Limaro, Etke Komij Aikwij Kõtãik Kom ñõn Bõr eo Ami?
Limaro, Etke Komij Aikwij Kõtãik Kom ñõn Bõr eo Ami?
“Bõran kõra man.”—1 KOR. 11:3.
1, 2. (a) Ta eo dri jilik Paul ear jeje kake kin karõk eo an Jeova kin lajrõk in bõr im ro rej aikwij kõtãik ir? (b) Ta kajitõk ko jenaj etali ilo katak in?
JEOVA ear kõmõne lajrõk eo ekwon me dri jilik Paul ear konono kake ke ear je “bõran jabrewõt man Kraist” im “bõran Kraist Anij.” (1 Kor. 11:3) Katak eo lok ear kalikar bwe Jisõs ear watõke juõn jerammõn elap im juõn menin kalõñliñ ñõn an kõtãik e ñõn Bõr eo an, Jeova Anij, im bwe Kraist ej bõran dri Kristian man ro. Ke Kraist ear jerbal iben armij ro ear kwalok joij, lejokmen, tiriamokake, im ear jab kibbon. Ej aikwij eindrein wãwen an man ro ilo congregation eo jerbal iben ro jet, elaptata iben limaro beleir.
2 Ak ta kin kõra ro? Wõn eo ej bõr eo air? Paul ear je, “bõran kõra man.” En ewi lemnok eo an kõra ro kin nan kein rej kakõrmol in Anij? Nan in kakabilek in ej ke jerbal wõt elañe leo ejjab juõn dri tõmak? Ñe kõra ro rej kõtãik ir ñõn lõmaro beleir, men in ej ke melelen bwe rejjab maroñ kwalok lemnok ko air ñe rej aikwij kõmõn bebe ko? Ilo wãwen it eo juõn kõra ej bõk nebar ñõn emõke?
“Inaj Kõmmõne Juõn Rejtan bwe En Jibañe”
3, 4. Etke karõk eo an Anij kin bõr eor tokjen ilo mour in mare?
3 Anij ear beek kin wõn eo ej bõran juõn baamle. Elikin an kar kõmõnmõn Adam, Jeova Anij ear ba: “Ejjab emmõn an leo make ian. Inaj kõmmõne juõn rejtan bwe en jibañe.” Ke ear kõmõnmõne Iv, joñõn an kar Adam lõñliñ kin an or juõn rejetan im an dri jibõñ, ear ba: “Kiõ ej kab naj wor mõtta. Drin ej driũ im kanniekin ej kanniekũ.” (Jen. 2:18-24, UBS) Ear or iben Adam im Iv kejatrikrik eo ñõn erom jemen im jinen armij otemjej rewãppen, me renaj kar mour ñõn indrio ilo paredais eo ibelakin lõl.
4 Kin jab bokake eo an Adam im Iv, wãwen eo ewãppen ilo jikin kallip in Iden ear joko. (Riit Dri Rom 5:12.) Bõtab karõk eo an Anij bwe leo ej bõran lio belen ear jerbal wõt. Ñe ejime an leo kõmõne ijo kwonan einwõt bõr eo im lio ej kõtãik e ñõn bõr eo an, men in ej bõktok elap mõnõnõ im tokjen ko remõn ñõn mour in mare eo. Tokjen eo enaj einlok wõt wãwen kar iñjake eo an Jisõs kin an kõtãik e ñõn Bõr eo an, Jeova. Mokta jen an kar ber ion lõl einwõt juõn armij, Jisõs ear “mõnõnõ ien otemjej iman [Jeova].” (Ken. 8:30) Kin jab wãppen eo ar, man ro rejjab maroñ kajejit erro eo air einwõt bõr ilo wãppen, im ejjab biruru ñõn an kõra ro kõtãik ir. Bõtab, ñe lõmaro im limaro rej kate wõt ir joñõn wõt air maroñ ñõn kajejit erro ko air, men in enaj bõktok mõnõnõ eo elaptata me emaroñ walok ilo mour in mare eo airro ilo ran kein.
5. Etke dri belele ro rej aikwij bõk ñõn burueir nan in kakabilek eo ej ber ilo Dri Rom 12:10?
5 Bwe en maroñ or tõbrõk ilo juõn mour in mare, elukkun aurõk ñõn an dri belele ro jerbale nan in kakabilek in ilo Baibel me ej ñõn aolep dri Kristian ro: “Komin kanuij yokwe dron einwõt ro jimjen jimjatin ilo Christ, im komin kwalok ami mõnõnõ in kautiej dron.” (Rom 12:10, UBS) Bareinwõt, leo im lio jimor rej aikwij kate ir ñõn kwalok ‘joij ñõn dron, en emõn burueir, im ren jolok nana jen dron.’—Ep. 4:32.
