Kwon Jab Kaburomõj Jitõb Kwojarjar eo an Jeova

“Komin jab kaburomõj Jitõb Kwojarjar an Anij, ilo Eo emwij sil kom.”​—EP. 4:​30.

1. Ta eo emwij an Jeova kar kõmõne ñõn elõñ million armij ro, im ta erro eo eber ibeir?

 JEOVA emwij an kõmõne juõn men ejej uan ñõn elõñ million armij ro rej jokwe ilo lõlin eobrõk kin nana. Ear kebellok ial eo bwe ren maroñ kebak e ikijen nejin eo ej mõke wõt, Jisõs Kraist. (Jon 6:​44) Kwoj juõn ian rein elañe kwoj mour ekkar ñõn wujleplok eo am ñõn Anij. Kinke emwij am baptais ilo etan jitõb kwojarjar, ej am erro ñõn mour ekkar ñõn tel eo an.​—Matu 28:19.

2. Ta kajitõk ko jenaj etali?

² Jej “jeor ñõn Jitõb,” ilo ar kõnõk juõn armij ekãl. (Gal. 6:8; Ep. 4:​17-​24) Bõtab, dri jilik Paul ej kakabilek im kakkil kij bwe jen jab kaburomõj jitõb kwojarjar eo an Anij. (Riit Dri  Epesõs 4​:25-​32.) Jen lukkun etale kiõ nan in kakabilek in an dri jilik Paul. Ta melele eo an Paul ke ear kennan kin kaburomõj jitõb kwojarjar? Ilo wãwen it ko juõn dri Kristian emaroñ kaburomõj jitõb kwojarjar? Im ewi wãwen jemaroñ bõprae bwe jen jab kaburomõj jitõb kwojarjar eo an Jeova?

Melelen Nan ko an Paul

3. Ewi wãwen kwonaj kar kemeleleik nan ko ilo Dri Epesõs 4:​30?

³ Moktata, jen lale nan ko an Paul ilo Dri Epesõs 4:​30. Ear je: “Komin jab kaburomõj Jitõb Kwojarjar an Anij, ilo Eo emwij sil kom mae ran in lomor.” Paul ear jab kõnan bwe dri tõmak ro mõtõn ren likit kõtan eo air iben Anij ilo kauwatata. Jitõb kwojarjar eo an Jeova ear ‘sil ir mae ran in lomor.’ Jitõb kwojarjar eo an Anij ej juõn sil ak kein kamol ñõn dri kabit ro retiljek ilo ien ko etto im bareinwõt ilo ran kein “kin men otemjej ko emwij an keboji” ñõn ir. (2 Kor. 1:​22) Sil in ej kalikar bwe rein rej an Anij im renaj bõk jolit ñõn mour ilõñ. Oran aolep rein renaj sil ir ej 144,000.​—Rev. 7:​2-4.

4. Etke eaurõk ñõn kejbãrok bwe jen jab kaburomõj jitõb kwojarjar eo an Anij?

⁴ Ar kaburomõj jitõb kwojarjar eo emaroñ buñten ne eo moktata im emaroñ kõmõn bwe jen luji jitõb eo an Anij im ej jerbal ilo mour ko ar einwõt dri Kristian. Ñõn kamol bwe men in emaroñ walok, ej alikar ilo nan ko an Devid elikin an kar jerawiwi iben Bat-Shiba. Devid ear akwelap ñõn Jeova im ba: “Kwon jab jolok iõ jen iman mejõm; im Kwon jab bõk jen ña Am Jitõb Kwojarjar.” (Sam 51:11) Dri kabit ro wõt im rej kamol air “tiljek ñõn mij,” renaj bõk “belin” mour indrio ilõñ eo me ejamin lo wabõnbõn. (Rev. 2:​10; 1 Kor. 15:53) Dri Kristian ro im kejatrikrik eo air ej ñõn mour indrio ion lõl, ir bareinwõt rej aikwiji jitõb kwojarjar eo ñõn air maroñ drebij wõt air tiljek ñõn Anij, im bwe ren bõk menin letok eo kin mour indrio im ej berber ion katok in binmour eo an Kraist. (Jon 3:​36; Rom 5:8; 6:​23) Kin men in, kij aolep jej aikwij kejbãrok bwe jen jab kaburomõj jitõb kwojarjar eo an Jeova.

