Bõk Kwonam Joñõn wõt Am Maroñ ilo Jerbal in Marmir Jonikõn Eo

“Komin kijejeto ien otemjej ilo ami jerbal ñõn Iroij.”​—1 KOR. 15:⁠58, UBS.

1. Ta nan in kir eo Jisõs ear lelok ñõn dri kalor ro an?

 KE EAR itoitak ilujen Sameria ilo jemlokõnlok yiõ eo 33, Jisõs ear bwijrõklok im kakije ilo juõn aibijlõl iturin bukwon in Saikar. Ke rar ber ijin, ear ba ñõn dri kalor ro an: “Komin reilok, im lale jikin kallip ko; bwe kiõ remouj [ak rekalo, UBS] ilo ien marmir.” (Jon 4:​35) Jisõs ear jab konono kin juõn ien lukkun marmir jonikõn, ak ear konono kin jerbal in aintok ro emol burueir im renaj erom dri kalor ro an. Ilo mol, ear lelok juõn nan in kir ñõn dri kalor ro an ñõn bõk kwonair ilo jerbal in. Ear kanuij lap jerbal bõtab ekaru ien ñõn karereiklok!

2, 3. (a) Ta eo ej kalikar bwe jej mour ilo ien marmir jonikõn eo? (b) Ta eo jenaj etale ilo katak in?

² Eor melelen nan ko an Jisõs kin juõn ien marmir ilo ran kein ar. Jej mour ilo juõn tõre me armij ro ilo lõl in rej einwõt juõn jikin kallip ‘ekalo ñõn marmir.’ Kajjojo yiõ, elõñ million armij ro rej katak kin mol eo, im elõñ tausan dri kalor ro rekãl emwij air baptais. Jej bõk jerammõn eo ñõn bõk kwonad joñõn wõt ar maroñ ilo jerbal in marmir in ejej uan iomin tel eo an Iroij in marmir eo, Jeova Anij. Kwoj ke “kijejeto” ilo jerbal in marmir in?​—1 Kor. 15:58, UBS.

³ Ke ear kwalok nan ilo lõl in iomin jilu im jimõtõn yiõ ko, Jisõs ear kapoje dri kalor ro an ñõn jerbal eo air einwõt ro rej marmir jonikõn. Jenaj etale jilu ian katak ko raurõk im Jisõs ear katakini dri kalor ro an. Ilo kajjojo ian katak kein, jenaj etale jet karkar ko im remaroñ jibõñ kij ilo ar kate kij ilo jerbal in aintok dri kalor ro. Jen etale karkar kein kajjojo.

Etã Buru Elap an Aurõk

4. Ta wanjoñok eo Jisõs ear kwaloke kin aurõkin etã buru?

⁴ Pijaiklok mõk ien in: Ej kab mwij an dri kalor ro akwail kin wõn eo elaptata iair. Ewalok air jelke dron im kitõtõik dron ilo turin mejeir. Kin men in, Jisõs ear kirtok juõn ajiri im kajutõk e iolapeir. Ilo an konono kin ajiri eo, ear ba: “Jabrewõt eo ej mõke kõtaik e einwõt ajiri in erik, e in elaptata ilo ailiñ in lõñ.” (Riit Matu 18:​1-4.) Ijellokin air bõk lemnok eo an lõl in, eo ej kile armij ro kin joñõn kajur, mweie, im buñbuñ eo air, dri kalor ro rar aikwij melele bwe air utiej ej berber wõt ion air “mõke kõtaik” ir iman mejen armij ro. Jeova enaj kar kejerammõn ir elañe rej kwalok etã buru eo emol.

5, 6. Etke kwoj aikwij etã buru ñõn am maroñ bõk kwonam ilo jerbal in marmir jonikõn eo? Kemelele.

⁵ Ñõn ranin, elõñ armij ro ilo lõl in rej wujleplok mour ko air ñõn air kõtõbar bwe ren kajur, mweie, im buñbuñ. Kin men in, ejabwe ak ejelok air ien ñõn katak kin Anij im korijer ñõn e. (Matu 13:22) Ilo okõtõn, armij ro an Jeova rej mõnõnõ in “mõke kõtaik” ir iman mejen ro jet bwe ren maroñ bõk kejerammõn im buñburu eo an Iroij in marmir eo.​—Matu 6:​24; 2 Kor. 11:7; Pil. 3:8.

