Jen Kate Kij ñõn Kabukot Kejerammõn jen Jeova

“[Anij] ej lelok jinekjij ñõn ro rej kabukot E.”​—HIB. 11:6.

1, 2. (a) Ewi wãwen an elõñ armij kajeoñ in bõk kejerammõn ko? (b) Etke ej aikwij or ar itoklimo ñõn bõk kejerammõn jen Jeova?

 MOKTA jen an juõn ilok jen ailiñ eo an ñõn bar juõn ailiñ, ekkã an armij ro ba: “Anij en kejerammõn yuk ilo ial in am!” Elõñ dri tel in kabuñ ko rej kejerammõn armij ro, menin mour ko, im men ko einwõt kein jerbal, kein tõrinae, wa ko, im men ko eierlok wõt. Jet armij rej lemnok bwe elañe rej etal ñõn jikin ko rekwojarjar remaroñ bõk kejerammõn. Dri tel ro ilo kien ekkã air kajitõk iben Anij bwe en kejerammõn ailiñ ko air. Kwoj lemnok ke bwe kajitõk kein an armij rein rej itok jen burueir? Eor ke tokjeir? Wõn ro Anij ej lukkun kejerammõn ir, im etke?

² Jeova ear kanan bwe ilo naj ran ko eliktata, enaj or armij ro rerreo im ainemõn jen aolep ailiñ ko, renaj kwalok nan kin Ailiñ eo an ibelakin lõl in meñe renaj iion matõrtõr im jumae. (Ais. 2:​2-4; Matu 24:14; Rev. 7:​9, 14) Ro im renaj bõk jerbal in rekõnan im rej aikwiji kejerammõn ko jen Anij, kinke rejjab maroñ lo tõbrõk elañe Anij ejjab kejerammõn ir. (Sam 127:1) Ak ewi wãwen jemaroñ bõk kejerammõn ko jen Anij?

 Jerammõn ko Rej Buñ Ion Ro Rej Bokake

3. Ta eo enaj kar walok elañe dri Israel ro rar bokake?

³ Riit Jabõn Kennan Ko 10:​6, 7. Mokta jen an kar ailiñ in Israel dreloñe Enen Kalimur eo, Jeova ear kalikar bwe enaj kejerammõn im kejbãrok ir elañe renaj bokake e. (Dut. 28:​1, 2) Jerammõn ko jen Jeova renaj kar buñ ioir. Aet, jerammõn ko renaj itok ion ro rej bokake.

4. Bokake eo emol ej kitibuj ta?

⁴ Ilo wãwen it eo dri Israel ro ren kar aikwij bokake Anij? Anij ear ba ilo Kien eo an bwe eban buñburuen elañe armij ro an rar jab korijer ñõn e “kin buruen mõnõnõ im kammolol.” (Riit Duteronomi 28:45-47, UBS.) Ej tellokin Jeova bwe jen bokake e kin aolepen buruer, im jab einwõt menin mour ak enjel ro renana me rej bokake wõt bõtab ejjab kinke rekõnan. (Mark 1:​27; Jem. 3:3) Bokake Anij kin juõn buru emol ej kakõlen ar yokwe e. Ej alikar jen lõñliñ eo im ej waloktok jen ar tõmak bwe kien ko an Jeova rejjab erro im ej “lelok jinekjij ñõn ro rej kabukot E.”​—Hib. 11:6; 1 Jon 5:3.

5. Elañe juõn armij ear liki kalimur eo an Jeova bwe enaj kejerammõn e, ewi wãwen men in enaj kar jibõñ e ñõn bokake kien eo ilo Duteronomi 15:​7, 8?

