“Kwon Jab Mijõk. I Naj Jibõñ Yuk”

JISÕS ear kakkil dri kalor ro an: “Devil e naj jolok jet iami na iloan prisõn bwe en melejoñ kom.” Bõtab, mokta jen an kar lelok nan in kakkil in, Jisõs ear ba: “Kwon jab lelñoñ kin men ko kwo naj iñtan kaki.” Kinke Setan ej wõnmanlok wõt im kajerbal kalbuj einwõt ken kalelñoñ eo ñõn kabwijrõk jerbal in kwalok nan kin Ailiñ eo, inem ejelok berre bwe emaroñ or jet kien ko me renaj matõrtõre dri Kristian ro remol. (Rev. 2:​10; 12:17) Kin men in, ta eo enaj jibõñ kij ñõn ar pojõk in jelmae jerbal ko retao an Setan im “jab lelñoñ,” einwõt an kar Jisõs kakkil kake?

Emol, enañin kij aolep ear or juõn ien jar iñjake ar lelñoñ. Bõtab, Nan eo an Anij ej kalimur ñõn kij bwe jenaj maroñ anjo ion ar lelñoñ ikijen jibõñ eo jen Jeova. Ewi wãwen? Juõn wãwen Jeova ej jibõñ kij bwe jen pojõk in jelmae jumae ej ilo an kalikari kõl ko Setan im dimõn ro an rej kajerbali. (2 Kor. 2:​11) Ñõn kwalok juõn wanjoñok kin ewi wãwen men in ej eindrein, jen etale juõn men me ear walok ilo ien ko etto. Jenaj bareinwõt etale jet joñok ko kin dri tõmak ro mõtar retiljek ilo ran kein, ro im rar ‘jutõk bin nae etao ko an devil’ eo.​—Ep. 6:​11-​13.

Juõn Kiñ eo Ej Mijõk Anij Ej Jelmae Juõn Iroij Enana

Enañin 700 buki yiõ ko mokta jen an kar Kraist itok ñõn lõl, Kiñ eo an Assiria etan Senakerib ear anjo ion elõñ ailiñ ko. Kin an liki bwe ear anjo ion ailiñ kein, ear beek ñõn kokkure armij ro an Jeova im jikin kwelok eo air elap, Jerusalem, ijo Kiñ Hezekaia, eo ej mijõk Anij, ej iroij ie. (2 Kiñ. 18:​1-3, 13) Ejelok berre, Setan ear kortokjen ien in ñõn kamakõt Senakerib bwe en kajejiti karõk ko an ñõn jolok kabuñ eo emol ion lõl.​—Jen. 3:​15.

Senakerib ear jilkinlok juõn jarin armij ro ñõn Jerusalem ñõn kalelñoñ armij ro ie bwe ren kõtãik ir ñõn iomin maroñ eo air. Juõn ian ro rar tel jarin armij rein kar Rabshake, eo ear jerbal einwõt dri konono eo elap an kiñ eo. * (2 Kiñ. 18:17) Kõtõbar eo an Rabshake ear ñõn an kabwer dri Ju ro bwe ren mõkõj im kõtãik ir iomin maroñ eo air. Ta kõl ko Rabshake ear kate in kajerbali ñõn an kalelñoñ dri Ju ro?

Rar Tiljek Wõt Meñe Rar Mõke Iair

Rabshake ear jiroñ ro rej jutõk ikijen Hezekaia: “Ein drein kiñ elap, kiñ in Assiria, ej ba, Ta liki in, eo kwoj liki? . . . Lo, kwoj liki jokwõn in koba in eobõp, aet, Ijipt; eo elañe juõn armij ej jurõke, e naj wie pein, im bijlok.”  (2 Kiñ 18:19, 21) Nan in kinak kein an Rabshake rar jab mol kinke Hezekaia ear jab kõmõn juõn kwon iben ailiñ in Ijipt. Mekarta, nan kein rar kalikar men eo Rabshake ear kõnan bwe dri Ju ro ren kememej: ‘Ejelok juõn enaj jibõñ kom. Komij mõke iami.’

