Komin Kalek Dron ilo Congregation Eo
Komin Kalek Dron ilo Congregation Eo
“Komin kainemõne dron, im kalek dron.”—1 TES. 5:11.
1. Ta jerammõn ko kwoj bõki jen am mõtõn congregation eo, ak ta abañ ko jet rej jelmaiki wõt?
EMOL ej juõn jerammõn elap ñõn mõtõn congregation eo an Kristian. Eor juõn am kõtan emõn iben Jeova. Am atartar ion Nan eo an bwe en tel yuk ej kejbãrok yuk jen tokjen ko renana rej walok jen wãwen mour eo ejjab an dri Kristian. Im elõñ ro mõtõm remol rej kõnan bwe kwon lo tõbrõk. Aet, elõñ jerammõn ko kwoj bõki. Bõtab, enañin aolep dri Kristian ro rej jelmaik abañ ko reoktõk jen dron. Jet iair remaroñ aikwij jibõñ ñõn melele katak ko remulõl ilo Nan in Anij. Jet rej nañinmij ak barõk, ak remaroñ iion iñtan jen tokjen ko rej walok jen bebe ko rejjab emõn rar kõmõni. Im kij aolep jej mour ilo juõn lõl enana.
2. Ta eo jej aikwij kõmõne ñe ro jeer im jãter rej iion abañ ko rebin, im etke?
2 Ejelok juõn iar ekõnan lo an dri Kristian ro mõtõn iion iñtan im aituerõk ko ilo mour. Dri jilik Paul ear keiri congregation eo ñõn juõn enbwin im ear ba bwe “ñe juõn ra ej iñtan, ra ko otemjej rej iñtan iben.” (1 Kor. 12:12, 26) Jej aikwij kate kij ñõn jibõñ ro jeer im jãter ñe rej iion wãwen kein. Eor bwebwenato ko ilo Baibel me rej kwalok kin wãwen ro uan congregation eo rar jibõñ ro jet ñõn anjo ion abañ ko. Ñe jej etale bwebwenato kein, kwon lemnok kin ewi wãwen kwomaroñ jibõñ ro jet ilo ejja wãwen ko wõt rej walok ilo bwebwenato kein. Ewi wãwen kwomaroñ jibõñ ro jeõm im jãtõm ñõn wõnmanlok wõt ilo air korijer ñõn Jeova im kin men in kalek ro ilo congregation eo an Jeova?
Rar “Bõk E” Ibeirro
3, 4. Ilo wãwen it Akula im Prisilla rar jibõñ Apollõs?
3 Ke Apollõs ear etal im jokwe ilo Epesõs, ear mwij karere an erom juõn dri evanjel ekijejeto. Bwebwenato eo ilo buk in Jerbal ej ba bwe “kin an bõplolin, elap an konono im katakin men ko an Iroij, [bõtab] e jela baptais an Jon wõt.” Kinke Apollõs ear jaje kin baptais ‘ilo etan Jemen im Nejin im Jitõb Kwojarjar,’ melelen bwe bwelen dri kalor ro an Jon dri Baptais ñe jab dri kalor ro an Jisõs rar kwalok nan ñõn e moktalok jen kar ran in Pentekost eo ilo yiõ eo 33. Meñe Apollõs ear kijejeto, eor jet melele ko raurõk me ear jab melele kaki. Ewi wãwen kõmao iben dri tõmak ro mõtõn ear jibõñ e?—Jerb. 1:4, 5; 18:25; Matu 28:19.
4 Dri Kristian dri belele ro etair Akula im Prisilla rar roñjake an Apollõs kwalok ilo beran ilo imõn kwelok eo, im rar bõk e ibeirro, im katakin e kin elõñ melele ko jet. (Riit Jerbal 18:24-26.) Men in rar kõmõne ear juõn menin yokwe. Aet, Akula im Prisilla rar kebak Apollõs ilo juõn wãwen ejoij im emõn, im rar jab kõmõn an lemnok bwe rar notaik e. Abañ eo wõt ej bwe ear jaje kin bwebwenatoõn congregation eo an dri Kristian ro ilo jinoin. Im ejelok berre bwe Apollõs ear lukkun kamolol kin rein mõtõn rekãl kin air kar kwalok tibrikin melele kein raurõk ñõn e. Kin an Apollõs jela kin melele kein, ear ‘lap an jibõñ’ ro jein im jãtin ilo Akeia im ear kwalok nan ilo beran.—Jerb. 18:27, 28.
