Jeova Ekõnan bwe Kwon Jab Jorran

ÑE ENAJ itok ien eo elap an kauwatata, Armagedõn, Anij eo Ekajur Potata enaj “kejbãrok” aolep ro im rej kabuñburuen. (Sam 31:​23) Ak, ilo mol, ien otemjej Jeova ekõnan kejbãrok armij ro jen men ko rekauwatata. Kinke Anij “[Ej] unin mour,” ej watõk armij otemjej bwe raurõk, im rej tellokin an Jeova kejbãrok ir.​—Sam 36:9, UBS.

Dri korijer ro an Anij ilo ien ko etto rar bõk ejja lemnok eo an Anij kin mour. Ekkar ñõn Jenesis 33:18, elikin an Jekõb im baamle eo an etetal ilo juõn ial ekauwatata, rar tõkãktok jikin eo rar jibareke “ilo ainemõn” ak ilo ejelok jorran. Jekõb ear atartar ion Jeova ñõn an kejbãrok e, ak ear bareinwõt bõk buñten ne ko ñõn an kejbãrok aolep ro im rar itoitak iben. (Jen. 32:​7, 8; 33:14, 15) Ilo am jerbale nan in kakabilek ko ilo Baibel, enaj emõnlok wãwen am kejbãrok mour eo am im mour eo an ro jet. Jen lale ewi wãwen mol in ej jerbal ñõn ro rej kalek Imõn Kwelok ko, lelok jibõñ ilo ien ko elap jorran, im jerbal ko jet reinlok wõt.

Wãwen Kejbãrok Mour Iomin Kien Moses

Kien Moses ear aikwij bwe armij ro an Anij ren lor wãwen ko ñõn kejbãrok mour. Ñõn wanjoñok, ke juõn dri Israel ear kalek mweo imõn, ear aikwij kõmõn worwor in kejenwan in mweo. Kinke ekkã an armij ro ber ilo kejenwan in mweo imweir, worwor ko rar kejbãrok ir jen air wutlok. (1 Sam. 9:​26; Matu 24:17) Elañe ear walok juõn lanwõtwõt kinke rar jab lore kien in, Jeova enaj kar naruõn armij eo imõn mweo.​—Dut. 22:8.

Kaje ko iomin Kien eo ear bareinwõt jerbal ñõn jorran ko rar walok jen menin mour ko. Elañe juõn kau koman ear mõn juõn armij ilo an dribõj e, inem armij eo nejin kau eo enaj kar aikwij kokkure ñõn kejbãrok armij ro jet. Kinke ear jab maroñ kañe ak wia kake kõniekin ñõn ro jet, an kar mõn kau eo nejin ear juõn jerata elap. Ak kiõ ta eo enaj walok elañe armij eo ear jab worwore kau eo nejin elikin an kar dribõj juõn armij? Elañe kau eo ear bar dribõj juõn armij im armij eo emij, inem naj aikwij kare kau eo ñõn mij im mõn armij eo an kau eo. Kien in ear kamakõt aolep armij ro me rar jerwane air lali menin mour ko nejir ñõn air lukkun etale ir mõke.​—Ex. 21:28, 29.

Kien eo ear bareinwõt rejañ armij ro ñõn air kajerbal ilo jime kein jerbal ko air. Elõñ dri Israel ro rar kajerbal ilil ko ñõn jekjek kani. Elañe mãl eo ear jekarlok im jek juõn dri turin, inem eo ear jekjek kani ear aikwij ko ñõn jikin kone eo. Ear aikwij ber ijo mae ien eo emij pris eo elap, im men in emaroñ kar melelen bwe armij eo ear jenolok jen baamle eo an iomin elõñ yiõ ko. Karõk in ear katakin armij ro kin joñõn  an kwojarjar mour iman mejen Jeova. Armij eo me ear bõk ejja lemnok eo an Anij kin mour enaj kar kõmõn bwe kein jerbal ko an ren emõn wõt ñõn kajerbali im jab kajerbali ilo juõn wãwen ekauwatata.​—Bwin. 35:25; Dut. 19:​4-6.

Ikijen kien kein, Jeova ear kalikar kin kõnan eo an bwe armij ro an ren kanuij kejbãrok bwe en jab kauwatata wãwen air jerbal iloan im inabijin mweo imweir. Ro rar kõmõn bwe ro jet ren mij ak jorran, meñe ilo jirullok, eor rueir iben Jeova. Lemnok eo an Jeova kin kejbãrok mour ejjab oktõk. (Mal. 3:6, UBS) Ekõnan bwe armij ro ren bõprae air kejorran ir mõke im ro jet. Men in elaptata an jerbal ñe jej kalek im kejbãrok Imõn Kwelok ko emwij ajelok ñõn kabuñ ñõn Anij eo emol.

