Katakin Ajiri ro Nejõm Bwe En Or Juõn Kõnan Ibeir ñõn Riit im Katak

KATE ñõn katakin ajiri ro nejõm ñõn riit im katak ej juõn ian wãwen ko relukkun aurõk kwomaroñ kõmõni ñõn kakõmõnmõnlok ilju im jeklaj eo air. Riit im katak remaroñ bõktok elap lõñliñ! Juõn ian men ko remõn jet armij rej kememeji ke rar drik ej ke jemeir im jineir rar riit ñõn ir. Riit emaroñ juõn men ekamõnõnõ im tokjen ko rej walok jene rej bareinwõt kamõnõnõ. Elaptata an mol men in iben ro dri korijeran Anij, kinke ñe jej katak Baibel eo jej kadrek juõn kõtan ebaklok iben Jeova. Juõn dri Kristian eor nejin ear ba, “Men ko kij armij jej lukkun kaurõki rej ekkejellok ñõn riit im katak.”

Juõn mõnit emõn ñõn katak emaroñ jibõñ ajiri ro nejõm ñõn ejaak juõn kõtan elukkun ebak iben Anij. (Sam 1:​1-3, 6) Meñe ar jela kilen riit ejjab menin aikwij ñõn bõk lomor, Baibel eo ej kwalok bwe riit emaroñ bõktok elap jerammõn. Ñõn wanjoñok, Baibel eo ej ba: “Emõnõnõ eo ej konono book in, im emõnõnõ ro rej roñjake nan in kanan kein.” (Rev. 1:3, UBS) Bareinwõt, tokjen kalomõnlokjen, eo ej juõn mõtõn eaurõk ñõn katak ej alikar ilo nan in kakabilek eo an dri jilik Paul ñõn Timote: “Kwon [kalomõnlokjen, NW] ilo men kein, im mõke lelok yuk ñõn ir.” Etke? “Bwe am wõnmanlok en alikar ñõn ro otemjej.”​—1 Tim. 4:​15.

Emol, kabel eo ñõn jela kilen riit im katak ejjab melelen bwe emaroñ kajju bõktok tokjen ko ñõn juõn armij. Elõñ ro rej jerwane air kajerbal kabel kein eor ibeir kin air jibarek men ko rejjab lukkun aurõk. Inem, ewi wãwen ro jemen im jinen remaroñ katakin ajiri ro nejiir bwe en or juõn kõnan ibeir ñõn bõk jelalokjen eo eor tokjen?

Yokwe eo Am im Joñok eo Am

Ajiri ro rej mõnõnõ in katak ñe rej iñjake yokwe jen jemeir im jineir. Owen im Claudia, ruo Kristian dri belele rej kememej kin ajiri ro ruo nejiiro ke rej ba: “Rekin reimanlok ñõn ien katak eo an baamle eo bwe ear juõn ien ejejuan, im rar iñjake air jokõne. Rar jino watõk ien in einwõt juõn jikin emõn mejatoto eo ie im eobrõk kin yokwe.” Meñe ajiri ro rej tõbar ien eo ebin ñe rej jodrikdrik, mejatoto in yokwe eo ej walok ilo ien katak eo an baamle eo enaj wõnmanlok im jelet wãwen rej watõk ien katak. Kiõ ajiri ro nejin Owen im Claudia rej pioneer im rej wõnmanlok im bõk tokjen jen air kar katakin ir bwe en or juõn kõnan ibeir ñõn riit im katak.

Juõn wãwen emaroñ lukkun jibõñ ej joñok eo an ro jemen im jinen. Ajiri ro me ekkã air lo an jemeir im jineir riit im katak elaplok air watõk men kein einwõt mõtõn mour ko air. Ak einwõt juõn jemen im jinen, ewi wãwen kwomaroñ likit juõn joñok ñõn ro nejõm elañe ebin am riit? Emaroñ melelen bwe kwoj aikwij ukot men ko raurõk ibõm ak lemnok eo am kin riit. (Rom 2:​21) Elañe riit ej juõn mõtõn eaurõk ilo mour eo am kajjojo ran, men in enaj lukkun jelet ajiri ro nejõm. Am niknik,  elaptata ilo am riit Baibel, kapoj katak ko ñõn kwelok, im katak iben baamle eo enaj kalikar aurõkin men kein.