5. Kain jibõñ rõt eo elõñ tausan dri kwalok ro kin Ailiñ eo rej mõnõnõ in jibõñ ro jet kake, im ewi tokjen eo?
5 Ranin, elõñ ro ilo congregation eo an Kristian rej lukkun kamolol kin ro rar jibõñ ir ñõn melele kin Baibel eo. Elõñ jimjera ko rebak rar ejaak ikõtan dri katak ro im ro rar katak Baibel ibeir. Enañin aolep ien, ar jibõñ armij ro ñõn melele mol eo ej kitibuj ar kõmõn karõk ñõn keini ar katak Baibel ibeir iomin jet aliñ ko. Bõtab, dri kwalok ro kin Ailiñ eo rej mõnõnõ in kõmõne men in kinke rej kile bwe ej kitibuj mour ko an armij ro. (Jon 17:3) Im ej juõn menin lõñliñ ñõn lo an armij ro melele kin mol eo, mour ekkar ñõne, im kajerbal mour ko air ñõn kõmõnmõn ankilan Jeova!
Rar “Nebar E”
6, 7. (a) Etke Paul ear kãlet Timote bwe en juõn mõtõn ilo an itoitak im lolok congregation ko? (b) Ta wõnmanlok eo kar jibõñ Timote bwe en kõmõne?
6 Ilo lolok eo ken karuo an dri jilik ro, Paul im Sailas, ñõn Listra, rar lo juõn likao ijo etan Timote, im bwelen ilo tõre in ear juõn jodrikdrik ak juõn likao 20 jima an yiõ. Ro “jimjãn jimjãten i Listra im Aikoniõm [rar] nebar e.” Jinen Timote, Eunis, im jibwin, Lois, rar jet dri Kristian ro rekijejeto, ak jemen ear jab juõn dri tõmak. (2 Tim. 1:5) Paul emaroñ kar jino jela kajen baamle in ilo lolok eo an ken kajuõn ñõn bukwon eo air ruo yiõ ko moktalok. Ak kiõ dri jilik in ear kwalok an mõnõnõ kin Timote kinke ear juõn likao ekanuij emõn. Inem, elikin an kar kumi in elder ro ilo congregation eo an jitõñ e, Timote ear erom juõn dri jibõñ ñõn Paul ilo jerbal in mejinede.—Riit Jerbal 16:1-3.
7 Ear kanuij lõñ men ko Timote ear aikwij katak jen eo mõtõn eridto. Bõtab joñõn an kar mõkõj an wõnmanlok, ejjabto tokelik Paul ear liki Timote ilo an jilkinlok e bwe en etal ikijen im lolok congregation ko. Iomin 15 yiõ ko ak lõñlok, Timote ear lo lõñliñ ilo an ber iben Paul. Im likao in me ear jab lukkun lap iminene iben im bwelen ear ejokok, ear kõmõn wõnmanlok im erom juõn overseer ekanuij emõn.—Pil. 2:19-22; 1 Tim. 1:3.
8, 9. Ta eo ro uan congregation eo remaroñ kõmõne ñõn rejañ jodrikdrik ro? Kwalok juõn wanjoñok.
8 Ranin, elõñ likao im jiroñ ro ilo congregation eo an Kristian im eor maroñ ko ibeir. Elañe ro mõtair rekajur ilo jitõb rej rejañ im jibõñ jodrikdrik rein, remaroñ kate ir ñõn jibarek im bõk erro ko relaplok ilo rolul eo an Jeova. Kwon reito reitak iloan congregation eo am! Kwoj lo ke jabrewõt jodrikdrik ro remaroñ lelok ir mõke einwõt kar Timote? Am jibõñ im lelok nan in rejañ ñõn ir, remaroñ erom pioneer ro, ro rej jerbal ilo Betel, mejinede ro, ak overseer ro rej itoitak. Ta eo kwomaroñ kõmõne ñõn jibõñ ir bwe ren kate im jibarek mejenkajik kein?
