Dri Tel eo Ar Ranin

“Ej bõk anjo im wõnmanlok bwe En bõk anjo.”​—REV. 6:2.

1, 2. (a) Ewi wãwen an Baibel eo pijaiklok Kraist einwõt Kiñ eo kar kairoije ilo 1914? (b) Ta ko Kraist ear kõmõni jen ke ear jino Kiñ?

 KAR kairoij Kraist einwõt Kiñ in Ailiñ eo an Jeova ilo 1914. Ilo lemnok ko ar, ewi wãwen ar pijaiklok Jisõs kiõ? Kwoj ke lemnok kin e einwõt juõn kiñ eo ej jijõt ion tron eo an ilõñ, im jen ien ñõn ien ej reilõltak im lale congregation ko an? Elañe eñin ej wãwen ar pijaiklok Jisõs, jej aikwij ukot lemnok ko ar. Buk in Sam im Reveles̃õn rej kwalok kin Jisõs einwõt juõn kiñ eo ej uwe ion juõn ors, im ej etal ñõn an “bõk anjo im wõnmanlok bwe En bõk anjo.”​—Rev. 6:2; Sam 2:​6-9; 45:​1-4.

² Men eo Kraist ear kõmõne moktata einwõt juõn kiñ elikin kar kairoije, kar bõk anjo ion ‘drakon eo im enjel ro an.’ Einwõt arkenjel eo Maikeel im ej tel enjel ro an, Kraist ear jolõltak Setan im enjel ro an renana jen lõñ im likit ir bwe ren berwõt ion lõl in. (Rev. 12:​7-9) Tokelik, ilo jerbal eo an einwõt “ri keañ” eo kin bujen eo, Jisõs ear itok iben Jemen ñõn etale tempel eo ilo kõkkar. (Mal. 3:1, UBS) Ear ekajete Christendom, mõtõn eo enanatata ilo “Babilõn Elap,” im ear naruõn kin an lap an katorlok bõtõktõk im kin an jab tiljek ñõn Anij ilo an lũñ iben kien ko an lõl in.​—Rev. 18:​2, 3, 24.

Kraist Ej Karreoik Kumi in Dri Korijer eo An Ion Lõl

3, 4. (a) Ta jerbal eo Kraist ear kõtõbrõke einwõt “ri keañ” eo an Jeova? (b) Ta eo rar loe ke kar etale tempel eo, im einwõt Bõran congregation ko, ta karõk eo Jisõs ear kõmõne?

³ Ke Jeova im “ri keañ” eo an rar etale tempel eo ilo kõkkar, rar lo juõn kumi in dri Kristian ro remol ilo melan ko ilo tempel in, im rejjab mõtõn kabuñ ko  ilo Christendom. Bõtab, kar aikwij bareinwõt karreoik dri Kristian dri kabit rein, ak “priest” rein. Dri kanan Malkai ear kanan kin men in: “Ri keañ eo an Iroij enaj itok im ekajete armij einwõt eo ej kaõnlok silver im gold kin kijeek bwe ren erreo, im enaj karreoik priest ro bwe ren maroñ bõklok menin jortak ko rewebben ñõn Iroij.” (Mal. 3:⁠3, UBS) Jeova ear kajerbal “ri keañ” eo kin bujen eo, Kraist Jisõs, ñõn karreoik dri kabit rein an.

⁴ Bõtab, Kraist ear lo bwe dri kabit rein retiljek rar kate ir joñõn wõt air maroñ ñõn letok katak ko jen Baibel ñõn armij ro dron Anij. Jen kar yiõ eo 1879 ñõn ranin, meñe rar iion wãwen ko rebin, rar letok katak ko remol jen Baibel kin Ailiñ eo an Anij ilo magazine in Imõniaroñroñ ko. Jisõs ear kanan bwe ñe “e naj itok” ñõn etale ro dron ilo ‘jemlokõn lõl,’ enaj jitõñ juõn dri korijer bwe en najirik ro dron “ilo ien emõn.” Enaj kwalok an mõnõnõ iben dri korijer in im enaj “kairoij e ion men ko otemjelok an” ion lõl. (Matu 24:3, 45-​47) Einwõt Bõran congregation ko an dri Kristian ro, Kraist ear kajerbal ‘dri korijer in etiljek im meletlet’ ñõn lolorjake men ko an Ailiñ eo ion lõl in. Ear letok nan in tel ko ñõn dri kabit “ro dron” im ‘s̃ip ro jet’ mõtair ikijen Kumi eo Ej Tel Dri Kennan ro an Jeova.​—Jon 10:16.