Kin men in, yokwe im joñok eo am elap air aurõk ñõn am katakin ajiri ro nejõm bwe en or juõn kõnan ibeir ñõn riit. Ak ta buñten ne ko rekeie kwomaroñ kõmõni ñõn rejañ ir?

Jibõñ Ajiri ro Nejõm ñõn Kadrek Juõn Kõnan ñõn Riit

Ta jet ian buñten ne ko raurõk remaroñ jibõñ yuk ñõn tõbar mejenkajik eo am ñõn kadrek juõn kõnan iben ajiri ro nejõm ñõn riit? Kõmõn bwe en or air buk jen ke rar drik wõt. Juõn Kristian elder me jemen in jinen rar katakin e bwe en or juõn kõnan iben ñõn riit ej letok nan in rejañ in: “Kõmõn bwe ajiri ro nejõm ren iminene in jibwe im kajerbale buk ko. Elañe rej kõmõn eindrein, buk ko remaroñ erom men ko raurõk im mõtõn mour eo air.” Inem elõñ ajiri ro renaj mõnõnõ in bõk ibeir buk kein me rej berber ion Baibel, einwõt Eoroñ Dri Kaki eo Elap im Aõ Buk in Bwebwenato ko jen Baibel mokta jen air jela riit. Ñe kwoj riiti buk kein iben ajiri ro nejõm, kwoj kwalok ñõn ir bwe ren jela jab baj kajin eo wõt ak bareinwõt kin ‘men ko an Anij’ im ‘nan ko an Anij.’​—1 Kor. 2:​13.

Keini am riit ilo juõn ainiken elaj. Kõmõn juõn lajrõk in riit iben ajiri ro nejõm kajjojo ran. Ilo am kõmõn eindrein kwoj katakin ir kilen konono ilo jime im kalaplok air iminene ñõn riit. Wãwen am riit ej bareinwõt aurõk. En kaitoktoklimo am riit im ir renaj bareinwõt kõmõn eindrein. Ilo mol, kwonaj lo bwe ajiri ro nejõm renaj kajitõk ibõm ñõn bar riiti ejja bwebwenato eo wõt elõñ alen. Kõmõne men eo rej kajitõk kake! Tokelik, renaj kõnan lale bwebwenato ko rekãl. Bõtab, kejbãrok ñõn jab iun ajiri eo nejõm ñõn riit ibõm. Jisõs ear likit juõn joñok kin men in ikijen an kar katakin dri roñjake ro an joñõn wõt “air maroñ in roñjake.” (Mark 4:​33) Elañe kwojjab iun ajiri ro nejõm, renaj kijerjer in reimanlok ñõn kajjojo ien riit, im enaj laplok am jibarek mejenkajik eo am ñõn katakin ir bwe en or juõn kõnan ibeir ñõn riit.

Rejañ ir ñõn bõk kwonair, im bwebwenato kin men ko kwar riiti. Kwonaj mõnõnõ ñõn lo bwe mõtõn wõt jidrik im ajiri eo nejõm enaj maroñ kile nan ko, jela kilen ba nan ko, im melele melelen elõñ nan ko. Konono iben dron kin men eo kwar riit emaroñ kalaplok wõnmanlok eo air. Juõn buk me ej kemelele kin wãwen ñõn jibõñ ajiri ro ñõn erom ro emõn air riit ej ba, bwebwenato ej jibõñ ajiri ro ñõn “katak nan ko renaj kili tokelik im melele ñe rej riit. Bwebwenato ñõn ajiri ro redrik im rej jino katak kilen riit im jeje ekanuij aurõk. Ñe elaplok am konono kin melele ko raurõk ñõn ir . . . enaj emõnlok.”

