Kwoj ke Kõtlok an Jeova Kajitõkin Yuk?

ELÕÑ buki kajitõk ko ilo Baibel me remaroñ jibõñ juõn ñõn an etale iñjake ko an remũlõl im unin ej kõmõni men ko. Ilo mol, Jeova Anij mõke ej kajerbal kajitõk ko ñõn katakin kij kin katak ko raurõk. Ñõn wanjoñok, Jeova ear kajerbal elõñ kajitõk ko ke ear kakkil Kein ñõn kajime ial eo an ekauwatata. (Jen. 4:​6, 7) Ilo ien ko jet, Jeova ear baj kajerbal wõt juõn kajitõk im ear kamakõt juõn armij ñõn kõmõne men eo ej aikwij in kõmõne. Ke dri kanan Aiseia ear roñ an Jeova bõkmantak kajitõk in: “Wõn eo In jilkinlok e, im wõn eo e kõnan ilok kin Kim?” Ear uak: “Ña e; Kwon jilkinlok iõ.”​—Ais. 6:8.

Dri Kaki eo Elap Jisõs ear bareinwõt emõn an kajerbal kajitõk ko. Ilo buk in Gospel ko, Matu, Mark, Luk im Jon rar je elõñlok jen 280 kajitõk ko an Jisõs. Meñe jet ien ear kajerbal kajitõk ko ñõn kaikõñ ro rar notaik e, enañin aolep ien mejenkajik eo an ej ñõn tõbar buruen ro rar roñjake, im kamakõt ir ñõn lemnok kin jutõk eo air iben Anij. (Matu 22:​41-​46; Jon 14:​9, 10) Ilo ejja wãwen in lok wõt, dri jilik Paul, eo ear je buk ko 14 ilo Jeje ko an dri Kristian ilo kajin Grik jen Matu ñõn Reveles̃õn, ear kajerbal kajitõk ko ñõn karel buruen armij ro. (Rom 10:13-​15) Ñõn wanjoñok, ilo letter eo an ñõn dri Rom ro ear je elõñ kajitõk ko. Kajitõk ko an Paul rar kamakõt ro rej riiti letter ko an ñõn katak im kaurõk mulõl “in mweien meletlet im jela an Anij.”​—Rom 11:33.

Meñe jet kajitõk ko kar aikwij uaki, ko jet rar ñõn kamakõt juõn ñõn lukkun kalomõnlokjen. Buk in Gospel ko rej kwalok bwe ear lap an Jisõs kajerbal kajitõk kein me rar kamakõt juõn ñõn lukkun kalomõnlokjen. Juõn ien, Jisõs ear kakkil dri kalor ro an: “Komin lale, im kejbãrok kom jen leven an Parisi ro, im jen leven an Herõd,” melelen jerbal ko air retao im katak ko rewan. (Mark 8:​15; Matu 16:12) Dri kalor ro an Jisõs rar jab melele im rar jino akwail kin air kar meloklok in bõktok bred. Lale wãwen an Jisõs kajerbal kajitõk ko ilo bwebwenato eo an ibeir elikin men eo ear walok. Jisõs ear ba ñõn ir: “Etke komij konono bwe ejelok bred ibemi? Kom ar jaje ñõn kiõ ke? A kom jab melele ke? Buruemi re bin wõt ke? Eor mejemi, kom jab lo ke? Im eor lojiliñemi, kom jab roñ ke? . . . Kom jañin melele ke?” Kajitõk ko an Jisõs rar kõmõn bwe dri kalor ro an ren lemnok im kamakõt ir ñõn kalomõnlokjen kin lukkun melelen nan ko an.​—Mark 8:​16-​21.

“In Kajitõk Ibõm”

Jeova Anij ear kajerbal kajitõk ko ñõn kajime lemnok ko an Job, leo dri korijeran. Ikijen elõñ kajitõk ko, Jeova ear katakin Job ñõn jela kin joñõn an etolok ñe ej keiri e mõke iben dri Kõmõnmõn eo an. (Job, japter 38- 41) Jeova ear ke kõtõmene bwe Job en uaki kajjojo ian kajitõk kein? Einwõt ear jab. Melele eo ar kin kajitõk kein einwõt “Kwar ber ia ke I ar likit loñtõk ko loñtõn lõl?” rar ñõn lujur lemnok im iñjake eo an Job. Elikin an Jeova kwalok jejjo wõt kajitõk ko, Job ear jino an ikõñ. Ear ba wõt: “Ta eo in uak ñõn Kwe? Ij likit peiõ ion loñiõ.” (Job 38:4; 40:4) Job ear melele im kõtãik e mõke. Bõtab, Jeova ear jab baj katakin wõt Job ñõn kõtãik buruen. Ear bareinwõt kajimeiki lemnok eo an. Ilo wãwen it?

