Komij Ruwainene ñõn Ial in Mour eo Emõntata!

“Elañe jej mour ak mij, kij dron [Jeova].”​—ROM 14:8.

1. Ta eo Jisõs ear katakin kake kin wãwen mour eo emõntata?

 JEOVA ekõnan bwe jen lõñliñ kin wãwen mour eo emõntata. Armij remaroñ mour ilo elõñ wãwen ko, ak wãwen mour eo emõntata ej ñe jej mour ekkar ñõn Nan eo an Anij im katak jen Nejin Anij, Jisõs Kraist. Jisõs ear katakin dri kalor ro an ñõn kabuñ ñõn Anij ilo jitõb im ilo mol, im ear kakien ir ñõn kõmõn dri kalor ro. (Matu 28:19, 20; Jon 4:​24) Ilo ar mour ekkar ñõn nan in jiroñ ko an Jisõs, jej kabuñburuen Jeova im lõñliñ kin An kejerammõn kij.

2. Ewi wãwen an kar elõñ uak ñõn ennan eo an Ailiñ eo ilo ien ko an dri Kristian ro mokta, im ta kar melelen ñõn air lor ‘Ial eo’?

² Ñe ro etã burueir rej erom dri tõmak im baptais, eor un ko remõn ñõn ar ba, “Kimij karuwaineneik kom ñõn ial in mour eo emõntata!” (Jerb. 13:48) Ilo ien ko an dri Kristian ro mokta, elõñ tausan armij ro jen elõñ ailiñ ko rar mõnõnõ in bõk mol eo im rar kalikar ñõn aolep bwe emwij air wujleplok air mour ñõn Anij ikijen air baptais. (Jerb. 2:​41) Dri kalor ro mokta rar lor ‘Ial eo.’ (Jerb. 9:2; 19:23) Nan in ejejit kinke ro rar erom dri kalor ro an Kraist rar edrep wõt ñõn wãwen mour eo me ej berber ion air tõmak ilo Jisõs Kraist im lor joñok ko an remõn.​—1 Pit. 2:​21.

3. Etke armij ro an Jeova rej baptais, im eor jete oran armij ro rar baptais iomin joñoul yiõ ko remotlok?

³ Kar kamõkajlok jerbal in kõmõn dri kalor ro ilo ran kein eliktata, im kiõ rej kõmõne ilo elõñlok jen 230 ailiñ ko. Iomin joñoul yiõ ko remotlok, elõñlok jen 2,700,000 armij ro rar kãlet ñõn air korijer ñõn Jeova im baptais ñõn kalikar bwe emwij air wujleplok ir ñõn e. Melelen bwe elõñlok jen 5,000 armij ro rej kobatok kajjojo wik! Bebe eo ñõn baptais ej berber ion yokwe eo ar ñõn Anij, jelalokjen eo ar kin Jeje ko, im ar tõmak kin men ko jej katak kaki. Baptais ej buñten ne eo eaurõktata ilo mour eo ar, kinke ej jinoin jimjera eo ar iben Jeova. Ej bareinwõt kwalok kin ar liki bwe enaj jibõñ kij ñõn tiljek wõt ñõn E, einwõt an kar jibõñ dri korijer ro an etto ñõn etetal ilo ial eo an.​—Ais. 30:21.

 Etke Baptais Eaurõk?

4, 5. Kwalok jet ian jerammõn im tokjen ko rej itok jen ar baptais.

⁴ Bwelen emwij am jino bõk jelalokjen eo kin Anij, kõmõn oktõk ko ilo mour eo am, im kiõ kwoj juõn dri kwalok ejañin baptais. Elap ar nebar yuk kin wõnmanlok kein kwar kõmõni. Ak emwij ke am wujleplok yuk mõke ñõn Anij ilo jar, im kwoj reimanlok ke ñõn am baptais? Jen am katak Baibel eo, ejelok berre kwoj kiõ kile bwe men eo eaurõktata ilo mour eo am ej ñõn bõktok nebar ñõn Jeova, im jab ñõn kabuñburuõm mõke im ñõn koorlok mweiuk. (Riit Sam 148:11-​13; Luk 12:15) Inem, ta jet ian jerammõn im tokjen ko rej itok jen ar baptais?