Ien Marmir Lõl

5. Ta eo Jon ear loe an Kiñ eo an Ailiñ eo kõmõne ilo vis̃õn eo?

⁵ Dri jilik Jon ear lo juõn vis̃õn kin bar juõn men Kiñ eo an Ailiñ eo enaj kõmõne ilo “ran eo ran in Iroij,” elikin kar kairoij E ilo 1914. Jon ear je: “I ar lale, im lo, kõro emouj; im ion kõro eo juõn ej jijõt einwõt Nejin armij, im ion bõran belin gold, im ilo pein sikel ekõñ.” (Rev. 1:​10; 14:14) Jon ear roñ ainiken an juõn enjel an Jeova jiroñ Dri Marmir in bwe en kajerbal sikel eo an kinke “lõl ebojak ñõn madmid.”​—Rev. 14:​15, 16, UBS.

6. Ta eo Jisõs ear ba ren kõtlok bwe en edrek?

⁶ Ien “marmir” in ilo lõl ej kakememej kij kin parebõl eo an Jisõs kin wit im tãõ ko. Jisõs ear keiri e mõke ñõn juõn eman ear jeori ine ko ilo jikin kallip eo an im ear reimanlok ñõn an marmire aolepen ine kein elañe renaj edrek im erom wit. Wit kein rej jitõñlok ñõn “ro nejin ailiñ in lõñ,” dri Kristian dri kabit ro im renaj iroij iben Jisõs ilo Ailiñ eo an. Bõtab ilo boñin eo, dri kijirãt eo, “Devil,” ear kobrõk jikin kallip eo kin ine in tãõ ko, “ro nejin eo dri nana.” Dri jeor eo ear jiroñ dri jerbal ro an bwe ren kõtlok bwe wit im tãõ ko ren edrek iben dron mae ien enaj jino ien marmir jonikõn, ilo ‘jemlokõn lõl.’ Ilo ien in, enaj jilkinlok enjel ro an ñõn kajenolok wit ko jen tãõ ko.​—Matu 13:​24-​30, 36-​41.

7. Ewi wãwen an Kraist kõmõne jerbal in “marmir eo” ilo lõl in?

 ⁷ Ilo an kajejit kitien vis̃õn eo kar kwalok ñõn Jon, Jisõs ej tel jerbal in marmir jonikõn eo ibelakin lõl in. Ien marmir lõl ear jinoe ke rar aintok bween 144,000 “ ro nejin ailiñ eo,” ro rej jutõk kin “wit” eo ilo parebõl eo an Jisõs. Oktõk eo ikõtan dri Kristian ro remol im ro rewan ear laplok an alikarlok elikin kar Bata eo an Lõl in Kein Kajuõn. Joñõn an kar lukkun alikar oktõk kein, ear jino mõtõn eo kein karuo ilo ien marmir eo an lõl, ien aintok s̃ip ro jet. Rein rejjab “ro nejin ailiñ eo,” ak rej juõn “jar elap” in armij ro im rekõnan erom ro dron Ailiñ in. Kar bõk armij rein jen “ailiñ otemjej, im ian bwij otemjej, im driloabjen otemjej, im konono otemjej.” Rej kõtãik ir ñõn Ailiñ eo an Anij, eo ej ejaakin Kraist im ro 144,000 im renaj iroij iben ilo Ailiñ in lõñ.​—Rev. 7:​9, 10; Dan. 7:​13, 14, 18.

