Kajeõrlok Mejõm jen Men ko Rewan!

“Kwon kajeõr meja jen lale wan, im Kwon kãejmour iõ ilo ial ko Am.”​—SAM 119:37.

1. Ewi joñõn an aurõk menin letok eo ñõn lo men ko kin mejer?

 MAROÑ eo ar ñõn lo men ko kin mejer elukkun aurõk! Ikijen maroñ in, jemaroñ lo aolep men ko rej ber ibelakir im uno ko unokair. Maroñ eo ar ñõn lo ej kamaroñ kij ñõn lo ro jerar im men ko rekauwatata me jekõnan kejbãrok kij jeni. Bareinwõt, ikijen mejer jej lo men ko raibujuij, jej kamolol kin menin kõmõnmõn ko rekabwilõñlõñ, im lo kein kamol ko bwe eor juõn Anij im kin aibujuij eo an. (Sam 8:​3, 4; 19:​1, 2; 104:24; Rom 1:​20) Im kinke mejer ej wãwen eo lemnok eo ar ej bõk melele ko, maroñ eo ar ñõn lo ej lukkun aurõk ñõn ar bõk jelalokjen eo kin Jeova im ñõn kalek tõmak eo ar ilo e.​—Josh. 1:8; Sam 1:​2, 3.

2. Etke jej aikwij kejbãrok kij jen men ko jej kalimjeki, im ta eo jemaroñ katak jen kajitõk eo an dri jeje sam ñõn Jeova?

² Bõtab, men ko jej kalimjeki remaroñ bareinwõt bõktok jorran ko ñõn kij. Joñõn an lap wãwen an mejer jelet lemnok eo ar, emaroñ kakajurlok kõnan ko ar ilo buruer. Kinke jej mour ilo juõn lõl me wãwen mour ko an armij ro relukkun etton im eor jitõbõn kibbon ie kin air ber iomin kajur eo an Setan Devil eo, jej jelmae melejoñ ko ikijen pija ko im nan in kareelel ko me emaroñ biruru air kejebwãbweik kij, meñe emaroñ mõkõj ar bõk mejer jen ar kalimjeki. (1 Jon 5:​19) Eñin unin dri jeje sam ear eowore Anij: “Kwon kajeõr meja jen lale wan, im Kwon kãejmour iõ ilo ial ko Am.”​—Sam 119:37.

Wãwen eo Mejer Emaroñ Mone Kij

3-5. Ta bwebwenato ko ilo Baibel rej kwalok kin kauwatata eo ñõn kõtlok bwe mejer en kabo kij?

³ Jen lale ta eo ear walok ñõn kõra eo moktata, Iv. Setan ear ba bwe mejen ‘enaj bellok’ elañe enaj mõña jen “wijki in jela emõn im nana.” Iv emaroñ kar lukkun reel kin lemnok eo bwe mejen enaj “bellok.” Kõnan eo an ñõn mõña jen leen wijki eo ear kajurlok ke “e ar lo bwe emõn leen wijki eo ñõn mõña, im wõleo ñõn mejen, im juõn wijki emõn bwe en kameletlet.” Kin an kar Iv to an kalimjeke wijki eo, men in ear tellok e ñõn an jab bokake kien eo Anij ear leloke. Leo belen, Adam, ear bareinwõt jab bokake im tokjen men in ear jelet armij ro ilo juõn wãwen enana.​—Jen. 2:​17; 3:​2-6; Rom 5:​12; Jem. 1:​14, 15.

⁴ Ilo ran ko an Noa, ear or jet enjel ro me rar bareinwõt kõtlok bwe mejeir en jelet ir. Ikijen enjel rein, Jenesis 6:2 ej ba: “Lõmaro nejin Anij rar lo kõra ro nejin armij bwe re dreo; im rar bõk limaro beleir einwõt air mijkaiye.” Kin an dri jumae rein kalimjeke limaro nejin armij, men in ear kadrek ibeir juõn kõnan ejakkar ñõn belele iben armij ro, im kar keutak ñõn ir ajiri ro relej. Nana ko an armij ro ilo ien eo ear tellok ñõn an Anij kokkure ir, ijellokin wõt Noa im baamle eo an.​—Jen. 6:​4-7, 11, 12.