⁵ Einwõt juõn dri Kristian me emwij an wujleplok e mõke ñõn Anij, enaj laptata an or unin mour eo am. Kinke kwoj kõmõnmõn ankilan Anij enaj laplok am mõnõnõ. (Rom 12:​1, 2) Jitõb kwojarjar eo an Jeova enaj jibõñ yuk ñõn ejaak karkar ko karkarin Anij einwõt ainemõn im tõmak. (Gal. 5:​22, 23) Anij enaj uake jar ko am im kejerammõn yuk ilo am kate yuk ñõn mour ekkar ñõn Nan eo an. Kwonaj lo lõñliñ ilo am jerbal in kwalok nan, im ilo am mour ekkar ñõn wãwen eo Anij ej buñburuen kake, men in enaj kakajurlok kejatrikrik eo am kin mour indrio. Bareinwõt, am wujleplok im baptais enaj kwalok bwe kwoj lukkun kõnan erom juõn ian Dri Kennan ro an Jeova.​—Ais. 43:10-​12.

6. Ta eo baptais eo ar ej kalikare?

⁶ Ilo ar wujleplok kij mõke ñõn Anij im baptais, jej kalikar ñõn aolep bwe jej ro dron Jeova. Dri jilik Paul ear je, “Bwe ejelok iar ej mour ñõn e mõke, im ejelok en ej mij ñõn e mõke. Bwe elañe je mour, jej mour ñõn Iroij; ak elañe je mij, ñõn Iroij jej mij: inem elañe jej mour ak mij, kij dron Iroij.” (Rom 14:​7, 8) Anij ear kwalok bwe ej kaurõk kij kajjojo ilo an kar letok ñõn kij anemkwoj eo ñõn kãlet. Ñe jej beek ilo buruer ñõn jibarek ial in mour in kinke jej yokwe E, jej kamõnõnõik buruen Anij. (Ken. 27:11) Baptais eo ar ej kõkkar kin wujleplok eo ar ñõn Anij im ej kalikar ñõn aolep bwe Jeova ej Iroij eo ar. Ej kwalok bwe jar kãlet ñõn rejetake iroij potata eo an. (Jerb. 5:​29, 32) Tokjen men in, Jeova ej ber iber. (Riit Sam 118:6, UBS.) Baptais ej bareinwõt kebellok ial eo ñõn ar bõk elõñ jerammõn ko jet kiõ im ilo ran ko rej ber iman.

Jerammõn eo kin Ro Jeer im Jãter

7-9. (a) Ta kalimur eo Jisõs ear lelok ñõn ro rar ilok jen aolep men ko air ñõn lor e? (b) Ewi wãwen an jejit kitien kalimur eo an Jisõs ilo Mark 10:29, 30?

⁷ Dri jilik Piter ear ba ñõn Jisõs: “Lo, kim ar ilok jen men otemjej, im lor Yuk: kin men in, ta eo e naj am?” (Matu 19:27) Piter ear kõnan jela kin ta eo enaj walok ñõn e im dri kalor ro  jet an Jisõs ilo ran ko renaj itok. Ñõn air kajerbal aolepen maroñ ko air ñõn kõmõne jerbal in kwalok nan kin Ailiñ eo, rein rar karmijete men ko raurõk ibeir. (Matu 4:​18-​22) Ta kalimur eo Jisõs ear lelok ñõn ir?

⁸ Ilo ejja bwebwenato eo ilo buk in Mark, Jisõs ear kalikar bwe dri kalor ro an renaj mõtõn dri tõmak ro jeer im jãter ilo ien ko etto. Ear ba: “Ejelok armij eo e ar likit im, ak jein im jãtin man im kõra rõn, ak jemen, ak jinen, ak ro nejin, ak ene ko enen, kin Ña im kin gospel, a e naj bõk jibuki kin juõn ilo ien in, mo ko, im jein im jãtin man im kõra rõn, im ro jinen, im ro nejin, im enen, kab matõrtõr ko; im ilo lõl e naj itok, mour in drio.” (Mark 10:29, 30) Dri Kristian ro mokta, einwõt Lidia, Akula, Prisilla, im Geiõs, rar jet ian ro im rar kebellok “mo ko” imweir im rar erom “jein im jãtin man im kõra rõn, im ro jinen” dri tõmak ro mõtair, einwõt an kar Jisõs kalimur.​—Jerb. 16:14, 15; 18:​2-4; 3 Jon 1, 5-8.

