo ien eo ear baptais, bõtab elikin an baptais ej kõmõne juõn mõnit enana im ej menin aikwij bwe en jijõt iben juõn kumi in ekajet (judicial committee)? Bwelen ej ba bwe ear jab lukkun melele kin unin an kar baptais, im ear jab mol ilo an kar wujleplok an mour im baptais. Elañe elder ro rej jijõt iben armij in, rejjab aikwij bõkmantak kajitõk ko kin kar baptais eo an, im jab kajitõk iben elañe ej iñjake bwe ear jab mol ilo an kar wujleplok mour eo an im baptais. Unin, kinke armij in emwij an kar roñjake katak eo kin aurõkin im melelen an juõn baptais. Bareinwõt, ear uak “aet” ñõn kajitõk ko kin wujleplok im baptais. Inem ear jokolok iomin dren ilo ien eo ear baptais. Alikar bwe armij in ear lukkun melele kin men eo ear kõmõne im joñõn aurõkin. Kin men in, ilo ien eo elder ro rej jijõt iben armij in, renaj watõke einwõt juõn eo emwij an baptais.

Elañe armij in ej bõkmantak kajitõk eo kin baptais eo an, inem elder ro remaroñ kwalok ñõne bwe en etale Imõniaroñroñ eo ilo kajin belle an March 1, 1960 ilo peij 159 ñõn 160, im February 15, 1964 ilo peij 123 ñõn 126 ijo im ej kemelele kin bar baptais. Ej an juõn mõke kãlet ñõn an bar baptais elañe ej iñjake bwe ear jabwe an melele kin Baibel ilo tõre eo ear baptais.

Ta ko dri Kristian ro rej aikwij lemnok kaki elañe rej kõmõn karõk ko kin jikin jokwe?

Aolep rej aikwij juõn jikin air jokwe. Bõtab, ranin, elõñ armij ro im ejelok imweir mõke. Kin an binlok mour, elaplok abañ ko kin ejmour im kin abañ ko jet, men kein rej kõmõn bwe baamle ko im ro nukuer ren jokwe iben dron. Ilo jet jikin ko ibelakin lõl, baamle ko im ro nukuer rej jokwe iben dron ilo juõn rum im ejelok jikin ñõn ir mõke.

Ejjab kwonan rolul eo an Jeova ñõn kõmõn kien ko ñõn dri Kristian ro ilo congregation ko kajjojo ibelakin lõlin ikijen ia ko rekkar ñõn air maroñ jokwe ie im bareinwõt wõn ro rekkar im remaroñ jokwe ibeir. Bõtab, rolul eo an Anij ej rejañ dri Kristian ro kajjojo ñõn air kajerbal nan in rejañ ko ilo Baibel ñõn air lale elañe armij ro rej jokwe ibeir im ijo rej jokwe ie emõn iman mejen Anij. Ta jet ian nan in rejañ kein?

 Juõn men eaurõk dri Kristian ro rej aikwij lemnok mokta kake ej ewi wãwen an ro rej jokwe ibeir naj jelet ir im mour in jitõb eo air. Kain armij rõt ir? Rej ke kabuñ ñõn Jeova? Rej ke mour ekkar ñõn kien ko ilo Baibel? Dri jilik Paul ear je “Komin jab bwir: kõmao ko renana rej kakõt mõnit ko remõn.”​—1 Kor. 15:33.

Jeje ko ilo Baibel rej kwalok bwe Jeova ej drike lũñ im lejen. (Hib. 13:4) Jeova ej drike jikin jokwe ko im rej kõtlok an eman im kõra ro rejañin mare mour iben dron einwõt ñe rej dri belele. Juõn dri Kristian ej kejbãrok e mõke bwe en jab jokwe ilo jikin ko im mour etton ej walok ie.

Kobatok iben men in, Baibel eo ej rejañ aolep ro rekõnan kabuñburuen Anij ñõn “ko jen lũñ.” (1 Kor. 6:​18) Kin men in, ej juõn men in meletlet ñõn an dri Kristian ro kejbãrok ir bwe ren jab jokwe ilo jikin ko im remaroñ kõmõn bwe ren bo ilo mõnit ko retton. Ñõn wanjoñok, bwelen jet dri Kristian man im kõra rej jokwe ilo juõn wõt im. Air jokwe iben dron emaroñ ke tellok ir ñõn air kõmõni jet men ko rejakkar? Ta elañe ruo armij im rejañin mare im irro ej mõke ilo mweo kinke ro jet ilo mweo rejoko ilo tõre eo? Ilo ejja wãwen in wõt, enaj juõn men ekauwatata ñõn an ruo armij im rej kõnan dron jokwe ilo juõn wõt im. Enaj juõn men in meletlet ñõn ar kejbãrok bwe jen jab mour ilo wãwen in.

Bareinwõt, ejakkar ñõn an armij ro me emwij air jibel wõnmanlok im jokwe iben dron ilo juõn wõt im. Unin kinke emwij air kar iminene in kar jokwe iben dron im rar ebake dron, im men in emaroñ tellok ñõn air kõmõni mõnit ko retton.​—Ken. 22:3.

Bar juõn men aurõk im jej aikwij lemnok kake ej kin wãwen eo ro ilo bukwon eo renaj lemnok kin jokãlet ko ar. Juõn dri Kristian ej aikwij kejbãrok bwe karõk ko ej kõmõni ikijen wõn ro ej jokwe ibeir ak jikin eo ej jokwe ie ren jab kalõkatip armij ro ilo bukwon eo. Jejjab kõnan bwe makõtkit ko ar ren katton etan Jeova. Paul ear je: “Komin jab lõkatipi dri Ju, ak dri Grik, ak eklisia an Anij; Einwõt ña ij kabuñburuen ro otemjej ilo men otemjej, im jab bukot aõ men in kakajuror, a an ro relõñ bwe ren mour.”​—1 Kor. 10:32, 33.

Ejjab juõn men ebiruru ñõn an ro rej kõnan mour ekkar ñõn kien ko an Jeova bukot juõn jikin jokwe ekkar. Meñe eindrein, ak dri Kristian ro rej aikwij kõmõne “men eo ej kabuñburuen Iroij.” Rej aikwij kejbãrok bwe en ejelok jabrewõt mõnit ko rejakkar rej walok iloan moko imweir. (Ep. 5:​5, 10) Dri Kristian ro rej aikwij jar im kajitõk kin tel eo an Jeova im kamaat air maroñ ñõn air kejbãrok dron jen jorran ko ilo kõniek im kõtan air iben Jeova, elaptata ñõn kejbãrok ãt eo ekwojarjar etan Jeova.