Kajitõk ko jen Ro Rej Riit

Eon eo ilo Ezekiel 18:20, UBS me ej ba bwe “nejin ejjab aikwij in iñtan kin jerawiwi ko an jemen” ej ke jumae eon eo ilo Exodus 20:5, me ej ba bwe Jeova enaj “jibel nana an ro jemeir ion ro nejir”?

Rejjab jumae dron. Nan ko ilo juõn ian eon ko ej kalikar bwe kajjojo armij ej aikwij uak kin kõmõn ko an mõke im nan ko ilo eon eo juõn ej kalikar kin wãwen bwir eo an juõn armij emaroñ jelet ro nejin im ro jibwũn.

Ezekiel japter 18 ej kwalok kin aurõkin an kajjojo armij aikwij uak kin kõmõn ko an mõke. Eon 4 ej ba: “Armij eo wõt ej jerawiwi, enaj mij.” Ta kin juõn eman “elab an emmõn im wãnik im mol”? “Enaj mour.” (Ezek. 18:5, 9, UBS) Ilo wãwen in, ñe emõn ridtõn armij eo im emelele kin erro ko an, naj ekajete kajjojo armij “ekkar ñõn kõmmõn ko an.”​—Ezek. 18:30, UBS.

Lemnok in ej alikar ilo wãwen eo ear walok ñõn juõn dri Livai etan Korah. Ilo ien eo dri Israel ro rar ito itak ilo ene jemaren eo, Korah ear jab juburu kin jerbal ko me Jeova ear lelok ñõn e. Ilo an kar kajeoñ in bõk jerbal ko an pris, Korah im ro jet rar jumae Moses im Aron, ro me Jeova ear jitõñ ir. Kin air wãlok im kõnan bõk jerbal in, juõn jerammõn me ejjab  tellokir, Jeova ear mõn Korah im jar eo rar jumae. (Bwin. 16:​8-​11, 31-​33) Bõtab, ro nejin Korah rar jab kobalok iben ilo jumae eo. Anij ear jab narueir kin jerawiwi eo an jemeir. Tiljek eo air ñõn Jeova ear kejbãrok mour ko air.​—Bwin. 26:10, 11.

Ak ta kin nan in kakkil eo ilo Exodus 20:5 me ej mõtõn Kien ko Joñoul? Bar juõn alen, etale aolepen jepta eo. Jeova ear kajutõk bujen kien eo iben ailiñ in Israel. Elikin air kar roñjake kakien ko an bujen eo, rar ba: “Men otemjej Jeova e ar konono, kim naj kõmõni.” (Ex. 19:5-8) Einwõt juõn ailiñ, rar koman juõn kõtan emõn iben Jeova. Kin men in, nan ko ilo Exodus 20:5 rar jitõñlok ñõn aolepen ailiñ in Israel.

Ke dri Israel ro rar tiljek wõt ñõn Jeova, aolepen ailiñ eo ear bok tokjen im rar mõnõnõ kin elõñ jerammõn ko. (Liv. 26:​3-8) Bõtab, ke ailiñ in Israel ear karmijete Jeova im lor Anij ko rewan, ear bok jerammõn im kejbãrok eo an jen ir, im ailiñ eo ear jerata. (Ekaj. 2:​11-​18) Emol bwe elõñ ro rar drebij air tiljek im kejbãrok kien ko an Anij meñe dri ailiñ eo rar kabuñ ñõn ekjõp. (1 Kiñ. 19:14, 18) Ro rar tiljek remaroñ kar iion abañ kin jerawiwi eo an ailiñ eo, bõtab Jeova ear kwalok an joij ñõn ir.

Ke dri Israel ro rar beran ilo air kokkure kien ko an Jeova ñõn joñõn eo ear koman bwe ãt eo etan en erom men in kajirere ñõn dri ailiñ ko jet, Jeova ear bebe bwe en kajeik armij ro an ilo an kõtlok bwe ren ber ilo kamakoko ilo Babilõn. Alikar, ej koba kaje eo an kajjojo armij im an armij ro an einwõt juõn kumi. (Jerm. 52:​3-​11, 27) Emol, Baibel eo ej kwalok bwe joñõn an lap nana eo ailiñ in Israel ear kõmõne, ear jelet ebeben eo ken kajilu, ken kemen, im ebeben ko jet tokelik einwõt an Exodus 20:5 kwalok kake.

Ebar or bwebwenato ko ilo Nan in Anij kin wãwen jerawiwi ko an jemen im jinen remaroñ jelet baamle eo. Pris eo Elap etan Ilai ear kaillu Jeova ilo an kar kõtlok bwe ‘dri nana’ ro nejin me rej mour etton ren ber wõt ilo jerbal in pris. (1 Sam. 2:​12-​16, 22-​25) Kinke ear laplok an Ilai koutiej lõmaro nejin jen Jeova, Anij ear kakien bwe baamle eo an Ilai en to jen jerbal eo eutiej an pris im men in ear jino iben Ebaiatar, ladrik eo nejin leo jibwin. (1 Sam. 2:​29-​36; 1 Kiñ. 2:​27) Lemnok in ilo Exodus 20:5 ej bareinwõt alikar ilo wanjoñok eo an Gihezai. Ear jerwane jerbal eo an einwõt dri korijer eo an Ilaisha ñõn bok mweiuk ko me dri Tel eo an jarin tõrinae eo an Siria etan Neaman ear kõnan lilok kin air kar kemour e jen nañinmij eo an. Ikijen Ilaisha, Jeova ear kwalok kaje eo an ilo an ba: “Nañinmij in leper an Neaman e naj edrep ñõn yuk, im ñõn ineõm ñõn in drio.” (2 Kiñ. 5:​20-​27) Kin men in, bwir eo an Gihezai ear jelet ro nejin im ro jibwin.

Einwõt dri Kõmõnmõn eo im dri Letok-Mour eo, eor an Jeova maroñ ñõn bebe kin ta kaje eo ejime im ekkar. Kemelele ko itu lõñ kin men ko rar walok ej kwalok bwe jerawiwi ko an jimair im jibwiir remaroñ jelet ajiri ro ak ro jibwiir ilo nana. Bõtab, Jeova ej “roñjake lamij an eo dri jorran” im kajjojo armij ro emol air kõnan kebake e remaroñ bõk jerammõn jen e im bareinwõt jibõñ.​—Job 34:⁠28.

[Kamelele in juõn pija ilo peij 29]

Korah im jar in dri jumae ro mõtõn rar aikwij uak kin kõmõn ko air