⁹ Ranin, elaplok an jejit kitien men eo Jisõs ear ba. “Ene ko” me dri kalor ro an rar ilok jeni rej jitõñlok ñõn jikin jerbal ko me elõñ rar mõnõnõ in bwijrõk jeni bwe ren maroñ kowõnmanlok men ko an Ailiñ in Anij ilo ailiñ ko jet, im jet ian rein ej kitibuj mejinede ro, ro uan baamle in Bethel, dri jerbal in ekkal ro, im ro jet. Elõñ ro jeer im jãter rar ilok jen moko imweir bwe ren maroñ bõk juõn wãwen mour elamwan, im ej juõn menin kalõñliñ ñe jej roñ bwebwenato ko air kin wãwen an kar Jeova kejbãrok ir im wãwen air jerbal ñõn e ear kamõnõnõik ir. (Jerb. 20:35) Bareinwõt, aolep dri korijer ro an Jeova me emwij air baptais remaroñ lõñliñ kin jerammõn eo ñõn “bukot mokta ailiñ in Anij, im kwojarjar eo An” iben dri Kristian ro jeir im jãtir ibelakin lõl.​—Matu 6:​33.

Bõk Kejbãrok “ilo Jikin Etino” Eo

10, 11. Ta “jikin etino an Eo eutiejtata,” im ewi wãwen jemaroñ ber ilo jikin in?

¹⁰ Wujleplok im baptais ej bareinwõt letok jerammõn eo ñõn jokwe “ilo jikin etino an  Eo eutiejtata.” (Riit Sam 91:1.) Jikin in ej kõkkar kin juõn wãwen ber ejokõne im bõk kejbãrok jen men ko remaroñ kokkure kõtan eo ar iben Jeova. Ej juõn “jikin etino” kinke ro wõt im rej bõk lemnok eo an Anij kin men ko im rej liki e remaroñ bõk wãwen ber in ejokõne. Ilo ar mour ekkar ñõn wujleplok eo ar im jerbale liki eo ar ilo Jeova, ilo juõn wãwen, ej einwõt ñe jej ba ñõn e: “[Kwoj] aõ likepijñõk im aõ me; aõ Anij, I naj liki E.” (Sam 91:2) Jeova Anij enaj erom jikin kone eo ar. (Sam 91:9) Ejelok juõn jikin einwõt in.

¹¹ Ar maroñ ber ilo “jikin etino” eo an Jeova ej bareinwõt kalikar bwe emwij ar bõk jerammõn eo ñõn ejaak juõn jimjera ebak iben. Men in ej jino ilo ien eo jej wujleplok kij mõke im baptais. Elikin ar kõmõne men in, jej kakajurlok kõtan eo ar iben Anij ilo ar druaklok ñõn e ikijen ar katak Baibel, jar jen buruer, im bokake aolep ien. (Jem. 4:8) Ejelok juõn elaplok an kar ebake Jeova ijellokin wõt Jisõs, eo ear lukkun liki dri Kõmõnmõn eo an. (Jon 8:​29) Kin men in, jen jab berre Jeova ak kõnan im maroñ eo an ñõn jibõñ kij kajejit wujleplok eo ar ñõn e. (Ekk. 5:4) Menin letok ko ilo jitõb me Anij ear kapoji ñõn armij ro an rej kamol bwe ej yokwe kij im ekõnan bwe jen lo tõbrõk ilo ar korijer ñõn e.

Kaurõk Kõtan eo Ar Eainemõn

12, 13. (a) Ta in paredais eo ilo jitõb? (b) Ewi wãwen jemaroñ jibõñ ro rekãl?

¹² Wujleplok im baptais rej bareinwõt kebellok ial eo ñõn ar dreloñ ilo paredais eo ilo jitõb ak juõn wãwen ber eainemõn im burukuk me dri korijer ro an Jeova rej lõñliñ kake. Ej juõn wãwen ber ejejuan an ro eor juõn kõtan eainemõn iben Jeova Anij im iben dron. (Sam 29:11; Ais. 54:13) Ejelok jabrewõt men ilo lõl in ej einlok wõt wãwen ber in ejejuan. Men in elaptata an alikar ilo kwelok ko relap me rej walok ibelakin lõl, ijo ro jeer im jãter jen ailiñ im kajin ko rej kweloklok iben dron ilo ainemõn, burukuk, im yokwe.