⁵ Jen etale ewi wãwen dri Israel ro remaroñ kar kwalok air bokake jen aolepen burueir ilo air lore kien eo ilo Duteronomi 15:​7, 8. (Riit.) Air bokake kien in emaroñ kar jibõñ ro rejeramel, bõtab ñe ejjab jen burueir, emaroñ ke kar kowõnmanlok kõtan ko remõn ibwiljin armij ro an Anij? Elaptata, ren kar ke kwalok air tõmak bwe Jeova emaroñ kejbãrok dri korijer ro an, im kwalok air kamolol bwe Jeova ej lelok ien ñõn air lor joñok eo an kin kwalok joij? Jab ñõn jidrik! Anij ejela kin buruen armij ro im emol air joij, im ear kalimur bwe enaj kejerammõn ir ilo aolepen jerbal ko air. (Dut. 15:10) Elañe armij ro rej kwalok air tõmak ilo kalimur in im jerbale, Anij enaj kejerammõn ir.​—Ken. 28:20.

6. Ta eo Dri Hibru 11:6 ej jiroñ kij bwe Anij enaj kõmõne?

⁶ Kobalok iben tõmak eo ar ilo Jeova bwe ej juõn Dri Letok Jinekjij, Dri Hibru 11:6 ej bar kalikar juõn karkar jej aikwiji ñõn ar bõk kejerammõn jen Anij. Ilo eon in ej kalikar bwe Jeova ej kejerammõn ro rej kate ir im “kabukot E.” Ekkar ñõn ukok in Baibel eo etan Ukok in Lõl eo Ekãl kin Jeje ko Rekwojarjar, * ej kwalok bwe Jeova ej kejerammõn ro rej “lukkun kabukot E.” Elap ar liki kinke Anij eo emol “E ban riõp.” (Taitõs 1:2) Emwij an Jeova kwalok iomin elõñ tausan yiõ ko bwe jemaroñ liki kalimur ko an. Nan ko an Jeova reban likjõp, aolep ien renaj mol. (Ais. 55:11) Inem jemaroñ lukkun liki bwe elañe jej kwalok ar tõmak ilo Anij, enaj kejerammõn kij.

7. Ta eo jej aikwij kõmõne bwe Anij en kejerammõn kij ikijen ine eo “inen” Ebream?

⁷ Jisõs Kraist ej mõtõn eo elap ilo ine eo “inen” Ebream. Dri Kristian dri kabit ro rej ejaake mõtõn eo kein karuo ilo ‘ine’ in kar kanan kake. Kar kakien rein bwe ren kennanik armij kin “men ko remõn an Eo e ar kir [ir] jen marok im ñõn iloan maram eo An e men in bwilõñ.” (Gal. 3:​7-9, 14, 16, 26-​29; 1 Pit. 2:9) Jen jab kõtõmene bwe enaj or juõn ar kõtan iben Anij elañe jej kejekron ro me Jisõs ear jitõñ ir bwe ren lale men ko mweien. Elañe en kar jab “dri korijer e tiljek im meletlet,” jeban kar lukkun melele kin men ko jej riiti ilo Nan in Anij, im jeban kar jela ewi wãwen jemaroñ jerbali. (Matu 24:45-​47) Elañe jej jerbali katak ko jen Baibel, jemaroñ liki bwe Anij enaj kejerammõn kij.

Likit Ankilan Anij Moktata

8, 9. Ewi wãwen Jekõb ear jerbale tõmak eo an kin kalimur eo an Anij?

⁸ Jekõb ej juõn joñok emõn ilo an kar kate  joñõn wõt an maroñ bwe Anij en maroñ kejerammõn e. Ear jab jela ewi wãwen kalimur eo an Anij ñõn Ebream enaj kar walok, bõtab ear tõmak bwe Jeova enaj koorlok ro inen jiman, im renaj erom juõn ailiñ elap. Kin men in, ilo yiõ eo 1781 mokta jen an kar Jisõs itok ñõn lõl, Jekõb ear ilok ñõn Heran ñõn bukot juõn belen. Ear jab baj itoklimo wõt in kabukot juõn eo edreo, ak ear bukot juõn eo ej kabuñ ñõn Jeova im enaj juõn jinen emõn ñõn ajiri ro nejiiro.

