Kõmõn bwe in Boub Wõt ilo Rolul eo an Jeova

EKKAR ÑÕN VERNON ZUBKO

IAR ridtolok ilo juõn jikin ebake Stenen, juõn bukwon im ej ber ilo Saskatchewan ilo Canada. Jema im jinõ, etair Fred im Adella, rar kate ir ñõn kabwe aikwij ko an ledrik eo jeiõ, Aurellia, ña, im ro jãtiõ, Alvin, Allegra, im Daryl im bareinwõt katakin kim kin Jeova. Ñõn ranin, kimij kamolol jemem im jinim kin air kar katakin kim kin mol eo.

Jema, eo ej juõn dri kabit, ear juõn dri kwalok nan ekijejeto im beran. Ear kate e ñõn kabwe aikwij ko am, im ear bareinwõt kõmõn bwe aolep ren jela bwe ej juõn ian Dri Kennan ro an Jeova. Ien otemjej ear konono kin mol eo. Iban meloklok joñok eo an emõn kin kijejeto im beran. Ekkã an kar jiroñ iõ, “Kwon boub wõt ilo rolul eo an Jeova, inem kwonaj bõprae yuk jen am iion elõñ abañ ko.”

Ekkã am kar kwalok nan iturin ial ko ilo Stenen im ilo bukwon ko jet rebak. Bõtab, ejjab aolep ien men in ear biruru ñõn ña. Ilo kajjojo bukwon ko ear or kumi in dri koaroñ ro, ro im rar jibarek kim jodrikdrik ro im kajirere kake kim. Juõn ien ke ear drualitõk aõ yiõ, juõn kumi in jodrikdrik rar kabole iõ ke iar jutõk iturin ial eo kin Imõniaroñroñ eo im buk eo etan Ruj! (Awake!). Rar kanõke at eo aõ jen bõra im likiti ion jur eo ituriõ. Emõn bwe juõn brother eridto ear loe ta eo ear walok inem ear kebake iõ im kajitõk, “Vern, ta eo ej walok?” Im ladrik ro rar mõkõj im ko. Meñe men in iar iione ear kailluik iõ, ak ear katakin iõ bwe ñe jej kwalok nan iturin ial ko, jej aikwij kebak armij ro im jab jutõk wõt einwõt juõn jur. Wãwen kein iar iioni ke iar ridtolok rar bareinwõt kaberan iõ ñõn aõ kwalok nan jen im ñõn im.

Kimro Alvin kar baptais ilo Mei 1951. Kar 13 aõ yiõ ilo ien eo. Ij kememej wõt an kar Brother  Jack Nathan, eo ear kwalok katak eo kin baptais, rejañ kim ñõn jab kõtlok bwe en motlok juõn aliñ in am jab konono ñõn ro jet kin Jeova. Baamle eo am ear watõk jerbal in pioneer einwõt jerbal eo emõntata. Inem ilo yiõ eo 1958, elikin aõ kar kadrioijlok jen jikuul, iar emakõt ñõn aõ pioneer ilo juõn jikin etan Winnipeg ilo Manitoba. Meñe jema ear mõnõnõ ke iar jerbal iben ilo business eo an baamle eo einwõt juõn eo ej kameoeoiki alal ko, ak ear lap airro jinõ rejañ iõ bwe in bõk jerbal in kwalok nan full-time im rar rejetake bebe eo aõ ñõn emakõt.

Juõn Jikin Ekãl im Juõn Mõta Ekãl

Ilo yiõ eo 1959 ra eo ear kir jabrewõt eo emaroñ emakõt ñõn Quebec, ijo ear lap aikwij dri kwalok nan ro ie. Iar etal im pioneer ilo Montreal. Men in ear juõn oktõk elap! Ear lukkun oktõk jen jabrewõt men iar kõmõne mokta ilo mour eo aõ, ke iar katak kajin French im katak ñõn mour ekkar ñõn mõnit  ko air. Circuit overseer eo am ear jiroñ iõ, “Kwon jab ba, ‘Eñin wãwen eo kimar kõmõne ilo bukwon eo aõ.’ ” Ear juõn nan in rejañ emõn.​—1 Kor. 9:​22, 23.

Ear ejelok mõta pioneer ke iar emakõtlok ñõn Quebec. Bõtab, juõn sister etan Shirley Turcotte, eo iar iione moktalok ilo Winnepeg, ear erom juõn mõta ñõn indrio ke komro ear mare ilo Pãpode 1961. Ear bareinwõt itok jen juõn baamle im elap an yokwe Jeova. Iar jab lukkun kile ilo ien eo bwe enaj kar juõn eo im elap an kakajur im kõkãtõk iõ iomin aolepen yiõ ko.