⁵ Elõñ buki yiõ ko tokelik, ke Ekan ear lo jet mweiuk ko ilo ien kokkure eo an jikin kwelok eo ilo Jeriko, ear kwoti. Anij ear kakien bwe ren kokkure aolep men ko ilo jikin kwelok eo, ijellokin wõt jet men ko me ren  kar liloki ñõn tempel eo an Jeova. Kar kakkil dri Israel ro: “Komin kanuij kejbãrok kom jen men in aje eo, ñe ab mwijin ami aje, komij bõk jen men in aje ko” jen ene eo. Ke Ekan ear jab bokake, dri Israel ro rar iñtan im jet iair rar mij ke jikin kwelok eo ilo Eai ear anjo ioir. Ekan ear jab kwalok mol bwe e eo ear kwot mae ien eo rar jibwe e. Ekan ear ba: ‘Ke I ar lo mweiuk ko inem I ar ankwonaki im bõki.’ Mõm an mejen ear tellok e ñõn jorran, ekoba “men otemjej iben.” (Josh. 6:​18, 19; 7:​1-​26) Ekan ear kõnan juõn men me emo ñõn an kar bõke.

Jej Aikwij Jadõr

6, 7. Ewi ian “marmir ko” ekkã an Setan kajerbale ñõn kabo kij, im ewi wãwen ro rej kõmõn kareelel ko rej kajerbale men in?

⁶ Ranin, armij ro rej iion melejoñ eo me ej einlok wõt wãwen eo kar kajerbale ñõn kabo Iv, enjel ro, im Ekan. Ian aolep menin “marmir ko” Setan ej kajerbali, men eo elaptata an kareelel ej “mõm an mej ko.” (2 Kor. 2:​11; 1 Jon 2:​16) Ro rej kõmõn menin kareelel ko ilo ran kein, rejela bwe men ko armij ro rej loi elap air jelet ir. Juõn armij ilo Europe me etijemlok kin menin kareelel ko ear ba: “Maroñ eo me elaptata an kareelel ej maroñ eo ñõn lo. Ekkã an maroñ in anjo ion maroñ ko jet einwõt ãtbwin, roñlokjen, im men ko jet, im eor an maroñ ñõn kõmõn bwe armij ro ren emakõt ilo juõn wãwen rejela bwe enana.”

⁷ Eñin unin ro rej kõmõn menin kareelel ko ekkã air kajerbal elõñ pija ko ñõn kareel armij ro bwe ren kõnan wiaik men ko rej kareelel kaki! Juõn dri etale jen Amerika me ear katak kin ewi wãwen menin kareelel ko rej jelet kajjojo armij ro, ear ba bwe kar “kõmõni menin kareel ko jab ñõn letok wõt melele ko, ak elaptata ñõn kamakõt iñjake ko an ro rej lali bwe ren kõmõne juõn men.” Pija ko kin kõra im man ro rej kareelel kin enbwinir ej juõn ian kõl ko ekkã air kajerbali. Inem, elukkun aurõk bwe jen jadõr kin men ko jej kalimjeki im kin men ko jej kõtlok bwe ren dreloñ ilo lemnok ko ar im buruer!

8. Ewi wãwen Baibel eo ej kalikar kin aikwij eo ñõn ar kejbãrok mejer?

⁸ Mõm an mej im an kõniek remaroñ bareinwõt jelet dri Kristian ro remol. Kin men in, Nan eo an Anij ej rejañ kij ñõn jadõr ilo men ko jej kalimjeki im kõnan. (1 Kor. 9:​25, 27; riit 1 Jon 2:​15-​17.) Eman eo etiljek Job, ear kile joñõn an kajur wãwen an mejer jelet kõnan ko ar. Ear ba: “I ar kõmõn juõn bujen iben meja; inem ekijkan aõ maroñ in reilok ñõn juõn virjin?” (Job 31:1) Job ear jab baj makoko in uñir juõn kõra ilo jakkar, ak ear kõmõn bwe men in en jab walok ilo lemnok eo an bareinwõt. Jisõs ear kalikar bwe jej aikwij kejbãrok lemnok eo ar jen men ko retton ke ear ba: “Jabrewõt eo ej kalimjek kõra im mijkaiye emwij an lũñ iben ilo buruen.”​—Matu 5:​28.

