Kijenmij Iomin Melejoñ ko Ear Kakajurlok Liki eo Am ilo Jeova

Ekkar ñõn ada Dello Stritto

Ej kap mwij aõ je nan ko an unin tel in ran eo ilo buk in jeje eo aõ. Meñe 36 aõ yiõ ak ear bõk ruo auõ ñõn aõ je nan kein. Etke ear eindrein? Jinõ enaj kemelele.​—Joel

KIMRO leo iba ar jimor baptais einwõt Dri Kennan ro an Jeova ilo yiõ eo 1968. Elikin aõ kar keutak ruo nejiõ ladrik, David im Marc, ear or bar juõn nejiõ ladrik etan Joel. Ear jab uñ an aliñ ke ear lotak ilo yiõ eo 1973, ilo juõn aujpitõl me ej ber ilo bukwon eo etan Binche ilo Belgium, me ej ber enañin 40 mail turõkin jikin eo etan Brussels. Joñõn erron kar 3 wõt paun im 12 aunij. Ke iar drioij jen aujpitõl eo, Joel ear aikwij ber wõt bwe en kalaplok joñõn paun ko iben.

Jet wik ko tokelik ke ear jab emõnlok an mour, kimro Luigi, leo beleiõ, ar bõklok Joel ñõn juõn taktõ in ajiri. Elikin an kõmõn jet kakõlkõl ko kin Joel, taktõ eo ear ba: “ Elap aõ buromõj in ba bwe elõñ nañinmij ko iben Joel.” Ear lukkun lokjenamro ke ear ba nan kein. Ilo ien in, iar jino kile bwe ladrik eo nejimro ear lukkun nañinmij. Inem taktõ eo ear bõklok leo iba ñõn juõn jikin im ear jiroñ e: “Niñniñ eo nejõm ej bõk nañinmij eo etan trisomy 21,” ak ãt eo juõn Down syndrome. *

Kimar lukkun buromõj kin etale ko an taktõ eo, inem kimar bebe in kebake bar juõn taktõ me etijemlok in kamarmire nañinmij ko. Iomin enañin juõn auõ taktõ eo ear lukkun etale Joel, im ejelok juõn men ear ba. Meñe ear juõn wõt auõ, ak ñõn kimro Luigi ear juõn ien elukkun aitok. Ke emwij an etale ladrik eo, taktõ eo ear reitok im ba, “Ladrik in nejõmiro enaj lap an aikwiji komiro.” Inem, ilo juõn ainiken ejoij, ear ba, “Ak Joel enaj mõnõnõ kinke jinen im jemen relukkun yokwe e!” Kin juõn buru eobrõk kin elõñ kain iñjake ko, iar jiburi Joel, im kimar bõklok e ñõn mweo. Ilo ien in, ear drualitõk wik ridtõn.

Kwelok ko an Kristian im Jerbal in Kwalok Nan rar Kakajur Kim

Elikin bar jet kakõlkõl ko, rar lo bwe ear jab emõn an kar ejaak menono eo an Joel im ear or juõn nañinmij iben me ear kõmõn bwe en biruru dri ko drin. Kinke ear lukkun kilep menono eo an, ear itak iben ãrin, im men in  ear kõmõn bwe en biruru an bõk nañinmij ko. Ejjabto, ke ear emen an aliñ, Joel ear bõk nañinmij in pneumonia im ear aikwij in bar rol ñõn aujpitõl eo, ijo rar kajenolok e jen armij ro jet. Ear lap amro buromõj ke kim ar lo an iñtan. Kimar lukkun kõnan jiburi im mejenmaiki, ak kimar jab maroñ kõmõni men kein iomin joñoul wik. Ear ejelok men en kimro Luigi ar maroñ kõmõne, ijellokin wõt amro kalimjeke, atbokwõje dron, im jar.

Iomin abañ kein, kimar wõnmanlok wõt im ber ilo ien kwelok ko an congregation eo iben David im Mark, ro im rar 6 im 3 air yiõ ilo ien eo. Ilo am ber ilo Imõn Kwelok eo, kimar iñjake an Jeova kejbãrok kim. Ilo ien ko kimar ber ie iben dri tõmak ro jeim im jãtim, kimar bõk iñjake eo bwe kim maroñ likit inebata ko am ion Jeova, im men in ear kõmõn bwe kimin ainemõn. (Sam 55:22) Nõj ro me rar lale Joel rar ba bwe rar kile wãwen an kwelok ko an Kristian kar jibõñ kim kõmõn bwe mour ko am ren jokkin wõt juõn.