Ñe Eo Belen Ejjab Ber ilo Mol Eo
6, 7. Ta eo emaroñ walok elañe lio ej kõtãik wõt e ñõn leo belen me ejjab ber ilo mol eo?
6 Ta elañe eo beleõm ejjab juõn dri korijer an Jeova? Eo im ekkã an jab ber ilo mol eo ilo baamle eo ej leo. Elañe ej eindrein, inem ewi wãwen lio ej aikwij kõmõn ñõn leo belen? Baibel eo ej uak: “Ein drein, limaro, komin kõtãik kom ñõn lõmaro belemi; bwe elañe jabrewõt e jab bokake nan eo, en rel buruen ñe ejelok nan, kin an beleir ber im kõmõn; Ñe rej lo ami etetal ekwojarjar ilo mijõk.”—1 Pit. 3:1, 2.
7 Nan eo an Anij ej jiroñ lio bwe en kõtãik wõt e ñõn leo belen me ejjab ber ilo mol eo. Kõmõn ko an remõn remaroñ kamakõt leo ñõn an etale ta eo ej kõmõn bwe lio en emakõt ilo juõn wãwen emõn. Tokjen men in, leo emaroñ etale tõmak eo an lio belen im tokelik erom juõn dri tõmak bareinwõt.
8, 9. Ta eo juõn Kristian kõra emaroñ kõmõne elañe mwilin ejjab kaitoklimoen leo belen ñõn an kõnan katak mol eo?
8 Bõtab, ta elañe leo ejjab kwalok an itoklimo? Baibel eo ej rejañ lio ñõn an kwalok karkar ko karkarin Kristian ien otemjej, meñe emaroñ bin ñõn an kõmõne. Ñõn wanjoñok, jej riit ilo 1 Dri Korint 13:4: “Yokwe ej meanwõr.” Inem, emõn bwe lio en wõnmanlok im jerbal “kin etã otemjej kab inemõn, kin ejelok burokaru,” im ñõn kijenmij iomin wãwen eo ej iione ilo yokwe. (Ep. 4:2) Ikijen jibõñ eo jen kajur eo an Anij melelen jitõb kwojarjar eo an, juõn dri Kristian emaroñ kwalok karkar ko karkarin Kristian, meñe ej ber iomin wãwen ko rebin.
9 Paul ear je, “I maroñ in kõmõn men otemjej ilo Eo ej kakajur iõ.” (Pil. 4:13) Jitõb eo an Anij ej kamaroñ dri Kristian dri belele eo ñõn an kõmõni elõñ men ko me ejamin naj kar maroñ kõmõni elañe ear jab bõk jibõñ jene. Ñõn wanjoñok, ñe elukkun nana wãwen an dri belele eo kõmõn ñõn dri Kristian eo belen, men in emaroñ kamakõt e ñõn an kõnan ukot nana kin nana. Bõtab, Baibel eo ej jiroñ aolep dri Kristian ro: “Komin jab bar lelok ñõn jabrewõt armij nana kin nana. . . . Bwe emwij je, Kwonaõ irenwõne, I naj nawõnan, Iroij e ba.” (Rom 12:17-19) Ejja eindreinlok wõt an 1 Dri Tessalonika 5:15 kakabilek kij: “Komin lale bwe ejelok iami en nawõnan nana kin nana ñõn jabrewõt armij; a ien otemjej komin lor men ko remõn ñõn dron kab ñõn armij otemjelok.” Ikijen jibõñ eo jen jitõb kwojarjar eo an Jeova, jenaj maroñ kõmõne men eo jar jab maroñ kõmõne kin kajur eo ar mõke. Inem ekkar ñõn ar jar bwe jitõb kwojarjar eo an Jeova en jibõñ kij kin men eo jej likjõp kake!