Dri Tel eo an Congregation Ko

8, 9. (a) Ta eo ej kwalok bwe Kraist ejjab baj lale wõt congregation ko, ak ej bareinwõt lale aolep mour ko an armij ro kajjojo ilo congregation ko? (b) Einwõt kar kwalok ilo peij 26, ta men ko “rettino im remwilõl an Satan” jej aikwij kejbãrok kij jeni?

⁸ Jar katak ilo katak eo lok iman kin wãwen an Jisõs kar lukkun lale aolep men ko rar walok ilo congregation ko kajjojo ilo kar ebeben eo kein kajuõn. Ilo ran kein ar, kar lelok ñõn Kiñ eo ar “kajur otemjej i lõñ im i lõl.” Kraist, Dri Tel eo ar, ej bõran aolep congregation ko ibelakin lõl im ro rej tel ilo congregation kein. (Matu 28:18; Kol. 1:​18) Jeova ear kõmõn bwe Jisõs en ‘bõran men otemjej ilo congregation eo’ an dri kabit ro. (Ep. 1:​22) Ilo wãwen in, Jisõs ejela kin aolep men ko rej walok ilo elõñlok jen 100,000 congregation ko kajjojo ibelakin lõl in.

⁹ Jisõs ear lelok ennan in ñõn congregation eo etto ilo Thaietaira: “Nejin Anij, eo mejen rej einwõt urur in kijeek, im neen einwõt jinibor ejatõltil, Ej ba men kein; I jela jerbal ko am.” (Rev. 2:​18, 19) Ear koweik ro ilo congregation in kin air mour etton im mour ñõn ir mõke. Ear ba: “Ña eo ej kabukot buruen armij im lemnok ko air: im I naj lewoj ñõn kom kaju iami, ekar ñõn jerbal ko ami.” (Rev. 2:​23) Nan kein rej kwalok bwe Kraist ejjab baj lale wõt congregation ko, ak ej bareinwõt lale wãwen mour ko an armij ro kajjojo ilo congregation ko. Jisõs ear nebar dri Kristian ro ilo Thaietaira im rar “jab katak . . . ‘men ko rettino im remwilõl an Setan.’ ” (Rev. 2:​24, UBS) Ranin, ej buñburuen iben ro redrik im reridto im rej bõpraik ir jen men ko “rettino im remwilõl an Satan.” Men kein remaroñ itok ikijen Internet ak mijjin, ak kin katak ko an armij. Elap an mõnõnõ elañe ej lo an dri Kristian ro ranin kate ir joñõn wõt air maroñ ñõn lore tel eo an ilo aolep wãwen air mour!

10. Ewi wãwen an buk in Reveles̃õn kwalok kin wãwen an Jisõs tel elder ro, ak ta karõk eo elder rein rej aikwij kile?

¹⁰ Ilo yokwe, Kraist ej letok nan in tel ko ñõn congregation ko an ion lõl in ikijen elder ro ear kãlet ir. (Ep. 4:​8, 11, 12) Ilo ebeben eo kein kajuõn, aolep eman ro rar tel rar dri kabit. Buk in Reveles̃õn ej kõkkar kin ir einwõt iju ko rej ber ilo tuanbwijmaroñ in pein Kraist. (Rev. 1:​16, 20) Ranin, enañin aolep elder ro rej mõtõn s̃ip ro jet. Jemaroñ ba bwe rej ber iomin tel eo an Kraist kinke kar kãlet man rein elikin air kar jar im ikijen tel eo jen kajur eo an Anij. (Jerb. 20:28) Bõtab, man rein rej kile bwe Kraist ej kajerbal juõn kumi edrik in eman ro rej dri kabit ñõn air tel dri kalor ro an ion lõl.​—Riit Jerbal 15:​6, 28-​30.