Ewi Wãwen Juõn Dri Kristian Emaroñ Kaburomõj Jitõb Kwojarjar?

5, 6. Ewi wãwen juõn dri Kristian emaroñ kaburomõj jitõb kwojarjar eo an Jeova?

⁵ Einwõt dri Kristian ro emwij air baptais, jej aikwij bõpraik ar kaburomõj jitõb kwojarjar. Elañe “jej mour kin Jitõb, im etetal kin Jitõb,” kõnan ko an kõniek reban anjo ior im jeban kõmõni mõnit ko renana. (Gal. 5:​16, 25, 26) Bõtab wãwen in emaroñ oktõk. Jemaroñ kaburomõj jitõb kwojarjar eo an Anij, bwelen ilo ar jab kile, elañe jej kõtlok bwe jidrik kin jidrik jen kõmõni mõnit ko me Baibel eo ej kananaiki.

⁶ Elañe jej wõnmanlok wõt im jumae ial in tel eo an jitõb kwojarjar, jenaj kaburomõj Jeova, eo ej unjen jitõb in. Ilo ar etale nan ko ilo Dri Epesõs 4:​25-​32, enaj kwalok ñõn kij kin wãwen jej aikwij makõtkit, im enaj jibõñ kij ñõn bõpraik ar kaburomõj jitõb kwojarjar eo an Anij.

Ewi Wãwen Jemaroñ Bõprae Ar Kaburomõj Jitõb Kwojarjar

7, 8. Kemelele kin unin jej aikwij mol.

⁷ Jej aikwij mol. Ekkar ñõn Dri Epesõs 4:​25, Paul ear je: “Ke emwij ami jolok riõp, komin konono mol, kom otemjej, ñõn dri turumi: bwe kij ran dron.” Kinke jej “ran dron,” jen jab etao im kajeoñ telbiloik dri tõmak ro mõtar, kinke ej einwõt ñe jej riõp ñõn ir. Jabrewõt eo ej jerbal ilo wãwen in ejamin maroñ jimjera iben Anij.​—Riit Jabõn Kennan Ko 6:​16-19.

⁸ Nan im kõmõn ko reriõp remaroñ rupe burukuk eo an juõn congregation. Kin men in, jej aikwij einwõt dri kanan Daniel eo ear lap air liki, im ro jet rar jab maroñ lo notan. (Dan. 6:​4, UBS) Jej aikwij bareinwõt kememej nan in kakabilek ko an Paul ñõn dri Kristian  dri kabit ro bwe kajjojo iair rej “enbwinin Kraist” im rej ran dron. Rej aikwij burukuk wõt iben aolep dri kabit ro jet remol an Jisõs. (Ep. 4:​11, 12) Elañe jej kejatrikrik in mour indrio ilo juõn paredais ijin ion lõl, kij bareinwõt jej aikwij konono ilo mol. Ilo wãwen in, jej jibõñ kowõnmanlok burukuk eo an jimjãn jimjãtin ibelakin lõl.

9. Etke eaurõk bwe jen jerbale nan ko ilo Dri Epesõs 4:​26, 27?

⁹ Jej aikwij jumae Devil eo, im jab kõtlok bwe en kokkure kõtan eo ar iben Jeova. (Jem. 4:7) Jitõb kwojarjar eo ej jibõñ kij ñõn jumae Setan. Ñõn wanjoñok, jemaroñ kõmõne men in ilo ar drebij ar illu. Paul ear je: “Komin illu im jab jerawiwi: al en jab tulok ion ami illu; im komin jab najikin devil eo.” (Ep. 4:​26, 27) Elañe eor unin ar illu, ar mõkõj im jar ilo buruer emaroñ jibõñ ‘kemer buruer’ bwe jen jab kõmõn jabrewõt men emaroñ kaburomõj jitõb eo an Anij. (Ken. 17:27) Kin men in, jen jab illu wõt im kõtlok bwe Setan en kabo kij ñõn kõmõn juõn men enana. (Sam 37:​8, 9) Juõn wãwen jemaroñ jumae Setan ej ilo ar kamarmiri abañ ko ilo mõkõj ekkar ñõn nan in kakabilek eo an Jisõs.​—Matu 5:​23, 24; 18:15-​17.