Iomin ien in, iar bareinwõt akwelap ñõn Jeova bwe en letok kajur ñõn aõ bõk kwonaõ ilo jerbal in kwalok nan. Ijellokin aõ berwõt mweo im jõñ, iar kõnan konono iben ro jet im jiroñ ir kin ewi wãwen liki eo aõ ilo kalimur eo an Anij kin juõn lõl ejelok nañinmij ie, ear kakajur iõ. Ilo aolep ien ko iar bõk kwonaõ ilo jerbal in kwalok nan, iar kile bwe Jeova ear uake jar ko aõ.

“Ekabwilõñlõñ Men In!”

Ear juõn ran ekamõnõnõ ke Joel ear maroñ drioij jen aujpitõl eo im kimar maroñ bõklok e ñõn mweo! Bõtab, ilo ran eo tok juõn, lõñliñ eo am ear oktõk ñõn buromõj. Nañinmij eo an Joel ear nanalok, im kimar aikwij mõkõj im bar bõklok e ñõn aujpitõl. Elikin an taktõ ro etale e, rar jiroñ kim im ba: “Eor wõt iben Joel enañin jiljino aliñ ñõn an mour.” Ruo aliñ ko tokelik, ke ear drualitõk an aliñ, ear einwõt ñe ejejit kitien nan ko an taktõ ro kinke nañinmij eo an Joel ear laplok an nana. Juõn taktõ ear jijõt ibem im ba: “Elap aõ buromõj in ba bwe ejelok bar men en kim maroñ kõmõne ñõn jibõñ Joel. Jeova wõt emaroñ jibõñ e ilo ien in.”

Iar jeblak ñõn rum eo an Joel ilo aujpitõl eo. Meñe iar lukkun buromõj im mõk, ak iar berwõt iturin Joel. Jet ian kõra ro ilo congregation eo rar kotaik dron im ber iba kinke Luigi ear aikwij lale ladrik ro ruo rerittolok nejimro. Juõn wik ear motlok. Inem ilo jidimkij, menono eo an Joel ear bwijrõk an jerbal. Nõj ro rar mõkõjtok ñõn iloan rum eo, ak ear ejelok men en rar maroñ kõmõne ñõn jibõñ e. Elikin jet minit ko, juõn iair ear ba ilo juõn ainiken emera, “Emij Joel. . .” Kin aõ mõjino, iar jino jõñ im drioij jen rum eo. Iar kajeoñ in jar ñõn Jeova, ak iar jab maroñ kemeleleik E ilo nan kin joñõn aõ kar iñtan. Elikin 15 minit, juõn ian nõj ro ear kir iõ im ba, “Ebar mour Joel!” Inem ear jibwe peiõ im ba, “Itok, kwomaroñ lo e kiõ.” Ke iar jeblak ñõn iben Joel, iar lo bwe ear bar jino an jerbal menono eo an! Ear mõkõj an jededlok ennan eo bwe Joel ebar mour. Nõj im taktõ ro rar aolep itok im lale, im elõñ rar ba, “Ekabwilõñlõñ men in!”

Ke Ear Emen an Yiõ, Ear Kõmõn Juõn Wõnmanlok Ekabwilõñlõñ

Ilo yiõ ko jinoin in an Joel mour, ekkã an kar taktõ eo jiroñ kim, “Elap an Joel naj aikwiji yokwe eo ami.” Kinke kimro  Luigi ar iñjake yokwe eo an Jeova elikin an kar Joel lotak, kimro ar kõnan kwalok ejja yokwe in wõt ñõn ladrik eo nejimro. Elõñ ien ko rar bellok ñõn amro kõmõne men in kinke Joel ear aikwij jibõñ ilo aolep men ko ear kõmõni.