 “Kwon itok, Iroij Jisõs”

11. Etke jej kijoruretok an Dri Tel eo ar itok ilo mõkõj?

¹¹ Ke ear lelok vis̃õn eo ñõn dri jilik Jon, elõñ alen Jisõs ear eliji bwe enaj mõkõj im itok. (Rev. 2:​16; 3:​11; 22:​7, 20) Ejelok berre bwe ear jitõñlok ñõn ien eo enaj itok im ekajete Babilõn Elap im jukjuk im ber in enana an Setan. (2 Tes. 1:​7, 8) Kin an lukkun kijoruretok an jejit kitien vis̃õn in, dri jilik Jon ear ba: “Amen: Kwon itok, Iroij Jisõs.” Kij eo im jej mour ilo ran kein eliktata jej bareinwõt kijoruretok an Dri Tel im Kiñ eo ar itok ilo an kajur ilo Ailiñ eo an ñõn kaibujuij etan Jemen im wijtake Iroij Potata eo an.

12. Ta jerbal eo Kraist enaj karerelok mokta jen an naj kõtlok kõto ko im renaj kokkure jukjuk im ber eo an Setan?

¹² Mokta jen an Jisõs kokkure rolul ko an Setan ilo lõl in, enaj sili ro bween 144,000 im rej uan Israel eo an Anij. Baibel eo ej lukkun kalikar bwe naj drebij wõt kõto ko im renaj kokkure jukjuk im ber in an Setan mae ien enaj rerelok an sili ro rej uan 144,000.​—Rev. 7:​1-4.

13. Ñe enaj walok jinoin ‘iñtan eo elap,’ ewi wãwen Kraist enaj kalikar ber eo an?

¹³ Enañin aolep armij ro ion lõl in rejjab kile bwe emwij an jino ber eo an Kraist jen kar yiõ eo 1914. (2 Pit. 3:​3, 4) Bõtab, mõtõn jidrik enaj kalikar ber eo an ikijen an naj bõktok ekajet eo an Jeova ion aolep rolul ko rej mõtõn jukjuk im ber in an Setan. Ejelok berre bwe kokkure eo nae “armij in jerawiwi,” dri tel in kabuñ ko ilo Christendom, enaj kalikar ‘weaktok eo an’ Kraist. (Riit 2 Dri Tessalonika 2:​3, 8.) Men in enaj kamol bwe Jeova ear jitõñ Kraist bwe en Dri Ekajet. (Riit 2 Timote 4:⁠1.) Jebeblok eo an Christendom, mõtõn eo enanatata ilo “Babilõn Elap,” enaj men eo moktata im enaj walok. Inem naj kokkure aolep rolul in kabuñ ko rewan. Jeova enaj likit ilo buruen dri tel ro ilo kien ko an lõl ñõn kokkure kõra in ekijoñ. (Rev. 17:​15-​18) Eñin naj kakõlen jinoin ‘iñtan eo elap.’​—Matu 24:21.

14. (a) Etke naj kakaru kitien jinoin iñtan eo elap? (b) Ta naj melelen “kakõlõn Nejin armij” ñõn armij ro an Jeova?

¹⁴ Jisõs ear ba bwe unin naj kakaru kitien iñtan eo elap ej “kin ro dri kãlet,” bween Kristian dri kabit ro im rej mour wõt ion lõl in. (Matu 24:22) Jeova eban kõtlok bwe ren mõn aolep dri Kristian dri kabit ro im s̃ip ro jet mõtair ilo ien eo naj kokkure kabuñ ko rewan. Jisõs ear wõnmanlok im ba bwe “elikin iñtan ilo ran ko,” enaj or kakõle ko ilo al, aliñ, im iju ko, inem “kakõlõn Nejin armij e naj weak i lõñ.” Men in enaj kõmõn bwe dri ailiñ otemjej ion lõl in ren “buromõj.” Eban eindrein iben dri kabit ro im kejatrikrik eo air ej ñõn mour ilõñ, im bareinwõt ro mõtair me kejatrikrik eo air ej ñõn mour ion lõl. Renaj “reiliñlok im jer: bwe ebaktok” ien eo naj lomoren ir.​—Matu 24:​29, 30; Luk 21:​25-​28.

