Brother ro, Komin Jeor ñõn Jitõb im Kate ñõn Jibarek Erro ko Relaplok!

“Eo ej jeor ñõn Jitõb, jen Jitõb e naj marmir mour in drio.”​—GAL. 6:8.

1, 2. Ewi wãwen Matu 9:​37, 38 ej jejit kitien kiõ, im ta menin aikwij eo ilo rolul eo me ear walok jen men in?

 KIÕ kwoj lo men ko rej walok me kwojamin melokloki! Jerbal eo Jisõs ear konono kake ej wõnmanlok im laplok wõt. Jisõs ej ba: “Elap jonikõn, a eiet dri jerbal; Inem komin jar ñõn Iroij in marmir, bwe En jilkinlok ro dri jerbal ilo jonikõn eo An.” (Matu 9:​37, 38) Jeova Anij ej uaki jar kein ilo juõn wãwen ekanuij lap. Ilo yiõ eo 2009, ear lõñlok congregation ko an Dri Kennan ro an Jeova ñõn 2,031, im ear tõbar 105,298. Ilo joñõn in, 757 oran armij ro rar baptais kajjojo ran!

² Orlok in ej kõmõn bwe en laplok aikwij brother ro me ej tellokir ñõn tel ilo katakin im lale congregation ko. (Ep. 4:​11) Iomin elõñ yiõ ko, Jeova ear letok man ro me ear tellokir ñõn kejbãrok aikwij ko an s̃ip ko an, im jej liki bwe enaj wõnmanlok im kõmõn eindrein. Kanan eo ilo Maika ej kalimuri kij bwe ilo ran ko eliktata, enaj lõñ “ri tel ro” me eor air maroñ ñõn tel ro dron Jeova.​—Maika 5:5, UBS.

3. Kemelele ta melelen ñõn “jeor ñõn Jitõb.”

³ Elañe kwoj juõn man emwij an baptais, ta eo emaroñ jibõñ yuk ñõn jibarek erro ko ilo congregation eo? Unleplep eo ej bwe kwon “jeor ñõn Jitõb.” (Gal. 6:8) Ñõn kõmõn men in ej kitibuj am mour ilo juõn wãwen kwoj kõtlok bwe en biruru an jitõb kwojarjar eo an Anij tel mour eo am. Kwon beek bwe kwon jab ‘jeor ñõn kõniek.’ Jab kõtlok bwe men kein einwõt, emõn kõjeiõm, ien kakije im menin kamõnõnõ ko ren kadriklok kõnan eo am ñõn kajerbal mour eo am ilo jerbal eo an Anij. Aolep dri Kristian ro rej aikwij “jeor ñõn Jitõb,” im tokelik, man ro me rej kõmõn men in emaroñ tellokir ñõn bõk erro ko ilo congregation eo. Kinke ej juõn aikwij elap kin jerbal in ministerial servant im elder ranin, elaptata an katak in jitõñlok ñõn dri Kristian man ro. Kin men in, brother ro, kimij rejañ kom ñõn lukkun etale katak in im jar kake.

Kate ñõn Jibarek Jerbal eo Emõn

4, 5. (a) Ta erro ko ilo congregation eo kar rejañ man ro emwij air baptais ñõn jibareki? (b) Ewi wãwen juõn emaroñ kate im jibareki?

⁴ Juõn dri Kristian man ejjab kajju erom juõn elder ilo congregation eo. Ej aikwij kate e ñõn jibareke ‘jerbal in emõn.’ (1 Tim. 3:1) Ej kitibuj an korijer ñõn dri tõmak ro mõtõn ikijen an mol an kejbãrok aikwij ko air. (Riit Aiseia 32:​1, 2.) Juõn eman ej jibareki erro ko kin juõn lemnok ejime ejjab lemnok kin tokjen eo an mõke. Bõtab eobrõk kin kõnan ko ejelok kibbon ie ñõn an ro jet bõk tokjen.

