Berwõt im Kajur ilo Men ko Lor Jitõb ñe Jej Kouk Juõn uan Baamle eo Ar Enañinmij

ELIKIN air lo juõn tumor iturin dilepin Kim, juõn ian Dri Kennan ro an Jeova, rar kile bwe ear juõn cancer. * Leo belen, etan Steve ej ba: “Elikin air mwijiti im jolok tumor eo, rar aikwij likiti Kim ilo juõn mijjin [radiotherapy] im lelok uno ñõn e [chemotherapy] ñõn mõn kij in cancer eo. Kein kamarmir im uno kein rar kõmõn bwe en mõjinolok. Im ear bin an kõmõn jabrewõt.”

Kwomaroñ ke lemnok kin buromõj eo Steve ear iione ke ear lale an eo ejitenburu iben iñtan kin nañinmij in me ej kõmõn bwe en lap an mõjino. Bwelen eor juõn ilo baamle eo am me ej iñtan kin juõn nañinmij elap ak kin an bwijwõlã. (Ekk. 12:​1-7) Elañe aet, kwojela bwe ñõn an lukkun emõn am kejbãrok eo ejitenburu ibõm, kwoj aikwij kejbãrok yuk mõke. Elañe kwoj mõjino ilo men ko lor jitõb, men in enaj bareinwõt jelet iñjake im ejmour eo am, im kwomaroñ likjõp in kabwe aikwij ko an eo enañinmij ilo baamle eo am. Ewi wãwen kwomaroñ jokkin wõt juõn ilo am kõmõni erro ko an dri Kristian, im ilo ejja ien eo wõt kouk juõn nukõm enañinmij ak ebwijwõlã? Eor ke jabrewõt men ro uan congregation eo remaroñ kõmõne ñõn jibõñ ro renañinmij?

Ewi Wãwen Jemaroñ Jokkin Wõt Juõn?

Ñõn drebij am jokkin wõt juõn ilo jitõb im kejbãrok ejmour eo am, ñe kwoj kouk juõn nukõm enañinmij, kwoj aikwij jela kilen ukoktak im kajerbal ien im maroñ ko am. Jabõn Kennan 11:2 ej ba: “Meletlet ej ber iben ro retã.” Ilo melele eo ijin, nan in ‘etã’ ak etã buru ej melelen ñe juõn ej kile joñõn maroñ eo an mõke. Ñõn kejbãrok bwe kwon jab kajeoñ kõmõn ellã jen joñõn maroñ ko am, kwoj aikwij etale lajrõk im erro ko am.

 Steve ear kwalok meletlet im etã buru ilo an bar etale joñõn jerbal ko ej aikwij ineki. Kobalok iben jerbal eo an, ear juõn elder eo ej karõk jerbal ko an kumi in elder ro, im service overseer ilo juõn ian congregation ko an Dri Kennan ro an Jeova ilo Ireland. Ear bareinwõt juõn ian ro rej jibõñ taktõ ro ñõn jerbal iben Dri Kennan ro an Jeova renañinmij ñe abañ eo kin bõtõktõk ej walok. Steve ej ba, “Kim [lio beleiõ] ejañin kar aol im ba bwe ij kejekron e kinke elap aõ jolok ien ko aõ ñõn erro kein. Bõtab, ña mõke iar jela bwe iar jab maroñwe aolepen erro kein. Ewi wãwen Steve ear kamarmire abañ in? Ej ba, “Elikin aõ jar im kalomõnlokjen, iar bebe in jijõtlok jen aõ karõk jerbal ko an kumi in elder ro. Iar wõnmanlok wõt im jerbal einwõt juõn elder. Bõtab ilo aõ lelok jet ian erro ko ñõn ro jet, iar maroñ kalaplok ien ko aõ iben Kim im kabwe aikwij ko an.”

Elikin jidrik ien, nañinmij eo an Kim ear bwijrõk jen an nanalok. Steve im Kim rar bar etale wãwen eo rej ber ie, im ilo an lio belen rejetak e, Steve ear maroñ bar jeblak im kõmõne erro ko an kar mokta ilo congregation. Steve ej kemelele, “Kimro jimor kar katak ñõn jerbal ekkar ñõn joñõn eo wõt me nañinmij eo ej kamaroñ kimro ñõn kõmõne. Ij lukkun  kamolol Jeova kin jibõñ eo an, im bareinwõt lio beleiõ kin an meanwõr im rejetake iõ meñe enañinmij.”

