Ear Lap Tõbrõk ilo Jerbal eo Ejej Uan ilo Bulgaria

“Elap jonikõn, a eiet dri jerbal; Inem komin jar ñõn Iroij in marmir, bwe En jilkinlok ro dri jerbal ilo jonikõn eo An.”​—Matu 9:​37, 38.

NAN kein an Jisõs rar jejit ñõn wãwen eo ear walok ilo Bulgaria, juõn ailiñ ilo Europe! Ear lap air aikwij dri kwalok nan ro ñõn bõklok nuuj eo emõn ñõn elõñlok jen jiljilimjuõn million armij ro rej jokwe ijo. Eor tarrin 1,700 dri kwalok nan ro ilo Bulgaria, bõtab rejjab maroñ tõbar aolepen armij ro ilo ailiñ in. Kin men in, Kumi eo Ej Tel Dri Kennan ro an Jeova rar kajitõk iben dri kwalok ro rejelã kajin Bulgaria jen ailiñ ko jet ilo Europe ñõn jibõñ ilo juõn jerbal ejej uan im ear walok ilo kar 2009 eo. Kar karõk bwe jerbal in en walok iomin jiljilimjuõn wik ilo aliñ in Juun im Julae, im ear jemloklok ilo ien Kwelok eo Elap etan “Komin Ekil Wõt” ilo bukwon in Sofia, ilo Okõj 14-​16, 2009.

Elõñ Rar Mõnõnõ in Bõk Kwonair

Ro jeer im jãter ilo obij eo an Dri Kennan ro an Jeova ilo Sofia rar jab jela jete jen France, Germany, Greece, Italy, Poland, im Spain renaj kar uak ñõn nan in kir eo. Melelen bwe rein renaj aikwij kajerbal jããn ko air mõke im ien kakije ko air ñõn etal ñõn Bulgaria im kwalok nan. Ear lukkun kamõnõnõ ñõn lo bwe jen wik ñõn wik ear lõñlok oran ro rar kwalok air kõnan bõk kwonair im ear tõbar joñõn in 292! Kin an lõñ ro rar mõnõnõ in bõk kwonair, rar maroñ jilkinlok rein ñõn jilu jikin ko ilo Bulgaria: Kazanlak, Sandanski, im Silistra. Circuit overseer ro ilo Bulgaria rar kajitõk iben pioneer im dri kwalok ro ilo bukwon eo ñõn rejetake jerbal eo. Ejjabto, ear or 382 dri kwalok ro rar jibõñ ilo jerbal in kwalok nan eo ilo bukwon kein im ejeja air kin kwalok nan ie.

Kar jilkinlok jet eman ro jeer im jãter jen congregation ko rebak ñõn kepoj jikin jokwe ko. Rar rent apartment ko im kabuk hotel ko ejjab lap wõnair. Eman rein rar kate ir ñõn kõmõn karõk ko ñõn jibõñ rein im bareinwõt ñõn kabwe aikwij ko air. Ilo aolep jikin kein jilu, emwij air kar kapoje jikin ko rein remaroñ kajerbali ñõn kwelok iben dron. Rar bareinwõt kõmõn karõk bwe dri lotok rein ren tel kwelok ko an congregation. Elap an kar kamõnõnõ ñõn lo elõñlok jen 50 kwalok nan ro rej kwelok iben dron ñõn nebar Jeova ilo jikin ko ejelok Dri Kennan ro an Jeova rej jokwe ie.

Kijejeto eo an ro rar etal jen ailiñ ko jet ñõn jibõñ ilo jerbal eo ejej uan ear lap an kõkãtõk. Ekkã an lap an bwil ilo aliñ kein Juun im Julae. Bõtab, ejelok men ear kabwijrõk rein jeer im jãter rekijejeto. Ear let air kwalok nan iomin wik ko jilu moktata ilo Silistra, juõn bukwon elõñlok jen 50,000 armij rej jokwe ie im ej ber iturin River Danube. Kin men in, ro jeer im jãter rar wõnmanlok wõt im kwalok nan mae ien eo rar tõbarlok Tutrakan, juõn bukwon ej ber 35 mile iturilikin Silistra. Ekkã air jino kwalok nan ilo 9:30 jiboñ. Elikin air mõña in raelip, ekkã air wõnmanlok wõt im kwalok nan ñõn 7:00 auõ jota ak  manlok wõt. Rar bareinwõt kwalok nan ilo Kazanlak im Sandanski, im kin kijejeto eo an rein rar itok in jibõñ, jerbal in ejej uan ear tõbarlok bukwon im jikin kwelok ko rebak.