⁵ Ñõn jibarek jerbal in ministerial servant im elder, juõn ej aikwij kate ñõn tõbar menin aikwij ko Baibel eo ej kalikar bwe rej aikwij kajejiti. (1 Tim. 3:​1-​10, 12, 13; Tait. 1:​5-9) Elañe kwoj juõn man emwij an baptais, kajitõkin yuk mõke: ‘Ij ke keini aõ bõk kwonaõ ilo jerbal in kwalok nan, im ij ke jibõñ ro jet ñõn kõmõn eindrein? Ij ke kõkãtõk dri kabuñ ro  mõta ikijen aõ kwalok itoklimo eo emol kin mour eo air? Armij ro rej watõk iõ ke bwe emõn aõ niknik in katak Nan in Anij? Ij ke kakõmõnmõnlok wãwen aõ uak? Ij ke tiljek ilo jerbal ko me elder ro rar kabbeik iõ kaki?’ (2 Tim. 4:​5) Kain kajitõk rõt kein ej tellokin am lukkun lemnok kaki.

6. Ta wãwen eo eaurõk bwe en tellokin am bõk erro ko ilo congregation eo?

⁶ Bar juõn wãwen bwe en tellokin am bõk erro ko ilo congregation eo ej ‘bwe ilo maroñ kwon kajurlok kin jitõb eo an Anij ilo am.’ (Ep. 3:​16) Ñõn bõk jerbal in ministerial servant ak elder ilo congregation eo ejjab melelen bwe rej ekãlel ñõn ber ilo juõn obij. Remaroñ bõk jerbal kein ikijen wõt air ridtolok ilo jitõb. Ewi wãwen remaroñ tõbar men in? Juõn wãwen ej bwe kwon “etetal kin Jitõb” im jerbale leen jitõb eo. (Gal. 5:​16, 22, 23) Ñe kwoj kamol bwe eor karkar ko karkarin jitõb ibõm ñõn kajejiti erro ko jet rar liwõj, im ilo am jerbali nan in kakabilek ko kwar bõki kin wãwen am maroñ kõmõn wõnmanlok, inem ‘am wõnmanlok enaj alikar ñõn ro otemjej.’​—1 Tim. 4:​15.

Jitõbõn Karmijete Ej Menin Aikwij

7. Korijer ñõn ro jet ej kitibuj ta?

⁷ Korijer ñõn ro jet ej kitibuj am lukkun kate yuk im ej aikwiji am kwalok jitõbõn karmijete. Kinke elder ro rej jerbal einwõt juõn s̃eperd ilo kõkkar, elap air lemnok kin abañ ko rej walok ilo bwij eo. Lale wãwen erro eo an dri jilik Paul kin jerbal in s̃eperd ear jelet e. Ear ba ñõn dri tõmak ro mõtõn ilo Korint: “Jen elõñ jorran im iñtan buruõ I ar jejewoj ñõn kom kin elõñ dren in kemjalal; jab bwe komin buromõj, a bwe komin jela yokwe eo iba e kanuij lap ñõn kom.” (2 Kor. 2:4) Ealikar bwe Paul ear lelok aolepen an ñõn jerbal eo an.

8, 9. Kwalok wanjoñok ko ilo Baibel me rej kwalok kin wãwen eman ro rar kejbãrok aikwij ko an ro jet.

⁸ Jen jinoin, jitõbõn karmijete ej kakõle eo kakõlen man ro rar jerbal ikijen dri korijer ro  an Jeova. Ñõn wanjoñok, jejjab maroñ lemnoke an Noa ba ñõn ro ilo uan baamle eo an: ‘Kajelaiktok iõ ñe emwij jek wa eo bwe imaroñ jibõñ yuk.’ Moses ear jab ba ñõn dri Israel ro ilo Ijipt: ‘Inaj lo kom ilo Lomalo Ekilmir. Kate joñõn wõt ami maroñ bwe komin ber ijen.’ Joshua ear jab ba: ‘Kajelaiktok iõ ñe erup worwor in Jeriko.’ Im Aiseia ear jab jitõñ bar juõn armij im ba: ‘Eñin leo! Kwon jilkinlok e.’​—Ais. 6:8.