¹³ Wãwen ber in ejokõne me jej lõñliñ kake ej lukkun oktõk jen wãwen ko relukkun nana ilo lõl in ranin. (Riit Aiseia 65:13, 14.) Ilo ar keañ kin ennan eo an Ailiñ eo, eor iber jerammõn eo ñõn ar kwalok ñõn ro jet nan in kir eo ñõn air kobatok ilo wãwen ber in ejokõne. Ej bareinwõt juõn jerammõn ñõn ar jibõñ ro rekãl ilo congregation eo im remaroñ bõk tokjen jen kaminene eo rej bõke ilo jerbal in kwalok nan. Iomin tel eo an elder ro, jemaroñ bõk jerammõn eo ñõn jibõñ ro rekãl, einwõt an kar Akula im Prisilla “kemeleleik im kalikarlok ial in Anij” ñõn Apollõs.​—Jerb. 18:24-26.

Wõnmanlok Wõt im Katak jen Jisõs

14, 15. Ta un ko remõn eor iber ñõn ar wõnmanlok wõt im katak jen Jisõs?

¹⁴ Eor un ko remõn iber ñõn ar wõnmanlok wõt im katak jen Jisõs. Mokta jen an kar mour ion lõl einwõt juõn armij, Jisõs ear jerbal iben Jemen iomin elõñ tausan yiõ ko. (Ken. 8:22, 30) Ear jela bwe ial in mour eo emõntata ej berber ion an korijer ñõn Anij im an kwalok nan kin mol eo. (Jon 18:37) Ear alikar ñõn Jisõs bwe wãwen mour ko jet ej kwalok jitõbõn kibbon im jab kwalok lolokjen. Ear jela bwe enaj lap air melejoñwe e im naj mõne ñõn mij. (Matu 20:18, 19; Hib. 4:​15) Jisõs, eo ej Joñok eo emõntata, ear katakin kij kin wãwen eo jemaroñ drebij wõt ar tiljek.

¹⁵ Ejjabto elikin an kar Jisõs baptais, Setan ear kajeoñ kabo e bwe en ilok jen ial in mour eo emõntata, ak ear jab lo tõbrõk. (Matu 4:​1-​11) Men in ej katakin kij bwe jekron ta eo Setan ej kõmõne, jemaroñ drebij wõt ar tiljek. Ekkã an kajeoñ in kabo ro rej pojõk in baptais im bareinwõt ro ej kab mwij air baptais. (1 Pit. 5:8) Ro uan baamle eo ar remaroñ jumae kij kinke rar roñ nan ko rejjab mol kin Dri Kennan ro an Jeova im rej bõk lemnok eo bwe rej kejbãrok kij. Bõtab, melejoñ rõt kein rej kebellok ñõn kij ien ko remõn ñõn ar kwalok  karkar ko karkarin Kristian, einwõt koutiej im joij, ilo ien eo jej uaki kajitõk ko im kwalok nan. (1 Pit. 3:​15) Wãwen kein jej jelmaiki remaroñ jelet ro rej roñjake kij ilo juõn wãwen emõn.​—1 Tim. 4:​16.

Edrep Wõt ñõn Ial in Mour eo Emõntata!

16, 17. (a) Ilo Duteronomi 30:19, 20, ta men ko jilu jej aikwij kõmõni ñõn ar maroñ bõk mour? (b) Ewi wãwen an kar Jisõs, Jon, im Paul rejetake men eo Moses ear je?

¹⁶ Enañin 1,500 yiõ ko mokta jen an Jisõs ber ion lõl, Moses ear rejañ dri Israel ro ñõn kãlet ial in mour eo emõntata. Ear ba: “Ij kir ñõn lõñ im ñõn lõl bwe ren kennan nae yuk ranin, bwe emwij aõ kwalok ñõn yuk mour im mij, kejerammõn im kejerata: inem kwon kãlet mour bwe kwon mour wõt, kwe im ro ineõm; bwe kwon yokwe Jeova am Anij, ñõn bokake ainiken, im edrep ñõn E.” (Dut. 30:19, 20) Dri Israel ro rar jab tiljek ñõn Anij, bõtab men ko jilu jej aikwij kõmõni me Moses ear kwalok kaki ñõn bõk mour rar jab oktõk. Jisõs im ro jet rar bareinwõt kwalok kaki.