⁶ Lemnok kin wanjoñok eo an Francisco, juõn elder ilo South Amerika. Ke ear juõn likao, ear bwijrõk jen an jikuul ilo university bwe en pioneer. Ear ba: “Tokelik ke iar pojõk  in mare, imaroñ kar lo juõn jerbal im emaroñ kar bõktok elap jããn ñõn kimro lio iba. Ijellokin, kimro ar bebe ñõn mour ilo juõn wãwen elamwan bwe kimro en maroñ wõnmanlok im pioneer. Tokelik, ear or nejimro ajiri im ear binlok mour. Bõtab, Jeova ear jibõñ kim ñõn edrep wõt ñõn bebe eo amro.” Francisco ear wõnmanlok wõt im ba: “Elõñlok jen 30 yiõ ko, iar maroñ bõk jerammõn eo ñõn jerbal einwõt juõn elder im bareinwõt jerbal ko jet raurõk. Ejelok juõn ien kimro kar ajlok kin amro mour ilo lamwan.”

7. Ewi wãwen kwar kajeoñ in jerbale nan in kakabilek eo ilo Dri Rom 12:16?

⁷ Elañe kwoj kejekron “men ko routiej” an lõl in im “kõtaik [yuk] ñõn men ko rettã,” kwe bareinwõt kwomaroñ bõk jerammõn ko jet ilo jerbal in marmir jonikõn eo.​—Rom 12:16; Matu 4:​19, 20; Luk 18:28-​30.

Niknik Ej Bõktok Jerammõn Ko

8, 9. (a) Kwalok ilo tukaru kin parebõl eo an Jisõs kin talent ko. (b) Wõn ro elaptata air maroñ bõk kõkãtõk jen parebõl in?

⁸ Niknik ej bar juõn karkar jej aikwiji ñõn ar bõk kwonad joñõn wõt ar maroñ ilo jerbal in marmir jonikõn eo. Jisõs ear kwalok kin men in ilo parebõl eo kin talent ko. * Wanjoñok in ej kin juõn eman me mokta jen an kar ilok ñõn bar juõn ailiñ, ear lelok men ko mweien ñõn dri korijer ro an jilu bwe ren lali. Ear lelok lailim talent ñõn dri korijer eo kein kajuõn, ruo talent ñõn dri korijer eo kein karuo, im juõn talent ñõn eo kein kajilu. Elikin an iroij eo ilok, dri korijer eo kein kajuõn im karuo rar niknik kin jerbal ko air im mõkõj im bukot ialan an orlok talent ko ak moni ko air. Ijo turãjet, dri korijer eo kein kajilu ear “jowõn.” Ear kalibwin talent eo an im noje iomin brij. Ke leo ear jeblak, ear kejerammõn dri korijer ro ruo an ikijen an kar kairoij ir “ion men ko relõñ.” Ak kin dri korijer eo kein kajilu, leo ear bõk talent eo ear lelok ñõn e im jilkinlok e jen mweo imõn.​—Matu 25:⁠14-30.

⁹ Ejelok berre, kwoj kõnan kajeoñwe dri korijer ro reniknik ilo parebõl eo an Jisõs im bõk kwonam joñõn wõt am maroñ ilo jerbal in kõmõn dri kalor ro. Bõtab, ta elañe wãwen ko ibõm rej kabañ yuk jen am kõmõne ijo kwonam? Bwelen kin an laplok wõnan mour, men in ej iun yuk bwe kwon jolok elõñ auõ ko ilo jikin jerbal eo am bwe kwon maroñ kabwe aikwij ko an baamle eo am. Ak bwelen ejoko am kajur einwõt kar mokta im ejmour eo am ejjab emõn. Elañe kwoj iion wãwen kein, kwomaroñ bõk kõkãtõk jen parebõl eo kin talent ko.