Bareinwõt, etale men eo ear walok iben Jerry, juõn circuit overseer im Maria, lio belen. Rar aikwij in ukot mejenkajik ko air bwe ren maroñ kejbãrok ridto ro jineir im jemeir. Maria ej ba, “Kar mejenkajik eo amro leo beleiõ ej ñõn jerbal in mejinede ilo bar juõn ailiñ. Bõtab, Jerry ej mõke wõt nejiir, im jemen im jinen rar aikwij bwe juõn en kouk ir. Kin men in, kimar bebe in berwõt ilo Ireland im kouk ir. Ilo am kõmõne men in, kimar maroñ ber iben jemen Jerry aolepen ien ko ear ber ilo aujpitõl mokta jen an kar mij. Ranin, kimij maroñ konono iben jinen Jerry kajjojo ran, im kimij jab lukkun ettolok elañe ej aikwij jibõñ. Elap an jinen Jerry bõk jibõñ im rejetak jen congregation eo an, im men in ej kamaroñ kim bwe kimin berwõt ilo jerbal in lolok congregation ko.”

Wãwen Ro Jet Remaroñ Jibõñ

Ke ear konono kin menin aikwij ko rar aikwij lilok ñõn kõra ro reridto im ejoko lõmaro beleir ilo congregation eo, dri jilik Paul ear je: “Elañe jabrewõt e jakkene ro nukin, im elaplok ro dri loan mweo imõn, e ar kariõp an tõmak im ej nana jen dri jab tõmak.” Paul ear kakememej dri Kristian ro mõtõn bwe elañe rekõnan bwe men ko rej kõmõni ren ‘kabuñburuen Anij,’ rej aikwij kabwe aikwij ko an ridto ro jemeir im jineir, im bareinwõt ro jimair im jibwiir. (1 Tim. 5:​4, 8) Mekarta, ro jet ilo congregation eo remaroñ im rej aikwij lelok jibõñ.

Lale men eo ear walok iben Hakan im Inger, ruo dri belele reridto ilo Sweden. Hakan ej ba, “Ke kar kwalok bwe lio beleiõ eor an nañinmij in cancer, kimro kar lukkun ilbõk. Jen jinoin, Inger ear ejmour im kajur. Ak kiõ kimij aikwij etal ñõn aujpitõl aolep ran, im uno ko ej bõki rej kõmõn bwe en mõjinolok. Ilo tõre in, Inger ear berwõt ilo mweo, im iar aikwij ber iben ñõn kouk e.” Ewi wãwen congregation eo air ear jibõñ Hakan im Inger?

Elder ro ilo congregation eo rar karõk bwe dri belele rein ren kajerbal telephone ñõn roñjake kwelok ko. Kobalok iben men in, ro jeer im jãter rej lolok ir im bar kajerbal telephone ñõn konono ibeir. Rej bareinwõt jilkinlok letter im card ko. Hakan ej ba, “Ealikar bwe ro jeer im jãter im bareinwõt Jeova rar jibõñ kim. Eaurõk kate eo air ñõn jibõñ kim bwe kimin maroñ kajur wõt ilo jitõb. Ij kamolol bwe emõnlok an Inger mour, im kimij maroñ bar ber ilo kwelok ko an dri Kristian ilo Imõn Kwelok eo.” Elañe ro uan congregation eo rej kõmõne ijo kwonair ñõn jibõñ ro renañinmij im ro rebwijwõlã ibwiljiir, rej kamol ir mõke bwe rej “juõn jeran ej yokwe ien otemjej; im juõn jein im jãtin, e ar lotak bwe en dri jibõñ ilo ien jorran.”​—Ken. 17:17.

Jeova Ej Kamolol kin Am Kate Yuk

Emaroñ lukkun kamõkmõk ñõn kouk juõn uan baamle eo am enañinmij. Bõtab, Kiñ Devid ear je: “Emõnõnõ eo ej lale ro dri jeramel [eo emõjino, NW]; Jeova e naj lomoren ilo ran in jorran.”​—Sam 41:1.

Etke ro rej kouk ro renañinmij ak ro remõjino rej mõnõnõ? Jabõn Kennan 19:17 ej ba: “Eo ej tiriamokake ro dri jeramel [mõjino, NW], ej lelok ñõn Jeova, im E naj nawõnan kin an kõmõn emõn.”Anij eo emol eor an itoklimo kin dri korijer ro an retiljek me rej nañinmij, im ej kejerammõn ro rej kwalok joij ñõn rein. Dri jeje sam eo Devid ear al: “Jeova e naj lale e [eo enañinmij] ilo kinien ñe e mojino: Kwoj kõmõn aolepen bed eo an ilo an nañinmij.” (Sam 41:3) Jemaroñ liki bwe elañe juõn eo ej kouk dri nañinmij ro ej iion abañ ak iñtan, Jeova enaj jibõñ e.

Jej mõnõnõ ñõn jela bwe Jeova Anij ej mõnõnõ im buñburuen kin ar kouk juõn eo enañinmij ilo baamle eo ar! Meñe jej aikwij kate kij ilo ar jibõñ rein, Baibel eo ej kalimur ñõn kij bwe “kin men in katok ko eirwõt Anij ej buñburuen.”​—Hib. 13:16.

[Kamelele eo itulõl]

[Pija Ko ilo peij 18]

Drebij wõt am jokkin wõt juõn ilo jitõb im bõk jibõñ jen ro jet