Jej Aikwij Kejbãrok Kij jen Men ko Rewan

9. (a) Etke jej aikwij lukkun kejbãrok ñe jej kajerbal Internet eo? (b) Ta tokjen ko renana remaroñ walok meñe juõn emaroñ mõkõj im bõk mejen jen pija in kelwan ko?

⁹ Ilo lõl in ranin, ekkã an armij ro “kalimjek” pija in kelwan ko, elaptata ilo Internet. Meñe jejjab bukot website kein ilo computer eo, ak jet ien rej mõke walok! Juõn menin kareelel me ej kwalok pija ko kin kõra im man ro rej kareelel kin enbwinir emaroñ walok ilo idriñ ilo computer eo an juõn armij. Ak ke kwoj kebellok juõn e-mail, im kwoj lemnok ejjab nana, emaroñ ilo idriñ kwalok pija in kelwan ko ilo juõn website me ebin an kilek. Meñe juõn armij emaroñ mõkõj an bõk mejen mokta jen an kileke, ak emwij an pija eo jelet lemnok eo an. Pija in kelwan ko remaroñ bõktok tokjen ko rekaburomõjmõj ñõn juõn armij ilo an kõmõn bwe en abnõnõ bõklikõt eo an im ej aikwij kate e ñõn jolok pija ko retton jen lemnok eo an. Men eo  elaplok an nana ej ñe juõn ej wõnmanlok wõt im ‘kalimjeke,’ kinke men in ej kwalok bwe ejañin kajeeklok kõnan ko retton jen buruen.​—Riit Dri Epesõs 5:​3, 4, 12; Kol. 3:​5, 6.

10. Etke elaplok an biruru ñõn an ajiri ro bo ilo aujir eo ñõn aluij pija in kelwan ko, im ta eo emaroñ walok jen air kalimjeki?

¹⁰ Kinke ej biktõkin ajiri ro bwe ren jela kin men ko, men in emaroñ kõmõn bwe ren aluij pija in kelwan ko. Elañe men in ej walok, emaroñ to an jelet lemnok ko air kin belele. Juõn report ear kwalok bwe tokjen kein renana remaroñ kitibuj juõn lemnok ejjab jime kin belele, “abañ eo ñõn drebij juõn kõtan eyokwe im emõn iben armij ro, juõn lemnok ejjab mol kin kõra ro, im kõmõn bwe en juõn mõnit iben ñõn aluij pija in kelwan ko me emaroñ jelet an jikuul, im kõtan eo an iben ro mõtõn im baamle eo an.” Men eo elaplok an nana ej tokjen ko rej walok tokelik ilo juõn mour in belele.

11. Kwalok juõn wanjoñok kin joñõn an kauwatata ñõn aluiji pija in kelwan ko.

¹¹ Juõn jeer im jãter man ear je: “Ian aolep mõnit ko renana ear bin ñõn aõ bwijrõk jeni, mõnit eo ñõn aluiji pija in kelwan ko ear men eo elaptata an kar bin. Jen ien ñõn ien, juõn men ij ãtbwin, jet al ko, juõn men ij loe, ak juõn men ij lemnok kake emaroñ kõmõn an walok pija kein ilo lemnok eo aõ. Aolep ran ij kate iõ ñõn anjo ion men in.” Bar juõn jeer im jãter man, ke ear juõn ajiri, ear aluiji pija in kelwan ko an jemen, eo ejjab ber ilo mol eo, ilo ien eo ñe jemen im jinen rejjab ber ilo mweo. Ear je: “Elap an kar nana wãwen eo pija kein rar jelet lemnok eo aõ ke iar drik! Meñe kiõ emotlok 25 yiõ ko jen ien eo, jet ian pija kein rej walok wõt ilo lemnok eo aõ. Jekron ewi joñõn aõ kate iõ ñõn jab lemnok kaki, ak pija kein rej walok wõt im men in ej kõmõn an abnõnõ bõklikõt eo aõ.” Ej juõn menin meletlet ñõn ar bõprae ar bõk juõn bõklikõt enana ilo ar jab kalimjeki men ko rewan ak ejelok tokjeir! Ewi wãwen juõn armij emaroñ kõtõbrõke men in? Ej aikwij kate e ñõn “kajebokwe lemnok ko otemjej ñõn bokake Kraist.”​—2 Kor. 10:5.