 Wãwen Kejbãrok Mour ilo Ien Ekkal

Jej watõk jerbal eo ñõn kalek im kejbãrok Imõn Kwelok ko, ra ko im jibõñ ilo jikin ko jorran ko relap rar jeleti einwõt juõn jerammõn elap. Ien otemjej, jekõnan kõmõne jerbal eo ar ilo bolemen kinke elañe jejjab, meñe jej kõmõni jerbal ko rebiruru, jemaroñ bõktok jorran ko ñõn kij mõke im ro jet. (Ekk. 10:9) Aet, ilo ar iminene in kejbãrok wãwen ar jerbal, jenaj maroñ bõprae an walok jorran ko.

Baibel eo ej ba: “Aibujuij an likao ro, kajur eo air; im men in kalitlit lõlap ro, bõrair re uõn.” (Ken. 20:29) Kin an jodrikdrik ro kajur, remaroñ kõmõne jerbal ko relap, einwõt kwotak men ko reddo. Ak dri jerbal ro me uõn bõrair, ro elap iminene ko ibeir ilo jerbal in ekkal, remaroñ kõmõni jerbal ko jet, einwõt kabinet ko, kainõknõki itõrerein moko, im kejem ko. Ilo juõn ien, ro reridto rar kajerbal kajur eo air ke rar jodrikdrik ñõn kõtõbrõki jerbal ko relap. Elañe kwoj juõn dri jibõñ ekãl, kwon lale wãwen an ro eor iminene ko ibeir jerbal, im lor nan in tel ko air. Elañe kwo kõnan katak, brother ro rekabel ilo jerbal in ekkal eo renaj katakin yuk elõñ men ko. Men kein rej kitibuj wãwen eo ejime ñõn kajerbal men ko rekauwatata, einwõt uno ko ñõn mõn kij ko im men ko eierlok wõt im ñõn kwotak men ko reddo. Ilo  wãwen in, kwonaj lo tõbrõkin jerbal ko am, bõk kejbãrok, im kwonaj lo mõnõnõ.

Dri jerbal ro ilo jikin ekkal ko rej aikwij ekil wõt ien otemjej kinke juõn emaroñ kũb juõn roñ ilo jikin eo ekkã air etetal ie im rejaje kake. Jet dri jerbal ro remaroñ kar kamakõt jikin uwe eo, alal eo, ak juõn bakõj in uno. Elañe kwar mad kin juõn men, emaroñ biruru am iion jorran. Kien ko ikijen kejbãrok ekkã air aikwij an dri jerbal ro kajerbal kein kejbãrok ko air ñe rej jerbal. Mej, at, im juj ko rekkar ñõn jerbal in ekkal remaroñ kejbãrok yuk jen elõñ kauwatata ko ilo jikin ekkal eo. Im kwonaj kejbãrok elañe kwoj kõmõn bwe kein jerbal ko ren emõn wõt ñõn am kajerbali.

Meñe elõñ kein jerbal ko emaroñ biruru ñõn kajerbali, ak kwoj aikwij kamineneik yuk ñõn kajerbali ilo jime im ilo kabel. Elañe kwojañin jela kilen kajerbale kein jerbal eo kwoj aikwiji, inem kwon jiroñ brother eo me ej lolorjake jerbal eo kin men in. Enaj karõk juõn ien bwe kwon katak kilen kajerbale. Am jela joñõn maroñ ko ibõm ej juõn karkar emõn kwokõnan kadreke. Ilo mol, kwoj aikwij jerbale men in ñõn bõpraik yuk im ro jet jen jorran ko remaroñ walok ilo jikin jerbal eo.​—Ken. 11:2.

Elõñ rej jorran ilo jikin ekkal eo kinke rej wutlok jen jikin ko reutiej. Mokta jen am tallõñ ion jikin uwe ak kein tallõñ ko, kwon lale elañe ejelok jorran ko ie im emwij kõlaaki aolep men ko rej aikwiji bwe en jab kauwatata ñe kwoj kajerbale. Elañe kwoj jerbal ion juõn kein tallõñ ak ilo bõrwoj in juõn im, kwoj aikwij kajerbale kein dãbdeb ko ak kein baar ko ñõn kejbãrok yuk jen am wutlok. Kwon kebake eo ej lolorjake jerbal eo elañe eor am kajitõk kin jerbal ilo jikin ko reutiej. *

Ke ej laplok oran armij ro rej korijer ñõn Jeova ibelakin lõl, men in ej kõmõn an laplok aikwij eo ñõn kalek Imõn Kwelok ko im jikin ko jet ñõn kowõnmanlok kabuñ eo emol. Ro rej lolorjake jerbal eo ñõn kalek Imõn Kwelok ko im jerbal ko einlok wõt rej bõk erro eo ñõn kejbãrok s̃ip ro an Jeova me rej jerbal iomin tel eo air. (Ais. 32:​1, 2) Elañe kwoj bõk jerammõn eo ñõn tel dri Kristian ro jeim im jãtim ilo jerbal in ekkal, kwon jab meloklok kin aurõkin ar kejbãrok kij jen jorran. Kwon lale bwe jikin jerbal eo en erreo im bwe men ko rej kabañ yuk ren jab ber ijo. Ilo joij im alikar, kwon kemeleleik ro rej aikwij bõk nan in kakememej ko bwe ren jab jorran ñe rej jerbal. Kwon jab kõtlok bwe ro redrik ak dri jerbal ro ejabwe iminene ko ibeir ren dreloñ ilo jikin ko rekauwatata. Kwon lemnoklok iman kin jorran ko me dri jerbal ro remaroñ jelmaiki, im kapoj ir bwe ren jab jorran ilo jerbal ko air. Kememej bwe mejenkajik eo ar ej ñõn karerelok jerbal eo im bwe ejelok juõn en jorran.