Kajjojo yiõ, ilo yiõ ko jiljilimjuõn moktata in an Joel mour, kimar aikwij kijenmij kin men kein rar walok. Ikõtan Oktoba im Maaj, ear ikutkut an Joel nañinmij, im kimar aikwij bõkto bõktak e ñõn aujpitõl. Ilo ejja ien eo wõt, iar kate iõ bwe in jolok elap ien joñõn wõt aõ maroñ ñõn ber iben David im Mark. Tokjen men in, rar bõk kwonair ñõn jibõñ Joel bwe en kõmõn elõñ wõnmanlok ko rekabwilõñlõñ ilo an mour. Ñõn wanjoñok, jet ian taktõ ro rar jiroñ kim bwe Joel ejamin naj maroñ etetal. Bõtab, juõn ran ke ear emen an Joel yiõ, Marc ear ba, “Joel, kwalok ñõn Mama bwe kwomaroñ kõmõne!” Inem, iar bwilõñ ke Joel ear jino an etetal! Kimar lukkun lõñliñ, im kimar jar iben dron einwõt juõn baamle ñõn kamolol Jeova jen buruem. Ilo ien ko jet, meñe ear jab lukkun lap wõnmanlok ko Joel ear kõmõni, ien otemjej kimar nebar e.

Katakin Joel kin Anij jen ke Ear Drik, Ej Bõktok Tokjen ko Remõn

Ien otemjej ke ear emõn an Joel mour, kimar bõk e ñõn kwelok ko ilo Imõn Kwelok eo. Ñõn kejbãrok e jen kij ko redrik me remaroñ kõmõn an nañinmij, kimar likit Joel ilo juõn wan bwilbwil ejejuan me eor an liboror. Meñe ear eindrein an ber ilo ien kwelok ko, ak Joel ear lõñliñ in ber iben congregation eo.

Elap an kar dri Kristian ro jeim im jãtim kakajur kim ilo air kwalok yokwe im letok jibõñ eo kimar aikwiji. Ekkã an kar juõn brother kakememej kim kin nan ko ilo Aiseia 59:1: “Lo pein Jeova e jab karu bwe en jab maroñ in lomor; ak e jab bon lojiliñin bwe en jab maroñ in roñjake.” Elap an kar nan kein rekainemõn jibõñ kim ñõn liki Jeova.

Ke Joel ear ridtolok, kimar kate kim ñõn kõmõn bwe an korijer ñõn Jeova en men eo eaurõktata ilo mour eo an. Ilo ien ko rebellok, kimar konono iben Joel kin Jeova ilo wãwen eo me emaroñ ejaak juõn kõtan ebak iben Jemen ilõñ. Kimar akwelap ñõn Jeova bwe en kejerammõn kate eo am bwe en or tokjen ko remõn jen am katakin Joel kin E.

Ke ear juõn jodrikdrik, kimar lo an Joel mõnõnõ in kwalok kin mol eo ilo Baibel eo iben ro ej iion ir, im men in ear bõktok elap lõñliñ ñõn kim. Ke ear ejmourlok jen ien eo elikin an kar mijmij ke ear 14 an yiõ, iar lukkun mõnõnõ ke Joel ear kajitõk iba, “Mama, imaroñ ke lelok ñõn taktõ in mijmij eo buk eo Mour Indrio?” Jet yiõ ko tokelik, Joel ear bar aikwij mijmij. Kimar jela bwe emaroñ joko elikin an mijmij. Kin men in, mokta jen an kar mijmij, Joel ear lelok ñõn taktõ ro juõn letter me kimar kapoje iben dron. Letter eo ej kemelele kin bebe eo an ñõn jab bõk bõtõktõk. Taktõ in mijmij eo ear kajitõk iben Joel, “Im kwoj ke errã ilo men in?” Inem Joel ear uak im ba, “Aet.” Kimar lukkun loudiñdiñ kin an ladrik eo nejimro liki dri Kõmõnmõn eo an im an beek ilo buruen ñõn kabuñburuen. Elap an kar dri jerbal  ro ilo aujpitõl eo rejetake kim, im kimij kamolol kin men in.

Joel Ej Kõmõn Wõnmanlok ko ilo Mol Eo

Ke ear 17 an yiõ, Joel ear kalikar bwe emwij an wujleplok mour eo an ñõn Anij ilo an kar baptais. Ej juõn ran kim jamin melokloke! Kimar lukkun lõñliñ ke kimar lo an kõmõn wõnmanlok ko ilo mol eo. Jen ien eo, yokwe eo an ñõn Jeova im kijejeto eo an kin mol eo ear jab driklok. Ilo mol, Joel ej mõnõnõ in ba ñõn aolep ro ej iione ir, “Mol eo ej berberin mour eo aõ!”