10, 11. Etke jejjab aikwij kwot ak riõp?

¹⁰ Jen jab bo ilo jabrewõt wãwen ñõn kwot ak riõp. Ikijen kwot, Paul ear je: “Eo e ar kwot en jab bar kwot: a emõnlok en jerbal im kõmõn kin pein men eo emõn bwe en or iben in lelok ñõn eo ej aikwij.” (Ep. 4:​28) Elañe dri Kristian eo emwij an baptais ej kwot, enaj kõmõn bwe armij ren ‘kajirere kake etan Anij.’ (Ken. 30:​7-9) Meñe juõn ej jeramel, ejjab melelen bwe emaroñ kwot. Ro rej yokwe Anij im ro dri turiir rejelã bwe ejjab jime ñõn kwot jabrewõt ien.​—Mark 12:28-​31.

¹¹ Paul ear jab baj kwalok wõt kin ta eo jejjab aikwij kõmõne, ak ear bareinwõt kwalok kin ta eo jej aikwij kõmõne. Elañe jej etetal im mour kin jitõb kwojarjar, jenaj kate kij ñõn kabwe aikwij ko an baamle eo ar, im bareinwõt bwe en or iber menin “lelok ñõn eo ej aikwij.” (1 Tim. 5:8) Jisõs im dri jilik ro an rar kajenolok jããn ko ñõn jibõñ ro dri jeramel, ak Judas Iskariõt ear kwot jen jããn kein. (Jon 12:​4-6) Ealikar bwe jitõb kwojarjar eo ear jab ber iben. Einwõt kar Paul, jej “kõmmõni men ko rejimwe ien otemjej” kinke jitõbõn Anij ej tel kij. (Hib. 13:18, UBS) Ilo ar kõmõne men in, jejjab kaburomõj jitõb kwojarjar eo an Jeova.

Wãwen ko Jet ñõn Bõprae Ar Kaburomõj Jitõb Kwojarjar

12, 13. (a) Ilo Dri Epesõs 4:29, kain kennan rõt ko jej aikwij bõprae kij jeni? (b) Ar kennan en kar ilo wãwen rõt?

¹² Jej aikwij kejbãrok  wãwen ar kennan. Paul ear ba: “Ejelok nan etton en waloktok jen loñimi, a jabrewõt eo emõn im nan in kalek ekar ñõn aikwij, bwe en lelok joij ñõn eo ej roñjake.” (Ep. 4:​29) Bar juõn alen, dri jilik Paul ear jab baj kwalok wõt kin ta eo jejjab aikwij kõmõne, ak ear bareinwõt kwalok kin ta eo jej aikwij kõmõne. Jitõb eo an Anij enaj tel kij ñõn kwalok nan ko ‘remõn im nan in kalek rekkar ñõn aikwij, bwe ren lelok joij ñõn eo ej roñjake.’ Bareinwõt, jen jab kõtlok bwe nan ko retton ren waloktok jen loñir. Nan eo “etton” ear itok jen juõn nan ilo kajin Grik im kar kajerbale ilo kõkkar kin mõña ko rõkõt einwõt iik, kõniek, ak leen wijki ko. Einwõt ar drike mõña ko rõkõt, eindrein jej drike wãwen kennan ko Jeova ej watõki renana.

¹³ Wãwen ar kennan en emõn, joij, im “en emwij kejãtok e kin salt.” (Kol. 3:​8-​10; 4:6) Armij ro rej aikwij in kile bwe jej oktõk jen ir ñe rej roñjake men ko jej ba. Kin men in, jen jibõñ ro jet ñõn air konono kin men ko ‘remõn im nan in kalek.’ Im jen bõk ejja iñjake eo wõt an dri jeje sam ke ear al im ba: “Nan ko jen loõ, im lemnok ko ilo buruõ, ren emõn iman mejõm, O Jeova aõ dreka im aõ Dri lomor.”​—Sam 19:14.

