Burukuk ilo Yokwe​​—Ennan ko jen Kwelok eo Ej Walok Kajjojo Yiõ

ELÕÑ rar kijorur ñõn ber ilo Imõn Kwelok eo elap an Dri Kennan ro an Jeova ilo Jersey City, New Jersey, ilo Amerika. Ilo jiboñin Oktoba 3, 2009, elõñlok jen 5,000 rar kweloklok ñõn kwelok eo ken ka 125 an Watch Tower Bible and Tract Society of Pennsylvania me ej walok kajjojo yiõ. Elõñ tausan ro jet rar roñjake im aluije kwelok in ikijen radio im TV ilo jikin ko jilu ilo Betel eo ilo Amerika im Betel eo ilo Canada. Koba in aolep dri kwelok ro ej 13,235. Rein rar burukuk ilo yokwe eo air ñõn Jeova ke rar ber im lõñliñ kin kwelok in jilu auõ aitokõn.

Eo ear tel brokraam in ej Geoffrey Jackson, juõn ian Kumi eo Ej Tel Dri Kennan ro an Jeova. Ear kebellok brokraam in ikijen an kirtok kumi in dri al ro jen Betel me rar al jen buk in al eo ekãl. * Eo ear tel dri al ro ej David Splane, bar juõn ian Kumi eo Ej Tel, ear kwalok ilo tukaru kin aurõkin al bwe ej mõtõn kabuñ eo kwojarjar. Kar kirtok dri kwelok ro ñõn al jilu al ko rekãl ilo kwelok in. Kumi in dri al ro rar al mokta, inem tokelik rein im dri kwelok ro rar al iben dron. Kar kajerbal kumi in dri al ro ilo ien in wõt ejej uan. Kar jab kõmõne einwõt juõn joñok ñõn lore ilo ien kwelok ko an congregation im kwelok ko relap.

Ennan ko jen Ra Ko

Dri lotok ro jen ro uan Committee ko jen Ra ko jet rar kwalok ennan ko jen ra ko lailim. Kenneth Little ear kwalok bwe mõtõn jidrik ra eo ilo Canada enaj jinoe kõmõni enañin aolep magazine ko ñõn ro ilo Amerika im Canada. Tokjen men in enaj or joñoul alen laplok in air kõmõni magazine ko ilo ra in. Ñõn kõtõbrõk men in, juõn mijjin in kõmõn magazine ko me ekãl enaj wõnmanlok im jerbal iomin 16 auõ ko ilo juõn ran.

Reiner Thompson ear kwalok kin jerbal in kwalok nan kin Ailiñ eo ilo ailiñ in Dominican Republic, im Albert Olih ear kwalok kin makõtkit ko ar ilo ailiñ in Nigeria. Emile Kritzinger jen ailiñ in Mozambique ear kemelele bwe elikin elõñ yiõ in air iion matõrtõr, kien eo ear kamelim kabuñ eo an Dri Kennan ro an Jeova ilo 1992. Aolep ailiñ kein jilu ear laplok oran dri kwalok ro ie. Viv Mouritz jen ra eo ilo ailiñ in Australia ear kwalok kin wõnmanlok ko ilo East Timor me ej ber iomin kejbãrok eo an ra eo ilo Australia.

Committee ko an Kumi eo Ej Tel Dri Kennan ro an Jeova

Ilo yiõ eo 1976, kar likit aolep makõtkit ko an Dri Kennan ro an Jeova iomin lolorjake eo an committee ko jiljino an Kumi eo Ej Tel. Tokelik, kar jitõñ ro jet me rej uan s̃ip ro jet ñõn erom dri jibõñ ro. Kiõ eor 23 rej jerbal einwõt dri jibõñ ro. Kar kajitõk iben jiljino iair ñõn kwalok kin jerbal ko air. Koba in aolep yiõ ko in air ber ilo jerbal in full-time ej 341, melelen bwe kajjojo iair eor 57 yiõ ko in an full-time.

Don Adams, eo ear jino jerbal ilo Betel ilo yiõ eo 1943 ear kemelele bwe Committee in Karõk eo ej ejaakin ro rej lolorjake committee ko lailim im ej lale bwe en emõn air jerbal iben dron. Committee in ej lolorjake ien idriñ ko relap, ñe eor matõrtõr, case ko ilo court, jorran ko, im abañ ko jet me rej aikwij in kamarmiri ilo mõkõj im rej jelet Dri Kennan ro an Jeova ibelakin lõl.