⁹ Jejela bwe Jekõb ear iione kõra eo nukin etan Rejel. Joñõn an yokwe Rejel, ear errã ñõn jerbal ñõn jemen etan Leban iomin jiljilimjuõn yiõ bwe en maroñ bõke bwe en belen. Bwebwenato in ejjab baj wõt kin yokwe eo ikõtan Jekõb im Rejel. Jekõb ear jela kin kalimur eo Anij ear kwalok ñõn Ebream, eo jiman, im bareinwõt ñõn Aisak jemen. (Jen. 18:18; 22:17, 18; 26:​3-5, 24, 25) Inem Aisak ear ba ñõn Jekõb: “Anij Laplap en kejerammõn yuk, im katimon yuk, im korlok yuk, bwe en lõñ ro bwijõm; im En lewoj ñõn yuk jerammõn an Ebream, ñõn kwe, im ñõn ro ineõm ibõm; bwe en am jolit eneo kwoj drua maijet ie, eo Anij e ar lelok ñõn Ebream.” (Jen. 28:​3, 4) Ear alikar an Jekõb liki nan ko an Jeova ilo an kar kate e ñõn bukot juõn belen emõn im ejaake juõn baamle.

10. Etke Jeova ear mõnõnõ in kejerammõne Jekõb?

¹⁰ Jekõb ear jab kate ñõn koorlok mweiuk ko ñõn baamle eo an. Ear lemnok wõt kin kalimur eo an Jeova kin menmenbwij eo an. Ear kõnan wõt kõmõnmõn ankilan Jeova. Jekõb ear kate e ñõn kõmõn jabrewõt men joñõn wõt an maroñ ñõn bõk kejerammõn jen Anij, meñe ear iion elõñ melejoñ ko. Ear likit wõt ankilan Anij moktata meñe ear ridtolok im bwijwõlã, im Jeova ear kejerammõn e kin an kate.​—Riit Jenesis 32:24-​29.

11. Ta ko jej aikwij kate kij ñõn kõmõni me rej errã iben ankilan Anij?

¹¹ Einwõt Jekõb, jejjab jela ilo tibrikin wãwen Jeova enaj kajejite karõk eo an. Bõtab, ilo ar katak Nan eo an Anij, eor ar jela kin ta ko renaj walok elañe enaj itok ‘Ran eo an Jeova.’ (2 Pit. 3:​10, 17) Ñõn wanjoñok, jejjab  jela ñãt eo ran eo an Anij enaj itok, bõtab jejela bwe elukkun ebak. Jej tõmake Nan eo an Anij ilo an ba bwe elañe elet ar kwalok nan kiõ ke ejja or wõt ien, jemaroñ lomoren kij mõke im ro rej roñjake kij.​—1 Tim. 4:​16.

12. Ta eo jemaroñ liki bwe Jeova enaj kõmõne ñõn kij elañe jej kate kij joñõn wõt ar maroñ?

¹² Jejela bwe jemlokõn jukjuk im ber in emaroñ walok jabrewõt ien, kinke Jeova ejjab aikwij kõtar mae ien kajjojo armij ro ion lõl emwij air roñ kin ennan eo. (Matu 10:23) Bareinwõt, jej bõk nan in tel ko kin wãwen jemaroñ kõmõne jerbal in ilo juõn wãwen ekeie. Kin tõmak, jej bõk kwonad ilo jerbal in joñõn wõt ar maroñ, im jej kajerbale jabrewõt men ko eor iber ñõn jerbal in. Armij ro ilo jikin ko jej etal im kwalok nan ie renaj ke aolep ien mõnõnõ in roñjake? Ilo mol, jejjab jela. (Riit Ekklisiastis 11:​5, 6.) Jerbal eo ar ej ñõn kwalok nan wõt im liki bwe Jeova enaj kejerammõn kij. (1 Kor. 3:6, 7) Jemaroñ liki bwe Jeova ej lo ar kate kij joñõn wõt ar maroñ, im enaj jibõñ im tel kij ikijen kajur eo an.​—Sam. 32:8

Kabukot Kajur eo an Anij

13, 14. Ewi wãwen kajur eo an Anij ear jibõñ dri korijer ro an?