Meñe Job ear juõn armij “etiljek im wãnik,” jet ien nan ko an rar kwalok lemnok ko rebwir, im Ilaihu ear kwalok men in ñõn Job ke ear kajime e “kin an mõke kowãnik e, im  jab Anij.” (Job 1:8, UBS; 32:2; 33:​8-​12) Inem, kajitõk ko an Jeova rar bareinwõt kajimeiki melele eo an Job. Ilo an kar konono ñõn Job ikijen juõn aire, Anij ear ba:“Wõn in ej kamarok bebe kin nan ko im ejelok jelalokjen? Kwon kañõrñõr kiõ einwõt juõn eman; bwe in kajitõk ibõm, im kwon kwalok ñõn iõ.” (Job 38:​1-3) Ikijen kajitõk ko, Jeova ear kareilok Job ñõn joñõn lapen meletlet im kajur eo An einwõt ear kwalok ikijen jerbal ko an rekabwilõñlõñ. Melele in ear jibõñ Job ñõn kalaplok an liki wãwen an Jeova ekajet im kõmõni men ko jen kar mokta. Ear juõn men ekabwilõñlõñ ke Job ear lo an Anij eo Ekajur Potata kajitõkin e!

Wãwen Jemaroñ Kõtlok bwe Jeova En Kajitõkin Kij

Ta kin kij? Jemaroñ ke bareinwõt bõk tokjen jen kajitõk ko rej ber ilo Baibel eo? Aet, jemaroñ! Ñe jej kõtlok bwe kajitõk kein ren kõmõn bwe jen bwijrõk im lemnok, emaroñ bõktok jerammõn ko ilo men ko lor jitõb. Kajitõk ko ilo Nan in Anij me ej tõbar buruen armij ej mõtõn men ko rej kõmõn bwe Baibel eo en keie. Emol, “nan in Anij ej . . . jerbal wõt . . . im e mõkõj an kili lemnok ko im bebe ko an buru.” (Hib. 4:​12) Bõtab, ñõn ar lukkun bõk tokjen, jej aikwij jitõñtok kajitõk ko ñõn kij mõke, einwõt ñe Jeova ej kajitõkin kij. (Rom 15:⁠4) Jen etale jet ian wanjoñok ko.

“Eo ej Iroij in ekajet ñõn aolepen lõl E jamin kõmõn wãnik ke?” (Jen. 18:⁠25) Ebream ear bõkmantak kajitõk in ñõn Jeova ilo ien eo Anij ear ekajete Sodom im Gomorra. Ebream ear lemnok bwe en etolok jen Jeova ñõn an mõn armij ro rewãnik iben armij ro renana. Kajitõk eo an Ebream ear kalikar an lukkun tõmak bwe Jeova ewãnik.

Ranin, jet remaroñ kajidede kin jet men ikijen ekajet eo an Jeova ilo ilju im jeklaj, einwõt wõn ro renaj elã im mour ilo Armagedõn im wõn ro renaj jerkakbiji. Jen ar kõtlok bwe lemnok rõt kein ren kabnõnõik kij, jen kememej kajitõk eo an Ebream. Jen einwõt Ebream, ilo ar jela kajen Jeova einwõt juõn Jemen ejoij im lukkun liki e bwe ej ekajet jime im tiriamokake. Men in enaj bõprae kij jen ar jolok ien im maroñ ko ar kin an le jen joñõn ar inebata im berre, im kõbauwe kin men ko ejelok tokjeir.

“Wõn iami kin [an] inebata buruen e maroñ in kaitoklok an mour ilo juõn mokwõj in pã?” (Matu 6:⁠27) Ke ear konono ñõn juõn jarlepju in armij ekoba dri kalor ro an, Jisõs ear kajerbal kajitõk in ñõn kalikar aikwij eo ibeir ñõn likit ir mõke ilo loberin pein Jeova eo ej  yokwe. Ran ko eliktata an jukjuk im ber in enana ej kõmõn bwe en lõñlok inebata ko, ak ilo ar lemnok wõt kaki men kein ejamin kaitoklok ar mour ak kakõmõnmõnlok wãwen ar mour.

Jabrewõt ien jej inebata kin kij mõke ak ro rejitenburu iber, ar kakememej kij mõke kin kajitõk eo an Jisõs emaroñ jibõñ kij ñõn bõk juõn lemnok ejime kin men ko jej inebata kaki. Emaroñ jibõñ kij ñõn kabwijrõk ar inebata im bõk lemnok ko renana me rej kamõk lemnok im iñjake ko ar im bareinwõt enbwinir. Einwõt Jisõs ear kalimuri kij, Jemer ilõñ, eo ej najirik bao ko imejatoto im kalitlit mãr ko ilo jikin kallip, ejela aikwij ko ar otemjej.​—Matu 6:​26-​34.