10. Ewi wãwen iroij eo ilo parebõl eo kin talent ko ear kwalok an lolokjen, im ewi wãwen men in ej kõkãtõk yuk?

 ¹⁰ Iroij eo ilo parebõl in ear kile joñõn maroñ ko an kajjojo ian dri korijer ro an. Ear kalikare men in ilo an kar lelok talent ko ekkar ñõn joñõn “air maroñ.” (Matu 25:15) Einwõt an kar iroij eo kõtõmene, ear laplok orlok ko an dri korijer eo kein kajuõn jen eo kein karuo. Bõtab, iroij in ear kamolol dri korijer rein jimor kin air kar niknik im kate ir ikijen an naetair dri “korijera emõn im tiljek,” im ear lelok ñõn irro juõn wõt kain jerammõn. (Matu 25:21, 23) Ilo ejja wãwen in wõt, Jeova Anij eo ej Iroij in marmir, ejela bwe wãwen ko iber rej jelet joñõn ar maroñ jerbal ñõn e. Inem eban likjõp jen an kile joñõn am kate yuk ñõn korijer ñõn e kin aolepen am kajur, im enaj kejerammõn yuk.​—Mark 14:​3-9; riit Luk 21:​1-4.

11. Kemelele kin wãwen jemaroñ bõk jerammõn ko elañe jej niknik wõt meñe jej ber ilo wãwen ko rebin.

¹¹ Wanjoñok eo kin Selmira, juõn Kristian kõra ej jokwe ilo Brazil, ej kwalok bwe ar niknik ilo jerbal eo an Jeova ejjab wawa wõt ion ar lo jerammõn ko ilo mour ko ar. Roñoul yiõ ko remotlok, leo iben Selmira ear mij elikin an kar jet dri kwot ro buki, kin men in ear aikwij mõke lale ajiri ro jilu nejiiro. Ear jolok elõñ auõ ilo jerbal eo an ilo moko mwen armij einwõt juõn maid, im ial eo an ñõn jikin jerbal ear kamõkmõk ke ear aikwij iuwe ilo wa ko robrak kin armij. Meñe ear bin ñõn e, ear karõke ien ko an bwe en maroñ pioneer. Tokelik, ruo ian ajiri ro nejin rar kobalok iben ilo jerbal in pioneer. Ear ba: “Iomin yiõ ko, elõñlok jen 20 armij ro rar katak Baibel iba im emwij air erom ro uan ‘baamle’ eo aõ. Ñõn ranin, ij mõnõnõ kin yokwe im jimjera eo air. Ej juõn menin aurõk me jejjab maroñ wiaiki.” Ejelok berre bwe Iroij in marmir eo ear kejerammõne Selmira kin an niknik ilo an kate!

12. Ewi wãwen jemaroñ kwalok ar niknik ilo jerbal in kwalok nan?

¹² Elañe wãwen ko rebin ilo mour rej kabañ yuk jen am bõk kwonam ilo jerbal in kwalok nan, kwomaroñ kalaplok wõt ijo kwonam ilo jerbal in marmir jonikõn eo ilo am kakõmõnmõnlok wãwen am jerbal in kwalok nan. Elañe kwoj jerbale nan in kakabilek ko rej walok ilo Kwelok in Ar Jerbal ñõn Ailiñ Eo kajjojo wik, enaj jibõñ yuk bwe en emõnlok wãwen am kwalok nan im kwonaj kajeoñ kõl ko jet kin kilen kwalok nan. (2 Tim. 2:​15) Bareinwõt, elañe emõn, kwomaroñ bwijrõk jen makõtkit ko ejelok tokjeir ak bar kõmõni ilo bar juõn ien bwe kwon ekkeini am rejetake jerbal in kwalok nan eo ilo congregation eo am.​—Kol. 4:5.

13. Ta ki eo bwe juõn en maroñ niknik im drebij wõt an niknik?

¹³ Kememej wõt bwe niknik ej jebar im waloktok jen juõn buru eobrõk kin kamolol. (Sam 40:8) Dri korijer eo kein kajilu ilo parebõl eo an Jisõs ear mijõke iroij eo an, ear watõke einwõt juõn armij elej im ejaje kamanwa. Kin men in, eman in ear kalibwini talent eo an ijellokin an kar ilok im kõmõn bwe en orlok men ko mweien iroij eo an. Ñõn bõprae lemnok rõt in, jej aikwij kadrek im drebij juõn kõtan ebak iben Iroij in marmir eo, Jeova. Kajenolok ien ñõn am katak im kalomõnlokjen kin karkar kein an remõn einwõt yokwe, meanwõr, im tiriamokake. Ilo wãwen in, buruõm enaj kamakõt yuk bwe kwon kõmõne jerbal eo an joñõn wõt am maroñ.​—Luk 6:​45; Pil. 1: ​9-​11.

