Kajitõk ko jen Ro Rej Riit

Etke Jisõs ear maroñ ba bwe emwij jeorlok jerawiwi ko an kõra eo kar watõke dri jerawiwi?​—Luk 7:​37, 48.

Ke Jisõs ear kejota ilo mweo imõn Parisi eo etan, Saimõn, juõn kõra ear itok im jijõt iturin neen Jisõs. Im ej katutu neen Jisõs kin dren in kemjalal ko an, im kõmõrãiki kin kolan bõran. Inem ej mejenmaik im kabiti neen kin oil eñaj. Ekkar ñõn buk in Luk, armij ro rar jela bwe kõra in kar juõn “dri jerawiwi.” Emol, aolep armij rej dri jerawiwi kinke rejjab wãppen, ak Baibel eo ekkã an kajerbal nan in ‘jerawiwi’ ñõn juõn armij eo ekkã an kõmõni mõnit ko renana. Alikar bwe kõra in ear juõn kõra ekijoñ. Jisõs ear ba nan kein ñõn kõra in im ear juõn armij eo elap an jerawiwi: “Jerawiwi ko am re joko.” (Luk 7:​36-​38, 48) Ta melelen an kar Jisõs ba nan kein ñõn kõra in? Elañe ejañin kar lelok katok in binmour eo, ewi wãwen emaroñ jeorlok bwir ko an kõra in?

Moktalok jen an kar Jisõs jeorlok bwir ko an kõra in, ear kajerbal juõn wanjoñok ñõn kemeleleik Saimõn kin juõn katak eaurõk. Ear kõkkar kin jerawiwi einwõt juõn muri eo elap im ebin kõllãiki. Jisõs ear ba ñõn Saimõn: “Ruo dri muri an juõn dri kamuri: juõn ej muri kin limabuki siliñ, im eo juõn kin limñoul. Ke ejelok ibeirro bwe ren kõrrã, e ar jeorlok airro muri. Kin men in, kwon ba ñõn Iõ, wõn iairro elap an yokwe e? Saimõn e uak im ba, Aõ lemnok, eo elap an jeorlok an muri. Im E ba ñõn e, Emol am ekajet.” (Luk 7:​41-​43) Kij aolep jej muri ñõn Anij, kin men in elañe jejjab bokake Anij, ej einwõt ñe jej likjõp in kõllãiki muri ko ar iben Anij. Kin jab wãppen eo ar, muri ko ar rej laplok jen ien ñõn ien. Bõtab, Jeova ej pojõk im emõnõnõ in jeorlok muri ko ar. Eñin unin ear rejañ dri kalor ro an ñõn jar im kajitõk iben Anij: “Jolok amuij muri ibõm, einwõt kim ar jolok an armij muri ibem.” (Matu 6:​12) Luk 11:4 ej kwalok bwe muri kein rej einwõt jerawiwi ko.

Ewi wãwen Anij ear jeorlok jerawiwi ko an armij ro ilo ien ko etto? Ekkar ñõn ekajet jime eo an Anij, wõnan jerawiwi ej mij. Eñin unin Adam ear mij ñõn kõllãik wõnan jerawiwi eo an. Bõtab, iomin kien eo Anij ear lelok ñõn dri Israel ro, Jeova ear maroñ jeorlok bwir ko an juõn dri jerawiwi ikijen an katok kin juõn menin mour. Paul ear je: “Innem, ekkar ñõn Kien Moses, enañin men otemjej rej erreo kin bõtõktõk; im ejjelok jeorlok jerawiwi elañe ejjelok katorlok bõtõktõk.” (Hib. 9:​22, UBS) Dri Ju ro rar lemnok bwe ej wãwen eo drein wõt im Anij maroñ jeorlok bwir ko an armij ro. Eñin unin jejjab bwilõñ kin wãwen an armij ro kar jab errã kin men eo Jisõs ear ba ñõn kõra eo. Ro im rar kejota iben Jisõs ilo boñen eo rar ba ilo burueir: “Wõn e, bwe en maroñ in jeorlok jerawiwi ko?” (Luk 7:​49, UBS) Jerawiwi ko relap an kõra in ekijoñ remaroñ ke joko?