¹⁷ Ken kajuõn, ‘jej aikwij yokwe Jeova ar Anij.’ Jej kwalok bwe jej yokwe Anij ilo ar jerbal ekkar ñõn wãwen ko an rewãnik. (Matu 22:37) Ken karuo, jej aikwij ‘bokake ainiken Jeova’ ilo ar katak Nan eo an im bokake kien ko an. (1 Jon 5:3) Men in ej melelen bwe jej aikwij keini ar ber ilo kwelok ko an Kristian, ijo jej katak kin Baibel eo. (Hib. 10:23-​25) Ken kajilu, jej aikwij ‘edrep ñõn Jeova.’ Jekron ta eo jej jelmaiki, ien otemjej jej aikwij jerbale tõmak eo ar ilo Anij im lor Nejin.​—2 Kor. 4:​16-​18.

18. (a) Ewi wãwen an kar Imõniaroñroñ eo ilo yiõ eo 1914 kwalok kin mol eo? (b) En kar ewi iñjake eo ar kin maram im mol eo ranin?

¹⁸ Ej juõn jerammõn elap ñõn ar mour ekkar ñõn mol eo ilo Baibel! Ilo yiõ eo 1914, kar je nan kein raurõk ilo Imõniaroñroñ eo: “Kij ejjab juõn armij ejerammõn im mõnõnõ ke? Anij eo ar ejjab tiljek ke? Ñe juõn ejela kin jabrewõt men emõnlok, en bõke. Elañe jabrewõt iami ej lo juõn men emõnlok, kimij kejatrikrik bwe kom naj jiroñ kim. Ejelok men en emõnlok kim jela kake ak joñõn emõn in wõt men eo kim ar loe ilo Nan in Anij. . . . Ejelok juõn men emaroñ kwalok kin ainemõn, lõñliñ, im jerammõn eo me jelalokjen eo ealikar kin Anij eo emol ear bõktok ñõn buruer im mour eo ar. Bwebwenato eo kin meletlet, ekajet jime, kajur im yokwe eo an Anij, ej kabwe aikwij ko ar ilo lemnok im iñjake. Ebar ejelok men eo jej bukote. Men eo elaptata ar kõnan ej ñõn kalaplok jelalokjen eo kin Anij eo ar.” * (The Watch Tower, Tijemba 15, 1914, peij 377-378) Kamolol eo ar kin maram im mol eo ilo Baibel ejjab oktõk. Ilo mol, eor iber kiõ juõn un elaplok ñõn ar lõñliñ bwe jej “etal ilo maram jen Jeova.”​—Ais. 2:5; Sam 43:3; Ken. 4:​18.

19. Etke ro ej tellokir ñõn baptais rej aikwij bõk buñten ne in ilo mõkõj?

¹⁹ Elañe kwokõnan “etal ilo maram jen Jeova” ak kwojañin wujleplok am mour im baptais einwõt juõn Kristian, kwon jab aiberber. Kwon kõmõne jabrewõt men kwoj aikwiji ñõn tellokin am baptais, eo ej wãwen eo ejejuan ñõn ar kwalok kamolol kin men eo Anij im Kraist rar kõmõne ñõn kij. Lelok ñõn Jeova men eo eaurõktata ibõm, mour eo am. Kwalok bwe kwonaj kõmõnmõn ankilan Anij ilo am lor Nejin. (2 Kor. 5:​14, 15) Ejelok berre, eñin ial in mour eo emõntata!

[Kamelele eo itulals]

Ewi Wãwen Am Naj Uak?

• Ta eo baptais eo ar ej kõkkar kake?

• Ta jerammõn ko rej itok jen ar wujleplok kij mõke ñõn Anij im baptais?

• Etke elukkun aurõk ñõn ar katak jen Jisõs?

• Ta eo enaj jibõñ kij ñõn edrep wõt ñõn ial in mour eo emõntata?

[Kajitõk ko ñan katak]

[Kamelele in juõn pija ilo peij 25]

Ilo am baptais kwoj kwalok bwe kwar kãlet ial in mour eo emõntata

[Kamelele in juõn pija ilo peij 26]

Kwoj ke bõk kejbãrok ilo “jikin etino” eo?