Ta Tõbrõk Ko?

Ear lap tõbrõk ilo jerbal in kwalok nan iomin wik kein jiljilimjuõn. Einwõt ilo kar ran ko an dri jilik ro, ro rej jokwe ilo jikin kein remaroñ ba ‘Emwij ami kajededlok nan in katak ko ami ilo aolepen jikin kein am.’ (Jerbal 5:28, UBS) Dri kwalok nan rein rar likit 50,000 magazine ko im rar jino katak Baibel iben 482 armij ro. Ekamõnõnõ bwe ilo Jeptõmba 1, 2009, ear jutõk juõn congregation ilo Silistra, im ear jutõk jet kumi ko ilo Kazanlak im Sandanski. Ej menin kamõnõnõ ñõn lo an ro rej kab roñ kin nuuj eo emõn wõnmanlok wõt ilo air katak im kõmõn oktõk.

Ilo wik eo jinointata, juõn dri kwalok ej konono kajin Bulgaria jen Spain ear kwalok nan ñõn Karina, juõn kõra ej wiakake nuuj peba iturin ial. Karina ear kwalok an itoklimo im ear itok ñõn juõn ien kwelok. Ear errã ñõn katak Baibel. Kinke leo belen ej juõn eo ejjab tõmak ilo Anij, kõra in ear kajitõk ñõn katak Baibel ilo bar juõn jikin. Ledrik ro ruo nejin rar kobalok iben im katak Baibel. Ledrik eo eridto etan Daniela, ear lap an itoklimo kin katak ko remol jen Baibel. Ledrik in ear riiti aolepen buk eo Baibel Ej Katakin iomin juõn wõt wik im ear mõkõj im bwijrõk jen an kajerbali ekjõp ko. Inem ear jino bwebwenato kin mol eo iben ro mõtõn. Jilu wik elikin an kar jino ber ilo kwelok ko, ear ba ñõn kõra eo ear katak iben, “Einwõt ij bar juõn iami. Ta eo ij aikwij kõmõne bwe in jino kwalok nan?” Ej emõn wõt an Daniela wõnmanlok, ekoba jinen im ledrik eo jãtin.

Ilo Kazanlak, juõn jeer im jãter dri Bulgaria etan Orlin ear itok jen Italy ñõn jiboñ ilo jerbal in ejej uan, ear jeblak ñõn jikin jokwe eo an elikin kwalok nan. Ilo ial eo an lok, Orlin ear kwalok nan ñõn ruo likao rej jijõt ilo juõn jea ilo juõn jikin ikkure. Ear likit buk eo Baibel Ej Katakin ibeirro im karõk ñõn bar jeblak ilo ran eo tok juõn. Ke ear jeblak, Orlin ear jino katak Baibel iben Svetomir, im irro kar bar katak ilo ran eo tok juõn. Iomin druatimjuõn ran, Orlin ear katak iben Svetomir drualitõk alen. Svetomir ej ba: “Ruo ran mokta jen aõ kar iion yuk, iar kajitõk iben Anij ñõn jibõñ iõ bwe in kebake e. Im iar kalimur bwe ñe enaj jibõñ iõ, inaj ajelok mour eo aõ ñõn e.” Elikin an Orlin jeblak ñõn  Italy, ro jeer im jãter ilo bukwon eo rar wõnmanlok wõt im katak iben Svetomir, im elap an kate ñõn jerbale men ko ej katak.

Elap Jerammõn Ñõn Ro Rej Karmijete Ir Mõke

Ta iñjake eo an ro rar mõnõnõ in kajerbal ien kakije ko air im jããn ko air mõke ñõn etal im kwalok nan kin nuuj eo emõn ilo bar juõn ailiñ? Juõn elder ilo Spain ear ba: “Jerbal in ejej uan ear kõmõn bwe ro jeer im jãter rej konono kajin Bulgaria ilo Spain ren ebake dron. Men in ear lap an jelet ro jeer im jãter im rar bõk kwonair. Ruo dri belele jen Italy rar ba: “Aliñ in kar aliñ eo emõntata ilo mour ko amro! Jerbal in ear ukot mour ko amro! Kiõ, kimro ej jet armij ro reoktõk.” Dri belele rein rar jino lemnok ñõn emakõtlok ñõn Bulgaria im jibõñ ijo elaplok aikwij ie. Carina ej juõn regular pioneer jen Spain im ear bõk kwonan ilo jerbal eo ilo Silistra. Ear kakoni jããn ko an bwe en maroñ ber ilo Bulgaria iomin juõn yiõ. Carina ear ba: “Elap aõ mõnõnõ bwe Jeova ear kõmõn bwe in jerbal ilo Bulgaria, im ij kejatrikrik bwe inaj ber ijin iomin juõn ien eaitok. Kiõ eor lailim aõ dri katak im jilu iair rej itok ñõn kwelok ko.”