Jerbal in Kwalok Nan ilo Gaspé

Ruo yiõ elikin amro mare, kar jitõñ komro ñõn jerbal einwõt special pioneer ilo jikin eo etan Rimouski ilo Quebec. Ilo yiõ eo tok juõn, ra eo ear kajitõk ibemro ñõn kõmõne jerbal in kwalok nan eo ilujen Gaspé Peninsula, im ej ber iturear in Canada. Jerbal eo am kar ñõn kwalok kin mol eo ñõn elõñ armij ro joñõn wõt am maroñ. (Ekk. 11:6) Kimar kanne wa eo waam kin elõñlok jen 1,000 magazine ko im enañin 400 buk ko im bareinwõt jet mõña im nuknuk ko, inem kimar ilok ilo ial in kwalok nan eo am juõn aliñ aitokõn. Ear lukkun let am kwalok nan ilo aolep bukwon ko redrik ilo Gaspé. Kar kajela ilo radio bwe Dri Kennan ro an Jeova renaj itok ñõn bukwon eo im kar ba ñõn armij ro bwe ren jab bõk jabrewõt buk ko jen ir. Bõtab, enañin aolep armij ro ilo bukwon eo ear bwir air melele kin kajela eo im rar lemnok bwe ear kareelel kin buk ko ar, kin men in rar mõnõnõ in ebbõk air buk.

Ilo kar yiõ ko, anemkwoj in kwalok nan ear kãl ilo jet jikin ko ilo Quebec, im ear ekkã an bõlijmãn ro kabwijrõk kim. Men in ear walok ilo juõn ian bukwon ko kimar dror buk ko ie ilo enañin aolep moko. Juõn bõlijmãn ear kajitõk bwe kimin etal iben ñõn mõn bõlijmãn, im kimar kõmõne men in. Iar lo bwe lawyer eo an bukwon eo ear kakien bõlijmãn ro ñõn kabwijrõk kim jen am kwalok nan. Kinke eo ej jeban bõlijmãn ro ear joko ilo ien eo, iar kwalok ñõn lawyer eo juõn letter jen ra eo ilo Toronto im ej kemelele kin maroñ eo am ñõn kwalok nan. Elikin an kar lawyer eo riiti letter eo, ear mõkõj im ba: “Ijjab kõnan bwe en or abañ. Pris eo ear jiroñ iõ bwe in kabwijrõk kom.” Kinke kimar kõnan bwe armij ro ilo bukwon eo ren kile bwe jerbal eo am ear jab nae kien, ilo mõkõj kimar jeblak im kamwijlok am jerbal in kwalok nan jen ijo bõlijmãn ro rar kabwijrõk kim jene.

Ilo jiboñin ran eo tok juõn, kimar jeblak im bukot eo ej jeban bõlijmãn ro. Ke ear roñ bwe rar kabwijrõk kim jen am kwalok nan, ear jab mõnõnõ. Ear illu ke ear kennan iben lawyer eo ilo telephone! Bõlijmãn in ear jiroñ kim bwe kimin call e elañe enaj bar or jabrewõt abañ, im enaj kamarmire abañ eo. Meñe kim ruwamaejet im kimij jab lukkun jela kajin French, ak kimar kile an armij ro lukkun joij im jela karuwainene. Bõtab kimar lemnok, ‘Eor ke juõn ien rein renaj jela kin mol eo?’ Kimar lo uak eo jet yiõ ko tokelik ke kimar jeblak ñõn kalek Imõn Kwelok ko ilo Gaspé. Kimar lo bwe elõñ ian ro im kimar kwalok nan ñõn ir, rej kiõ jet ian ro jeer im jãter. Emol bwe Jeova eo ej kõmõn bwe en edrek.​—1 Kor. 3:6, 7.

Juõn Menin Letok

Ledrik eo nejimro etan Lisa ear lotak ilo yiõ eo 1970. Menin letok in jen Jeova ear kalaplok amro lõñliñ. Shirley im Lisa rar jerbal iba ilo elõñ jerbal in ekkal Imõn Kwelok ko. Elikin an kar Lisa kamwij an jikuul, ear ba: “Eokwe, Mama im Baba, kinke iar kõmõn bwe komro en bwijrõk jen jerbal in full-time iomin jidrik ien, inaj erom juõn pioneer ñõn bõk jikin ien ko komro ear bwijrõk jen amiro pioneer.” Elõñlok jen 20 yiõ ko tokelik, Lisa ej wõnmanlok wõt im jerbal einwõt juõn pioneer, bõtab kiõ ej pioneer iben leo belen etan Sylvain. Irro jimor kar bõk jerammõn eo ñõn jerbal ilo jet ian jerbal in ekkal ko ilo ailiñ ko  jet. Mejenkajik eo am einwõt juõn baamle ej ñõn kõmõn bwe mour eo am en lamwan im ñõn kalaplok ijo kwonam ilo jerbal eo an Jeova. Ijañin meloklok nan ko an Lisa ke ear jino pioneer. Ilo mol, ear kamakõt iõ ñõn aõ jeblak ñõn jerbal in kwalok nan full-time ilo yiõ eo 2001, im jen ien eo ij pioneer wõt. Jerbal in pioneer ej wõnmanlok wõt im katakin iõ ñõn liki Jeova ilo men otemjej ij kõmõne im ñõn bõk juõn mour elamwan im ekalõñliñ.