Kõmõn bwe ajiri ro nejõm ren riit ñõn yuk, im rejañ ir ñõn bõkmantak kajitõk ko. Kwomaroñ mõke bõkmantak kajitõk ko jen buk ko im kwalok uak ko bwe ren kãlet. Ilo wãwen in, ajiri ro renaj jela bwe remaroñ bõk melele ko jen buk ko im eor juõn melele ilikin nan ko rej riiti. Elap an wãwen in jibõñ elaptata ñe men eo kwoj riiti ej berber ion Nan in Anij, buk eo eaurõktata ian aolep buk.​—Hib. 4:​12.

Bõtab, jab meloklok bwe kilen riit ejjab juõn men ebiruru. Ej bõk elap ien im kaminene ñõn jela riit. Inem kwon rejañ ro redrik ñõn kalaplok air kõnan riit ilo am lelok elap nan in nebar ko ñõn ir. Am nebar ajiri ro nejõm enaj rejañ ir bwe ren kõnan riit.

Riit Ej Juõn Men Elap Tokjen im Ekamõnõnõ

Katakin ajiri ro nejõm kilen katak ej kõmõn bwe en or tokjen air aikwij riit. Katak ej kitibuj bõk melele ko im melele kin ewi wãwen rej ekkejel iben dron. Ej koba maroñ eo ñõn karõk melele ko, kememeji, im jerbali. Elikin an juõn ajiri jela kilen katak im melele kin ewi wãwen men eo ej katak kake emaroñ jibõñ e, riit enaj erom juõn men elap tokjen im ekamõnõnõ iben.​—Ekk. 10:10.

Kwalok menin aikwij ko kin kilen katak. Ien Kabuñ an Baamle ilo jota, bwebwenato kin  buk eo Liñõri Jeje ko Ran Otemjej, im ien ko jet rej kebellok ien ko rekanuij emõn ñõn katakin ajiri ro nejõm kilen katak. Jijõt wõt im lukkun lale juõn katak iomin jidrik ien enaj katakin ir kalomõnlokjen, eo elukkun aurõk ñõn katak. Bareinwõt, kwomaroñ rejañ ladrik eo nejõm ñõn kwalok ñõn yuk kin ewi wãwen men ko ej kab mwij an katak kaki rej ekkejellok iben men ko ejela karere. Men in ej katakin e ñõn jela keiri melele ko. Ak etke kwojjab kajitõk iben ledrik eo nejõm ñõn kemelele ilo tukaru men ko ej riiti ilo nan ko an mõke? Men in enaj jibõñ e ñõn jela melelen im kememeje. Eliji ak bar kwalok un ko relap elikin an riit juõn katak ej bar juõn kein jibõñ ñõn kememej kwomaroñ kwalok ñõn ir. Meñe ajiri ro redrik remaroñ bareinwõt katak kin ewi wãwen ñõn je melele ko ilo tu karu ilo ien katak ak kwelok ko an congregation eo. Men in enaj lukkun jibõñ ir ñõn kalomõnlokjen! Wãwen kein rebiruru rej kõmõn bwe katak en kaitoktoklimo im aurõk ñõn kwe im ajiri ro nejõm.

Kõmõn bwe wãwen ko ibelakir ren kowõnmanlok air katak. Juõn jikin eaemlolo im emeram, bareinwõt ejelok keroro ie im emõn ej kõmõn bwe en biruru air kalomõnlokjen. Emol, wãwen ro jemen im jinen rej watõk katak ej lukkun aurõk. Juõn jinen ej ba, “Elap an aurõk bwe kwon ekkeini am kõmõn ien ñõn riit im katak. Men in ej jibõñ ajiri ro nejõm ñõn jela kilen karõk men ko. Rej katak ñõn kajejit men ko rej aikwij kõmõni ilo ien eo rar karõke.” Elõñ ro jemen im jinen rejjab kõtlok makõtkit ko jet ilo ien katak. Ekkar ñõn juõn dri meletlet ej ba bwe eñin ej wãwen eo elaptata ej jibõñ katakin ajiri ro ñõn lor juõn mõnit emõn ñõn katak.

