Konono ilo Joij Ej Kowõnmanlok Kõtan ko Remõn

“Ami konono, en ien otemjej ilo joij.”​—KOL. 4:6.

1, 2. Ta tokjen eo emõn ear walok kin an juõn brother konono ilo joij?

 JUÕN jeer im jãter man ear ba, “Ke iar kwalok nan jen im ñõn im, iar iion juõn eman me joñõn an kar illu ear kiji dreka in ñiin im kõkankane enbwinin. Ilo joij iar kajeoñ in kamanwa iben jen Baibel eo, ak ear laplok wõt an illu. Lio iben im ajiri ro nejiiro rar bareinwõt buroñe iõ, im iar jela bwe iar aikwij etal jen ijo. Iar kalikar ñõn baamle eo bwe iar itok ilo ainemõn im bwe iar kõnan ilok ilo ainemõn. Iar riiti lok ñõn ir Dri Galetia 5:​22 im 23, me ej kwalok kin yokwe, inemõn, jadõr, im ainemõn. Inem iar ilok jen ijo.”

² “Tokelik, ke iar lolok moko me rej ber kajen wõt mweo imweir, iar lo an baamle eo jijõt inabijin mweo. Ke rar jeale iõ, iar lemnok iba mõke, ‘Ta eo renaj ba ñõn iõ kiõ?’ Leo ear jibwe juõn nien aibij emolo im ear kajitõk iba elañe iar kõnan irak. Ear kajitõk bwe in jeorlok an bwir kin an kar jab kwalok joij im ear nebar iõ kin an kajur tõmak eo aõ. Inem ear or ainemõn.”

3. Etke jejjab aikwij kõtlok bwe ro jet ren kaillu kij?

³ Ilo lõl in ranin me eobrõk kin ijjibed ko, ekkã ar iion armij ro rellulu, bareinwõt ilo ien jerbal in kwalok nan. Ñe jej iion kain armij rõt in, elukkun aurõk bwe jen kwalok “inimõn im mijõk.” (1 Pit. 3:​15) Elañe brother eo me kar kwalok kake ilo pãrokõrããp ko jinoin ear kõtlok bwe illu im jab joij eo an dri mweo en kaillu e, lemnok eo an dri mweo emaroñ kar jab oktõk ak bwelen enaj kar laplok wõt an illu. Kin an kar brother eo drebij an illu im konono ilo joij, men in ear bõktok juõn tokjen emõn.

Konono ilo Joij Ej Kitibuj Ta?

4. Etke eaurõk ñõn ar konono ilo joij?

⁴ Meñe jej jerbal iben ro iloan ak ilikin congregation eo, ak iben ro uan baamle eo ar, eaurõk bwe jen lor nan in kakabilek eo an Paul: “Ami konono, en ien otemjej ilo joij, im en emwij kejãtok e kin salt.” (Kol. 4:6) Konono ilo joij im emõn emaroñ kebellok juõn ien ñõn ar konono iben dron ilo ainemõn.

5. Konono iben dron ilo emõn ejjab melelen ta? Kwalok juõn wanjoñok.

⁵ Konono iben dron ilo emõn ejjab melelen bwe kwoj kaiur im kwalok aolep lemnok im iñjake ko am, elaptata ñe kwoj illu. Baibel eo ej kwalok bwe juõn eo ejaje drebij an illu ej kakõlõn mõjino. (Riit Jabõn Kennan Ko 25:28; 29:11.) Juõn ien Moses, eo “e kanuij inemõn” ian aolep armij ro rar mour ilo ien eo, ear kõtlok bwe kiblia eo an ailiñ in Israel en kaillu e im kõmõn an likjõp in kaibujuij Anij. Moses ear kwalok ilo alikar kin iñjake eo an, ak ear jab buñburuen Jeova. Elikin 40 yiõ in an tel dri Israel ro, Jeova ear jab kõtlok bwe Moses en ãñinlok ir ñõn loan Enen Kalimur eo.​—Bwin. 12:3; 20:10, 12; Sam 106:32.

6. Ta melelen ñõn kwalok lolokjen ñe jej konono?

⁶ Baibel eo ej rejañ kij bwe jen kwalok lolokjen im drebij loõd ñe jej konono. “Nan ko am relõñ remaroñ kõmmõn bwe kwon jerawiwi. Elañe kwo jelãlokjen, innem kwonaj ikõñ wõt.” (Ken. 10:19, UBS; 17:27) Mekarta, kwalok lolokjen ejjab melelen bwe jejjab maroñ kwalok lemnok im iñjake ko ar. Ak ej melelen ar konono “ilo joij,” ikijen ar kajerbal loõd ñõn kõkãtõk armij ro im jab ñõn kõmetak ir.​—Riit Jabõn Kennan Ko 12:18; 18:21.

