Jibõñ Ajiri ro bwe Ren Jela kin Rolul eo an Jeova

AJIRI ro rej mõnõnõ in katak. Lemnok mõk kin kajitõk ko me ajiri in Israel ro remaroñ kar kajitõk kaki ilo boñin kwojkwoj in Kijone eo moktata: ‘Etke rar aikwij mõne lam eo?’ ‘Etke Baba ej likit bõtõktõk ion jurõn kejem eo?’ ‘Jej etal ñõn ia?’ An Jeova mõnõnõ kin kajitõk rõt kein ej alikar ilo men eo ear kakien eman in Israel ro me eor nejiir ñõn air kõmõne. Ikijen kwojkwoj in kijone eo renaj kõmõne ilo ran ko renaj itok, Jeova ear jiroñ ir: “Ñe ro nejimi rej ba ñõn kom, Ta melelen jerbal in ibemi? Kom naj ba, Ej men in katok kijone an Jeova, Eo e ar kijon moko imõn ro nejin Israel ilo Ijipt, ke E ar mõn ro dri Ijipt, im kõtlok moko imwem.” (Ex. 12:24-​27) Tokelik, Jeova ear kakememej ro jemen im jinen ajiri in Israel ro kin aurõkin air uaki kajitõk ko an ro nejiir ikijen “kien ko, im ekajet ko” Jeova ear kakien ir kaki.​—Dut. 6:​20-​25.

 Alikar, Jeova ear kõnan bwe ajiri ro ren lo uak ko rekajuburu ñõn kajitõk ko air kin kabuñ eo emol. Uak kein renaj kamakõt ir ñõn air yokwe Jeova einwõt air Anij im dri Lomor. Jeova ekõnan bwe en eindrein iben ajiri ro ranin. Juõn wãwen ro jemen im jinen remaroñ katakin ro nejiir ñõn air yokwe Jeova im armij ro an ej ikijen air jibõñ ir bwe ren jela kin rolul eo an Jeova im ñõn melele kin wãwen rej bõk tokjen jen karõk ko an rolul eo. Inem jen etali jet ian wãwen ko ajiri ro remaroñ kalaplok air melele kin rolul eo an Anij.

Congregation eo Am

Ajiri ro rej aikwij jela kajen ro uan congregation eo me baamle eo air rej kõmao ibeir. Ñõn air kõtõbrõk men in, ro jemen im jinen rej aikwij ãñin ajiri ro nejiir ñõn aolep kwelok ko. Ilo wãwen in, rej lor nan in jiroñ eo an Jeova ñõn dri Israel ro ke ear kakien ir: ‘Kwon kokweloktok armij ro, man im kõra, im ajiri, . . .  bwe ren roñjake, im bwe ren katak, im mijõk Jeova am Anij, im lali in kõmõn nan ko otemjej an kien in; im bwe ro nejir, ro rar jaje kake, ren roñjake im jela mijõk Jeova am Anij.’​—Dut. 31:12, 13.

Ajiri ro remaroñ jino katak kin Nan eo an Jeova jen ien eo rej drik wõt. Ikijen Timote, dri jilik Paul ear ba: “Jen ke kwoj ajiri, kw’ar jela jeje ko rokwojarjar.” (2 Tim. 3:​15) Ilo ien kwelok ko, ajiri ro redrik rej jino air melele kin katak ko im kiili al in kwelok ko. Ilo kwelok kein, rej katak ñõn kajerbal im koutiej Baibel eo im buk ko jet me rej berber ion Baibel. Bareinwõt, ilo kwelok ko ar renaj kile yokwe eo emol me ej karkar eo karkarin dri kalor ro an Kraist. Jisõs ear ba: “Kien ekãl Ij  lewoj ñõn kom, Komin yokwe dron; einwõt I ar yokwe kom, komin bareinwõt yokwe dron. Ilo men in armij otemjej re naj jela bwe komij dri kalora, elañe komij yokwe dron.” (Jon 13:34, 35) Yokwe eo eokmãnãn im jokõne eo emol me jej loe ilo Imõn Kwelok eo enaj karel ajiri ro im jibõñ ir ñõn keini air ber ilo kwelok ko ilo aolepen air mour.