12, 13. Ta men ko ejelok tokjeir dri Kristian ro rej aikwij kejbãrok ir jeni, im etke?

¹² “Men in drike” ko jet ak men ko ejelok tokjeir me jej aikwij kejbãrok kij jeni ej menin kamõnõnõ ko me rej kowõnmanlok arõk mweiuk, anijnij, ak men ko eor koaroñ, uror, im mij ie. (Riit Sam 101:3.) Ej erro eo an dri Kristian ro jemen im jinen ajiri ro ñõn kãlet kain pija rõt ko remaroñ aluiji ilo mweo imweir. Emol, ejelok juõn dri Kristian ej bõk kwonan ilo anijnij. Meñe eindrein, ro jemen im jinen rej aikwij kejbãrok ajiri ro nejiir jen pija ko, mijjin in ikkure ko, im bareinwõt buk in mõñka ko me rej kwalok jerbal ko an dimõn ro.​—Ken. 22:5.

¹³ Meñe jej drik ak ridto, jej aikwij kejbãrok bwe mejer en jab itoklimo kin mijjin in ikkure ko me eor koaroñ ie im rej kwalok an armij ire im katorlok bõtõktõk. (Riit Sam 11:5.) Jej aikwij bõprae ar lemnok kin jabrewõt men ko me Jeova ej kitõtõkaki. Kememej bwe Setan ej kajeoñ in kokkure lemnok ko ar. (2 Kor. 11:3) Bareinwõt, ñe jej jolok elap ien ko ar ilo menin kamõnõnõ ko me rejjab nana, men in emaroñ bõk ien ko jej kajerbali ñõn katak iben baamle eo ar, riit Baibel ran otemjej, im ñõn kapojõk ñõn ien kwelok ko.​—Pil. 1:​9, 10.

Lor Joñok eo an Jisõs

14, 15. Ta eo ekaitoktoklimo kin wãwen eo ken kajilu Setan ear kabo Jisõs kake im ewi wãwen an kar Jisõs maroñ anjo ion men in?

¹⁴ Ekaburomõjmõj bwe ilo lõl in enana, jejjab maroñ bõprae mejer jen ar lo men ko me ejelok tokjeir. Jisõs ear iione wãwen in bareinwõt. Ilo alen eo ken kajilu in an Setan kajeoñ in kabo Jisõs jen an kõmõnmõn ankilan Anij, “Devil ej bar añinliñlok E ñõn juõn tol e kanuij utiej, im kaluij E kin ailiñ in lõl otemjej, im air aibujuij.” (Matu 4:8) Etke Setan  ear kõmõne men in? Ejelok berre, ear kõnan kajerbal kilan eo ekajur kin mej, kinke ilo an Jisõs reilok im lo ailiñ ko an lõl, men in emaroñ kabo e ñõn kõnan bõk buñbuñ eo an lõl. Ak ewi wãwen an kar Jisõs emakõt?

¹⁵ Jisõs ear jab lemnok kin menin kabo eo me Setan ear iten lelok ñõn e, kinke ear jab kõnan kõtlok bwe jabrewõt kõnan ko renana ren dreloñ ilo buruen. Inem ilo mõkõj Jisõs ear uak im ba: “Kwon ilok, Setan!” (Matu 4:​10) Jisõs ear kamol bwe unin an mour ej ñõn berwõt ilo juõn kõtan emõn iben Jeova, im ear kamol men in ilo an kõmõnmõn ankilan Anij. (Hib. 10:7) Tokjen men in, Jisõs ear lo tõbrõk ilo an kar maroñ bõprae Setan jen an kabo e.