 “Juõn Ien Ikõñ, im Juõn Ien Konono”

7. Kain rõt men ko jejjab aikwij kwaloki, im etke?

⁷ Einwõt ar aikwij kwalok joij im drebij loõd ñe jej konono iben dri jerbal ro mõtar ak iben ruwamaejet ro ilo jerbal in kwalok nan, jej aikwij bareinwõt kõmõne men in ilo congregation eo im ilo mweo imõd. Ñe jej illu ilo ar konono im jab lemnok kin wãwen an naj jelet ro jet emaroñ bõktok ñõn kij im ro jet elap jorran ñõn ejmour eo ar ilo kõniek, iñjake, im kõtan eo ar iben Anij. (Ken. 18:​6, 7) Jej aikwij jela drebij iñjake ko ar renana me rej walok kin jab wãppen eo ar. Konono nae, kajirere, jab kwalok koutiej, im burukaru, men kein renana. (Kol. 3:8; Jem. 1:​20) Remaroñ kokkure kõtan eo ar eaurõk iben ro jet im Jeova. Jisõs ear katakin: “Jabrewõt eo ej illu ñõn jein im jãtin e naj uõta kin ekajet eo: im jabrewõt eo e naj ba ñõn jein im jãtin, Reka, * e naj uõta kin dri bebe: a jabrewõt eo e naj ba, Kwo bwebwe, e naj uõta kin kijeek i Geena.”​—Matu 5:​22.

8. Ñãt eo jej aikwij kwalok iñjake ko ar, im ilo wãwen it?

⁸ Bõtab, eor jet men ko me emõn ñõn ar kwalok ak konono kaki iben dron. Elañe juõn brother ear ba ak kõmõne juõn men me elap an kainebataik yuk im kwojjab maroñ kejekrone, jab kõtlok bwe kijirãt eo am en edrek ilo buruõm. (Ken. 19:11) Elañe juõn armij ear kaillu yuk, kwon drebij iñjake ko am inem bõk buñten ne ko kwoj aikwiji ñõn kamarmire abañ eo. Paul ear je: “Al en jab tulok ion ami illu.” Kin am inebata wõt kin abañ eo, emõn bwe kwon bõkmantak kake ilo juõn wãwen ejoij im ilo juõn ien ekkar. (Riit Dri Epesõs 4:​26, 27, 31, 32.) Kwon konono iben jeõm im jãtõm kin abañ eo ilo juõn wãwen ealikar ak en ilo joij, kin mejenkajik eo ñõn kajeblak kõtan eo am emõn iben.​—Liv. 19:17; Matu 18:15.

9. Etke jej aikwij drebij iñjake ko ar mokta jen ar kebake ro jet?

 ⁹ Alikar, kwoj aikwij kejbãrok bwe en ekkar ien eo kwoj kãlete. Eor “juõn ien ikõñ, im juõn ien konono.” (Ekk. 3:​1, 7) Bareinwõt, “buruen dru wãnik, ej kalomõnlokjen kin an uak.” (Ken. 15:28) Men in emaroñ kitibuj am kõtar mokta jen am konono kin abañ eo. Elañe kwoj konono kin abañ eo ilo ien eo kwoj illu wõt, men in emaroñ kalaplok abañ eo, bõtab ilo ejja ien eo wõt, ejjab juõn menin meletlet ñõn am kõtar iomin juõn ien eaitok.

Kõmõn ko Rejoij Rej Kowõnmanlok Kõtan ko Remõn

10. Ewi wãwen kõmõn ko ar rejoij remaroñ kakõmõnmõnlok kõtan ko ar iben ro jet?

¹⁰ Konono iben dron ilo juõn wãwen ejoij im emõn ej jibõñ kij ñõn ejaak im kejbãrok kõtan ko rainemõn. Ilo mol, ar kate kij joñõn wõt ar maroñ ñõn kakõmõnmõnlok kõtan eo ar iben ro jet emaroñ kakõmõnmõnlok wãwen ar konono ibeir. Ilo ar bõk buñten ne eo mokta ñõn kõmõni men ko rejoij ñõn ro jet, einwõt bukot ien ko rebellok ñõn jibõñ, lelok juõn menin lelok, im kwalok karuwainene, men kein remaroñ kõmõn bwe en emõn ar konono iben dron. Bareinwõt, ar kõmõni men kein emaroñ “ejoji melle kijeek” na ion juõn armij me emaroñ kõmõn bwe en kwalok karkar ko remõn, im kõmõn bwe en birurulok ar konono im kamarmiri abañ ko ibeir.​—Rom 12:20, 21.