10. Ewi wãwen an kar Jisõs jerbal iben ro im rar jab joij ilo nan im kõmõn ko air?
10 Jisõs ear likit joñok eo emõntata kin wãwen eo ear jerbal iben ro im rar ba ak kõmõni men ko renana nae e. Ilo 1 Piter 2:23 ej ba: “Eo ke ar konono nae E, e ar jab bar konono nae; ke E ar iñtan E ar jab kalelñoñ, a E ar mõke likit E ñõn Eo ej ekajet jime.” Jej bõk rejañ ñõn lor joñok in an emõn. Jen jab kõtlok bwe kõmõn ko renana an ro jet ren kailluik kij. Einwõt kar kakabilek aolep dri Kristian ro, “komin tiriamokake dron, komin yokwe einwõt jimjãn jimjãten, komin keni, im en etã buruemi: Komin jab lelok nana kin nana, ak kajirere kin kajirere.”—1 Pit. 3:8, 9.
Rejjab Maroñ ke Kwalok Lemnok ko Air?
11. Ta jerammõn eo elap eor iben jet Kristian kõra ro?
11 Kinke kõra ro rej aikwij kõtãik ir ñõn lõmaro beleir, men in ej ke melelen bwe rejjab maroñ kwalok lemnok ko air ñe rej kõmõn bebe ko kin men ko an baamle eo ak men ko jet? Jaab. Jeova ej lilok elõñ jerammõn ko ñõn man im kõra ro. Lemnok kin jerammõn eo elap me eor iben kajjojo 144,000 dri kabit ro ñõn iroij einwõt kiñ im pris ro ilõñ iben Kraist ñe enaj iroij ion lõl! Oran in ej kitibuj kõra ro. (Gal. 3:26-29) Alikar, Jeova ear lelok kwonan kõra ro ilo karõk eo an kin men ko.
12, 13. Kwalok juõn wanjoñok me ej kwalok bwe ear or kõra ro im rar drikanij.
12 Ñõn wanjoñok, ilo ien ko etto ear or kõra ro im rar drikanij. Joel 2:28, 29, (UBS) ear kanan: “Tokelik inaj lutõk aõ jitõb ion armij otemjej: ladrik ro im ledrik ro nejimi renaj kwalok nan ko aõ. . . . Ilo ien eo, inaj lutõk aõ jitõb, aet, ion emman ro im kõrã ro karejara.”
13 Enañin 120 dri kalor ro an Jisõs me rar koba iben dron ilo juõn bo ilo Jerusalem ilo ran in Pentekost eo ilo yiõ eo 33, ear kitibuj kõra im man ro jimor. Kar lutõklok jitõb eo an Anij ion aolepen armij rein. Kin men in, Piter ear maroñ eliji nan ko dri kanan Joel ear kanan kaki im jerbale ñõn man im kõra ro jimor. Piter ear ba: “A men in men eo dri kanan Joel e ar konono kake; Im Anij ej ba, Ilo ran ko eliktata, I naj lutõk aõ Jitõb ion kõniek otemjej: im ro nejemi man im ro nejemi kõra re naj drikanij, . . . ; Im ilo ran ko I naj lutõk aõ Jitõb ion ro dri korijera man im ion ro dri korijera kõra; im re naj drikanij.”—Jerb. 2:16-18.
14. Kar ta ijo kwonan kõra ro ñõn kajededlok kabuñ in Kristian eo jinoin?
14 Ilo ien ko an dri Kristian ro jinoin, ear lap ijo kwonan kõra ro ñõn kajededlok kabuñ in Kristian. Rar kwalok nan ñõn ro jet kin Ailiñ eo an Anij im kõmõni men ko me rar ekkejellok ñõn jerbal in kwalok nan. (Luk 8:1-3) Ñõn wanjoñok, dri jilik Paul ear ãñiñin Phoebe einwõt juõn “eo ej jerbal ilo eklesia eo ilo Cenchreae.” Im ke Paul ear jilkinlok nan in yokyokwe ñõn dri jerbal ro mõtõn, ear konono kin elõñ kõra ro retiljek, ekoba “Traipina im Traiposa, ro rej jerbal ilo Iroij.” Ear bareinwõt konono kin ‘jerair ejitenburu Persis, eo elab kwonan ilo jerbal an Iroij.’—Rom 16:1, 12, UBS.