“Juõn eman e maroñ in bõk kijeek na ilo ubõn, im nuknuk ko an re jamin urur ke?” (Ken. 6:​27) Ilo japter 1 ñõn 9 ilo buk in Jabõn Kennan Ko, jej lo nan in kakabilek ko remeletlet juõn jemen ej lelok ñõn leo nejin. Kajitõk in ej ber itulõñ ej konono kin tokjen ko renana rej itok jen mour in lũñ. (Ken. 6:​29) Elañe jej kile bwe jej katoojoj ak lemnok kin kõnan eo ñõn belele wan, kajitõk in enaj einwõt juõn kein kakkil bwe men in ekauwatata. Juõn armij emaroñ kajitõkin e mõke kin kajitõk in jabrewõt ien ekõnan kõmõne juõn men ebwir im jab kin mour in lũñ wõt. Elukkun alikar nan in kakabilek eo ekeie ilo Baibel: ‘Kwonaj marmir men eo kwoj jeore’!​—Gal. 6:⁠7.

“Wõn kwe eo kwoj ekajet korijeran bar juõn?” (Rom 14:⁠4) Ilo letter eo an ñõn dri Rom, Paul ear kwalok abañ ko rar walok ilo congregation eo ilo ebeben eo ken kajuõn. Jet ian dri Kristian ro me rar itok jen mõnit ko rekajjo jen dron, ekkã air kar ekajete bebe im kõmõn ko an dri tõmak ro jeir im jãtir. Kajitõk eo an Paul ear kakememej ir ñõn mõnõnõ iben dron im kõtlok bwe Jeova en ekajet.

Ejja einwõt ranin, ro dron Jeova rej itok jen ailiñ ko jet im mõnit ko reoktõk jen dron. Bõtab, emwij an Jeova kakuktok kij ñõn burukuk iben dron. Jej ke kowõnmanlok ar burukuk iben dron? Elañe emõkõj ar ellotane kõmõn ko an eo jeer im jãter ekkar ñõn bõklikõt eo an, ej menin meletlet ñõn ar kajitõkin kij mõke kin kajitõk eo an Paul itulõñ!

Kajitõk ko Rej Karuaklok Kij ñõn Jeova

Wanjoñok kein rej kwalok ewi wãwen kajitõk ko rej ber ilo Nan in Anij remaroñ kamakõt juõn armij ñõn etale e mõke. Ar etale kajjojo ian kajitõk ko emaroñ jibõñ kij ñõn jerbali ilo mour eo ar ekkar ñõn wãwen eo iber. Im ñe jej riiti Baibel eo, jenaj lo kajitõk ko jet me remaroñ jibõñ kij.​—Lale box eo ilo peij 14.

Ñe jej kõtlok bwe kajitõk ko rej ber ilo Nan in Anij ren tõbar buruer, men in enaj jibõñ kij ñõn kõmõn bwe lemnok ko ar im buruer ren burukuk iben ial eo an Jeova ewãnik. Elikin an kar Jeova kajitõkin e, Job ear errã im ba: “I kar roñjake kin lojiliñiõ kin Kwe; a kiõ meja ej kab lo Yuk.” (Job 42:⁠5) Aet, ear laplok an Job watõk bwe Jeova emol an ber, einwõt ñe E ar ber iman mejen. Tokelik dri kalor Jemes ear kwalok nan kein: “Komin druaklok ñõn Anij, im E naj druakwoj ñõn kom.” (Jem. 4:⁠8) Jen kõtlok bwe aolepen Nan in Anij ekoba kajitõk ko ren jibõñ kij ñõn ridtolok ilo jitõb im kõmõn bwe en alikarlok ar “lo” Jeova.

[Box ilo peij 14]

Ñe kwoj kajitõkin yuk mõke kin kajitõk kein, ewi wãwen remaroñ jibõñ yuk ñõn bõk lemnok eo an Jeova?

▪ “Ewi men eo Iroij ej kõnan: bokake ke ak katok?”​—1 Sam. 15:⁠22, UBS.

▪ “Eo e ar kõmõnmõn mej E jamin lo ke?”​—Sam 94:⁠9.

▪ “Kwoj lo juõn armij e meletlet ilo an lemnok ke?”​—Ken. 26:12.

▪ “Ekkar ke bwe kwon illu?”—Jona 4:⁠4, UBS.

▪ “Eor ke tokjen ñe juõn armij ej jibadrek bwe men otemjej ilõl in ren an, ak mour eo an ejako jene?”—Matu 16:26, UBS.

▪ “Wõn e naj kijbil kij jen yokwe an Kraist?”​—Rom 8:⁠35.

▪ “Ta eo ibõm, im kw’ar jab bõke?”​—1 Kor. 4:⁠7.

▪ “Kõmao õt an maram iben marok?”​—2 Kor. 6:⁠14.

[Pija ilo peij 15]

Ta eo Job ear katak jen kajitõk ko an Jeova?