14. Ekkar ñõn Dri Epesõs 4:​30, 31, ta ko jej aikwij jolok jen kij?

¹⁴ Jej aikwij jolok meo, libõpne, konono nae, kab kakitõtõ otemjej. Elikin an kar Paul kakkil nae ar kaburomõj jitõb eo an Anij, ear je: “En joko jen kom meo otemjej, im libõpne, im illu, im airwaro, im konono nae, kab kakitõtõ otemjej.” (Ep. 4:30, 31) Kinke jejjab wãppen, kij aolep jej aikwij kate kij ñõn kejbãrok lemnok im kõmõn ko ar. Elañe jej kwalok ‘meo otemjej, libõpne, im illu’ ien otemjej, inem jenaj kaburomõj jitõb eo an Anij. Enaj eindrein bareinwõt elañe jejjab jeorlok bwir ko armij rej kõmõni nae kij, im jej ellotane ro jet, im jab kõnan kamarmir abañ eo ikõtan armij eo ear bwir nae kij. Elañe jej jino kajitokjen nan in kakabilek ko ilo Baibel, jemaroñ jino kõmõni men ko me renaj tellok kij ñõn ar jerawiwi nae jitõb eo im kokkure kõtan eo ar iben Anij im armij ro.

15. Ta eo jej aikwij kõmõne elañe juõn ej bwir nae kij?

¹⁵ Jej aikwij joij, emõn buruer, jolok an dron bwir. Paul ear je: “Komin joij ñõn dron, en emõn buruemi, jolok nana jen dron, einwõt Anij ilo Kraist E ar jolok ami nana.” (Ep. 4:​32) Meñe juõn armij ar kõmõne juõn men elukkun nana nae kij, jej aikwij kajeoñwe Anij ilo ar jolok bwir. (Luk 11:4) Ta elañe juõn ian dri tõmak ro mõtar ear ba juõn nan enana nae kij? Ñõn ar kamarmire abañ eo, jej aikwij mokta kebake im konono iben, elañe ej lukkun ukwelok im kajitõk bwe jen jolok an bwir, inem jej aikwij jolok bwir eo an. Bõtab, meñe jej jeorlok an bwir, ak ebar or men ko jet jej aikwij kõmõni. Livitikõs 19:​18 ej ba: “Kwon jab irenwõne, im kwon jab bãle ro nejin armij ro am; a kwon yokwe dri turum einwõt kwe: Ña Jeova.”

 Jej Aikwij Ekil Wõt

16. Kwalok juõn wanjoñok eo im ej kalikar kin aikwij eo ñõn ar kõmõn oktõk ko bwe jen jab kaburomõj jitõb eo an Jeova.

¹⁶ Jemaroñ kõmõne juõn men ilo ittino me Anij ejjab buñburuen kake. Ñõn wanjoñok, juõn jeer im jãter ej roñjake al ko rejakkar. Ejjabto men in emaroñ kabnõnõik bõklikõt eo an kinke ej kejekron nan in kakabilek ko ilo buk ko “dri korijer e tiljek im meletlet” ej litoki. (Matu 24:45) Emaroñ jar kin abañ in im emaroñ kememej nan ko an Paul ilo Dri Epesõs 4:​30. Inem ej kate e bwe en jab kõmõn jabrewõt men me enaj kaburomõj jitõb eo an Anij, im ej bebe ñõn an kejbãrok bwe en jab bar roñjaki al ko rejakkar. Jeova enaj kejerammõn armij in kin an kate. Kin men in, ien otemjej jen kejbãrok bwe jen jab kaburomõj jitõb kwojarjar eo an Anij.