9 Martin, eo eor 20 yiõ in an jerbal ilo Betel, ej kwalok an kamolol ke ej kememejtok an kar juõn circuit overseer kwalok an itoklimo kin e 30 yiõ ko remotlok ke rar kwalok nan iben dron. Overseer eo ear lukkun mõnõnõ ke ej konono kin jerbal eo an ilo Betel ke ear juõn likao. Ear rejañ Martin bwe en lemnok kin wãwen emaroñ kõtlok bwe rolul eo an Jeova en kajerbal e ilo ejja wãwen eo wõt ear kõmõne. Martin ear iñjake bwe bwebwenato eo airro ear lukkun jelet bebe ko ear kõmõni tokelik. Wõn ejela men eo emõn kwomaroñ kõmõne ñõn jibõñ jodrikdrik ro mõtõm ikijen am bwebwenato ibeir kin mejenkajik ko rej ekkejellok ñõn jerbal eo ar ñõn Anij.
“Kaberan Ro Rej Kũmkũm” ak Barõk
10. Kar ewi iñjake eo an Epaprodaitõs, im etke?
10 Epaprodaitõs ear etal ilo juõn ial eaitok im kamõkmõk jen Pilippai ñõn Rom bwe en lolok dri jilik Paul, eo ear ber ilo kalbuj kin tõmak eo an. Ear itoitak einwõt juõn dri jilikan dri Pilippai ro. Ear jab baj bõklok wõt menin lelok eo air ñõn dri jilik Paul ak ear bareinwõt bebe ñõn berwõt iben im kõmõn jabrewõt men emaroñ kõmõne ñõn jibõñ Paul ilo wãwen eo ebin ej ber ie. Bõtab, ke Epaprodaitõs ear ber ilo Rom, ear nañinmij im “baj mij wõt jidrik.” Kin an lemnok bwe ear likjõp in kajejit jerbal eo an, men in ear kõmõn bwe Epaprodaitõs en barõk.—Pil. 2: 25-27, UBS.
11. (a) Etke jejjab aikwij bwilõñ ñe jet ilo congregation eo rej bõk nañinmij in buromõj ak barõk? (b) Ta eo Paul ear rejañ kake kin wãwen ber eo an Epaprodaitõs?
11 Ranin, elõñ kain ijjibed ko rej kõmõn bwe armij ren barõk. Etale ko jen Rolul eo Ibelakin Lõl kin Ejmour ej ba bwe elõñ armij ro ibelakin lõl in rej bõk nañinmij in buromõj ak barõk ilo juõn ien ilo mour ko air. Armij ro an Jeova rej bareinwõt bõk nañinmij in buromõj ak barõk. Abañ ko kin an bin an juõn armij kabwe aikwij ko an baamle eo, bõk juõn nañinmij elap, ebwer kin likjõp ko an mõke, ak kin bar un ko jet remaroñ kõmõn menin an barõk. Ta eo dri Pilippai ro remaroñ kar kõmõne ñõn jibõñ Epaprodaitõs? Paul ear je: “Komin karuaineneiki kin lõñliñ elab, einwõt ke ej juõn jatid ilo Iroij. Komin kautiej armij otemjej ro rej einwõt e, kinke ear kejekdron mour eo an, im enañin kar mij wõt jidrik, kin etan jerbal an Christ, bwe en jibañ iõ kin men ko kom ban jibañ iõ kaki.”—Pil. 2:29, 30, UBS.