Ilo jet ien ko rej kab motlok, ro rej jumae kabuñ eo emol rar bareinwõt kamijõk dri Kristian ro remol ilo air ba bwe renaj kalbuji ir bwe ren jenolok jen ro jeir im jãtir. Juõn Kristian kõra, eo kar kalbuj e kin tõmak eo an im ear jenolok jen dri tõmak ro mõtõn iomin elõñ yiõ ko, ear tokelik kwalok kin ta eo ear jibõñ e bwe en jab ebwer kin an lelñoñ. Ear ba: “Jar ear jibõñ iõ ñõn druaklok ñõn Jeova . . . Iar kememej kalimur eo ilo Aiseia 66:2 bwe Anij ej lo “eo e jeramel im etã buruen.” Ien otemjej men in ear kakajur im kainemõn iõ.” Eindreinlok wõt, juõn brother eo ear mõke ian ilo juõn rum in kalbuj iomin elõñ yiõ ko, ear ba: “Iar kile bwe meñe iar kalbuj ilo juõn rum edrik ak iar iñjake aõ anemkwoj kinke iar lõñliñ kin juõn kõtan emõn iben Jeova.” Aet, juõn kõtan emõn iben Jeova ear kakajur dri Kristian rein ruo ñõn kijenmij wõt ke rar ber ilo kalbuj im jenolok jen ro jeir im jãtir. (Sam 9:​9, 10) Ro rej matõrtõr Dri Kennan ro an Jeova remaroñ kajenolok ir jen baamle eo air, ro mõtair, im ro jeir im jãtir, bõtab dri Kristian ro ilo kalbuj rar jela bwe ro rej jumae ir rejjab maroñ kajenolok ir jen Jeova.​—Rom 8:​35-​39.

Inem, elap an aurõk bwe jen kajerbal aolep ien ko remõn im rebellok ñõn ar kakajur kõtan eo ar iben Jeova! (Jem. 4:8) Jej aikwij keini ar kajitõkin kij mõke: ‘Ij ke lukkun tõmak bwe emol an Jeova ber? Nan ko an rej ke lukkun jelet iõ ke ij kõmõn bebe ko redrik im relap ilo mour eo aõ ran otemjej?’ (Luk 16:10) Elañe jej kate kij ñõn drebij wõt kõtan eo ar emõn iben Anij, inem ejelok unin ar aikwij mijõk. Dri kanan Jeremaia, eo ej konono ikijen dri Ju ro rej iñtan, ear ba: “O Iroij, iar kir ñõn yuk jen kabin roñ eo . . . Kwar eoroñ iõ im ba in jab mijak.”​—Liãj. 3:​55-​57, UBS.

Ejelok Tõbrõkin Air Kõmõn bwe Ren Berre Anij

Rabshake ear kajerbal nan in riõp ko retao ñõn kõmõn bwe en or an armij ro berre. Ear ba: ‘E jab . . ., jikin ko An Jeova reutiej, im lokatok ko An, Hezekaia e ar bõkilok [ak kokkuri]? . . . Jeova e ar ba ñõn iõ, Kwon wõnliñlok nae enen im kokkure.’ (2 Kiñ. 18:22, 25) Ilo wãwen in, Rabshake ear ba bwe Jeova ejamin tõrinae ñõn armij ro An kinke Ear jab buñburuen kake ir. Bõtab, men in ear jab mol. Jeova ear buñburuen iben Hezekaia im dri Ju ro, ro im rar jeblak ñõn kabuñ eo emol.​—2 Kiñ. 18:​3-7.

Ranin, dri kijirãt ro retao remaroñ kwalok jidrik melele ko remol ñõn kõmõn bwe armij ro ren errã ibeir, bõtab ilo etao, rej kobaik nan in riõp ko ñõn kõmõn bwe en or an armij ro berre. Ñõn wanjoñok, ear or jet ien ko ke kar jiroñ dri Kristian ro jeer im jãter ilo kalbuj bwe juõn ian brother ro rej lolorjake ir ilo ailiñ eo air ear ilok jen tõmak eo an, inem ejjab nana ñe renaj bareinwõt kõmõne men in. Bõtab, ikijen dri Kristian ro me eor lolokjen ibeir, kain lemnok rõt kein rejamin kõmõn bwe en or air berre.

Lemnok kin ta eo ear walok ñõn juõn Kristian kõra ilo ien Bata eo an Lõl Ken Karuo. Ke ear ber ilo kalbuj, kar kwalok ñõn e juõn peba me ej kalikar bwe ear or juõn brother, eo eor erro ko iben me ear ilok jen tõmak eo an. Dri  etale eo ear kajitõk iben elañe ear liki brother in. Sister eo ear uak im ba, “[Ej] baj juõn armij ejjab wãppen.” Ear kakobaba im ba bwe toõn wõt an brother eo lor nan in kakabilek ko ilo Baibel, Anij ear kajerbal e. Inem ear ba: “Bõtab, kinke nan ko an rejjab errã iben Baibel eo, ejoko kiõ an juõn ian ro jeiõ im jãtiõ.” Ilo meletlet, sister in etiljek ear lor nan in kakkil eo ilo Baibel: “Komin jab liki bwirõk rõn, ak nejin armij eo ejelok jibõñ iben.”​—Sam 146:3.

