Kijenmij Meñe Eo Beleõm Ejjab Tiljek

MARGARITA im leo iben etan Raúl, rar korijer ñõn Jeova einwõt full-time dri kwalok ro iomin elõñ yiõ ko. * Ak ejjabto elikin an kar lotak ajiri eo nejiiro, Raúl ear jino katoõnlok e jen Jeova. Tokelik, Raúl ear mour in lũñ im ear bukwelok jen congregation eo. Margarita ej ba, “Ke aolep men kein rar walok, ear einwõt ñe iar iten mij kin aõ lukkun buromõj im jaje ta eo in kõmõne.”

Ejjabto elikin an kar Jane mare, leo belen ear jab tiljek ñõn kalimur eo an bwe enaj kaurõk im yokwe e ilo an kar jino mõn e. Jane ej ba, “Ilo ien eo moktata ear baiti iõ, iar lukkun ilbõk im jok. Ear erom juõn mõnit iben bwe en mõn iõ inem tokelik akwelap iba bwe in jeorlok an bwir. Iar lemnok bwe ej erro eo aõ einwõt juõn dri Kristian ñõn jeorlok an bwir im melokloke. Iar bareinwõt bõk lemnok eo bwe ijjab kwalok aõ tiljek ñõn leo iba elañe ij konono kake abañ eo amro ñõn jabrewõt armij ekoba elder ro ilo congregation eo. Mõnit eo ear kõmõne ilo an mõn iõ im tokelik kajitõk jeorlok bwir ear wõnmanlok iomin elõñ yiõ ko. Iomin ien kein, iar lemnok bwe ej aikwij or juõn men imaroñ kõmõne bwe leo iba en yokwe iõ. Eliktata, ke ear ilok jen kimro ledrik eo nejimro, iar bõk lemnok eo bwe en kar laplok aõ kate iõ ñõn kõmõni ak ba men ko ñõn kejbãrok mour in mare eo amro.”

 Einwõt Margarita im Jane, kinke leo ibõm ear jab tiljek ñõn kalimur eo an ñõn yuk, bwelen kwoj iñtan kin an kar leo kõmetak iñjake ko am, eor am inebata kin jããn, im kwoj iñjake bwe men kein rej jelet kõtan eo am iben Jeova. Ak bwelen kwoj juõn leo dri belele me kwoj buromõj im iñtan kinke lio beleõm ear jab tiljek ñõn yuk. Ejelok berre bwe jej mour ilo “ien ko renana,” einwõt an kar Baibel eo kanan kake. Kanan in ej kalikar bwe ilo “ran ko eliktata,” kõtan ko an baamle ko renaj jorranlok, im elõñ iair enaj ejelok air yokwe dron. Jet renaj ba bwe rej korijer ñõn Anij, ak kõmõn ko air reoktõk. (2 Tim. 3:​1-5) Abañ kein rej bareinwõt jelet dri Kristian ro remol, kin men in, ta eo emaroñ jibõñ yuk ñõn kijenmij elañe eo beleõm ear jab tiljek ñõn yuk?

Bõk Lemnok eo an Jeova kin Kwe

Ilo jinoin, emaroñ bin ñõn am tõmak bwe armij eo kwoj yokwe ear lap an kõmetak yuk. Bwelen kwomaroñ jino naruõm mõke kin men eo enana ear kõmõne.

Bõtab, kememej bwe armij eo ewãppen Jisõs ear bareinwõt iion wãwen in ke juõn eo ear yokwe im liki ear ketõk e. Jisõs ear kãlet dri jilik ro an, ro mõtõn rebaktata, elikin an kar lukkun kalomõnlokjen im jar kin men in. Ilo ien in, aolep dri jilik rein 12 rar dri korijer ro retiljek an Jeova. Inem, ejelok berre Jisõs ear lukkun buromõj ke Judas ear oktõk im “ketak” E. (Luk 6:​12-​16) Bõtab, Jeova ear jab naruõn Jisõs kin men ko renana Judas ear kõmõni.