Ijo Kwonan Karkarin Yokwe

Jerbal eo ñõn kalek Imõn Kwelok im jikin ko jet ñõn kabuñ ñõn Anij eo emol ej kitibuj jerbal ko me remaroñ kauwatata. Kin men in, ro rej bõk kwonair ilo jerbal kein rej aikwij lukkun kejbãrok wãwen air jerbal. Ilo am lor nan in kakabilek ko ilo Baibel, bokake kien ko kin jerbal in ekkal, im am kajerbal lolokjen, kwonaj kejbãrok yuk im dri jerbal ro mõtõm jen jorran.

Ta un eo elaptata unin ar kejbãrok bwe en ejelok jorran ilo wãwen ar jerbal? Yokwe eo ar ñõn Jeova ej kamakõt kij ñõn ar kaurõk mour, einwõt e. Im yokwe eo ar ñõn armij ro ej kõmõn bwe jen kejbãrok ir jen jorran. (Matu 22:37-​39) Kin men in, jen kate kij ñõn kõmõne jerbal in ekkal eo ar ilo ejelok jorran.

[Kamelele ko itulõl]

[Box/Pija ilo peij 30]

Wãwen eo ñõn Kajerbal ilo Jime Jikin Uwe Ko

Ilo juõn ian yiõ ko rej kab motlok, elõñlok jen 160,000 dri jerbal ro ilo Amerika rar jorran kin air wutlok jen jikin uwe ko, im enañin 150 armij ro rar mij. Inem, emwij kõlajrõki ilõl jet nan in tel ko me remaroñ jibõñ yuk ñõn kejbãrok bwe kwon jab wutlok jen jikin uwe ko ilo jabrewõt jikin kwoj jokwe ak jerbal ie.

◇ Jab kajerbal juõn jikin uwe me ejjab kwon an jutõk ak ejorran, im jab kajeoñ in kõkãle. Ijellokin men in, kwon joloke im kõmõn bwe ejelok en bar kajerbale.

◇ Aolep jikin uwe ko eor joñõn paun ko remaroñ ber ion. Kanuij kejbãrok bwe joñõn erroũm ekoba kein jerbal ko kwoj kajerbali ren jab le jen joñõn paun ko me jikin uwe eo emaroñe.

◇ Likit jikin uwe eo ion juõn jikin ebin im ejeban wõt juõn. Jab likiti ion juõn men ebiruru an okjak, einwõt ion bakõj ak box ko.

◇ Ien otemjej kwon jallok ñõn jikin uwe eo ñe kwoj wõnliñ ak wõnlõl ion.

◇ Kwon jab jutõk ak jijõt ion kein jutõk ko ruo lõñtata in jabrewõt jikin uwe.

◇ Ñe kwoj kajerbale juõn jikin uwe ñõn tallõñ ak to jen bõrwoj eo, jikin uwe eo ej aikwij aitoklok jilu ne ilõñin bõrwoj eo. Ñõn bõprae bwe neen jikin uwe eo en jab makõtkit, kwon lukwoje ñõn juõn jikin ebin ak dilaik juõn mõtõn alal imanin ne ko. Elañe kwojjab maroñ kõmõni men kein, inem kajitõk iben juõn armij bwe en drebij jikin uwe eo ke kwoj kõmõne jerbal eo am ion. Lukwoje ilõñin jikin uwe eo ñõn juõn men ebin bwe en jab okjak.

◇ Jab kajerbal kein jutõk ko ilo jikin uwe ko ñõn likit alal ko ikõtan bwe kwon maroñ jutõk ion.

◇ Elañe eutiej am jerbal ion jikin uwe eo im kwoj malok, kwomaroñ kõmõn bwe jikin uwe eo en okjak. Kwon bõprae am kõmõne men in ekauwatata. Jen men in, kwon kamakõti jikin uwe eo ilo jabrewõt ien kwoj aikwij bwe en ebake ijo kwoj kõmõne jerbal eo am.

◇ Elañe kwoj aikwij kajerbal jikin uwe eo imanin juõn kejem ekilek, kwon likit juõn nan in kakkil ion kejem eo im lake. Elañe kwojjab maroñ lake, inem kwon likit juõn dri waj ie bwe en kakkil ro rej aikwij drioij im dreloñ ijo.

◇ Kõtlok bwe juõn wõt armij en jerbal ion jikin uwe eo. Ak elañe kar kõmõnmõn jikin uwe eo bwe ruo armij ren maroñ jerbal ion, inem kwomaroñ kõtlok an ruo armij jerbal ion. *

[Kamelele itulõl]

[Pija ilo peij 29]

Kien Moses ear kakien armij ro ñõn kõmõn worwor in kejenwan in mweo imweir