Kajitõk ko jen Ro Rej Riit

Kinke Jeova ear kamo kabuñ ñõn ekjõp, etke ear jab kajeik Aron ke ear kõmõne juõn kon in kau gold?

Ke Aron ear kõmõne juõn kon in kau gold einwõt an walok ilo Exodus japter 32, ear rupe kien eo an Anij ikijen kabuñ ñõn ekjõp. (Ex. 20:​3-5) Tokjen men in, “Jeova e ar kanuij illu iben Aron ñõn kokkure e: im [Moses] ar jar kin Aron bareinwõt, ien eo.” (Dut. 9:​19, 20) ‘Elap ke tokjen’ jar eo an dri wãnik eo Moses ikijen Aron? (Jem. 5:​16) Aet. Kin an kar jar kin e im kin bar un ko ruo, einwõt ealikar bwe Jeova ear uake jar eo an Moses im ear jab kaje Aron.

Juõn un ej kin tiljek eo an Aron iomin elõñ yiõ ko. Ke Jeova ear jiroñ Moses bwe en jãdelok iman Pero im kadrioijlok dri Israel ro jen Ijipt, ear bar jitõñ Aron ñõn an ilok iben Moses im konono ikijen. (Ex. 4:​10-​16) Eman rein ruo rar bokake im jãdelok elõñ alen iman kiñ in Ijipt meñe rar iñtan kin an utiej buruen Pero. Kin men in, ke ear ber ilo Ijipt, Aron ear lukkun kamol bwe ear tiljek ilo jerbal eo an ñõn Jeova.​—Ex. 4:​21.

Jen bareinwõt lemnok kin ta eo ear kõmõn bwe Aron en eiki juõn kon in kau gold. Moses ear ber ion Tol Sainai iomin 40 ran ko. ‘Ke armij rar lo bwe e rumij an Moses wõnlõltak jen tol eo,’ rar karele Aron bwe en kõmõne juõn ekjõp ñõn ir. Aron ear errã im kõmõne juõn kon in kau gold. (Ex. 32:​1-6) Bõtab, makõtkit ko an Aron tokelik rar kamol bwe ear jab buñburuen kin an armij ro kabuñ ñõn ekjõp. Inem, ealikar bwe ear kõtlok bwe armij ro ren jibed e. Ñõn wanjoñok, ke Moses ear kamarmire abañ eo kin kabuñ ñõn ekjõp, aolep lõmaro nejin Livai ekoba Aron, rar kãlet ñõn lor Jeova. Kar mõn jilu tausan ian armij ro rar bõk erron kabuñ ñõn ekjõp.​—Ex. 32:25-​29.

Ejjabto, Moses ear jiroñ armij ro: “Kom ear kanuij jerawiwi.” (Ex. 32:30) Kin men in, ejjab Aron wõt ear or ruõn kin bwir eo. E im armij ro rar jimor bõk tokjen jen tiriamo eo elap an Jeova.

Elikin men eo ear walok ikijen kon in cow gold eo, Jeova ear kakien bwe Aron en jerbal einwõt pris eo elap. Anij ear ba ñõn Moses: “Kwon likit ion Aron nuknuk ko re kwojarjar; im kwon kabit e, im kokwojarjar e, bwe en korijer ñõn Iõ ilo jerbal an pris.” (Ex. 40:12, 13) Ealikar bwe Jeova ear jolok an Aron bwir kin likjõp eo an. Ilo buruen, Aron ear juõn eo etiljek ilo an rejetake kabuñ eo emol, im ear jab juõn dri jumae me ej kabuñ ñõn ekjõp.