Jej Aikwij Kwalok Yokwe im Tiljek ilo Jerbal in Ekkal

Jeova ear katakin iõ bwe elañe jej kõtlok bwe en kajerbal kij im mõnõnõ in kõmõne jabrewõt jerbal ej letok ñõn kij, inem jenaj bõk elõñ jerammõn ko. Aõ jerbal einwõt juõn ian committee eo ej lolorjake jerbal in ekkal im bõk kwonaõ ilo jerbal in ekkal ko iben ro jeiõ im jãtiõ ilo Quebec im joko jet ej juõn jerammõn elap.

Meñe jet ian ro rej jibõñ ilo jerbal in ekkal rejjab wejepedik ilo air kwalok katak ko, ak ñe rej kalek Imõn Kwelok ko relukkun kabel ilo air jerbal. Kabel ko an rein rej alikar ilo jerbal ko air im rej kamaat air maroñ ñõn kõmõne jerbal in. Im kin tokjen jerbal ko air ej jutõk juõn Imõn Kwelok eaibujuij ñõn air kajerbale ñõn kabuñ ñõn Jeova.

Kar kajitõk iba, “Ta karkar ko raurõktata ej aikwij or iben juõn eo ej mõnõnõ in jibõñ kalek Imõn Kwelok ko?” Jen wãwen ko iar iioni, juõn armij ej aikwij moktata yokwe Jeova im Nejin im bareinwõt rolul in jimjãn jimjãtin eo. (1 Kor. 16:14) Kein karuo, ej aikwij kwalok tiljek kinke ñe jet men rejjab ekkar ñõn kõnan ko an, im ejelok berre bwe men in enaj walok, juõn armij eo ej kwalok an tiljek enaj wõnmanlok wõt ilo an rejetake karõk ko an rolul eo. Tiljek enaj kamakõt e ñõn an mõnõnõ in jibõñ ilo jerbal in ekkal ko jet.

Elap Aõ Kamolol Jeova

Meñe jema ear mij ilo yiõ eo 1985, ak nan in rejañ ko an ñõn boub wõt ilo rolul eo an Jeova rej edrep wõt ilo lemnok eo aõ. Einwõt ro im emwij air bõk jerbal eo air ilo rolul eo an Jeova ilõñ, ejelok berre bwe elap an boub. (Rev. 14:13) Jinõ ej 97 an yiõ kiõ, im ejjab maroñ kennan einwõt kar mokta kinke emij rãjetin enbwinin, bõtab ej kememej wõt eon ko ilo Baibel eo. Ej kobaik jet eon ko jen Baibel eo ilo letter eo an im rejañ kim ñõn am wõnmanlok wõt im korijer ñõn Jeova ilo tiljek. Elap am kamolol jemem im jinim kin yokwe eo air elap ñõn kim!

Elap aõ bareinwõt kamolol Jeova kin Shirley, kõra eo beleiõ im eo mõta etiljek. Ej drebij wõt nan in rejañ ko an jinen ilo buruen, “Vern enaj lukkun boub ilo mol eo, im kwonaj aikwij kõtlok bwe ro jet ren kajerbal e.” Ke komro ear mare 49 yiõ ko remotlok, komro ear beek ñõn am ridtolok iben dron, korijer ñõn Jeova, im elañe komro jimor naj ellã jen jemlokõn jukjuk im ber in, komro naj jeblak im bar inono im wõnmanlok im korijer ñõn e ñõn indrio. Aet, ear lap am bõk kwonam “ilo jerbal an Iroij.” (1 Kor. 15:58) Ear mol an Jeova kejbãrok kim im kabwe aolep aikwij ko am.

[Pija ilo peij 31]

“Mejenkajik eo am einwõt juõn baamle ej ñõn kõmõn bwe mour eo am en lamwan im ñõn kalaplok ijo kwonam ilo jerbal eo an Jeova”