Ar bõk jelalokjen eo ejime kin Nan eo an Anij im jerbali nan in kakabilek ko ie renaj jibõñ kejbãrok kij nae melele ko retao me remaroñ kamõjnoik bebe eo ar ñõn kijenmij. (Ep. 4:​13, 14; Hib. 6:​19) Kin men in, ñõn kapoj kij mõke bwe en maroñ jime ar lemnok ñe jej ber iomin ijjibed ko, jej aikwij kõmõn bwe ar riit Baibel ran otemjej im katak iber mõke ren men ko raurõktata ilo mour eo ar. (Hib. 4:​12) Aet, kiõ ej ien eo ñõn ar kalaplok jelalokjen eo ar im kakajurlok tõmak eo ar. Juõn brother, eo ear kijenmij iomin elõñ yiõ ko ke ear mõke ian ilo juõn rum ilo jikin kalbuj eo, ear ba: “Ikõnan rejañ aolep bwe ren kile aurõkin aolep ekan ko lor jitõb kar litoki, kinke jejjab jela ewi wãwen remaroñ or tokjeir ñõn kij ilo ran ko renaj itok.” Emol, elañe jej tiljek in katak Nan eo an Anij im buk ko me kumi in dri korijer eo ej litok ranin, inem ñe jej iion wãwen ko relukkun bin, jitõb kwojarjar eo enaj “kakememej” kij kin men eo jar katak kake.​—Jon 14:26.

Bõk Kejbãrok jen Nan in Kamijõk Ko

Rabshake ear kajeoñ in kamijõk dri Ju ro ilo an kar ba: “Kwon letok men in kamol ñõn iroij eo aõ, kiñ in Assira, im I naj lewoj ruo tausan ors, elañe kwe kwo maroñ in likit ro dri uwe ioir. Inem ekijkan am maroñ in kajeor mejen juõn kapen ian ro redrik, dri korijeran iroij eo aõ.” (2 Kiñ. 18:23, 24) Ekkar ñõn wãwen lemnok an armij, ear ejelok an Hezekaia im armij ro an maroñ ñõn jutõk nae dri tõrinae ro rekajur an Assiria.

Eindreinlok wõt ranin, dri kijirãt ro remaroñ einwõt ñe relukkun kajur, elaptata ñe dri tel ro an kien eo an ailiñ eo rej rejetake ir. Ear eindrein iben dri Nazi ro ilo Bata eo an Lõl Ken Karuo. Rar kajeoñ in kalelñoñ elõñ dri korijer ro an Anij. Juõn jeer im jãter man, eo ear ber ilo kalbuj iomin elõñ yiõ ko, ear tokelik kwalok kin wãwen air kar kalelñoñ e. Ilo juõn ien, juõn bõlijmãn ear kajitõk iben: “Kwar ke lo wãwen air kar buki ladrik eo jãtõm? Ta eo kwar katak jen men in?” Brother in ear uak im ba: “Ij juõn dri kennan an Jeova im ijamin oktõk.” Im ear kalelñoñ iõ im ba, “Inem kim naj buki yuk.” Mekarta, brother in ear jutõk bin wõt, im dri kijirãt ro rar bwijrõk jen air kajeoñ in kalelñoñ e. Ta eo ear jibõñ e ñõn an jutõk bin wõt ilo ien eo rar kalelñoñ e? Ear uak im ba: “Iar liki etan Jeova.”​—Ken. 18:10.

Ilo ar lukkun tõmak ilo Jeova, jej bõk juõn kein tõrak elap me ej kejbãrok kij nae aolep men ko Setan ej kajerbali ñõn kokkure kõtan eo ar iben Jeova. (Ep. 6:​16) Kin men in, emõn bwe jen kajitõk iben Jeova ñõn jibõñ kij kakajurlok tõmak eo ar. (Luk 17:5) Jej aikwij bareinwõt kortokjen karõk ko rej kakajurlok tõmak eo ar me kumi in dri korijer eo etiljek ear litoki. Ñe jej iion ro rej kalelñoñ kij, jej bõk kakajur ñe jej kememej kalimur eo an Jeova ñõn dri kanan Ezekiel, eo ear aikwij lelok juõn ennan ñõn armij ro rekiblia. Jeova ear jiroñ e: “Inaj kõmmõn bwe kwon bin einwõt drekã, aet, am bin enaj einwõt juõn drekã diamond. Kwon jab mijak ri jumae rein.” (Ezek. 3:​9, UBS) Elañe ej juõn menin aikwij, Jeova emaroñ jibõñ kij bwe jen bin einwõt juõn dreka diamond einwõt an kar aikwij eindrein iben Ezekiel.