Emol bwe aolep armij ro renaj kõmõn bwir kinke ejelok juõn ewãppen. Kar kakõrmol dri jeje sam ñõn an je: “Elañe Kwe, O Jeova, kwo naj kakõle jerawiwi ko, O Iroij, wõn e naj jutõk?” (Sam 130:3) Ñõn air kajeoñwe Jeova, leo im lio rej aikwij jeorlok bwir ko an dron.​—1 Pit. 4:8.

Bõtab, “jabrewõt iar e naj lelok nan kin e mõke ñõn Anij.” (Rom 14:12) Elañe eo beleõm ear kõmõn bwe en juõn mõnit iben ñõn an ba ak kõmõni men ko relej, inem eo eor ruõn enaj aikwij uak ñõn Jeova. Jeova ej drike lej im konono nae, inem ejelok jabrewõt men ej naunin an dri belele eo jab kwalok yokwe im koutiej ñõn eo belen. (Sam 11:5; Ep. 5:​33; Kol. 3:​6-8) Ilo mol, elañe juõn dri Kristian ekutkut an kõtlok bwe illu en anjo ion im ejjab ukwelok im kõmõn oktõk ko, inem naj aikwij bukwelok e jen congregation eo. (Gal. 5:​19-​21; 2 Jon 9, 10) Ejjab aikwij nana an dri belele eo mour kin an kar kwalok ñõn elder ro kin mõnit ko renana an eo belen. Emol, Jeova ej tiriamokake ro ejelok rueir me rej iion wãwen in.

Ñe juõn dri belele ear lũñ, inem ej jerawiwi nae eo belen me ejelok ruõn im bareinwõt nae Jeova. (Matu 19:​4-9; Hib. 13:4) Elañe dri belele eo ejelok ruõn ear kate wõt e ñõn mour ekkar ñõn kien ko ilo Baibel, inem ejjab aikwij nana an mour kin an eo belen jab tiljek ñõn e ilo an kar lũñ.

Kememej bwe Jeova ejela kin wãwen am iñjake. Ilo kõkkar, ej kwalok kin e mõke einwõt leo belen ailiñ in Israel, im ilo Nan eo An, Baibel eo, elõñ eon ko rej kwalok kin joñõn an kar buromõj ke dri Israel ro rar jab tiljek ilo wãwen air kabuñ ñõn E. (Ais. 54:​5, 6; Jerm. 3:​1, 6-​10, UBS) Kwomaroñ liki bwe Jeova ej lo drenin kemjalal ko am elañe eo beleõm ear jab tiljek ñõn yuk ilo jet wãwen ko. (Mal. 2:​13, 14, UBS) Ejela bwe kwoj aikwij bõk kainemõn im kõkãtõk.

Wãwen eo Jeova Ej Letok Kainemõn

Juõn ian wãwen ko Jeova ej letok kainemõn ej ikijen congregation eo. Jane ear bõk jibõñ ilo wãwen in im ej kememej im ba: “Ien lotok eo an circuit overseer eo ear jejit an walok ilo ien eo ke iar lukkun buromõj. Circuit overseer eo ear jela kin joñõn aõ kar buromõj kin an leo beleiõ kanne juõn peba in jibel, inem ear jolok ien ñõn an jibõñ iõ kalomõnlokjen kin eon ko einwõt 1 Dri Korint 7:​15. Eon ko ear kwaloki im nan ko an rejoij rar kainemõn iõ  im jibõñ iõ bwe in jab naruõ mõke. *

Margarita, eo kar kwalok kake ilo jinoin, ear bareinwõt lo bwe Jeova ej letok jibõñ ikijen congregation eo. Ej ba, “Ke ear alikar bwe leo beleiõ ejamin ukwelok, iar bõk ajiri ro nejiõ im kimar emakõt ñõn bar juõn jikin kwelok. Ke kimar tõbar ijo, iar maroñ lo ruo rum ñõn rent ilo juõn im. Ilo ran eo tok juõn, iar lukkun buromõj, im ke iar kakonkone men ko mweiem, juõn armij ear kalõllõl ilo kejem eo. Iar lemnok bwe kõra eo mõn mweo ej kalõllõl, eo ej jokwe iturin rum eo aõ. Ak elap aõ kar bwilõñ bwe armij eo ear kalõllõl kar sister eo me ear katak Baibel iben jinõ im jibõñ baamle eo aõ ñõn katak mol eo ilo Baibel. Ear jab kõtõmene bwe en kar lo iõ ak ear itok ñõn mweo kinke ear katak Baibel iben kõra eo mõn mweo. Joñõn aõ kar lukkun mõnõnõ, iar jab maroñ drebij iñjake ko aõ. Iar kemeleleik e kin wãwen eo ij iione, im kimro ar jõñ. Ilo mõkõj, ear kõmõn karõk bwe kimin maroñ ber ilo kwelok eo ran eo. Ro ilo congregation eo rar karuwaineneiktok kim, im elder ro rar kõmõn karõk ko rekeie ñõn jibõñ iõ kakajurlok tõmak eo an baamle eo aõ.”

