Kwoj Ke Kememej?

Kwar mõnõnõ ke in riiti Imõniaroñroñ ko ilo aliñ ko rej kab motlok? Lale elañe kwomaroñ uake kajitõk kein ilõl:

• Ta eo emaroñ jibõñ juõn armij ñõn an drebij juõn lemnok ejime kin arkool?

Jar im katak Baibel remaroñ jibõñ. Kadrek jadõr, lor wõt bebe eo am, im kõmao iben ro remõn rej men ko raurõk. Juõn eo ej kãlet ñõn an irak ej aikwij kõmõn joñõn an irak, im katak ñõn ba jaab.​––7/1, peij 7-9.

• Etke Anij ear jab kajeik Aron ke ear kõmõne juõn kon in kau gold?

Aron ear rupe kien eo an Anij kin kabuñ ñõn ekjõp. (Ex. 20:​3-5) Bõtab, Moses ear jar ñõn Anij im akwelap kin Aron im ear ‘lap tokjen jar eo an.’ (Jem. 5:​16) Aron ear tiljek iomin elõñ yiõ ko. Im meñe armij ro rar karel Aron bwe en kõmõne juõn ekjõp ñõn ir, ak tokelik ear kamol bwe ear jab errã ibeir ilo an kar kãlet ñõn lor Jeova ke ear kobalok iben lõmaro nejin Livai. (Ex. 32:​25-​29)​––5/15, peij 21.

• Wõn ro rar kãlet buk ta ko renaj ber ilo Jeje ko ilo Kajin Grik?

Kar jab bebe eo an jabrewõt kumi in dri tel in kabuñ ko. Jen an eindrein, kar dri Kristian ro remol, ro im rar maroñ kile jeje ko kar kakõrmoli ikijen jibõñ eo jen kajur eo an Anij. Men in ej errã iben mol eo bwe juõn ian menin kabwilõñlõñ ko ilo jitõb me kar lilok ñõn dri Kristian ro jinoin kar “maroñ in kile menin letok ko.” (1 Kor. 12:​4, 10, UBS)​––4/1, peij 28.

• Ta eo emaroñ jibõñ yuk ñe eo beleõm ej mour in lũñ?

Elañe dri belele eo ejelok ruõn ear kate e ñõn mour ekkar ñõn kien ko ilo Baibel, inem ejjab aikwij nana an mour ak iñjake bwe eor ruõn kin an eo belen jab tiljek ñõn e ilo an kar lũñ. Anij ejela bwe kwoj aikwij bõk kainemõn im nan in kõkãtõk. Emaroñ lewoj kainemõn ikijen dri Kristian ro mõtõm.​––6/15, peij 30-​31.

• Ewi wãwen kwomaroñ katakin ajiri ro nejõm bwe en or juõn kõnan ibeir ñõn riit?

Juõn mejatoto in yokwe im joñok ko an ro jemen im jinen remaroñ jibõñ ajiri ro ñõn air kadrek juõn kõnan ñõn riit. Bareinwõt, kõmõn bwe en or air buk. Riit ilo juõn ainikien elaj. Rejañ ir ñõn air bõk kwonair, im bwebwenato kin ta eo kwar riiti. Kõmõn bwe ajiri ro nejõm ren riit ñõn yuk, im rejañ ir ñõn bõkmantak kajitõk ko.​––7/15, peij 26.