“Kwon Niknik ilo . . . Katakin”

“KOM likit eta Dri Kaki im Iroij: im emõn ami ba; bwe Ña ein drein.” (Jon 13:13) Ilo nan kein ñõn dri kalor ro an, Jisõs ear kalikar jerbal eo an einwõt juõn dri kaki. Inem, mokta wõt jen an kar Jisõs wõnliñlok ñõn lõñ, ear kakien dri kalor ro an: “Komin ilok, im kõmõn dri ailiñ ko otemjej bwe ren dri kalora, . . . im katakin ir bwe ren bokake nan ko otemjej I ar jiroñ kom.” (Matu 28:​19, 20) Tokelik, dri jilik Paul ear bareinwõt kalikar aurõkin ar katakin kin Nan in Anij. Ear kakabilek dri Kristian elder eo Timote im ba: “Kwon niknik ilo konono ilo buk, im kowe, im katakin. . . . Kwon owõn ilo men kein, im mõke lelok yuk ñõn ir, bwe am wõnmanlok en alikar ñõn ro otemjej.”​—1 Tim. 4:​13-​15.

Einwõt ilo ien ko etto, ranin, katakin ej juõn mõtõn ekanuij emõn ilo jerbal in kwalok nan eo ar im kwelok ko ar. Ewi wãwen jemaroñ niknik ilo katakin? Im ilo wãwen it men in enaj jibõñ kij bwe jen kõmõn wõnmanlok, einwõt juõn dri katakin kin Nan in Anij?

Kajeoñwe Dri Kaki eo Elap

Wãwen an kar Jisõs katakin ear kareel elõñ dri roñjake ro an. Lale wãwen nan ko an ear jelet ro rar ber ilo imõn kwelok eo ilo Nazeret. Dri jeje Gospel eo Luk ear je: “Ir otemjej rej nebar E, im bwilõñ kin nan in joij rej walok jen loñin.” (Luk 4:​22) Dri kalor ro an Jisõs rar lore joñok eo an kin jerbal in kwalok nan. Aet, dri jilik Paul ear rejañ dri Kristian ro mõtõn ilo an ba: “Komin dri kajeoñwe ña, einwõt ña ij bareinwõt dri kajeoñwe Kraist.” (1 Kor. 11:⁠1) Kinke Paul ear anõke kilen kwalok nan eo an Jisõs, Paul ear kanuij keie ilo an ‘katakin ilo bwilij, im jen mweo ñõn mweo.’​—Jerb. 20:⁠20.

Katakin “ilo Jikin Wia”

Jemaroñ lo joñok eo ekanuij emõn an Paul ilo Jerbal japter 17 kin jela eo an kin kilen katakin ilobwilij. Ilo japter in, jej riit kin lolok eo an ñõn Atens, ilo ailiñ in Gris. Jabrewõt jikin Paul ear loe ilo jikin kwelok in, meñe ilo turin ial ko, ilo jikin ko elõñ armij ie, ear or ekjõp ko. Eñin unin Paul ear lukkun inebata! Bõtab, ear jab kõtlok bwe inebata eo an en jelet e. Jen an eindrein, ‘ej kemelele ilo imõn kwelok eo im iben ro ej ion ir ilo jikin wia, ran otemjej.’ (Jerb. 17:16, 17) Ej juõn joñok emõn ñõn kij! Ilo ar kebake jabrewõt kain armij, jab ilo wãwen jej ekajete ir ak ilo juõn wãwen koutiej, men in emaroñ tellok ñõn an ro jet roñjake im tokelik anemkwoj jen kabuñ wan.​—Jerb. 10:​34, 35; Rev. 18:⁠4.

Paul ear iion jumae jen armij ro ilo jikin wia eo. Ibwiljin ro rar roñjake kar dri meletlet ro me tõmak ko air rar jumae katak ko remol ear kwalok kaki. Ke ro rar roñjake rar kwalok nan in jumae ko, Paul ear lemnok kin men ko rar ba. Jet rar kir e ‘dri koaroñroñ,’ im ilo kajin Grik ej “dri bõk ine,” im kar kajerbal nan in ñõn jitõñlok ñõn kain armij ro me rej bõkto bõktak ennan. Ro jet rar ba: “E einwõt ej kwalok anij ro drua.”​—Jerb. 17:18.