Jumae Menin Kabo Ko

Dri jumae ro rar lo bwe ñe ejjab tõbrõk aolep wãwen ko jet rej kajerbali, inem jet ien kareelel eo ñõn bõk jerammõn ko emaroñ  kõmõn bwe juõn en jab drebij an tiljek. Rabshake ear bareinwõt kajerbale kõl in. Ear ba ñõn armij ro ilo Jerusalem: “Ein drein kiñ in Assiria ej ba, Komin kõmõn ainemõn iba, im drioijtok ñõn iba; . . . mae ien I naj iwij im ãñinlok kom ñõn juõn ene einwõt eneo ami, enen korn im wain ekãl, enen bred im bwil in grep, enen wijki oliv; im hõnni, bwe komin mour wõt, im jab mij.” (2 Kiñ. 18:31, 32) Kejatrikrik eo ñõn mõña bred im irak wain ko rekãl emaroñ kar lukkun kareel ro rar jab maroñ drioij jen jikin kwelok eo kin an kar dri kijirãt ro nitbwili!

Kar kajerbal kõl in ñõn kajeoñ in kokkure tiljek eo an juõn mejinede me ear kalbuj. Kar jiroñ e bwe remaroñ likit e ilo juõn “im emõn” ilo juõn “jikin kallip eaibujuij” iomin jiljino aliñ bwe en maroñ lemnok kake. Bõtab, brother in ear beek ñõn drebij wõt an tiljek im ear jab ilok jen mour in Kristian eo an. Ta eo ear jibõñ e? Tokelik ear kemelele: “Iar bõk wõt lemnok eo bwe Ailiñ eo ej kejatrikrik eo emol.  . . Kin an kar jelalokjen eo kin Ailiñ eo an Anij kakajur iõ im aõ lukkun tõmak kake im jab berre ñõn jidrik, rar jab maroñ kareel iõ.”

Ewi joñõn an mol Ailiñ eo an Anij ñõn kij? Ebream, dri jilik Paul, im Jisõs rar maroñ kijenmij iomin melejoñ ko rebin kinke Ailiñ eo ear lukkun mol ñõn ir. (Pil. 3:​13, 14; Hib. 11:​8-​10; 12:2) Elañe jej wõnmanlok wõt im likiti Ailiñ eo moktata ilo mour ko ar, im lemnok wõt kin jerammõn ko enaj bõktok me rej ñõn indrio, inem jenaj anjo ion kareelel ko ñõn bõk anemkwoj eo ekaru kitien jen melejoñ ko ar.​—2 Kor. 4:​16-​18.

Jeova Ejamin Ilok jen Kij

Meñe Rabshake ear kajerbal elõñ wãwen ko ñõn kamijõk dri Ju ro, Hezekaia im armij ro an rar liki wõt Jeova. (2 Kiñ. 19:15, 19; Ais. 37:​5-7) Inem, Jeova ear uaki jar ko air kin jibõñ ilo an kar jilkinlok juõn enjel ñõn an mõn 185,000 dri tõrinae ro an Assiria ilo juõn wõt boñ. Ilo ran eo tok juõn, kin an kar Senakerib jok, ear kaiur im jeblak ñõn ijo jikin, Nineve, jikin kwelok eo elap, iben bween jarin tõrinae eo an.​—2 Kiñ. 19:35, 36.

Alikar, Jeova ear jab ilok jen ro rar liki e. Joñok ko an ro jeer im jãter ilo ran kein me rej jutõk bin wõt iomin melejoñ ko, rej kwalok bwe Jeova ej kõmõne ejja men in wõt ilo ran kein. Inem eor unin an kar Jemeruij ilõñ kalimur ñõn kij: “Bwe Ña Jeova, am Anij, I naj kapjere anbijmaroñõm, im ba ñõn yuk, Kwon jab mijõk; I naj jibõñ yuk.”​—Ais. 41:13.

[Kamelele eo itulal]

[Kamelele ilo peij 13]

Ilo Nan eo an, elõñlok jen 30 alen an Jeova kalimur ñõn dri korijer ro an: “Kwon jab mijõk”

[Kamelele ilo peij 12]

Ewi wãwen kõl ko Rabshake ear kajerbali rej einlok wõt men ko dri kijirãt ro an Anij ranin rej kajerbali?

[Pija ko ilo peij 15]

Juõn kõtan ebak iben Jeova ej kamaroñ kij ñõn drebij wõt ar tiljek iomin melejoñ ko