11. Ta eo Jekõb ear kõmõne ñõn kakõmõnmõnlok kõtan eo an iben Iso, im ta tokjen eo ear walok?

¹¹ Jekõb ear melele kin men in. Kin an kar Iso, bo eo jein lukkun illu iben, men in ear kamakõt Jekõb bwe en ko kinke ear lemnok bwe Iso enaj mõn e. Elikin elõñ yiõ ko, Jekõb ear jeblak. Ak ke Iso im 400 eman ro rej iten wõnmaik e, Jekõb ear lelñoñ im jar ñõn Jeova kin jibõñ. Inem ear jilkinlok ñõn Iso menin mour ko einwõt juõn menin lelok elap. Menin lelok in ear lap an jibõñ. Ke rar wõnmaik dron, lemnok eo an Iso ear oktõk, im ear etõr im atbokwõje Jekõb.​—Jen. 27:41-​44; 32:​6, 11, 13-​15; 33:​4, 10.

Kõkãtõk Ro Jet ilo Am Konono ilo Joij

12. Etke jej aikwij kajerbal nan ko rejoij ñõn ro jeer im jãter?

¹² Dri Kristian ro rej korijer ñõn Anij im jab ñõn armij ro. Bõtab, ekkã ar kõnan bwe jen bõk buñburu eo an ro jet. Nan ko ar rejoij remaroñ kadriklok inebata ko an ro jeer im jãter. Bõtab, nan ko reddo remaroñ kalaplok air inebata im kõmõn air lemnok bwe rar luji buñburu eo an Jeova. Kin men in, jen juõn buru emol, jen konono kin men ko rekõkãtõk ñõn ro jet, “jabrewõt eo emõn im nan in kalek ekar ñõn aikwij, bwe en lelok joij ñõn eo ej roñjake.”​—Ep. 4:​29.

13. Ta eo elder ro rej aikwij kememeje (a) ñe rej lelok nan in kakabilek ko? (b) ñe rej jeje juõn letter?

¹³ Elaptata, elder ro rej aikwij kwalok “joij” im jerbal iben bwij eo ilo yokwe. (1 Tes. 2:​7, 8) Ñe ej juõn menin aikwij ñõn an elder ro lelok nan in kakabilek ko, mejenkajik eo air ej ñõn kõmõne men in “ilo inemõn,” meñe ilo ien eo rej konono iben “ro rej jumae.” (2 Tim. 2:​24, 25) Elder ro rej aikwij bareinwõt kajerbal nan ko rejoij ñe rej jeje air letter ñõn bar juõn kumi in elder ak ñõn ra eo me rej ber iomin. Ekkar ñõn nan ko jej riit ilo Matu 7:​12, ej juõn menin aikwij ñõn air kwalok joij im kejbãrok bwe ren jab kalõkatip ro jet.

Konono ilo Joij Iloan Juõn Baamle

14. Ta nan in kakabilek eo Paul ear lelok ñõn lõmaro dri belele, im etke?

¹⁴ Ebiruru ñõn ar jab kile joñõn an lap an nan ko ar, turin mejer, im wãwen ar emakõt jelet ro jet. Ñõn wanjoñok, jet eman ro remaroñ jab lukkun kile ewi joñõn an nan ko air jelet limaro. Juõn sister ear ba, “Elap aõ mijõk ñe leo iba ej buroñe iõ.” Nan ko reddo remaroñ laplok air jelet juõn kõra jen juõn eman im emaroñ to an kememeje. (Luk 2:​19) Elaplok an men in mol ñe nan ko reddo rej walok jen juõn armij me kõra eo ej yokwe im ekõnan koutiej e. Paul ear kakabilek lõmaro dri belele: “Komin yokwe limaro belemi, im jab jememe ñõn ir.”​—Kol. 3:​19.