¹³ Ta elañe jej berre bwe ejabwe maroñ iber ñõn ar kajejit erro ko ar ak bõk kwonad ilo jerbal in kwalok nan? Jej aikwij kajitõk iben Jeova bwe en letok kajur eo an ñõn kakõmõnmõnlok kabel im maroñ ko iber ñõn kõmõne jerbal eo an. (Riit Luk 11:13.) Kajur eo an Anij emaroñ kamaroñ armij ro ñõn kõmõni jerbal ko ak erro ko air meñe eoktõk kar wãwen ber eo air mokta ak iminene ko air. Ñõn wanjoñok, elikin an kar dri Israel ro drioijlok jen Ijipt, kajur eo an Anij ear kamaroñ dri lale s̃ip im dri kamakoko ro bwe ren anjo ion dri kijirãt ro air meñe rejaje kilen tõrinae. (Ex. 17:​8-​13) Tokelik, kajur eo an Anij ear jibõñ Bizalel im Oholiab ñõn kalek imõn kaber eo ekkar ñõn karõk ko an Anij.​—Ex. 31:​2-6; 35:30-​35.

¹⁴ Ke dri korijer ro an Anij ilo ran kein rar aikwij in jino air kõmõni buk ko air mõke, kajur eo an Anij ear jibõñ ir. Eo jeer im jãter etan R. J. Martin, eo ar bõk erron kõmõni buk ko ilo ien eo, ear je juõn letter kin jerbal ko rar maroñ kõmõni ilo yiõ eo 1927. Ear ba: “Ilo ien eo ear jejit, Iroij ear kebellok juõn ien emõn, im kim ear wiaiki kein kõmõn buk eo elap, meñe kim jaje wãwen rar kõmõne ak wãwen an jerbal. Bõtab Iroij ear jibõñ ro rej kate ir joñõn wõt air maroñ ñõn korijer ñõn e. . . . Iomin jejjo wõt wik, kimar maroñ kajerbale, im ej jerbal wõt ñõn kiõ im kõmõni jet jerbal ko im ro rar eiki rejaje bwe emaroñ kar  kõmõni.” Jeova ej wõnmanlok wõt im kejerammõn ro rej kate ir joñõn wõt air maroñ ilo ran kein.

15. Ewi wãwen jemaroñ bõk kakajur jen Dri rom 8:​11 elañe jej iion elõñ kabo ko?

¹⁵ Kajur eo an Jeova ej jerbal ilo elõñ wãwen ko. Kajur in ej bellok ñõn aolep ro dri korijeran, im emaroñ jibõñ ir ñõn anjo ion melejoñ ko relap. Ta elañe jej iion elõñ kabo ko? Jemaroñ bõk kakajur jen nan ko an Paul ilo Dri Rom 7:⁠21, 25 im Dri Epesõs 1:19, 20. Aet, “kajur eo an [Anij] Eo E ar jerbale ilo Kraist, ke ear kejerkakbiji E jen ro remij” emaroñ jibõñ kij, im kakajur kij bwe jen anjo ion kõnan ko rejakkar an kõniek. Kar je eon in ñõn Kristian dri kabit ro, bõtab ej bar jerbal ñõn aolep dri korijer ro an Anij. Elañe jej likit ar tõmak ilo Kraist, anjo ion kõnan ko ar rejakkar, im mour ekkar ñõn tel eo an Anij, kij aolep jenaj bõk mour indrio.

16. Ta ko jej aikwij kõmõni bwe Anij en letok kajur eo an ñõn kij?

¹⁶ Jemaroñ ke kõtõmene bwe Anij enaj letok ñõn kij kajur eo an elañe jejjab kate kij? Jaab. Ijellokin ar jar kin kajur in, jej aikwij lukkun liñõri Nan ko an Anij. (Ken. 2:​1-6) Kobalok iben men in, kajur eo an Anij ej ber ilo congregation ko an dri Kristian ro. Ar ekkeini ar kobalok ilo kwelok ko ej kalaplok kõnan eo ar ñõn roñjake nan in kakabilek ko an Anij ñõn congregation ko. (Rev. 3:6) Ilo eta buru, jej aikwij jerbali men ko jej katak. Jabõn Kennan Ko 1:​23 ej jiroñ kij: ‘Komin oktõk kin nan in kowe ko aõ; lo, I naj lutõklok kajur eo aõ iomi.’ Aet, Anij ej lelok kajur eo an “ñõn ro rej bokake E.”​—Jerb. 5:​32.

