Pojõk Ej Tellok ñõn Tõbrõk ko Remõn

KWOPOJÕK ke in kwalok nan elañe ebellok jet ien ko remõn im kwar jab kõtõmene kake ilo territory eo an congregation eo am? Ro jeer im jãter ilo jikin bo eo an wa ko ilo bukwon in Turku, Finland, rar pojõk im men in ar tellok ñõn air lo tõbrõk ko remõn.

Jet ien ko rej kab motlok, ro jeer im jãter ilo Turku rar kile bwe juõn kumi in eman ro jen Esia rar itok ñõn ailiñ eo ñõn air kõmõne juõn tima elap ilo jikin jekjek wa eo ilo bukwon eo. Tokelik, juõn ian ro jeer im jãtir ear jela hotel ta ko dri jerbal rein rar jokwe ie. Ear bareinwõt jela bwe ilo jiboñtata, bus ko rej itok im bõk dri jerbal ro jen hotel ko air ñõn ijo rej jerbal ie. Ear mõkõj im kennanek ro jeer im jãtir ilo juõn congregation in belle ilo Turku.

Elder ro ilo congregation eo rar kile bwe kinke elõñ ro rej itok jen ailiñ ko jet, ear juõn ien emõn ñõn kwalok kin ennan eo kin Ailiñ eo. Kin men in, rar mõkõj im kõmõn karõk ko bwe ren maroñ kwalok nan ñõn rein. Ilo ran in Jabõt ilo ejja wik eo wõt, joñoul dri kwalok nan ro rar koba iben dron iturin jikin kõtar bus eo ilo jiljilimjuõn auõ jiboñ. Ilo jinoin, ejelok dri jerbal ear jãdelok. Dri kwalok rein rar jino air aol im ba ‘Mol ke jerumij? ‘Emwij air emakõt jen Turku ke?’ Bõtab, elikin jidrik ien, juõn eman me ej kõnõk nuknuk in jerbal eo an ej itok. Bar juõn ej itok elikin, im bar jet rej jãdetok. Ejjabto, juõn jar elap in dri jerbal ro rej ber ilo jikin kõtar bus eo. Dri kwalok ro rar jino kwalok nan im lelok buk ko ilo kajin belle ñõn dri jerbal rein. Elukkun emõn kinke ear bõk enañin juõn auõ ñõn air kane bus ko, im men in ear kõmõn bwe en or ien ñõn an dri kwalok ro maroñ konono iben enañin aolep dri jerbal ro. Ke ear ilok bus ko, dri jerbal ro rar bõk ibeir 126 buk ko redrik im 329 magazine ko!

Tõbrõk kein remõn rar kõkãtõk ro jeer im jãter bwe ren bar kõmõne ejja wãwen in wõt ilo wik eo tok juõn, ilo ien lotok eo an circuit overseer eo. Ilo juõn ran ewut ilo jiljino jimõtõn jiboñ, circuit overseer eo ear kõmõne kwelok in kwalok nan eo, im 24 dri kwalok ro rar etal ñõn jikin kõtar bus eo. Ibeirlok ilo ien in rar bõk buk ko ilo kajin Tagalog kinke rar jela bwe elõñ ian dri jerbal ro rar itok jen Philippines. Ilo jiboñõn eo, ke bus ko rar emakõt ñõn jikin jerbal eo, dri jerbal ro rar bõk ibeir 7 buk, 69 buk ko redrik, im 479 magazine ko. Baj pijaiklok mõk kin joñõn lõñliñ eo an ro jeer im jãter im rar bõk kwonair ilo jerbal in!

Mokta jen an dri jerbal ro bar jeblak ñõn kabijukneir, ro jeer im jãter rar maroñ lolok jet iair ilo hotel ko rej jokwe ie im kemelele kin ennan eo kin Ailiñ eo ilo tibrikin. Jet ian dri jerbal ro rar ba bwe dri Kennan ro an Jeova rar lolok ir ke rar ber ilo jikin ko jet ibelakin lõl. Rar kamolol ro jeer im jãter kin air kar emakõt im jibarek ir ke rar ber ilo Finland.

Kwopojõk ke in kwalok nan elañe ebellok jet ien ko remõn im kwar jab kõtõmene kake ilo territory eo an congregation eo am? Kwoj emakõt ke im jibarek armij ro rej itok jen ailiñ ko jet? Elañe aet, kwe bareinwõt kwomaroñ lo ejja kain tõbrõk in wõt rein jeer im jãter ilo Turku rar mõnõnõ kake.

[Map/Pija ilo peij 32]

FINLAND

HELSINKI

Turku

STX Europe