Bõtab, nan in kananaik ko an dri roñjake ro rar jab kabwer Paul. Jen an eindrein, ke rar kajitõk iben bwe en kemeleleik ir kin katak ko an, Paul ear kortokjen ien eo ñõn kwalok juõn katak me armij ro rar melele kake im ej lukkun kalikar an kabel ilo katakin. (Jerb. 17:​19-⁠22; 1 Pit. 3:​15) Jen eliji katak eo an ilo tibrikin im lale ta ko jemaroñ katak jene ñõn  jiboñ kij ñõn kakõmõnmõnlok kabel eo ar ilo katakin.

Bukot Men ko Rej Kaitoklimo Armij Ro

Paul ear ba: “Komeo, dri Atens, ij lo elap ami lale men in kabuñ ko otemjej. Bwe ke I ar . . . lo kabuñ ko ami, I ar lo juõn lokatok im jeje in ion, Ñõn Anij Eo Je Jaje Kake. Inem Eo komij kabuñ im jaje kake, E in ij kwalok ñõn kom.”​—Jerb. 17:​22, 23.

Paul ear lale men otemjej rar walok ibelakin. Jen men ko ear loi, ear laplok an Paul jela kin armij ro ear konono ñõn ir. Kij bareinwõt jemaroñ katak juõn men kin dri mweo elañe jej lukkun lale men ko ibelakir. Ñõn wanjoñok, kein ikkure ko inabijin mweo ak kakõle ko rej likiti ilo kejem ko remaroñ kwalok elõñ men ko kin dri mweo. Elañe eor ar melele kin wãwen ko an dri mweo, jemaroñ lukkun kãlet jab baj men ko wõt jenaj ba ak bareinwõt wãwen jenaj ba.​—Kol. 4:⁠6.

Paul ear jab konono ilo juõn wãwen ej ekajet. Bõtab, ear lo bwe wãwen an dri Atens ro “kabuñ” ñõn Anij ear jab berber ion jelalokjen eo ejime. Paul ear kalikar ñõn ir kin wãwen rar maroñ kabuñ ñõn Anij eo emol. (1 Kor. 14:⁠8) Inem ekanuij aurõk bwe jen konono ilo alikar im bareinwõt jab ilo juõn wãwen jej ekajet ñe jej keañ kin nuuj eo kin ailiñ eo!

Kwalok Joij im Jab Kaljiklok

Paul ear wõnmanlok im ba: “Anij eo E ar kõmõnmõn lõl im men otemjej iloan, E Iroij in lõñ im lõl, E jab jokwe iloan tempel pã ko rej kõmõnmõni; Im ejelok an pein armij jerbal ñõn E, einwõt elañe Ej aikwij men eo jabrewõt, bwe Ej lelok ñõn otemjej mour, im menono, im men otemjelok.”​—Jerb. 17:24, 25.

Ilo eon kein, Paul ej jitõñlok ñõn Jeova einwõt Dri Letok Mour. Ear ba ilo juõn wãwen ejjab kaillu ir ilo an konono kin Anij einwõt “Iroij in lõñ im lõl.” Ej juõn jerammõn ñõn jibõñ armij ro emol burueir me eoktõk kabuñ im mõnit ko air bwe ren maroñ melele bwe mour ej itok jen Jeova Anij!​—Sam 36:⁠9.

Inem, Paul ear ba: “Im E ar kõmõnmõn jen juõn wõt, dri ailiñ kõn otemjelok . . . im E ar likit ien ko ar jiroñ kaki mokta, im tõreren ene ko eneir, Bwe ren bukot Anij, elañe rej maroñ in jatol E, im lo E, ijoke E jab etolok jen kij otemjej.”​—Jerb. 17:​26, 27.

Wãwen jej katakin emaroñ kwalok ñõn ro jet kin kain Anij rõt eo jej kabuñ ñõn e. Ilo an jab kaljiklok, Jeova ej kõtlok bwe armij ro jen ailiñ otemjej ren “jatol E, im lo E.” Ilo ejja wãwen in wõt, jejjab kaljiklok ak jej konono iben aolep armij ro jej wõnmaik ir. Jej kajeoñ in jibõñ ro rej tõmak ilo Dri Kõmõnmõn eo bwe ren ejaak juõn jimjera ebak iben me emaroñ tellok ñõn jerammõn ko rej ñõn indrio. (Jem. 4:⁠8) Bõtab ewi wãwen ar jibõñ ro rej berre bwe eor Anij? Ej ilo ar lor joñok eo an Paul. Jen lale nan ko tok jet an.