17. Jemaroñ keiri kejerammõn ko jen Jeova ñõn ta?

¹⁷ Meñe jej kate kij ñõn bõk kejerammõn ko jen Anij, jej aikwij kememej bwe jerammõn ko Jeova ej lilok ñõn armij ro an rejjab wawa wõt ion air baj jerbal ñõn e. Jemaroñ keiri kejerammõn ko jen Jeova ñõn wãwen eo enbwinir ej bõk tokjen ko jen mõña ko jej kõñi. Anij ear kõmõnmõn enbwinir ilo juõn wãwen bwe jen mõnõnõ in mõña im bõk õn ko jen mõña ko jej kõñi. Ej bareinwõt letok ñõn kij mõña ko. Jejjab jela ewi wãwen an õn ko itok ñõn mõña ko jej kõñi, im ejjab aolep rejela ewi wãwen enbwinir ej bõk an kajur jen mõña ko. Men eo drein jejela bwe elañe jej mõña, jej bõk õn ko im rej kakajur kij. Elañe jej mõña ekan ko reuõne, enaj emõnlok ejmour eo ar. Ilo ejja wãwen in wõt, Jeova ej kwalok ta ko jej aikwij kõmõni bwe jen maroñ bõk mour indrio, im ej jibõñ kij bwe jen maroñ kõmõni men kein. Elukkun alikar bwe elap an Jeova jibõñ kij im ej tellokin bwe jen nebar e. Bõtab, ñõn bõk jerammõn ko jen Jeova, jej aikwij bokake e ilo ar jerbal ekkar ñõn ankilan.​—Hag. 2:​18, 19, UBS.

18. Ta eo kwon kate yuk ñõn kõmõne, im etke?

¹⁸ Kate yuk joñõn wõt am maroñ ñõn karerelok erro ko am. Ien otemjej kwon kajitõk jibõñ jen Jeova bwe kwon maroñ lo tõbrõk. (Mark 11:23, 24) Ilo am kate yuk, kwon liki bwe “eo ej kabukot ej lo.” (Matu 7:8) Naj kejerammõn dri kabit ro kin “belin mour” ilo lõñ. (Jem. 1:​12) ‘S̃ip ro jet’ an Kraist im rej kate ir bwe Anij en kejerammõn ir ikijen ‘ine’ eo inen Ebream, renaj mõnõnõ elañe Jisõs enaj ba: “Komin itok, kom ro Jema ej kejerammõn ir! Itok im amnak ilo ailiñ eo ear bojak ñõn kom jen jinoin kõmõnmõn lõl in.” (Jon 10:16; Matu 25:34, UBS) Aet, “ro Iroij ej kejerammõn ir renaj amnak ilo eneo, . . . im enaj eneir ñõn indrio.”​—Sam 37:22, 29, UBS.

Kwomaroñ ke Kemelele?

• Bokake eo emol ej kitibuj ta?

• Ta eo jej aikwij kõmõne bwe Anij en kejerammõn kij?

• Ta ko jej aikwij kõmõni bwe Anij en letok kajur eo an, im ewi wãwen emaroñ jibõñ kij?

[Kamelele eo itulal]

[Kajitõk ko ñan katak]

[Pija ko ilo peij 9]

Jekõb ear oktak iben juõn enjel ñõn bõk kejerammõn jen Jeova.

Kwoj ke kate yuk joñõn wõt am maroñ einwõt Jekõb?

[Pija ilo peij 10]

Kajur eo an Anij ear jibõñ Bizalel im Oholiab ñõn kalek imõn kaber eo