“Komin Kwojarjar”

14. Ta menin aikwij eo eaurõk ro rej kõnan jerbal in marmir rej aikwij kajejite?

¹⁴ Ilo an kwalok kin Jeje ko ilo kajin Hibru, dri jilik Piter ear kwalok kin ta eo Anij ekõnan jen dri korijer ro an ijin ion lõl, ear ba: “Einwõt Eo e ar kir kom E kwojarjar, komin bareinwõt kwojarjar ilo wãwen otemjej ami ber im  kõmõn; Bwe emwij jeje, Komin kwojarjar; bwe Ña I kwojarjar.” (1 Pit. 1:​15, 16; Liv. 19:2; Dut. 18:13) Nan kein rej kalikar bwe dri marmir ro rej aikwij erreo ilo mwil im ilo air kabuñ ñõn Anij. Jemaroñ kajejit menin aikwij in eaurõk ikijen ar bõk buñten ne ko ñõn karreoik kij ilo kõkkar. Ewi wãwen jemaroñ kõmõne men in? Jemaroñ kõmõne men in ikijen jibõñ eo jen nan eo emol an Anij.

15. Mol eo jen nan in Anij eor an kajur ñõn kõmõn ta ñõn kij?

¹⁵ Nan eo emol an Anij ej einwõt juõn dren eo ej karreo. Ñõn wanjoñok, dri jilik Piter ear je bwe congregation eo an Kristian dri kabit ro ej erreo iman mejen Anij. Ej einwõt juõn kõra erreo belen Kraist, eo ej “karreoik e ilo nan kin kwolkwol kin dren . . . , bwe en kwojarjar im ejelok notan.” (Ep. 5:​25-​27) Moktalok, Jisõs ear konono kin kajur in an nan in Anij karreo. Ilo an konono ñõn dri kalor ro an, Jisõs ear ba: “Kiõ kom erreo kin nan eo I ar konono ñõn kom.” (Jon 15:3) Kin men in, mol eo jen nan in Anij ear karreo armij ro ilo mwil im ilo air kabuñ ñõn Anij. Elañe jej kõtlok an mol eo jen Anij karreoik kij ilo wãwen in, enaj buñburuen ilo ar kabuñ ñõn e.

16. Ewi wãwen jemaroñ drebij wõt ar erreo iman mejen Anij?

¹⁶ Kin men in, ñõn erom dri marmir ro ilo jonikõn eo an Anij, jej aikwij mokta jolok aolep mõnit ko retton iben Anij jen mour ko ar. Aet, bwe en tellokin wõt ar bõk jerammõn eo ñõn jerbal einwõt dri marmir ro, jej aikwij kejbãrok mwil erreo im kien ko an Anij. (Riit 1 Piter 1:​14-​16.) Einwõt ar kanuij lale bwe jen erreo ien otemjej ilo enbwin, eindrein jej aikwij keini ar kõtlok bwe katak ko remol ilo Baibel eo ren karreoik kij. Men in ej kitibuj ar riiti Baibel eo im ber ilo kwelok ko an Kristian. Ej bareinwõt melelen bwe jej aikwij kate kij ñõn jerbale nan in kaiñi ko an Anij ilo mour ko ar. Ar kõmõne men in enaj kamaroñ kij bwe jen tõrinaek kõnan ko ar renana im bõprae menin kareelel ko rewan an lõl in. (Sam 119:9; Jem. 1:​21-​25). Aet, ej menin kainemõn ñõn jela bwe ikijen jiboñ eo jen nan eo emol an Anij, “emwij kwoli” kij, meñe jen jerawiwi ko relap!​—1 Kor. 6:​9-​11.