Elikin wõt an kar Adam im Iv jumae Anij, Jeova ar kwalok kanan eo moktata bwe enaj kajutõk juõn ‘ine,’ eo Setan im ro “inen” renaj kokkure jimwin neen. (Jen. 3:​15) Kokkure in ear walok ke dri kijirãt ro rar mõne Jisõs. (Gal. 3:​13, 16) Bõtõktõkin Kraist ear jerbal einwõt binmour eo im enaj kanemkwoj armij otemjej jen jerawiwi im mij. Kinke ejelok men emaroñ kabwijrõk karõk ko an Anij, elikin wõt an kar Jeova ba nan ko ilo Jenesis 3:15, ear watõk bwe binmour eo emwij an karere walok. Kiõ ear maroñ jeorlok bwir ko an ro rej likit air tõmak ilo kalimur ko an.

Mokta jen an kar Jisõs mour ion lõl, Jeova ear watõk jet armij ro einwõt dri wãnik ro. Jet  ian rein ej Inõk, Noa, Ebream, Rehab, im Job. Rar reimanlok ñõn kalimur ko an Jeova ilo air tõmak. Dri jilik Jemes ear je: “Ekijkan an kar Anij watõk jimmad Abraham einwõt juõn ri wãnik? Ekar jen jerbal ko an.” Ikijen Rehab, Jemes ear je: “Ejja einwõt Rahab, kõrã ekjioñ. Ear wãnik iman mejen Anij kin jerbal ko an.”​—Jem. 2:21-25, UBS.

Kiñ Devid ear kõmõni jet bwir ko rekanuij lap, bõtab ear lap an tõmak im liki ilo Anij im ear mol an ukwelok jen bwir ko an. Kobalok iben men in, Baibel ej ba: “Anij ear ajelok Christ bwe bõtõktõkin en ial in jeorlok jerawiwi ko an armij kin air tõmak ilo e. Anij ear kõmmõn men in bwe en kalikkar an wãnik. Ilo ien ko remotlok Anij ear meanwõd im ear jab watõk jerawiwi ko an armij; ak kiõ ilo ran kein ej watõk jerawiwi ko an armij bwe en kalikkar an wãnik. Ilo wãwen in Anij ej kwalok bwe e ewãnik, im bwe ej kowãnik jabdrewõt eo ej tõmak ilo Jesus.” (Rom 3:25, 26, UBS) Jeova ear maroñ jeorlok bwir ko an Devid im jab mõne ekkar ñõn kien ko an, kinke ear berbere men in ilo binmour eo an Jisõs im enaj kar walok.

Eñin men eo ear walok ñõn kõra eo ear kabiti neen Jisõs. Ear juõn kõra ekijoñ, bõtab ear ukwelok. Ear mõke kile bwe ej aikwij bwijrõk jen jerawiwi ko an, im men in ear lukkun alikar ilo an kaurõke eo Jeova ear jilkintok ñõn jeorlok bwir ko an armij. Meñe katok in binmour eo ejañin kar walok, ear lukkun alikar bwe enaj kar walok, im eñin unin Jisõs ear jiroñe kõra eo: “Jerawiwi ko am re joko.”

Einwõt an bwebwenato in kwalok, Jisõs ear jab karmijeteik dri jerawiwi ro. Ear emõn an kõmõn ñõn ir. Ilo ejja wãwen in lok wõt, Jeova ej mõnõnõ in jeorlok bwir ko an dri jerawiwi ro im rej ukwelok. Ej juõn men elap an kõkãtõk ñõn kij armij ro rejjab wãppen!

[Pija ilo peij 7]

Anij ear watõk ir dri wãnik