Wãwen eo Ro Jet Remaroñ Jibõñ

Emol, ro uan congregation eo remaroñ letok jibõñ ko rekeie ilo elõñ wãwen ko. Ñõn wanjoñok, Margarita ear kiõ aikwij kabuk an jerbal. Im juõn baamle ilo congregation eo ear mõnõnõ in jibõñ e elañe ear aikwij bwe juõn en lale ajiri ro nejin elikin jikuul.

Margarita ej ba, “Men eo elap aõ kamolol kake ej ñe ro ilo congregation eo rej mõnõnõ in jerbal iba im iben ro nejiõ ilo jerbal in kwalok nan.” Ikijen jibõñ rõt kein rekeie, ro uan congregation eo rej jibõñ ñõn “bõk men in erro ko an dron” im ilo air kõmõne men in rej kajejite ‘kien eo an Kraist.’​—Gal. 6:2.

Ro rej iñtan kin jerawiwi ko an ro jet rej lukkun kamolol kin jibõñ rõt kein rekeie. Ke leo belen Monique ear ilok jen e, men in ear kõmõn bwe Monique en mõke kõllãik muri eo airro kin joñõn in $15,000 im bwe en mõke kakajiririik ajiri ro emen nejiiro. Monique ej ba: “Ear lap an ro jeiõ im jãtiõ ilo congregation eo kwalok air yokwe iõ. Mour eo aõ emaroñ kar lukkun jorran elañe en kar jab kin jibõñ ko air. Ij kile bwe Jeova ear kajerbal brother ro relukkun joij me rar kate ir ñõn jibõñ ajiri ro nejiõ. Iar mõnõnõ in lo an ro nejiõ kajurlok ilo tõmak kin jibõñ ko an brother rein. Ñe ij aikwij nan in kakabilek, elder ro rar jibõñ iõ. Im ñe ij aikwij juõn armij ñõn aõ  konono iben, rar mõnõnõ in roñjake iõ.”​—Mark 10:29, 30.

Alikar, juõn jeran eyokwe enaj kar kile ñãt eo ejjab ekkar ñõn an bwebwenato kin wãwen eo ekaburomõjmõj me eo mõtõn ear iione. (Ekk. 3:7) Margarita ej ba, “Enañin aolep ien ij mõnõnõ in bwebwenato iben sister ro ilo congregation eo aõ ekãl kin jerbal in kwalok nan, dri katak Baibel ro am, ajiri ro nejim, im jab kin abañ ko aõ. Ij kamolol bwe rejjab kakememej iõ kin mour eo aõ kar mokta ilo air kajitõk kake, ak rej jibõñ iõ ñõn kõmõn juõn ijjino ekãl ilo mour eo aõ.”

Jumae Kõnan eo ñõn Irenwõne

Jet ien, jen am naruõm mõke kin jerawiwi ko an eo beleõm, kwomaroñ illu bwe elap am iñtan kin tokjen jerawiwi ko an. Elañe kwoj kõtlok bwe en laplok am illu, men in emaroñ kokkure tiljek eo am ñõn Jeova. Ñõn wanjoñok, kwomaroñ kajeoñ in bukot wãwen ko ñõn irenwõne eo beleõm me ear jab tiljek ñõn yuk.