15. Kwalok juõn wanjoñok kin etke leo ej aikwij jerbal iben lio belen ilo joij.

 ¹⁵ Ikijen men in, juõn jeer im jãter man me eor an iminene kin mour in mare ear kwalok juõn wanjoñok kin etke leo ej aikwij jerbal iben lio belen ilo joij, einwõt juõn ‘jãbi emõjino.’ Ear ba, “Ñe kwoj jibwe juõn jãbi ebiruru, ej aikwij mera am jibwe kinke emaroñ rup. Meñe kwoj bar kõmõne jãbi eo, ak enaj walok wõt annañin kõk eo. Elañe leo ej kajerbal nan ko relukkun erro ñõn lio belen, emaroñ lap an men in kõmetak buruen lio im to an jelet kõtan eo airro.​—Riit 1 Piter 3:7.

16. Ewi wãwen lio dri belele emaroñ kõkãtõk baamle eo an?

¹⁶ Eman ro bareinwõt remaroñ ebwer ak bõk kõkãtõk jen nan ko an bar juõn armij, ekoba nan ko an limaro beleir. “Juõn kõra . . . e jelalokjen,” eo leo belen ej “liki,” ej lemnok kin iñjake ko an leo, einwõt an kõnan bwe leo en kõmõn ñõn e. (Ken. 19:14; 31:11) Emol, elap kilan juõn kõra dri belele ilo baamle eo kinke nan im kõmõn ko an remaroñ jelet ir ilo juõn wãwen emõn ak nana. “Kõrã ro remeletlet rej kõmmõn bwe family ko air ren emmõn; ak ro rebwebwe rej rubi family ko air.”​—Ken. 14:1, UBS.

17. (a) Ewi wãwen an jodrikdrik ro aikwij konono iben jemeir im jineir? (b) Ewi wãwen an ridto ro aikwij konono ñõn jodrikdrik ro, im etke?

¹⁷ Jemen im jinen im ro nejir bareinwõt rej aikwij konono iben dron ilo joij. (Matu 15:4) Ñe jej konono iben ro redrik, ar kwalok joij ñõn ir enaj jibõñ kij ñõn bõprae ar “kaillu” ir ak ‘biuktõke ir ñõn illu.’ (Kol. 3:​21; Ep. 6:4) Meñe ilo ien ko ajiri ro rej aikwij bõk kowe, jemen im jinen im elder ro rej aikwij konono ñõn ir ilo koutiej. Ilo wãwen in, ridto ro rej kõmõn bwe en biruru ñõn an jodrikdrik ro kajime ial ko air im drebij kõtan eo air iben Anij. Men in emõnlok jen ar kõmõn bwe ren bõk lemnok eo bwe emwij ar ebwer jen ar jibõñ ir im men in emaroñ kõmõn bwe ren ebwer. Jodrikdrik ro remaroñ jab kememej aolep nan in kakabilek ko kar lilok ñõn ir, bõtab renaj kememej wãwen an kar ro jet konono ñõn ir.

Konono Men ko Remõn jen Buruõm

18. Ewi wãwen ar maroñ jolok inebata ko ar?

¹⁸ Drebij ar illu ejjab melelen ar baj kalikar ilo turin mejer bwe jej ainemõn.  Mejenkajik eo ar en laplok jen ar baj kate kij ñõn bõprae bwe jen jab kwalok ar illu. Elañe jej kajeoñ in kwalok ilo turin mejer bwe jej ainemõn ak iloa elap ar illu, men in emaroñ kõmõn ar lukkun inebata. Ej einwõt ñe jej jur brake im kiaj in wa eo ilo juõn wõt ien. Men in emaroñ kaiñtan injin eo im kõmõn bwe en jorran wa eo. Inem kwon jab drebij am illu im tokelik kõtlok bwe en anjo iom. Jar ñõn Jeova kin jiboñ bwe en jolok inebata ko am. Kõtlok bwe jitõb eo an Jeova en kõkãle am lolãtãt im buruõm bwe ren ekkar ñõn ankilan.​—Riit Dri Rom 12:2; Dri Epesõs 4:​23, 24.