Ñe ro jemen im jinen rej kõmõn bwe en juõn mõnit ibeir ñõn air mõkõj ñõn Imõn Kwelok eo im ber jidrik elikin kwelok eo, enaj bellok juõn ien emõn ñõn an ajiri ro nejiir ejaak jimjera ko iben ro jet. Ijellokin air kõtlok bwe ren kõmao wõt iben ajiri ro jet, emõn bwe ren kwalok kajeir ñõn aolep ro jeir im jãtir. Elañe rejela kajen ro reridto, ajiri ro renaj jela im lo bwe elõñ bwebwenato ko rekalõñliñ rar iioni ilo mour eo air im bwe elap meletlet ibeir. Einwõt an kar joñok eo emõn an Zekaraia, “ri kabilõk eo,” jelet kiñ in Juda eo etan Uzzaia, eindrein, joñok ko remõn an ro im rar korijer ñõn Jeova ilo tiljek iomin elõñ yiõ ko remaroñ jelet ajiri ro ranin. (2 Kron. 26:​1, 4, 5, UBS) Ilo Imõn Kwelok eo, ro jemen im jinen remaroñ bareinwõt kemeleleik ro nejiir kin library eo ilo Imõn Kwelok eo, board in kajela eo, im kin men ko jet.

Rolul eo Ibelakin Lõl

Ajiri ro rej aikwij melele bwe congregation eo air ej mõtõn rolul eo ibelakin lõl me ej kitibuj elõñlok jen 100,000 congregation ko. Kemelele kin mõtõn ko ilo rolul in, wãwen ej jerbal, im kin ijo kwonan ajiri ro ñõn rejetake rolul in. Kwalok ñõn ir kin etke komij reimanlok ñõn ien kwelok ko relap im ien lotok ko an circuit overseer eo.​—Lale box eo “Katak ko ñõn Etali ilo Ien Kabuñ an Baamle,” ilo peij 28.

Ro jemen im jinen remaroñ kir overseer ro rej itoitak, mejinede ro, ro uan baamle eo ilo Betel, im dri kwalok full-time ro ñõn mweo imweir ñõn air mõña iben dron ñe ebellok juõn ien emõn ñõn air kõmõne men in. Komin jab bõk lemnok eo bwe ejelok air ien ñõn air ber iben ajiri ro. Dri korijer rein im rej bõk jerbal in full-time rej kate ir ñõn kajeoñwe Jisõs, eo im ear kõtlok bwe ajiri ro ren kebake e im konono iben. (Mark 10:13-​16) Ñe ajiri ro rej roñjake bwebwenato ko rar walok ilo mour eo air im lo air lõñliñ kin jerbal eo air ñõn Jeova, men in emaroñ kamakõt ir ñõn kõmõn bwe jerbal in full-time en mejenkajik eo air.

Bar ta eo kom maroñ kõmõne einwõt juõn baamle ñõn jibõñ ro nejimi bwe en laplok air jela kin rolul eo an Jeova? Eñin jet ian nan in rejañ ko: Kom maroñ kõmõn bwe en mejenkajik eo ami ñõn etale buk eo etan Jehovah’s Witnesses​—Proclaimers of God’s Kingdom. * Kom maroñ kalikar kin yokwe, etã buru im tiljek eo an dri korijer ro an Jeova. Kwalok kin wãwen an kar Jeova kajerbale ir ñõn kajededlok nuuj eo emõn ibelakin lõl. Kajerbal video ko an rolul eo an Jeova ñõn katakin ir kin katak ko raurõk jen ien ko etto im ilo ran kein. Elañe kom maroñ, lolok ra eo eber ilo ailiñ eo am ak ilo ailiñ ko jet. Ien lolok kein renaj kalikar ñõn ro nejimi kin wãwen eo rolul eo an Jeova ion lõl iomin tel eo an kumi in dri korijer eo etiljek kar karõke ñõn letok katak ko im ej tel ro jeer im jãter ibelakin lõl, einwõt kar walok ilo ien ko an dri Kristian ro jinoin.​—Matu 24:45-​47; Jerb. 15:​22-​31.

