Kwoj Watõk ke Jeova Einwõt Juõn Jemõm?

KE JUÕN ian dri kalor ro an Jisõs ear kajitõk: “Iroij, kwon katakin kim kin jar.” Jisõs ear uak: “Ñe kom jar, komin ba, Jememuij, En kwojarjar Etõm.” (Luk 11:​1, 2) Jisõs emaroñ kar kajerbal title ko reutiej ñõn jitõñlok ñõn Jeova einwõt “Eo Laplap,” “Dri Kaki,” “Dri Kõmõnmõn,” “Juõn eo ekar mour indrio,” im “Kiñ eo Ej mour wõt jen in drio ñõn in drio.” (Jen. 49:25; Ais. 30:20; 40:28; Dan. 7:9, UBS; 1 Tim. 1:​17) Jen an eindrein, Jisõs ear kãlet nan eo “Jememuij.” Etke? Bwelen kinke ekõnan bwe jen kebake Eo eutiejtata ijoko otemjej ilõñ im ilõl ilo wãwen eo juõn ajiri etã buruen ej kebake jemen, eo elap an yokwe.

Bõtab, jet armij ebin air watõk Anij einwõt juõn jemeir. Juõn Kristian etan Atsuko * ej ba, “Elõñ yiõ ko elikin aõ kar baptais, ear bin aõ druaklok ñõn Jeova im jar ñõn e einwõt juõn Jema.” Ej kwalok unin an kar bin men in, “Ijjab maroñ kememej juõn ien me jema ear kwalok an yokwe iõ.”

Ilo ran kein eliktata, “yokwe” eo me juõn ej kõtõmene jen jemen elukkun jokolok. (2 Tim. 3:​1, 3) Inem ejjab juõn menin bwilõñ ñe armij ro rej bõk ejja iñjake eo wõt an Atsuko. Bõtab, ej menin kõkãtõk ñõn jela bwe eor un ko remõn ñõn ar watõk Jeova einwõt juõn Jemer me elap an yokwe.

Jeova Ej Juõn Dri Letok Elap An Yokwe

Elañe jekõnan watõk Jeova einwõt juõn jemer, jej aikwij jela kajen. Jisõs ear ba: “Ejelok en e jela Nejin, a Jema wõt, im ejelok en e jela Jema, a Nejin wõt, im jabrewõt eo Nejin e kõnan kwalok E ñõn e.” (Matu 11:27) Wãwen eo emõntata ñõn ar jela kin Jeova einwõt juõn Jemer ej ilo ar lemnok kin men ko Jisõs ear kwaloki kin Anij eo emol. Inem, ta eo Jisõs ear kwalok kake kin Jemen?

Ilo an kar kile im koutiej Jeova einwõt Eo ej Unjen mour eo an, Jisõs ear ba: “Ña Ij mour kin Jema.” (Jon 6:​57) Kij bareinwõt jej muri kin mour ko ar ñõn Jemer ilõñ. (Sam 36:9; Jerb. 17:28) Ta eo ear kamakõt Jeova ñõn lelok mour ñõn ro jet? Ejjab ke kin an yokwe? Alikar jej aikwij bar yokwe Jemer ilõñ kin menin letok in.

Wãwen eo elaptata Anij ear kwalok an yokwe armij ro ej ikijen menin letok eo kin katok in binmour eo an Jisõs. Binmour eo ear kamaroñ armij ro rejerawiwi ñõn bõk juõn kõtan ebak iben Jeova ikijen eo Nejin ej mõke wõt. (Rom 5:​12; 1 Jon 4:​9, 10) Im kinke Jemer ilõñ ej juõn Eo ej kajejit kalimur ko an, jemaroñ liki bwe aolep ro rej yokwe im bokake e renaj lo mõnõnõ kin “anemkwojan in aibujuij an ro nejin Anij.”​—Rom 8:​21.

Jemer ilõñ ej bareinwõt “kõtak al” ior ran otemjej. (Matu 5:​45) Jemaroñ jab lemnok bwe ej juõn men eaurõk ñõn ar jar bwe al en tak. Bõtab, elap ar aikwiji im jej mõnõnõ ñe ej romak! Bareinwõt, Jemer ilõñ ej juõn Dri Letok jejamin keiri, ejela kin aikwij ko ar mokta jen ar kajitõk iben. Kin men in, jejjab aikwij ke kar bõk ien ñõn etale im kalomõnlokjen kin wãwen Jemer ilõñ ej kejbãrok menin kõmõnmõn ko an?​—Matu 6:​8, 26.

 Jemeruij Ilõñ Ej Juõn “Likepijñõk”

Nan ko an Jeova ñõn Ebream ilo Jenesis 15:1 rar lukkun kainemõn e. Jeova ear ba: “Kwon jab mijõk: Ña am likipijñõk.” Bareinwõt jar eo an Jisõs ilo boñin eo eliktata in an kar mour ion lõl, ej rejetake melele in bwe emol Jeova ej juõn “likepijñõk.” Kin an Jisõs inebata kin dri kalor ro an, ear jar: “Ij iwij ñõn Yuk. Jema Kwojarjar, kwon kejbãrok ir ilo etõm.” (Jon 17:11, 14) Jeova ear lale im kejbãrok dri kalor ro an Jisõs.

Juõn wãwen Anij ej kejbãrok kij jen menin etao ko an Setan ranin ej ilo an letok ekan ko lor jitõb ilo ien eo ejejit ikijen “dri korijer e tiljek im meletlet.” (Matu 24:45) Bwe jen “kõnõk aolepen ken tõrinae an Anij” ej aurõk bwe jen bõk ekan kein rej kakajur kij. Ñõn wanjoñok, lemnok kin “ken tõrak in tõmak,” me ej kamaroñ kij ñõn “kwũni mõri kijeek otemjej an eo dri nana.” (Ep. 6:​11, 16) Tõmak eo ar ej kejbãrok kij jen ar jorran ilo jitõb im ej kwalok bwe jej kile kajur eo an Jeova ñõn kejbãrok kij.