Dan Molchan ear kwalok kin jerbal eo an Committee in Lale Dri Jerbal, ej lolorjake  aikwij ko ilo jitõb im ilo kõniek an 19,851 dri jerbal ro ilo Betel ko ibelakin lõl. David Sinclair ear konono kin wãwen Commitee in Kõmõn Buk eo ej bõk erron wia menin aikwij ko im kein jerbal ko an ra ko. Tokelik, Robert Wallen, eo ear jerbal ilo Betel enañin 60 yiõ ko ear kwalok wãwen Committee in Jerbal in Kwalok Nan ej lolorjake makõtkit ko an armij ro an Jeova ilo jerbal in kwalok nan im ilo congregation ko. William Malenfant ear kemelele ilo tukaru kin kate eo an Committee in Katakin ilo air keboji brokraam in kwelok ko relap. Eliktata, John Wischuk ear kemelele kin wãwen Committee in Jeje eo ej lolorjake air keboji im kõmõni magazine im buk ko. *

Unin Tel in Yiõ eo 2010 Ej kin Yokwe

Ro rar kwalok katak ko tok jilu rej ro uan Kumi eo Ej Tel. Gerrit Lösch ear ijjino kin kajitõk in, “Kwokõnan ke bwe ro jet ren yokwe yuk?” Ear kemelele bwe yokwe ej mõtõn menin aikwij ko an armij, im ej kõmõn bwe en emõn ar mour. Unin ar mour ej kin yokwe kinke Jeova ear kõmõnmõn kij ilo yokwe. Un eo elaptata unin jej kwalok nan im katakin ej kinke jej yokwe Jeova.

Jejjab kwalok yokwe eo emol ñõn ro “dri turid” wõt ak bareinwõt ñõn ro rej kijirãte kij. (Matu 5:​43-​45) Kar rejañ dri kwelok ro ñõn lemnok kin men ko Jisõs ear jelmaiki kin kij, rar dreñlokwe, kajirere kake, emmõje, im wãkare. Meñe eindrein, ear jar kin dri tõrinae ro me rar dilaik e. Men in ejjab ke kõmõn bwe en laplok ar yokwe e? Inem Brother Lösch ear kajela kin unin tel eo an yiõ eo 2010: 1 Dri Korint 13:​7, 8, ‘Yokwe ej kijenmij ilo men otemjej. Yokwe ejamin joko.’ Eor iber jerammõn eo jab baj ñõn mour indrio wõt ak bareinwõt ñõn kwalok yokwe im lo an ro jet yokwe kij ñõn indrio.

Kwoj Kattõr ke kin Jidrik Wõt Kaan?

Samuel Herd ear jino kwalok katak eo an ikijen juõn wanjoñok. Bwelen juõn mõtõm ej ektake yuk bwe komro en ettõr ñõn juõn jikin 30 mail etolokin. Ke kwoj jijõt ijo iman kwoj lo bwe jidrik wõt kaan in wa eo. Kwoj ba ñõn eo mõtõm bwe mõtõn jidrik emaat kaan wa eo. Ej ba kwon jab inebata bwe eor wõt jidrik kaan ilo tank eo. Bõtab ejjabto tokelik emaat kaan in wa eo. Eor ke tokjen ñõn ettõr wõt kin jidrik kaan, meñe kwojela bwe emaroñ maat ilo ien eo komij ettõr ilo ial eo? Enaj kar emõnlok ñõn kaboole tank eo! Ilo kõkkar, jej aikwij kaboole wa eo kin kaan ikijen ar kalaplok jelalokjen eo ar kin Jeova.

Jej aikwij kaboole tank eo im ekkeini ar kõmõne men in ñõn jemlokõn. Eor emen wãwen  ko jemaroñ kõmõne men in. Ken kajuõn, katak iber mõke, im kajeoñ jela kobõn Baibel eo ilo ar riiti ran otemjej. Ijellokin ar baj riiti wõt, jej aikwij melele ta eo jej riiti. Ken karuo, kortokjen Ien Kabuñ an Baamle ilo jota. Jej ke bwijrõk kajjojo wik im kaboole tank eo ak jej teiñi kin jidrik wõt kaan? Ken kajilu, ber ilo ien katak im kwelok ko an congregation eo. Ken kemen, kalomõnlokjen ilo juõn jikin ejelok keroro ie, im lemnok kin ial ko an Jeova. Sam 143:5 ej ba: “I kememej ran ko mokta: I kalomõnlokjen kin men ko Kw’ar kõmõnmõni.”