“Bwe ilo E jej mour, im etetal, im ber; einwõt jet ian ro ami dri kine al r’ar ba, Bwe kij bareinwõt ro nejin. Inem bwe kij ro nejin Anij, e jab emõn bwe jen lemnok wãwen Anij einwõt gold ak silver ak dreka.”​—Jerb. 17:​28, 29.

 Bwe dri roñjake ro an ren itoklimo im tõmak men ko ear ba, Paul ear eliji nan ko an dri kine al ro me dri Atens ro rar jela kin ir im koutiej ir. Jej bareinwõt bukot men ko armij rej itoklimo kaki ilo ar kemelele kin men ko jejela bwe renaj tõmaki. Ñõn wanjoñok, ilo letter eo an Paul ñõn dri Hibru ro, ear je wanjoñok in me ej bar kareel armij ro ranin: “Bwe im otemjej armij rej kaleki; a Eo e ar kalek men otemjej, E Anij.” (Hib. 3:⁠4) Ar kõmõn bwe dri mweo en lukkun lemnok kin wanjoñok in ebiruru emaroñ jibõñ ir kile bwe emol men ko jej ba. Lale ilo katak eo an Paul ej kwalok bar juõn kilen katakin ekeie, ej ikijen lujur buruen armij.

Kalikar bwe Ej Ien ñõn Air Emakõt Kiõ

Paul ear ba: “Im Anij e ar jab kanuij illu ilo ien ko ien jaje; a kiõ Ej jiroñ armij otemjej ijo ko otemjej bwe ren ukwelok ibeir: Bwe E ar likit juõn ran, iomin ran eo E naj ekajet ro dri lõl ilo wãnik kin Armij eo E ar likit E.”​—Jerb. 17:​30, 31.

An Anij kõtlok bwe nana en walok ej letok juõn ien ebellok ñõn ar kwalok ñõn e ta eo ej lukkun ber ilo buruer. Eaurõk bwe jen kwalok ñõn armij bwe ej ien ñõn emakõt kiõ im bareinwõt konono kin jerammõn ko iomin kien eo an Ailiñ in Anij, me mõtõn jidrik enaj itok.​—2 Tim. 3:​1-5.

Wãwen Armij ro Rej Emakõt Eoktõk jen Dron

“Im ke rej roñ kin jerkakbiji jen ro remij, jet rej kajirere kake: im bar jet re ba, Kim naj bar roñ jen yuk kin men in. Im ein drein Paul ej ilok jen ibeir. A jet armij rej errep na iben im tõmak.”​—Jerb. 17:​32-​34.

Jet emõkõj air emakõt kin wãwen jej katakin ir, ro jet remaroñ aikwij elap ien ñõn air tõmak kemelele ko ar. Bõtab, ñe wãwen ar kemeleleik mol eo ealikar im biruru emaroñ jibõñ juõn wõt armij ñõn bõk jelalokjen eo ejime kin Jeova, elap ar kamolol bwe Anij ej kajerbal kij ñõn kadruaklok armij ro ñõn Nejin!​—Jon 6:​44.

Men ko Jemaroñ Katak

Ñe jej kalomõnlokjen kin katak eo an Paul, elõñ men ko jemaroñ katak kin wãwen kemeleleik katak ko remol jen Baibel ñõn ro jet. Elañe eor iber jerammõn eo ñõn kwalok public talk ko ilo congregation eo, jemaroñ kate ñõn anõke Paul ikijen ar kajerbale nan ko reban kaillu ro rejjab tõmak ak enaj jibõñ ir ñõn melele im tõmak katak ko remol jen Baibel eo. Jekõnan kwalok katak kein remol ilo wãwen eo ealikar, ak jenaj aikwij kejbãrok bwe jen jab kajitokjen tõmak eo an ro rejjab tõmak im rej ber ilo kwelok ko. Ilo ejja ien eo wõt, ilo jerbal in kwalok nan eo ar, jej kate kij ñõn karel buruen armij ro im jab kaillu ir. Ilo ar kõmõn eindrein, jej lukkun lore nan in kakabilek eo an Paul ñõn ‘niknik ilo katakin.’

[Pija ilo peij 30]

Wãwen an Paul katakin ear alikar, biruru im jab kaillu armij

[Pija ilo peij 31]

Jej anõke Paul ilo ar lemnok kin iñjake an ro jej kwalok nan ñõn ir