⁹ Wanjoñok eo elaptata kin eman eo ear kõtlok bwe jitõb kwojarjar eo an Anij en tel e ej Jisõs Kraist. Ear mõnõnõ ñõn bõk erro eo ñõn jerbal einwõt dri Lomor eo an armij. (Jon 3:​16) Jitõbõn karmijete eo an Jisõs me ej berber ion yokwe ej ke kamakõt kij ñõn kõmõn eindrein bareinwõt? Juõn eo eto an bõk jerbal in elder ej kwalok wãwen an watõk bwij eo, ke ej ba: “Nan ko an Jisõs ñõn Piter bwe en s̃eperd an s̃ip rar lukkun kamakõt iõ. Iomin elõñ yiõ ko, emwij aõ kile bwe wãwen nan ko reyokwe meñe redrik, ak kwalok joij remaroñ kõkãtõk bar juõn. Ekanuij lap aõ mõnõnõ ñõn kõmõne jerbal in lale s̃ip.”​—Jon 21:16.

10. Ta eo emaroñ kamakõt juõn dri Kristian man ñõn anõke joñok eo an Jisõs ikijen korijer ñõn ro jet?

¹⁰ Ikijen bwij eo an Anij, eman ro emwij air wujleplok air mour ilo congregation eo rej aikwij bõk lemnok eo an Jisõs, eo ear ba: “I naj kakijeik kom.” (Matu 11:28) Tõmak ilo Anij im yokwe congregation eo rej kamakõt man ro dri Kristian ñõn kate ir jibarek jerbal in emõn, im jab bõk lemnok eo bwe renaj luji jabrewõt men im bwe jerbal in elap an bin ñõn ir. Bõtab, ta elañe juõn ejjab kõnan kate ñõn jibarek erro ko? Juõn dri Kristian man emaroñ ke kadrek juõn kõnan ñõn bõk erro ko ilo congregation eo?

Kadrek Juõn Kõnan ñõn Korijer ñõn Ro Jet

11. Ewi wãwen juõn emaroñ kadrek juõn kõnan ñõn korijer ñõn ro jet?

¹¹ Elañe kwoj iñjake bwe ejelok kabel ibõm im ej bõprae yuk jen am kate ñõn jibarek erro ko, ekkar bwe kwon jar kin jitõb kwojarjar. (Luk 11:13) Jitõb kwojarjar eo an Jeova enaj jibõñ yuk ñõn anjo jen jabrewõt men kwoj inebata kaki kin men in. Kõnan eo ñõn korijer ej itok jen Anij, kinke jitõb kwojarjar eo an Jeova ej kamakõt juõn brother ñõn an kate ñõn jibarek erro ko inem kakajur e ñõn kõmõni jerbal ko rekwojarjar. (Pil. 2:​13; 4:​13) Kin men in, ekkar bwe kwon kajitõk jibõñ jen Jeova ñõn kadrek juõn kõnan ñõn bõk erro ko.​—Riit Sam 25:​4, 5.

12. Ewi wãwen juõn emaroñ bõk meletlet eo ej aikwiji ñõn kajejit erro ko kar kabbeik e kaki?

¹² Juõn Kristian man emaroñ bebe bwe en jab kate ñõn jibarek erro ko, kin an lo bwe ebin ñõn kajejit aikwij ko an bwij eo, im an kejbãrok aikwij kein enaj bõk aolepen an maroñ. Ak emaroñ lemnok bwe ejabwe meletlet iben ñõn kajejit erro ko. Elañe eñin ej lemnok eo an, emaroñ bõk meletlet ikijen an niknik in katak Baibel eo im buk ko rej berber ion Baibel eo. Emõn bwe en kajitõkin e mõke, ‘Ij ke kajenolok ien ñõn katak Nan in Anij, im ij ke jar kin meletlet? Dri jilik Jemes ear je: “Elañe jabrewõt iami ej aikwij meletlet, en kajitõk kin e iben Anij, eo Ej wujlep ñõn armij otemjej, im jab enoik kake, im naj lelok ñõn e.” (Jem. 1:5) Kwoj ke tõmak nan kein rej kakõrmol in Anij? Ilo an uake jar eo an Solomon, Anij ear lelok ñõn e “buru e meletlet im jelalokjen” me ear kamaroñ e ñõn kile ta eo emõn im enana ke ear ekajete armij ro. (1 Kiñ. 3:7-​14) Emol bwe wãwen eo iben Solomon ear jej uan. Bõtab, jemaroñ liki bwe Anij enaj lelok meletlet ñõn man ro kar kabbeik ir kin erro ko an congregation eo bwe ren maroñ kejbãrok s̃ip ro an ilo wãwen eo ejime.​—Ken. 2:6.