“Ro Remõn Re Naj Rabõlbõl”

John Barr ear kwalok katak eo ken kajilu eliktata, me ear kemelele kin wanjoñok eo an Jisõs kin wit im tãõ ko. (Matu 13:24-​30, 38, 43) Wanjoñok in ej jitõñlok ñõn juõn “ien jonikõn” ilo ien eo me naj ainitok “ro nejin ailiñ in lõñ” im kajenolok tãõ ko ñõn tili ilo kijeek.

Brother Barr ear lukkun kalikar bwe jerbal in aintok in eban wõnmanlok ñõn indrio. Ear jitõñlok ñõn Matu 24:34 me ej ba: “Ebeben in e jamin joko ñõn ter eo naj jejit men kein otemjej.” Ruo alen ear riiti nan kein: “Melele eo ar ej bwe Jisõs ear ba bwe dri kabit ro me rar ber ilo ien eo kakõle eo ear jino alikar ilo 1914 renaj kar mour iomin jidrik ien iben dri kabit ro jet me renaj kar lo jinoin iñtan eo elap.” Jejjab lukkun jela ewi naj aitokõn “ebeben in,” ak ej kitibuji kumi kein ruo me renaj mour iben dron ilo ejja ien eo wõt. Meñe dri kabit rein eoktõk yiõ ko air jen dron, kumi kein ruo me rej ejaakin ebeben in renaj mour iben dron ilo juõn wõt ien ilo ran ko eliktata. Ej menin kõkãtõk ñõn jela bwe ejjab aolep dri kabit ro redriklok im rej mour iben dri kabit ro reridto me rar kile kakõle eo ke ear jino alikar ilo 1914, renaj mij mokta jen an jino iñtan eo elap.

“Ro nejin ailiñ in lõñ” rej kijoruretok ãjinkij eo air ñõn mour ilõñ, bõtab kij aolep jej aikwij tiljek wõt im romaklok ñõn jemlokõn. Ej juõn jerammõn iber ñõn loe jerbal in aintok “wit” ilo ran kein ar.

Elikin al eo eliktata, Theodore Jaracz jen Kumi eo Ej Tel ear kajemlok kin jar. Elap wõt an kar kõkãtõk brokraam eo ilo kwelok in me ej walok kajjojo yiõ!

[Kamelele ko itulal]

[Box ilo peij 5]

JIKUUL ÑÕN ELDER RO

Ilo kwelok eo, Anthony Morris, juõn eo ej uan Kumi eo Ej Tel Dri Kennan ro an Jeova, ear kajela bwe enaj or juõn jikuul in kaminene ñõn elder ro im enaj wõnmanlok wõt. Juõn jikuul ñõn elder ro jen Amerika ear jino kõmõn ilo jinoin 2008 ilo Patterson, New York ijo rej kõmõn jikuul in Baibel ie. Kilaj eo ken ka 72 ej kab jemloklok, im kiõ eor tarrin 6,720 elder ro emwij air ber ilo jikuul eo an elder. Ej lõñ wõt rejañin ber ilo jikuul in. Elõñlok jen 86,000 elder ro ilo ailiñ in Amerika. Kin men in, emwij an Kumi eo Ej Tel Dri Kennan ro an Jeova kowãppene an walok jikuul in ilo bar Brooklyn, New York, ilo jinoin Tijemba 7, 2009.

Ilo Patterson naj katakin emen brother ro rej lolok congregation ko iomin ruo aliñ im rein renaj emakõt ñõn Brooklyn ñõn katakin elder ro. Im enaj bar or emen renaj bar katakin ir ilo Patterson, inem tokelik renaj bar etal ñõn Brooklyn ñõn katakin elder ro. Im ro rar katakin ilo Brooklyn mokta, renaj etal im katakin ilo Imõn Kwelok ko relap im redrik. Men in enaj eindrein manlok wõt mae ien eor 12 dri katakin ro rej katakin jiljino jikuul ko an elder ro kajjojo wik ilo kajin Belle ilo Amerika. Inem naj katakin 4 brother ro ñõn katakin elder ro ilo kajin Spein. Jikuul in eban bõk jikin Jikuul in Jerbal ñõn Ailiñ eo. Unin rej kõmõn bar juõn jikuul ej ñõn jibõñ elder ro ñõn kõmõn wõt wõnmanlok ilo mour in Kristian eo air. Jino jen ien jerbal in kwalok nan eo ilo 2011, ra ko ibelakin lõl renaj jino kõmõn jikuul ilo Imõn Kwelok ko relap im redrik.

[Pija ilo peij 4]

Kar kebellok kwelok in kin al, jen buk in al eo ekãl, “Al ñõn Jeova”