Kemelele eo Am En Ekkar ñõn Ajiri Eo

Ñe komij katakin ro nejimi, kememej wãwen an kar Jisõs katakin dri jilik ro an. Juõn ien ear ba ñõn ir: “Bar elõñ men ko iba bwe In ba ñõn kom, a kom jab maroñ in bõki kiõ.” (Jon 16:12) Ear jab tarjen joñõn an kar Jisõs lelok melele ko ñõn dri jilik ro an. Jen  men in, ear katakin ir jidrik kin jidrik kin katak ko raurõk bwe ren maroñ lukkun melele. Eindrein, en jab tarjen joñõn ami kemelele ajiri eo nejimi. Ñe komij keini ami katakin ir kin rolul eo an Jeova im kõmõne men in jidrik kin jidrik, kom naj kalaplok air itoklimo im kõmõn bwe air katak kin congregation eo an Kristian en kalõñliñ ir. Ilo an ajiri ro nejimi ridtolok im oktõk aikwij ko air, kom maroñ bar eliji im kalaplok melele eo air kin men ko emwij air kar katak kaki.

Congregation eo an Kristian ej wãwen eo elap an aurõk ñõn kakajurlok kõtan eo ar iben Anij, im ajiri ro rej niknik in bõk kwonair ilo makõtkit ko ie enaj laplok air pojõk in jumae menin kareelel ko an lõl in an Setan. (Rom 12:2) Kimij liki bwe kom naj lo elap lõñliñ ilo ami jibõñ ro nejimi ñõn jela kin rolul eo an Jeova. Jen kejerammõn eo jen Jeova, kimij kejatrikrik bwe renaj tiljek wõt ñõn rolul eo im ñõn Anij eo eyokwe im jej korijer ñõn e.

[Box/​Pija ilo peij 28]

Katak ko ñõn Etali ilo Ien Kabuñ an Baamle

Eñin jet ian katak ko rej ekkejellok iben rolul eo an Jeova me kom maroñ etali ilo jotenin Kabuñ an Baamle.

▪ Etale bwebwenato ko kin congregation eo am kin ñãt im ewi wãwen an kar jino jutõk. Bareinwõt kin Imõn Kwelok ko congregation eo ear kajerbale mokta. Ñõn bwebwenato kin men kein, emõn bwe kwon kirtok juõn eo eto an ber ilo congregation eo ñõn mweo imõm ñõn uaki kajitõk ko an ajiri ro nejimi.

▪ Kemelele kin mejenkajik eo an kajjojo kwelok ko an congregation eo im kwelok ko relap im kin ewi wãwen ajiri ro remaroñ bõk tokjen jeni.

▪ Etali unin kajjojo jikuul ko an rolul eo an Jeova. Kwalok bwebwenato ko kin tõbrõk ko me ro rar kadrioijlok jen jikuul kein rar kõmõni.

▪ Jibõñ ajiri ro ñõn kile bwe elap an aurõk ñõn air erom dri kwalok ro rej keini in kwalok kin nuuj eo emõn. Kwalok ñõn ir kin ewi wãwen remaroñ bõk kwonair ilo tõbrõk ko rej walok ilo report eo kin jerbal in kwalok nan ibelakin lõl ilo Yearbook eo an Dri Kennan ro an Jeova. *

▪ Etali kajjojo jerbal in full-time ko im rej bellok ñõn jodrikdrik ro ilo rolul eo an Jeova. Kwomaroñ lo melele ko remõn ilo Ar Jerbal ñõn Ailiñ Eo an Maaj 2007, peij 3-6.

▪ Jibõñ ajiri ro ñõn melele kin etke rej kõmõn jet men ko ilo congregation eo. Kemeleleik ir etke rejjab aikwij jenolok jen rolul eo an Jeova, meñe ilo men ko redrik. Kwalok ñõn ir bwe wãwen eo remaroñ kõmõn ainemõn ilo congregation eo ej ilo air lor nan in tel ko an elder ro.

[Kamelele Ko eo itulal]

[Pija ko ilo peij 26]

Einwõt ilo ien ko an dri Israel ro, ro jemen im jinen ranin rej kate ir ñõn lelok uak ko rekajuburu ñe ajiri ro rej kajitõk kin rolul eo an Jeova

[Pija ilo peij 28]

Ro nejimi renaj bõk tokjen jen air ejaak jimjera ko iben ro im eto air korijer ñõn Jeova