Ke ear juõn likao, Joel ear jino katak riit im jeje, im men in ear kitibuj an lukkun kate e. Kajjojo nan ko me ear maroñ je, ear juõn tõbrõk elap. Jen ien eo, aolep jiboñ ej etale unin tel in ran jen buk eo Liñõri Jeje ko Ran Otemjej. Elikin an kõmõne men in, ej kate e ñõn je unin tel in ran eo ilo buk eo an, im kiõ alikar bwe elõñ buk ko iben.

Ilo ran in kwelok ko, Joel ekõnan bwe kimin mõkõjlok ñõn Imõn Kwelok eo bwe en maroñ karuwaineneik aolep dri kwelok ro. Ej lõñliñ in uak im bõk kwonan ñõn kwalok demonstration ko ilo ien kwelok ko. Bareinwõt, ej jibõñ leto letak kein kennan ko im kõmõni jerbal ko jet. Aolep wik, elañe emõn ejmour eo an, ej itok ibem tok ñõn kwalok nan. Ilo yiõ eo 2007, kar kajelaik congregation eo bwe kar jitõñe Joel bwe en juõn ministerial servant. Joñõn am kar lõñliñ, kimar jõñ. Ej juõn jerammõn elap jen Jeova!

Kimij Lo Wãwen an Jeova Jibõñ Kim

Ilo yiõ eo 1999, kimar ion bar juõn abañ. Juõn wa ear dribõj wa eo waam im Luigi ear lukkun jorran. Kar aikwij mwijiti juõn ian ne ko neen, im elõñ alen ear aikwij mijmij kin drilep eo an. Bar juõn alen, ilo am liki Jeova kimar iñjake kajur eo ej letok ñõn dri korijer ro an me rej ber ilo aikwij. (Pil. 4:​13) Meñe ejoko rãjetin neen Luigi im ejorran drilep eo an, kimij kate wõt kim ñõn bõk juõn lemnok ejime. Kinke ejjab maroñ jerbal ilo jikin jerbal eo an, elaplok kiõ an ien ñõn lale Joel. Men in ear kõmõn bwe en laplok ien ko aõ ñõn kõmõni makõtkit ko ilo jitõb. Bareinwõt, elaplok an Luigi ien kiõ ñõn lali aikwij ko lor jitõb an baamle eo im congregation eo, ijo ej wõnmanlok wõt im jerbal einwõt juõn eo ej lolorjake makõtkit ko an kumi in elder ro.

Kin aolep wãwen ko reinjuõn kimar iioni ilo mour eo am, kimij jolok elap ien iben dron einwõt juõn baamle. Iomin aolep ien ko remotlok, kimar katak ñõn kwalok kamanwa im ñõn jab kõtõmene kin men ko elap jen joñõn. Ilo ran ko kimij iten ebwer, kimij kebak Jeova ilo jar im kwalok ñõn e iñjake ko am. Ekaburomõjmõj bwe ke David im Marc rar ridtolok im mõkelok iair, jidrik kin jidrik rar bwijrõk jen air korijer ñõn Jeova. Kimij kejatrikrik bwe juõn ran renaj bar jeblak tok ñõn iben Jeova.​—Luk 15:17-​24.

Ilo aolepen yiõ ko mantak, kimar kile an Jeova jibõñ kim im katak ñõn atartar ion ilo aolep wãwen ko rebin kimar iioni. Elap an aurõk ñõn kim nan ko ilo Aiseia 41:13: “Ña Jeova, am Anij, I naj kapjere anbijmaroñõm, im ba ñõn yuk, Kwon jab mijõk; I naj jibõñ yuk.” Ilo am jela bwe Jeova ej kapjere peim, men in elap an kar kainemõn kim. Aet, kim maroñ ba bwe ilo am kijenmij iomin wãwen ko rebin, men in ear kakajur liki eo am ilo Jememuij ilõñ, Jeova.

[Kamelele ko itulõl]

[Pija ko ilo peij 17]

Joel iben jinen, Ada

[Pija ilo peij 18]

Ada, Joel, im Luigi

[Pija ilo peij 19]

Joel ej lõñliñ in karuwaineneik dri Kristian ro ilo Imõn Kwelok eo