15. Ilo ran kein ar, ewi ijo kwonan kõra ro ñõn kajededlok kabuñ in Kristian?
15 Ilo ran kein ar, jen ibwiljin elõñlok jen jiljilimjuõn million dri kwalok ro, eor juõn jar elap in kõra ro me rej kwalok kin nuuj eo emõn kin Ailiñ in Anij ibelakin lõl. (Matu 24:14) Elõñ iair rej full-time dri kwalok ro, mejinede ro, im rej uan baamle in Bethel. Dri jeje sam eo Devid ear al: “Iroij ej letok nan eo; kõra ro rej kwalok e, juõn jar elap.” (Sam 68:11) Elap an mol men in! Jeova ej kaurõk ijo kwonan kõra ro ñõn kwalok kin nuuj eo emõn im ñõn kõtõbrõke karõk ko an. Alikar, aikwij eo ñõn an kõra ro kõtãik ir ñõn lõmaro beleir ejjab melelen bwe rejjab maroñ kwalok lemnok ko air.
Kõra ro Ruo me Rar Kwalok Lemnok ko Air
16, 17. Ewi wãwen joñok eo an Sera ej kwalok bwe kõra ro remaroñ kwalok lemnok ko air ñõn lõmaro beleir?
16 Elañe Jeova ej lelok ñõn kõra ro elõñ jerammõn ko, inem ejjab ke juõn menin aikwij ñõn an lõmaro kebak limaro beleir mokta jen air kõmõn bebe ko relap? Ej juõn wãwen rej kwalok meletlet ñe rej kõmõne men in. Baibel eo ej kwalok kin jet wãwen ko rar walok ke kõra ro rar kwalok lemnok ko air ak kõmõni jet men ko meñe lõmaro beleir rar jab kajitõk ibeir kin men kein. Lemnok kin wanjoñok kein ruo.
17 Elõñ alen Sera ear jiroñ Ebream ñõn an jilkinlok kõra eo belen ken karuo im ladrik eo nejin kin air jab kwalok koutiej. “Men in e erro iman mejen Ebream,” ak ejjab ñõn Anij. Jeova ear jiroñ Ebream: “En jab erro iman mejõm, kin ladrik eo, im kin lio am dri kamakoko; ilo men otemjej Sera e ar ba ñõn yuk, kwon eoroñ ainiken.” (Jen. 21:8-12) Ebream ear bokake Jeova, im roñjake Sera ilo an kõmõne men eo ear kajitõk kake.
18. Ta men eo Abigeil ear kaiur in kõmõne?
18 Lemnok bareinwõt kin Abigeil, lio belen Nebal. Ke Devid ear ko jen Kiñ Saul, eo ear ebanbane e, ear kajutõk imõn kaber eo an ilo juõn jikin ebake melaj eo an Nebal. Ijellokin an bõk jabrewõt men jen men ko mweien eman in emweie, Devid im lõmaro mõtõn rar kejbãroki. Bõtab, Nebal ear “jememe im ankeke ilo kõmõn ko an,” im ear “kajirere kake ir.” Ear juõn eo “e jitokjen” im “bwebwe.” Ke likao ro mõtõn Devid rar kajitõk kin jet mõña ko, Nebal ear makoko in lelok. Ewi wãwen an kar Abigeil emakõt ke ear roñ kin ta eo ear walok? Ilo an jab kennanek Nebal, ear “kaiur e, im e ar bõk rubuki ion bred, im ruo botto in wain, im lailim jip emwij kapoji, im lailim joñõn korn jinmele, im jibuki urur in grep e mõra, im rubuki kek in fig ko” im ear liloki ñõn Devid im lõmaro mõtõn. Ejime ke men eo Abigeil ear kõmõne? Aet, jet wãwen ko me rar walok tokelik rej kwalok bwe ear jime men eo ear kõmõne. Baibel eo ej ba, “Jeova e ar mõn Nebal, inem e mij.” Tokelik, Devid ear mareik Abigeil.—1 Sam. 25:3, 14-19, 23-25, 38-42.
‘Kõra eo Ej Bõk Nebar’
19, 20. Ta eo ej kõmõn bwe juõn kõra en tellokin bõk nebar?
19 Baibel eo ej nebar lio dri belele me ej kõmõni men ko ekkar ñõn wãwen ko an Jeova. Ilo buk in Jabõn Kennan Ko ej nebar “juõn kõra emõn,” ilo an ba: “Bwe wõnan elap jen rubi ko. Buruen leo belen ej liki e, im e jamin aikwij orlok. Lio ej kõmõn emõn ñõn e, im jab nana, ran ko otemjej in an mour.” Bareinwõt, “ej walõñi lõñin ilo meletlet; im kien joij ej ion loen. Ej kanuij lale ial ko an ro dri mweo imõn, im e jab mõña ekõn in jowõn. Ro nejin rej loetõk im kamõnõnõik e; leo belen bareinwõt ej nebar e.”—Ken. 31:10-12, 26-28.