12. Ta eo emaroñ kainemõn ro rej barõk?
12 Jen bareinwõt rejañ ro jeer im jãter me rej ebwer ak barõk. Ejelok berre bwe eor men ko remõn jemaroñ ba kin jerbal eo air ñõn Jeova. Bwelen rar kõmõn elap oktõk ilo mour ko air bwe ren erom dri Kristian ro ak ñõn kalaplok ijo kwonair ilo jerbal in kwalok nan. Jej kamolol kin kate ko air, im jemaroñ kainemõn ir ilo ar kwalok bwe eindrein an Jeova bareinwõt iñjake kin ir. Meñe ridtolok ak nañinmij rej bõprae ro jet retiljek jen air kõmõni men ko joñõn wõt air maroñ einwõt rekin kar kõmõne mokta, ak ej tellokir bwe jen koutiej ir kin jerbal eo air iomin elõñ yiõ ko. Jekron ta un eo unin an eo jeer im jãter buromõj, eñin nan in kakabilek eo an Jeova ñõn aolep ro rej tiljek ñõn e: “Kaberan ro rej kũmkũm [ak barõk, NW], jibõñ ro re mõjino, komin meamiwõr ñõn armij otemjej.”—1 Tes. 5:14.
“Komin Jolok An Nana im Kainemõn E”
13, 14. (a) Ta abañ eo congregation eo ilo Korint ear aikwij kamarmire, im etke? (b) Ta tokjen eo ear walok jen air kar bukweloke dri jerawiwi eo?
13 Ear or juõn eman ilo congregation eo an dri Korint ro ilo ebeben eo ken kajuõn im ear jab ukwelok jen an mour in lũñ. Mwilin ear kokkure erreo eo an congregation eo im bareinwõt kalõkatip ro rejjab ber ilo tõmak. Kin men in, ekkar bwe Paul en jiroñ ir bwe ren jolok e jen congregation eo.—1 Kor. 5:1, 7, 11-13.
14 Ear or tokjen ko remõn rar walok jen air kar koweik e. Men in ear kejbãrok congregation eo jen kilan ko renana, im kõmõn bwe dri jerawiwi eo en kile men eo enana ear kõmõne, im ukwelok ilo mol. Kinke kõmõn ko an lein rar kalikar an ukwelok, Paul ear ba ilo letter eo an ken karuo ñõn congregation eo bwe ren bar kajeblaktok e. Bõtab, ejjab men in wõt rar aikwij kõmõne. Paul ear bareinwõt jiroñ congregation eo bwe ren “jolok an nana im kainemõn [dri jerawiwi eo ear ukwelok], ñe ab juõn einwõt en jo ilo an buromõj elaplok.”—Riit 2 Dri Korint 2:5-8.
15. En kar ewi wãwen ar watõk dri jerawiwi ro me rej ukwelok im emwij air bar jeblak ñõn congregation eo?
15 Ta eo jej katak jen men in? Jej buromõj ñe juõn ej aikwij bukwelok. Remaroñ kar katton etan Anij im kananaik etan congregation eo. Bareinwõt remaroñ kar jerawiwi nae kij. Bõtab, ñe elder ro rej etale abañ eo ekkar ñõn nan in tel ko an Jeova, im lo bwe dri jerawiwi eo ej ukwelok en bar jeblak ñõn congregation eo, men in ej kwalok bwe emwij an Jeova jolok an bwir. (Matu 18:17-20) Ejjab ke juõn men jej aikwij kõmõne ñõn kajeoñwe Jeova? Emol, ñe jej illu im jab jolok an dri jerawiwi eo bwir, emaroñ melelen men in bwe jej jumae Jeova. Ñõn ar kowõnmanlok ainemõn im burukuk eo ilo congregation eo an Anij im bõk buñburu eo an Jeova, ejjab ke bwe jen kar ‘kabin ar yokwe’ ñõn dri jerawiwi ro me rej ukwelok ilo mol im emwij air bar jeblak?—Matu 6:14, 15; Luk 15:7.