13, 14. (a) Kemelele kin wãwen “yokwe an Kraist” ear jelet Paul. (b) Ewi wãwen “yokwe an Kraist” en jelet kij?

¹³ Bar juõn menin jibõñ ñõn kadrek kõnan eo ñõn korijer ñõn ro jet ej ñõn lukkun kalomõnlokjen kin aolep men ko Jeova im Nejin  rar kõmõni ñõn kij. Ñõn wanjoñok, jen etale 2 Dri Korint 5:​14, 15. (Riit.) Ewi wãwen ‘yokwe an Kraist e rel ilo buruer’? Yokwe eo Kraist ear kwalok ke ear lelok mour eo an kin kij ekkar ñõn ankilan Anij ekanuij lap. Inem ke ej laplok melele im kamolol eo ar kin men in, ej lukkun kamakõt buruer. Paul ear kõtlok bwe yokwe eo an Kraist en tel e. Men in ear bõprae e jen an kar lemnok wõt kin e mõke im ear jibõñ e ñõn kõmõn bwe mejenkajik eo an moktata en korijer ñõn Anij im armij ro tulikin im iloan congregation eo.

¹⁴ Ar kalomõnlokjen kin yokwe eo an Kraist ñõn armij ro ej kamakõt kij bwe jen kwalok kamolol. Tokjen men in, jej kile bwe ejjab lukkun ekkar ñõn “jeor ñõn kõniekin” ikijen ar jibarek mejenkajik ko rekibbon im mour wõt ekkar ñõn kõnan ko ar mõke. Jen an eindrein, jej kõmõn oktõk ilo mour eo ar ñõn likit moktata jerbal eo Anij ear letok ñõn kij bwe jen kõmõne. Jej emakõt ñõn “korijer” ñõn ro jeer im jãter kinke jej yokwe ir. (Riit Dri Galetia 5:​13.) Elañe jej watõk kij mõke einwõt dri korijer ro retã rej jerbal ikijen dri korijer ro an Jeova emwij air wujleplok mour ko air, jenaj kaurõk im koutiej ir. Ejelok berre bwe jeban kajeoñwe jitõbõn ellotan eo Setan ej kowõnmanlok.​—Rev. 12:10.

Kate eo an Juõn Baamle

15, 16. Ñõn kãlet elañe juõn eman ej tellokin ñõn bõk jerbal in ministerial servant ak elder, ta ijo kwonan ro uan baamle eo?

¹⁵ Elañe juõn brother eor belen im nejin, aikwij lale ber eo an baamle eo bwe ren maroñ kãlet elañe ej tellokin bõk jerbal in ministerial servant ak elder. Emol, mour in jitõb im mwilin baamle eo an enaj jelet jokãlet eo elañe remaroñ lelok ñõn e erro ko. Men in ej lukkun kwalok joñõn aurõkin ijo kwonan baamle eo ilo air rejetake leo belele im jemeir ke ej kate ñõn kajejit aikwij ko an congregation einwõt juõn ministerial servant ak elder.​—Riit 1 Timote 3:​4, 5, 12.

¹⁶ Jeova ej buñburuen ñe ro uan baamle eo rej rejetake dron. (Ep. 3:​14, 15) Ej bõk elap kate ñõn an juõn bõran baamle jokkin wõt juõn ilo an kajejit erro ko an ilo congregation im an “emõn” an lale ro ilo mweo imõn. Kin men in, eaurõk bwe juõn elder ak juõn ministerial servant en katak Baibel iben lio belen im ajiri ro nejin bwe aolep remaroñ bõk tokjen jen Ien Kabuñ an Baamle eo ilo kajjojo wik. Ej aikwij ekkeini an jerbal in kwalok nan ibeir. Ejja wãwen in wõt, eaurõk bwe ro uan baamle eo ren rejetake bõran baamle eo ilo an kate.

Kwonaj ke Bar Bõk Kwonam?

17, 18. (a) Elañe juõn brother ejoko an bõk erro ko ilo congregation, ta eo emaroñ menin aikwij ñõn an kõmõne? (b) Ta lemnok eo me juõn eo ear bõk jerbal in elder ak ministerial servant ilo jinoin en kar bõke?