Jemaroñ kalaplok ar jela kin kejbãrok eo an Jemer ilõñ ikijen ar etale wãwen makõtkit ko an Nejin Anij ke ear ber ion lõl. Lale bwebwenato eo me kar je ilo Mark 10:13-​16. Ilo eon kein, Jisõs ear ba ñõn dri kalor ro an: “Komin likit ajiri rõn bwe ren itok ñõn iba.” Ke ajiri ro rar kabole e, Jisõs ear jiburlep ir im kejerammõn ir. Remaroñ kar lukkun mõnõnõ! Im kinke Jisõs ear ba: “Eo e ar lo Ña, e ar lo Jema,” jejela bwe Anij eo emol ekõnan bwe jen ebakelok e.​—Jon 14:9.

Jeova Anij ej unjen yokwe eo ejelok joñõn. Ej juõn Dri Letok im Dri Kejbãrok jejamin keiri im ekõnan bwe jen druaklok ñõn e. (Jem. 4:8) Inem ejelok kajitõk bwe Jeova ej juõn Jemen emõntata!

Jej Bõk Elap Tokjen!

Jej bõk elap tokjen jen ar likit ar liki ilo Jeova einwõt Jemer ilõñ eo me elap an yokwe im kea. (Ken. 3:​5, 6) Jisõs ear bõk tokjen jen an kar lukkun liki Jemen. Kraist ear jiroñ dri kalor ro an: “Ña I jab mõke iaõ, a Ña im Jema eo e ar jilkintok Iõ.” (Jon 8:​16) Ien otemjej Jisõs ear liki bwe Jeova ej rejetak e. Ñõn wanjoñok, ilo ien eo ke ear baptais, ear bõk nan in kõkãtõk jen Jemen ke Ear ba: “E in Nejiõ jitenburu iba, Ij mõnõnõ kake.” (Matu 3:​15-​17) Im jejjo ien mokta jen an mij, Jisõs ear lamij im ba: “Jema Ij lewoj Aõ ilo peõm.” (Luk 23:46) Liki eo an Jisõs ilo Jemen ear kajur wõt.

Emaroñ bar eindrein iber. Kinke Jeova ej ber iber, ejelok unin ar aikwij mijõk. (Sam 118:6) Atsuko, eo kar konono kake ilo jinoin, ear iminene in atartar ion kajur eo an mõke ke ear jelmae abañ ko. Bõtab ear katak kin mour eo an Jisõs im jerbal in kwalok nan eo an, elaptata kin kõtan eo an Jisõs iben Jemen ilõñ. Ta tokjen? Atsuko ej ba: “Iar katak kin tokjen an or juõn Jemer im ñõn atartar wõt ion.” Ej wõnmanlok wõt im ba: “Iar lo ainemõn im mõnõnõ eo emol. Ilo mol, ejelok unin ar aikwij inebata kin jabrewõt men.”

Ewi wãwen enaj laplok ar bõk tokjen jen ar watõk Jeova einwõt juõn Jemer? Ekkã an ajiri ro yokwe jemeir im jineir im kõnan kamõnõnõik ir. Kin an Nejin Anij yokwe Jemen ‘ien otemjej ear kõmõn men ko rej kabuñburuen.’ (Jon 8:​29) Ilo ejja wãwen in lok wõt, yokwe eo ar ñõn Jemer ilõñ emaroñ kamakõt kij ñõn kõmõni men ko rejime im “kamolol” e.​—Matu 11:25; Jon 5:​19.

Jemer Ilõñ ‘Ej Kapjere Anbijmaroñir’

Jemer ilõñ ear bareinwõt letok juõn “Ri Jibañ,” ej jitõb kwojarjar eo an. Jisõs ear ba: “Enaj tel kom ñan mol otemjej.” (Jon 14:15-​17; 16:12, 13, UBS) Jitõb kwojarjar eo an Anij emaroñ jibõñ kij bwe en laplok ar melele  kin Jemer. Emaroñ jibõñ kij ñõn jumae “me in tarinae ko rebbin,” melelen tõmak ko ejelok berberir, im lemnok ko rebwir, ilo wãwen in jenaj “anjo ion lemnak otemjej im kõmmõn bwe ren bokake Christ.” (2 Kor. 10:​4, 5, UBS) Kin men in, jen jar ñõn Jeova kin “Ri Jibañ” eo ear kalimur kake im liki bwe ‘Jemeruij i lõñ [enaj] lelok Jitõb Kwojarjar ñõn ro otemjej rej kajitõk iben.’ (Luk 11:13) Ej bareinwõt ekkar bwe jen jar kin jitõb kwojarjar eo bwe en jibõñ kij druaklok ñõn Jeova.

Juõn ajiri ej jokõne, ejelok an uõta, im ejjab mijõk ñe ej jibwe pein jemen im etetal. Elañe kwoj lukkun watõk Jeova einwõt juõn Jemõm, kwomaroñ liki nan kein rekainemõn: “Ña Jeova, am Anij, I naj kapjere anbijmaroñõm, im ba ñõn yuk, Kwon jab mijõk; I naj jibõñ yuk.” (Ais. 41:13) Kwomaroñ bõk jerammõn eo ñõn etetal iben Anij ñõn indrio. Kwon wõnmanlok im kõmõnmõn ankilan, inem kwonaj lo yokwe, lõñliñ, im jokõne eo me ej itok jen am watõk Jeova einwõt juõn Jemõm.

[Kamelele eo itulal]