“Emaroñ Jibañ Iõ”
16. Etke Paul ear inebata iben Mark?
16 Ebar or juõn bwebwenato ilo Baibel eo ej kwalok bwe jejjab aikwij drebij ar illu nae ro rej kainebataik kij. Ñõn wanjoñok, Jon Mark ear lukkun kainebataik dri jilik Paul. Ewi wãwen? Ke Paul im Barnebas rar jino jerbal in mejinede eo airro moktata, Mark ear etal ibeirro lok bwe en jibõñ irro. Bõtab ilo ial eo air lok, Mark ear ilok jen irro im jeblak ñõn kabijuknen kin juõn un me Baibel eo ejjab kalikare. Joñõn an Paul lukkun kar inebata kin men in, ke rar bebe in etal ilo ial eo air ken karuo, ear jab errã iben Barnebas kin Mark elañe ej aikwij bar etal ibeirro lok. Kin men eo ear walok moktalok, Paul ear jab kõnan bwe Mark en etal ibeirro lok.—Riit Jerbal 13:1-5, 13; 15:37, 38.
17, 18. Ta eo ear kamaroñ Paul im Mark ñõn kamarmire abañ eo ikõtairro, im ta eo jemaroñ katak jen men in?
17 Alikar, Mark ear jab kõtlok bwe en ebwer kin an Paul kar kejekron e, kinke ear wõnmanlok wõt ilo jerbal in mejinede ilo bar juõn jikin iben Barnebas. (Jerb. 15:39) An tiljek im mol ear alikar ilo nan ko Paul ear jei kin e jet yiõ tokelik. Ilo tõre in Paul ear kalbuj ilo Rom, im ear jeje ñõn Timote bwe en itok ñõn iben. Ilo ejja letter in wõt, Paul ear ba: “Bõktok Mark ibbamtok, bwe emaroñ jibañ iõ ilo jerbal in.” (2 Tim. 4:11, UBS) Aet, Paul ear kiõ tõmak bwe Mark ear kõmõn wõnmanlok.
18 Eor juõn men jemaroñ katak jen men in. Mark ear kadrek karkar ko karkarin juõn mejinede emõn. Ear jab lõkatip kin an kar Paul kejekron e. Mark im Paul jimor rar jet eman ro reridto ilo jitõb, im rar jab drebij air illu iben dron kin men eo ear walok ikõtairro. Jen an eindrein, Paul ear tokelik kile bwe Mark ear juõn dri jibõñ ekanuij lap tokjen. Inem ñe brother ro rej anjo jen abañ ko rej walok ikõtair im emotlok abañ eo, men eo emõn bwe ren kõmõne ej ñõn melokloke im wõnmanlok wõt im jibõñ ro jet ñõn wõnmanlok ilo jitõb. Ar kile emõn eo an ro jet ej kalek ro ilo congregation eo.
Congregation eo im Kwe
19. Ewi wãwen aolep ro uan congregation eo remaroñ jibõñ dron?
19 Ilo “ien ko renana,” kwoj aikwiji jibõñ eo an ro jeim im jãtim ilo congregation eo, im rej aikwiji jibõñ eo am bareinwõt. (2 Tim. 3:1) Ejjab aolep ien dri Kristian ro kajjojo remaroñ jela ta ial eo rej aikwij etal ielok ñõn air lo tõbrõk ilo air kamarmiri abañ ko rej jelmaiki, bõtab Jeova ejela. Im emaroñ kajerbal ro kajjojo uan congregation eo, ekoba kwe ñõn jibõñ ro jet etal ilo ial eo ejime. (Ais. 30:20, 21; 32:1, 2) Aet, jen likit ilo buruer nan in kakabilek eo an Paul! “Komin kainemõne dron, im kalek dron, einwõt ami kõmõnmõn.”—1 Tes. 5:11.
Ewi Wãwen Kwonaj Uak?
• Etke ej menin aikwij ñõn kalek dron ilo congregation eo an Kristian?
• Kain abañ rõt ko kwomaroñ jibõñ ro jet ñõn anjo jeni?
• Etke jej aikwiji jibõñ eo an ro jet ilo congregation eo ar?
[Kajitõk ko ñan katak]
[Pija ilo peij 11]
Ñe juõn mõtar dri Kristian ej iion juõn abañ ebin, jemaroñ jibõñ e
[Pija ilo peij 12]
Ranin elõñ likao im jiroñ ro ilo congregation eo an Kristian eor maroñ ko ibeir