15. Ta eo Kraist enaj kõmõne ñe enaj itok?

¹⁵ Mokta jen an kamwijlok an bõk anjo, Nejin armij enaj itok ilo bar juõn wãwen. Jisõs ear kanan: “A ñe Nejin armij e naj itok ilo wuj eo An, im enjel ro otemjej iben, ien  eo E naj jijõt ion tron in wuj eo An: Im naj kokweloktok dri ailiñ otemjej iman mejen; im E naj kijbil ir jen dron, einwõt s̃eperd ej kijbil s̃ip ko jen goat ko: Im e naj kajutõk s̃ip ko i anbijmaroñõn, a goat ko i anmiñin.” (Matu 25:​31-​33) Men in ej jitõñlok ñõn itok eo an Kraist einwõt Dri Ekajet eo ñõn kejibil “dri ailiñ otemjej” ilo ruo kumi ko. Ro rej “s̃ip” ej ro im rej rejetake ro jãtin Jisõs (Kristian dri kabit ro ion lõl) im “goat ko” ej ro “re jab bokake gospel an ar Iroij Jisõs Kraist.” (2 Tes. 1:​7, 8) Kar kwalok kin s̃ip ko bwe rej “ro remõn” im renaj “bõk mour in drio” ion lõl. Bõtab ro im rej goat renaj “ilok ñõn iñtan in drio,” ak joko indrio.​—Matu 25:⁠34, 40, 41, 45, 46.

Jisõs Ej Kamwijlok An Bõk Anjo

16. Ewi wãwen Kraist, Dri Tel eo ar, enaj kamwijlok an bõk anjo?

¹⁶ Elikin an rerelok sili ro uan ro renaj kiñ im pris iben im mwij kajenolok s̃ip ro im likit ir ituanbijmaroñ in pein ñõn bõk lomor, Kraist emaroñ wõnmanlok wõt im “bõk anjo.” (Rev. 5:​9, 10; 6:⁠2) Einwõt eo ej tel jar in tõrinae in enjel ro rekajur im ejelok berre dri kabit ro jãtin im emwij air jerkakbiji, Kraist enaj kokkure aolep kien ko, jar in tõrinae ko, im rolul in business ko an jukjuk im ber in an Setan. (Rev. 2:​26, 27; 19:​11-​21) Kraist enaj kamwijlok an bõk anjo ñe ej kokkure jukjuk im ber in an Setan. Inem enaj liabe Setan im enjel ro renana iomin juõn tausan yiõ.​—Rev. 20:​1-3.

17. Kraist enaj tel s̃ip ro an ñõn ta ilo ien eo enaj Iroij iomin Juõn Tausan yiõ, im ta eo jej aikwij beek ñõn kõmõne?

¹⁷ Ilo an konono kin ‘jar eo elap’ im rej mõtõn s̃ip ro jet, me renaj elã jen iñtan eo elap, dri jilik Jon ear kanan bwe “Lam eo Ej iolapin tron E naj air S̃eperd, im E naj tel ir ñõn unin dren ko dren in mour.” (Rev. 7:​9, 17) Aet, iomin Juõn Tausan Yiõ ko in an Kraist Iroij, enaj wõnmanlok wõt im tel s̃ip ro jet, ro emol air eoroñ ainiken, im enaj tel ir ñõn mour indrio. (Riit Jon 10:​16, 26-​28.) Jen beek ñõn tiljek wõt ilo ar lor Dri Tel eo ar jen kiõ im ñõn ien eo jenaj ber ilo lõl eo ekãl me Jeova ear kalimur kake!

Ilo Elij

• Ta eo Kraist ear kõmõne elikin an kar jino iroij?

• Wõn ro Kraist ej kajerbal ir ijin ion lõl ñõn tel congregation ko an?

• Ilo wãwen it ko mõtõn jidrik Kraist, Dri Tel eo ar, enaj itok?

• Ewi wãwen Kraist enaj wõnmanlok wõt im tel kij ilo lõl eo ekãl?

[Kajitõk ko ñan katak]

[Pija ilo peij 29]

Ber eo an Kraist enaj alikar ñe naj kokkure jukjuk im ber in an Setan