Kalikar tokjen katak. Eliktata, kwon jibõñ ajiri ro nejõm ñõn jela ewi wãwen remaroñ jerbale men ko rar katak kaki. Jerbale melele ko rar katak kaki ej kalikar unin rej katak. Juõn Kristian likao ej kamol men in ke ej ba: “Elañe ijjab lo jabrewõt tokjen ekeie kin men eo ij katak kake, ekanuij bin ñõn aõ kõnan katak kin men in. Ak elañe imaroñ jerbale ilo mour eo aõ, ej erom juõn men ikõnan melele kake.” Ñe jodrikdrik ro rejela bwe katak ej juõn wãwen ñõn kõtõbar juõn mejenkajik eaurõk, enaj kaitoklimoik ir. Renaj kijorur im reimanlok ñõn air katak einwõt air kar kijorur in riit.

Ãjinkij eo Emõntata

Elukkun lõñ tokjen ko remõn rej walok itok jen am katakin ajiri ro nejõm bwe en or juõn kõnan ibeir ñõn riit, im jejjab maroñ je aolepeir. Jet iair ej lo tõbrõk ilo jikuul, ilo jikin jerbal, ilo wãwen jerbal iben armij, melele men ko rej walok ilo lõl in, im ejaak juõn jimjera ebak ikõtan ajiri eo im jemen im jinen. Im kwojjab baj ba wõt juburu eo ej itok jen riit im katak.

Ilõñin men otemjej, kõnan eo ñõn katak emaroñ jibõñ ajiri ro nejõm ñõn erom ro ekajur kõtan eo air iben Jeova. Eñin ej ki eo ñõn kebellok lemnok ko air im burueir ñõn jela “drilpen, im aitokõn, im mũlõlin, im utiejen” mol eo ilo Baibel. (Ep. 3:​18) Emol, elukkun lõñ men ko Kristian ro jemen im jinen remaroñ katakin ajiri ro nejiir kaki. Ke ro jemen im jinen rej jolok ien iben ajiri ro nejiir im kõmõn jabrewõt men ñõn lelok ñõn ir juõn ijjino emõn ilo mour ko air, rej kejatrikrik bwe ajiri ro nejiir renaj kãlet ñõn erom dri kabuñ ro an Jeova. Katakin ajiri ro nejõm ñõn lor juõn mõnit emõn ñõn katak ej jibõñ ir ñõn ejaak im drebij juõn kõtan emõn iben Anij. Kin men in, elõñ un ko ibõm ñõn am jar im bukot kajerammõn jen Jeova ke kwoj kate yuk ñõn katakin ajiri ro nejõm bwe en or juõn kõnan ibeir ñõn riit im katak.​—Ken. 22:6.

 [Box/Pija ko ilo peij 26]

Riit . . .

• Kõmõn bwe en or air buk

• Riit ilo juõn ainiken elaj

• Rejañ ir bõk kwonair

• Bwebwenato kin men ko kwar riiti

• Kõmõn bwe ajiri ro nejõm ren riit ñõn yuk

• Rejañ ajiri ro nejõm ñõn bõkmantak kajitõk ko

Katak . . .

• Ro jemen im jinen ren likit juõn joñok emõn

• Kamineneik ajiri ro nejõm ñõn . . .

○ kalomõnlokjen

○ keiri

○ kemelele ilo tukaru

○ eliji

○ je melele ko

• Kõmõn bwe wãwen ko ibelakir ren kowõnmanlok air katak

• Kalikar tokjen katak