17. Bwe jen maroñ drebij wõt ar erreo, ta nan in kakabilek eo jen Baibel jej aikwij lore?

¹⁷ Kwoj ke kõtlok bwe katak ko ilo Baibel ren karreoik mour eo am? Ñõn wanjoñok, ta eo kwoj kõmõne elañe katak ko ilo Baibel eo rej kakkil yuk nae menin kamõnõnõ ko retton an lõl in? (Sam 101:3) Kwoj ke kejbãrok yuk jen kõmao ko ejelok tokjeir iben dri jikuul ak dri jerbal ro mõtõm im eoktõk tõmak ko air? (1 Kor. 15:33) Kwoj ke lukkun kate yuk ñõn am anjo ion mõjino ko am mõke im remaroñ katton yuk iman mejen Anij? (Kol. 3:⁠5) Kwoj ke bõprae jen am bõk kwonam ilo bwoktak ko an kien ko im jitõbõn koutiej ailiñ ko me ej walok ilo ikkure ko ñe rej jiaik dron?​—Jem. 4:⁠4.

18. Ewi wãwen erreo iman mejen Anij enaj jibõñ kij bwe en laplok ar jebar leen ko ilo jerbal in marmir eo?

¹⁸ Elañe kwoj tiljek ilo am bokake men kein, enaj bõktok tokjen ko remõn ñõn yuk. Ilo an keiri dri kabit ro dri kaloran einwõt ran juõn vain ak grep, Jisõs ear ba: “Jabrewõt ra ilo Ña e jab jebar leen, [Jema] Ej bõklok: im ra jabrewõt ej jebar leen, Ej karreoik e, bwe en orlok an jebar leen.” (Jon 15:2) Elañe kwoj  kõtlok bwe katak ko remol ilo Baibel ren karreoik yuk, kwonaj jebar elõñ leen ko.

Jerammõn ko Kiõ im Ran ko Rej Ber Iman

19. Ewi wãwen kar kejerammõne dri kalor ro an Jisõs kin air kate ir ilo jerbal in marmir eo?

¹⁹ Dri kalor ro retiljek im rar jerbali men ko Jisõs ear katakin ir kaki, rar bõk maroñ tokelik ikijen kajur eo an Anij ñõn kwalok nan “ñõn eneo etolok tata i lõl” ilo kar ran in Pentekost eo ilo yiõ eo 33. (Jerb. 1:8) Rar wõnmanlok im jerbal einwõt ro uan kumi eo ej tel ilo Jerusalem, mejinede ro, overseer ro rej itoitak, im ear lap ijo kwonair ilo air kwalok nan kin nuuj eo emõn ñõn “armij otemjej ilo lõl.” (Kol. 1:​23) Elap jerammõn ko rar bõki, im rar bõktok elap lõñliñ ñõn armij ro!

20. (a) Ta jerammõn ko emwij am bõki jen am bõk kwonam joñõn wõt am maroñ ilo jerbal in marmir jonikõn eo? (b) Ta eo kwoj beek ilo buruõm ñõn kõmõne?

²⁰ Aet, elañe jej kwalok etã buru, niknik, im koutiej kien ko ilo Nan in Anij kin mour erreo im wãwen kabuñ, jenaj wõnmanlok wõt im bõk kwonad joñõn wõt ar maroñ ilo jerbal in marmir jonikõn eo ranin. Meñe armij rej iñtan im buromõj kin air bõk jitõbõn arõk mweiuk im elap air bukot menin kamõnõnõ ko an lõl in, jej lo lõñliñ eo emol im ejuburuer. (Sam 126:6) Men eo eaurõktata ej bwe ar “jerbal e jab jekron ilo Iroij.” (1 Kor. 15:58) Iroij in marmir eo, Jeova Anij, enaj kejerammõn kij ñõn indrio kin ar ‘jerbal im yokwe, eo jej kwalok kin etan.’​—Hib. 6:​10-​12.

[Kamelele eo itulal]

Kwoj Kememej Ke?

Ilo am kate yuk ñõn bõk kwonam joñõn wõt am maroñ ilo jerbal in marmir jonikõn eo . . .

• etke eaurõk bwe kwon kwalok etã buru?

• ewi wãwen kwomaroñ niknik im drebij wõt am niknik?

• etke eaurõk bwe kwon erreo wõt iman mejen Anij?

[Kajitõk ko ñan katak]

[Pija ilo peij 17]

Etã buru ej jibõñ kij ñõn mour ilo juõn wãwen elamwan im ej berber ion ar jerbal ñõn Anij im Ailiñ eo an