Elañe kwoj kile bwe iñjake rõt kein rej laplok ibõm, kwomaroñ kalomõnlokjen kin joñok eo an Joshua im Keleb. Lõmarein retiljek rar likit mour eo air ilo kauwatata ñõn air wate Enen Kalimur eo. Ak ikijen dri iaroñroñ ro jet, tõmak eo air ear jab kajur im rar kõmõn bwe armij ro ren jab bokake Jeova. Ke Joshua im Keleb rar kajeoñ in rejañ ailiñ in Israel ñõn air drebij wõt air tiljek, jet iair rar kõnan kare irro kin dreka. (Bwin. 13:⁠25–​14:10) Kin tokjen jab bokake eo an dri Israel ro, Joshua im Keleb rar aikwij itoitak ibeir ilo ene jemaren iomin 40 yiõ ko, jab kin bwir ko airro, ak kin bwir ko an ro jet.

Meñe Joshua im Keleb remaroñ kar jab mõnõnõ kin men in, ak rar jab kõtlok bwe jerawiwi ko an ro jeir im jãtir ren kõmõn air illu. Ear laplok airro kaurõk jerbal eo airro ñõn Jeova. Elikin 40 yiõ in air etetal ilo ene jemaren, irro im dri Livai ro wõt ilo ebeben eo air rar bõk jerammõn eo ñõn ellã im mour im dreloñ ñõn Enen Kalimur eo.​—Bwin. 14:28-​30; Josh. 14:​6-​12.

Kõmõn ko an eo beleõm me ear jab tiljek, remaroñ kõmõn am iñtan iomin juõn ien eaitok. Meñe mour in mare eo amiro emaroñ jemlok, ak kwomaroñ iñtan ilo iñjake im kin an jabwe jããn. Bõtab, jen am kõtlok bwe lemnok ko am ren kabwer yuk, kememej bwe Jeova ejela wãwen eo emõntata ñõn jerbal iben ro rejjab koutiej kien ko an, einwõt an wanjoñok eo kin dri Israel ro ilo ene jemaren kwalok kake.​—Hib. 10:30, 31; 13:4.

Kwomaroñ Kijenmij!

Jen am kõtlok bwe lemnok ko rejjab jime ren kamõjnoik yuk, kwon bõk lemnok eo an Jeova. Jane ej ba: “Iar lo bwe ilo aõ roñjake cassette in Imõniaroñroñ eo im Ruj! * (Awake!), men in ear jibõñ iõ bwe in kijenmij wõt. Ilo aõ keini aõ ber im bõk kwonaõ ilo kwelok ko, men in ear bareinwõt kakajur iõ kinke ear kamad iõ jen aõ lemnok kin abañ ko aõ. Ilo ejja wãwen in wõt, ke iar bõk kwonaõ ilo jerbal in kwalok nan im katak Baibel iben armij ro jet ñõn jibõñ ir tõmak ilo Jeova, iar lo bwe ear kajurlok tõmak eo aõ im ear jibõñ iõ lemnok wõt kin men ko elaplok air aurõk.”

Monique, eo kar kwalok kake ilo pãrokõrããp ko lok, ej ba: “Iar maroñ kijenmij wõt ilo aõ kar keini aõ ber ilo kwelok ko im bõk kwonaõ ilo jerbal in kwalok nan joñõn wõt aõ maroñ. Baamle eo aõ ear ebakelok dron im ro ilo congregation eo. Wãwen eo iar iione ear jibõñ iõ ñõn kile ijo ij likjõp ie. Kin jibõñ eo jen Jeova, iar maroñ kijenmij wõt ke iar ber iomin melejoñ ko.”

Kwe bareinwõt kwomaroñ kijenmij iomin ejja melejoñ kein. Meñe jab tiljek eo an eo beleõm ear kõmõn am iñtan, kwon kate wõt yuk ñõn lor nan in kakabilek eo an Paul me emwij kakõrmole: “Jen jab mõk ilo kõmõn emõn: bwe ilo ien ekar je naj marmir elañe je jab bãrõk.”​—Gal. 6:9.

[Kamelele ko itulal]

[Pija ilo peij 31]

Dri belele ro me ro beleir rar ilok jen ir rej lukkun kamolol ñe ro jet rej jibõñ ir ilo jerbal in kwalok nan