Juõn jeer im jãter jen Italy ear kõnan bõk kwonan ilo jerbal eo, bõtab ear ejelok an ran in kakije kinke ej kab jino jerbal. Bõtab ear wõnmanlok wõt im kajitõk ñõn an jab jerbal iomin juõn aliñ, im epojõk in kamwij e jen jerbal eo an elañe eban tõbrõk kajitõk in an. Ear lap an bwilõñ ke boss eo an ear ba: “Emõn, ak juõn wõt aõ kajitõk. Kwoj aikwij jilkintok juõn aõ postcard jen Bulgaria.” Jiroñ in ear lukkun tõmak bwe Jeova ear uake jar ko an.

Juõn sister jodrikdrik etan Stanislava jen bukwon in Varna ilo Bulgaria ear kakije jen jikin jerbal eo an im elap wõnan, bwe en maroñ jibõñ ilo jerbal in kwalok nan eo ilo Silistra. Ke ear lo joñõn mõnõnõ eo an pioneer ro rar itok jen ijoko retolok ñõn kwalok kin nuuj eo emõn ilo ailiñ in an, men in ear lap an jelet buruen. Ledrik in ear jino kile bwe ear kajerbal mour eo an ñõn bukot jerbal ko remõn. Ke ear jeblak ñõn bukwon eo an elikin ruo wik, ear jolok an jerbal im ear erom juõn regular pioneer. Kiõ ej lukkun mõnõnõ einwõt juõn eo ej kememej dri kõmõnmõn eo an ilo ien an jodrikdrik.​—Ekk. 12:1.

Ej juõn jerammõn ñõn boub ilo jerbal eo an Jeova. Ejelok men emõnlok jen am lelok ien im kajur ko am ñõn jerbal in eaurõk ñõn kwalok im katakin armij ro kin nuuj eo emõn. Kwomaroñ ke kalaplok ijo kwonam ilo jerbal in lomor in? Bwelen eor jikin ko ilo ailiñ eo am im elaplok aikwij ie. Kwomaroñ ke emakõtlok ñõn jikin kein? Ak kwomaroñ ke kajeoñ katak bar juõn kajin ñõn jibõñ armij ro rej maro kin mol eo jen Baibel eo ilo ailiñ eo am? Jekron ta oktak ko kwonaj kõmõni ñõn kalaplok ijo kwonam ilo jerbal in kwalok nan ak kwon liki bwe Jeova enaj kejerammõn yuk.​—Ken. 10:22.

[Box/Pija ilo peij 32]

Juõn Ran Ebin Melokloke

Elõñ ian ro rar itok jen ailiñ ko jet ilo Europe ñõn jibõñ ilo jerbal in kwalok nan eo ilo Bulgaria rar bebe ñõn ber ilo Kwelok Elap eo ilo Sofia etan “Komin Ekil Wõt!” Ear juõn men in kõkãtok ñõn ro jeir im jãtir ilo bukwon eo ñõn lo elõñ dri lotok ro jen ailiñ ko jet. Armij ro 2,039 rar ber ilo ien eo rar lukkun mõnõnõ ke Brother Geoffrey Jackson, jen Kumi eo Ej Tel Rolul in ear kwalok bwe emwij ukot ukok in Baibel eo an Dri Kennan ro an Jeova * ñõn kajin Bulgaria! Aolep ro rar ber ilo Bõlaide eo rar kwalok air kamolol im mõnõnõ ilo air kabbokbok ilo elaj. Elõñ rar jõñ kin air lõñliñ. Baibel in ejime im biruru ñõn melele enaj jibõñ dri Bulgaria ro etã burueir ñõn kalaplok air jela kin Jeova.

[Map on page 30, 31]

BULGARIA

Silistra

Kazanlak

Sandanski

SOFIA

[Pija ilo peij 31]

Ear lap tõbrõk ilo jerbal in kwalok nan iomin wik kein jiljilimjuõn

[Kamelele eo itulal]