17. Ta eo emaroñ walok elañe jejjab ekil wõt im jar?

¹⁷ Elañe jejjab ekil im jar ien otemjej, jemaroñ bo ilo juõn mõnit etton im nana me emaroñ kaburomõj jitõb kwojarjar. Kinke Jeova ej kajerbal jitõb kwojarjar eo ñõn kõmõnmõn ankilan, alikar bwe wãwen an jerbal ej ien otemjej errã iben ankilan. Kin men in jemaroñ kaburomõj jitõb kwojarjar eo elañe jej kõmõni men ko rebwir nae Jeova. (Ep. 4:​30) Ilo jerawiwi, skraib ro ilo ien eo an Jisõs rar ba bwe men in kabwilõñlõñ ko Jisõs ear kõmõni kar itok jen kajur eo an Setan. (Riit Mark 3:​22-​30.) Dri kijirãte rein an Kraist rar “blaspim nae Jitõb Kwojarjar,” im ilo wãwen in rar kõmõn juõn bwir eo ej tellokin mij ñõn indrio. Jen kejbãrok bwe jen jab kõmõn einwõt kar rein.

18. Ewi wãwen ar maroñ jela bwe jerawiwi eo jar kõmõne ejjab nae jitõb kwojarjar?

¹⁸ Kinke jejjab kõnan ber ilo kauwatata eo ñõn kõmõn jerawiwi ko im remaroñ tellok kij ñõn mij indrio, jej aikwij kememej nan eo an Paul ke ear ba bwe jen jab kaburomõj jitõb kwojarjar. Ak ta elañe jar kõmõne juõn bwir elap? Elañe emwij ar ukwelok, bõk jibõñ jen elder ro, jemaroñ ba bwe emwij an Anij jeorlok ar bwir, im men in ej kalikar bwe jejjab jerawiwi nae jitõb kwojarjar eo. Ikijen jibõñ jen Anij, emaroñ bareinwõt bõprae kij jen ar kaburomõj jitõb kwojarjar eo ilo jabrewõt wãwen.

19, 20. (a) Ta jet ian men ko jej aikwij kejbãrok kij jeni? (b) Ta eo jej aikwij kate kij bwe jen kõmõne?

¹⁹ Anij ej kajerbal jitõb kwojarjar eo an ñõn kalaplok yokwe, lõñliñ, im burukuk eo ibwiljin armij ro an. (Sam 133:​1-3) Kin men in, jej aikwij kejbãrok bwe jen jab kaburomõj jitõb eo ikijen ar ñiremij ak ikijen ar konono nae ro me jitõb ear jitõñ ir ñõn lale congregation eo. (Jerb. 20:28; Jud 8) Ijellokin men in, jej aikwij kowõnmanlok jitõbõn burukuk im koutiej dron ilo congregation eo. Emol, jejjab aikwij rejañ ro ilo congregation eo bwe ren kwalok kaljiklok ilo ar kõmõn kumi ko rej jenolok jen dron ibwiljin armij ro an Anij. Paul ear je: “Ij akwelap ñõn kom, ro jãtiõ, kin etan ar Iroij Jisõs Kraist, bwe komin otemjej konono einwõt juõn, im bwe en ejelok jibil iolapemi; a bwe komin jimor wãppenlok ilo juõn lemnok im juõn bebe.”​—1 Kor. 1:​10.

²⁰ Jeova ej mõnõnõ im emaroñ jibõñ kij ñõn kejbãrok bwe jen jab kaburomõj jitõb eo an. Jen wõnmanlok wõt im kajitõk ñõn bõk jitõb kwojarjar eo im kate kij bwe jen jab kaburomõje. Jej aikwij “jeor ñõn Jitõb” ilo ar wõnmanlok wõt im kate kij ñõn bukot tel eo an jen kiõ im ñõn indrio.

Ewi Wãwen Kwonaj Uak?

• Ta melelen ñõn kaburomõj jitõb eo an Anij?

• Ewi wãwen juõn dri Kristian emaroñ kaburomõj jitõb eo an Anij?

• Ilo wãwen it ko jemaroñ bõprae kij jen ar kaburomõj jitõb kwojarjar?

[Kajitõk ko ñan katak]

[Pija ilo peij 30]

Kamarmiri abañ ko ar iben ro jet ilo mõkõj

[Pija ilo peij 31]

Ewi ian leen wijki kein ej lukkun kalikar wãwen am konono?