16. Ta men ko jemaroñ katak jen joñok eo an Jisõs ke ear jumae menin kabo ko an Setan?

¹⁶ Elõñ men ko jemaroñ katak jen joñok eo an Jisõs. Mokta, menin kabo ko an Setan rej jelet aolep armij. (Matu 24:24) Ken karuo, men eo jej kalimjeke emaroñ kakajurlok kõnan ko ilo buruer, meñe remõn ak nana. Ken kajilu, Setan enaj kajerbal “mõm an mej ko” joñõn wõt an maroñ ñõn kajeoñ in kejebwãbweik kij. (1 Pit. 5:8) Im ken kemen, kij bareinwõt jemaroñ jumae Setan, elaptata ñe jej emakõt ilo mõkõj.​—Jem. 4:7; 1 Pit. 2:​21.

Drebij wõt Juõn Mej “Emõn”

17. Etke ejjab juõn menin meletlet ñõn ar aiberber mae ien eo jej jelmae juõn men ejelok tokjen mokta jen ar bebe kin ta eo jen kõmõne?

¹⁷ Wujleplok eo ar ñõn Jeova ej kitibuj kalimur eo ñõn ilok jen men ko ejelok tokjeir. Ilo ar kalimur ñõn kõmõnmõn ankilan Anij, jej kobalok iben dri jeje sam ilo ar ba: “I ar drebij neiõ jen ial ko renana otemjej; bwe in bokake Am in nan.” (Sam 119:101) Ej juõn menin meletlet ñõn ar bebe lok iman kin ta eo jenaj kõmõne mokta jen ar jelmae juõn menin kabo. Jejela kin marmir ko an Setan kinke emwij an Baibel eo kalikar ñõn kij kin ta men ko Anij ej kananaiki. Ñãt eo Setan ear kajeoñ in kabo Jisõs ñõn an ukot dreka ko bwe ren erom bred? Ear kõmõne men in elikin an kar Jisõs jitlok iomin 40 ran im boñ ko  im ear “kwuli.” (Matu 4:​1-4) Setan emaroñ kile ien eo ñe jej mõjino im ebiruru ar naj bo ilo menin kabo ko an. Kin men in, kiõ ej ien eo ñõn ar lukkun lemnok kin men kein. Kwon jab aiberber! Elañe aolep ran jej lemnok wõt kin wujleplok eo ar ñõn Jeova, jenaj lukkun kate kij ñõn ilok jen men ko ejelok tokjeir.​—Ken. 1:5; 19:20.

18, 19. (a) Kwalok oktõk eo ikõtan juõn mej “emõn” im juõn eo “enana.” (b) Etke elukkun aurõk ñõn ar wõnmanlok wõt im lemnok kin men ko raurõk, im ta nan in kakabilek eo Dri Pilippai 4:8 ej letok ñõn kij ikijen men in?

¹⁸ Kajjojo ran, jej jelmae menin kareelel ko me remaroñ kamad kij, im rej lõñlok wõt. Inem, elukkun aurõk ñõn ar lor nan in rejañ eo an Jisõs ñõn drebij wõt juõn mej “emõn” ak bwe en lamwan wãwen ar mour. (Matu 6:​22, 23) Juõn mej “emõn” ej lemnok wõt ñõn kõmõnmõn ankilan Anij. Ilo okõtõn men in, juõn mej “enana” ej etao, ankwõnak, im ej itoklimo in lali men ko ejelok tokjeir.

¹⁹ Kememej bwe men ko jej kadreloñ ilo lemnok ko ar rej jelet buruer. Kin men in, elukkun aurõk bwe jen wõnmanlok wõt im lemnok kin men ko raurõklok. (Riit Dri Pilippai 4:8.) Jen wõnmanlok im kajeoñwe dri jeje sam ke ear jar im ba: “Kwon kajeõr meja jen lale wan.” Inem, ke jej kate kij ñõn jerbale men eo jej jar kake, jemaroñ liki bwe Jeova enaj “kãejmour [kij] ilo ial ko [An].”​—Sam 119:37; Hib. 10:36.

Ta eo Jej Aikwij Kememej Kake Kin . . .

• wãwen eo mejer ej jelet lemnok eo ar im buruer?

• kauwatata ko ñõn aluij pija in kelwan ko?

• aurõkin ar drebij wõt juõn mej “emõn”?

[Study Questions]

[Pija ko ilo peij 23]

Ta men ko ejelok tokjeir dri Kristian ro rej aikwij bõprae air kalimjeki?