20 Ta eo ej kõmõn bwe juõn kõra en tellokin bõk nebar? Jabõn Kennan Ko 31:30 ej ba, “Joij e men in mon, im dreo men wan, a juõn kõra ej mijõk Jeova, naj nebar e.” An lio mijõk Jeova, ej kitibuj an mõnõnõ in kõtãik e ñõn lajrõk in bõr eo me Jeova ear ejaake. “Bõran kõra man” einwõt “bõran jabrewõt man Kraist; im bõran Kraist Anij.”—1 Kor. 11:3.
Kwon Kamolol kin Menin Letok eo an Anij
21, 22. (a) Ta un ko eor iben Kristian dri belele ro ñõn kwalok air kamolol Anij kin menin letok eo kin mour in mare? (b) Etke jej aikwij koutiej lajrõk eo an Jeova kin bõr im ro eor air maroñ? (Lale box eo ilo peij 17.)
21 Ñõn Kristian dri belele ro, eor ibeir elõñ un ko ñõn kwalok air kamolol Anij! Remaroñ ijjurpe iben dron einwõt dri belele ro remõnõnõ. Elaptata, remaroñ kamolol kin menin letok in an Anij kin mour in mare kinke remaroñ mour iben dron im etetal iben Jeova. (Rut 1:9) Jeova, eo ej Unjen mour in mare, ejela ta eo armij ro rej aikwiji ñõn air bõk juõn mour in mare elemõnõnõ. Meñe jej jokwe ilo juõn lõl eor abañ ko ie, ien otemjej jen kõmõni men ko ekkar ñõn wãwen ko an Jeova, inem ‘lõñliñ in Jeova enaj ar kajur.’—Nih. 8:10.
22 Juõn Kristian leo dri belele me ej yokwe lio belen im einwõt e mõke enaj jerbale bõr eo an ilo joij im yokwe. Enaj lap an yokwe lio belen, eo ej mijõk Jeova, kinke lio enaj jibõñ im kanuij koutiej e. Men eo eaurõktata, joñok eo airro emõn kin mour in mare enaj koutiej Jeova Anij, eo ej tellokin bõk nebar.
Kwoj Kememej Ke?
• Ta karõk eo an Jeova kin lajrõk in bõr im ro rej aikwij kõtãik ir?
• Etke dri belele ro rej aikwij koutiej dron?
• Ewi wãwen juõn Kristian kõra ej aikwij kõmõn ñõn leo belen ejjab ber ilo mol eo?
• Etke lõmaro rej aikwij kebak limaro beleir mokta jen air kõmõn bebe ko relap?
[Kajitõk ko ñan katak]
[Box ilo peij 17]
Etke Jej Aikwij Kwalok Koutiej ñõn Ro Eor Air Maroñ?
Jeova ear kajutõk ibwiljin menin kõmõnmõn ko an remeletlet lajrõk eo kin bõr im ro eor air maroñ. Kar kõmõne men in ñõn tokjen eo an jitõb ro im armij ro jimor. Men in ej lelok ñõn ir ien ko rebellok ñõn air jerbale maroñ in kãlet eo air im ñõn koutiej Anij ilo air korijer ñõn e ilo juõn wãwen ekwon im burukuk.—Sam 133:1.
Congregation eo an Kristian dri kabit ro ej kile bwe Jisõs Kraist eor an maroñ ioir im ej bõr eo air. (Ep. 1:22, 23) Kin an Jisõs kile maroñ eo an Jeova, tokelik “Nejin e naj bareinwõt mõke kõtãik e ñõn Eo e ar kõtãik men otemjej ñõn E, bwe Anij en otemjej ilo otemjej.” (1 Kor. 15:27, 28) Inem, ekkar bwe ro im emwij air wujleplok ir ñõn Anij ren rejetake lajrõk eo an Anij kin bõr ilo congregation eo im iloan baamle eo! (1 Kor. 11:3; Hib. 13:17) Ilo ar kõmõne men in, jej bõk tokjen ko einwõt ro im rej bõk buñburu eo an Jeova im jerammõn eo an.—Ais. 48:17.
[Pija ilo peij 13]
Jar emaroñ jibõñ Kristian lio dri belele ñõn kwalok karkar ko karkarin Kristian
[Pija ilo peij 15]
Jeova ej kaurõk ijo kwonan kõra ro ñõn kowõnmanlok men ko an Ailiñ eo