Etke Jej Aikwij Koutiej Ro Reridto?

ILO juõn jikin ilo California, U.S.A, me ebak ñõn lojit, eor juõn wijki me ekkã an armij ro pijaiki. Etan wijki in ej Lone Cypress. Armij rej ba bwe ridtõn wijki in ej elõñlok jen 250 yiõ ko. Im wijki in aibujuij ebuñbuñ kin an kar maroñ mour wõt meñe iomin elõñ wãwen ko rebin, im ear bõk jibõñ ilo elõñ wãwen ko. Ñõn wanjoñok, armij ro rar kejbãrok wijki in ilo air lukwoje kin tomere ko im kalek juõn worwor in dreka ibelakin.

Wijki in emaroñ kakememej kij kin dri Kristian ro reridto me rej ber ibwiljid, ro im elukkun emõn air kijenmij wõt. Juõn wãwen elap rej kõmõne men in ej ilo air kwalok nan kin nuuj eo emõn. Dri kanan Joel ear kanan bwe “lõlap ro” renaj keañ kin ennan eo ilo Baibel eo. (Jerb. 2:​16-​21; Joel 2:​28-​32, UBS) Lemnok mõk kin elõñ auõ ko me rein rej joloki ñõn jibõñ ro jet ñõn katak kin “gospel in an ailiñ in lõñ”! (Matu 24:14) Jet ian dri kwalok rein reridto rar kijenmij iomin elõñ yiõ ko ke rar bõk matõrtõr im iion wãwen ko jet rebin. Elañe armij remaroñ kile juõn wijki bajjek kin an maroñ mour iomin wãwen ko rebin im rej kejbãroke kin tomere ko im juõn worwor dreka, inem ejjab ke laplok ar aikwij kwalok kamolol im koutiej ñõn ridto ro im rej ber ibwiljid?

Jeova Anij ear kakien armij ro an ilo ien ko etto: “Kwon jutõk im aber iman armij e uõn bõran, im kõñiajoik turin mejen eo e lõlap.” (Liv. 19:32) Ibwiljin dri korijer ro an Jeova ranin, jej lo joñok ko remõn an ro retiljek me rar “etetal iben Anij” iomin elõñ yiõ ko einwõt kar armij ro ilo ien ko etto. (Jen. 5:22, 24; 6:9) Ke rej wõnmanlok  im jerbale nan in kakabilek ko ilo Baibel, emol bwe uõn in bõrair ej “belin aibujuij.”​—Ken. 16:31.

Dri jilik Paul ear kakabilek jodrikdrik eo Timote: “Kwon jab konono eddro ñõn juõn emman eo eritto jen yuk.” Jen an eindrein, Timote ear aikwij ‘konono mera ñõne einwõt ñe ej jemen’ im ‘ñõn lillab ro einwõt ñe rej jinen.’ (1 Tim. 5:​1, 2) Ilo juõn wãwen, Timote ear aikwij “jutõk” iman ro reridto. Inem alikar, Jeova ej kõtõmene bwe jen konono ilo juõn wãwen ej kwalok koutiej.

Dri Rom 12:10, (UBS) ej ba: “Komin kwalok ami mõnõnõ in kautiej dron.” Emol, elder ro ilo congregation eo rej kwalok air koutiej dri Kristian ro reridto. Bõtab kij aolep jej aikwij mõnõnõ in koutiej dron.

Emol, ro uan baamle eo rej bõk erro eo ejejuan ñõn kea kin jemeir im jineir im jimair im jibwiir. Ikijen wijki eo Lone Cypress, armij ro rar bukot wãwen ko ñõn kejbãroke, im rej wõnmanlok wõt im kõmõne men in. Inem alikar, jej aikwij bukot wãwen ko ñõn kwalok koutiej ñõn jiner im jemer im jibwid im jimad. Ñõn wanjoñok, ñe jej roñjake ir, men in enaj bõprae kij jen ar kõmõni men ko ekkar ñõn kõnan ko ar, ilo ar jab lemnok kin iñjake ko air.​—Ken. 23:22; 1 Tim. 5:4.

Jeova ej lukkun kaurõk ridto ro me rej ber ibwiljid. Ejamin ilok jen ir. (Sam 71:18) Ilo mol, Anij ej kakajur ir bwe ren wõnmanlok ilo air korijer ñõn e ilo tiljek. Inem jen wõnmanlok wõt ilo ar jibõñ im koutiej ro reridto.

[Pija ko ilo peij 7]

Einwõt an wijki eo Lone Cypress aikwij bõk jibõñ, jej aikwij jibõñ im kwalok koutiej ñõn ro reridto

[Credit line]

American Spirit Images/age fotostock