19. Ta buñten ne ko jemaroñ bõki me emaroñ jibõñ kij bõprae akwail ko?

¹⁹ Bõk buñten ne ko rekeie me renaj jibõñ yuk ñõn drebij am illu. Elañe juõn armij ej kainebataik yuk im kwoj kile bwe kwoj jino illu, emõn bwe kwon mõkõj im ilok jen ijo kinke ilo wãwen in kwoj kõmõn bwe en mirlok am illu. (Ken. 17:14) Elañe armij eo kwoj konono iben ej jino kwalok an illu, en laplok am kate yuk ñõn konono ilo joij. Kememej: “Nan in uak e joij, ej kajeorlok illu; a nan e bin, ej biuktõki illu aitok.” (Ken. 15:1) Nan ko rejjab joij ak reddo remaroñ kalaplok wõt akwail eo meñe emera wãwen am konono. (Ken. 26:21) Inem ñe kwoj ber ilo juõn wãwen me ej melejoñwe am kwalok jadõr, ‘en rumij am konono, im en rumij am illu.’ Jar kin jitõb eo an Jeova bwe en jibõñ yuk ñõn kwalok nan ko remõn im jab nan ko renana.​—Jem. 1:​19.

En Mol Am Jeorlok Bwir

20, 21. Ta eo emaroñ jibõñ kij ñõn jeorlok bwir ko an ro jet, im etke jej aikwij kõmõne men in?

²⁰ Ekaburomõjmõj bwe ejelok juõn iar emaroñ wãppen an drebdribije loõn. (Jem. 3:2) Meñe rej lukkun kate ir ñõn kõmõne men in, ro uan baamle ko ar im dri tõmak ro jeer im jãter remaroñ jet ien ba men ko me rej kainebataik kij ilo air jab lemnok. Jen ar mõkõj im illu, jen kwalok meanwõr ilo ar etale unin air kar ba men eo. (Riit Ekklisiastis 7:​8, 9.) Rej ke ber iomin ijjibed ko, inebata kin juõn men, bwelen ejjab emõn air mour, ak rej iñtan kin juõn abañ me jejjab jela kake?

²¹ Meñe armij eo ej iione juõn ian wãwen kein, men in en jab naunin an kwalok an illu. Bõtab, ar kile wãwen kein emaroñ jibõñ kij ñõn melele kin unin jet ien armij ro rej ba ak kõmõni men ko me ren kar jab, im men in emaroñ kamakõt kij ñõn ar jeorlok air bwir. Kij aolep emwij ar ba ak kõmõni men ko me rar kainebataik ro jet, im jej kejatrikrik bwe renaj kwalok air joij ilo air jeorlok bwir ko ar. (Ekk. 7:​21, 22) Jisõs ear ba bwe ñõn an Anij jeorlok bwir ko ar, jej aikwij jeorlok bwir ko an ro jet. (Matu 6:​14, 15; 18:21, 22, 35) Kin men in, jej aikwij mõkõj in kajitõk jeorlok bwir im bareinwõt mõkõj in jeorlok bwir ko an ro jet, ilo wãwen in, jej kejbãrok yokwe, “eo ken lukwõj ej kowãppemi,” iloan baamle eo ar im iloan congregation eo.​—Kol. 3:​14.

22. Etke eor tokjen ñõn ar kate kij ñõn konono ilo joij?

²² Ke jukjuk im ber in me eobrõk kin armij ro rellulu ej ebak an jemlok, alikar enaj binlok ar kejbãrok lõñliñ im burukuk eo ar. Ar jerbali nan in kaiñi ko rekeie ilo Baibel eo enaj jibõñ kij ñõn kajerbal loõd ilo juõn wãwen emõn, im jab nana. Jenaj lõñliñ kin an naj laplok ainemõn ikõtan armij ro iloan congregation eo im baamle eo ar, im joñok eo ar enaj kwalok ñõn ro jet kin ‘Anij eo ar e mõnõnõ,’ Jeova.​—1 Tim. 1:​11.

[Kamelele eo itulal]

Kwomaroñ ke Kemelele?

• Etke eaurõk ñõn am kãlet juõn ien emõn ñõn am konono kin abañ ko?

• Etke ro uan baamle eo rej aikwij aolep ien konono iben dron “ilo joij”?

• Ewi wãwen jemaroñ bõprae ar ba nan ko rekõmetak?

• Ta eo emaroñ jibõñ kij bwe jen mõnõnõ in jeorlok bwir ko an ro jet?

[Kajitõk ko ñan katak]

[Pija ilo peij 21]

Kõtlok bwe en mirlok am illu, inem bukot juõn ien emõn ñõn am konono

[Pija ilo peij 23]

Ien otemjej juõn eman ej aikwij konono ilo joij ñõn lio belen