¹⁷ Bwelen kar mokta kwar juõn elder ak ministerial servant, ak kiõ ejoko am bõk erro kein. Kwoj yokwe Jeova im kwomaroñ liki bwe ej kea wõt kin yuk. (1 Pit. 5:​6, 7) Kar jiroñ yuk ke bwe kwoj aikwij kõmõn jet oktõk ko? Kwon mõnõnõ in kile bwir eo am im kate yuk ñõn kõmõn oktõk ikijen jibõñ eo an Anij. Kejbãrok bwe kwon jab wõnmanlok wõt im illu. Kwon meletlet ilo am drebij wõt juõn lemnok emõn. Juõn elder ear bõk jerbal in iomin elõñ yiõ ak ear joko jerammõn in jen e,  ear ba: “Iar kate iõ ñõn berwõt ilo kwelok ko, bõk kwonaõ ilo jerbal in kwalok nan, im riiti Baibel eo einwõt ikin kar kõmõne ke iar juõn elder, men in ej juõn mejenkajik iar maroñ tõbare. Iar katak ñõn kijenmij kinke iar lemnok bwe inaj bar bõk jerammõn in elikin juõn ak ruo yiõ, bõtab ear bõk enañin jiljilimjuõn yiõ ko bwe in bar maroñ bõk jerbal in elder. Ilo ien eo, nan in rejañ ko ñõn jab ebwer ak ñõn wõnmanlok wõt im kate ñõn jibarek erro ko rar lukkun jibõñ iõ.”

¹⁸ Elañe kwoj ber ilo ejja wãwen in wõt, kwon jab ebwer. Kalomõnlokjen kin wãwen Jeova ej kejerammõn jerbal in kwalok nan eo am im baamle eo am. Kalek mour in jitõb eo an baamle eo am, lolok ro renañinmij, im rejañ ro remõjno. Ilõñin men otemjej, kwon kaurõk jerammõn eo eor ibõm ñõn kaibujuij Anij im keañ kin nuuj eo emõn kin Ailiñ eo einwõt juõn ian Dri Kennan ro an Jeova. *​—Sam 145:​1, 2; Ais. 43:10-​12.

Kwon Bar Etale

19, 20. (a) Ta eo kar rejañ aolep man ro emwij air baptais ñõn kõmõne? (b) Ta eo jenaj etale ilo katak eo tok juõn?

¹⁹ Ranin, elukkun laplok aikwij elder ro im ministerial servant ro jen kar mokta. Kin men in, jej rejañ aolep man ro emwij air baptais bwe ren bar etale wãwen ko ibeir im kajitõkin ir mõke, ‘Elañe ijjab juõn ministerial servant ak juõn elder, etke ijjab bõk kwonaõ ilo juõn ian jerbal kein? Kõtlok bwe jitõb eo an Anij en jibõñ yuk ñõn bõk lemnok eo ejime kin men in eaurõk.

²⁰ Aolep ro uan congregation eo renaj bõk tokjen jen jitõbõn karmijete im kate ko an dri tõmak ro mõtair. Elañe jej kõmõn kain jerbal rõt in ejoij im ej lemnok kin ro jet, jenaj lo lõñliñ eo ej itok jen ar korijer ñõn ro jet im jeor ñõn jitõb. Bõtab, ilo an katak in tok juõn naj kwalok, jejjab aikwij kaburomõj jitõb kwojarjar eo an Anij. Ewi wãwen jemaroñ bõprae kij jen ar kõmõne men in?

[Kamelele eo itulõl]

Ewi Wãwen Kwonaj Uak?

• Ta eo kanan eo ilo Maika 5:5 ej kalimuri kij kake?

• Kemelele kin ta eo jitõbõn karmijete ej kitibuji.

• Ewi wãwen juõn emaroñ kadrek kõnan eo ñõn korijer ñõn ro jet?

• Ewi aurõkin an baamle eo rejetake dron bwe eman eo en maroñ tellokin ñõn bõk jerbal in ministerial servant ak elder?

[Kajitõk ko ñan katak]

[Pija ilo peij 25]

Ta eo kwomaroñ kõmõne ñõn kate im jibarek erro ko relaplok?