“Men in Ear Jibõñ Iõ ñõn Tõbar Buruen Armij Ro”

ILO Porto Alegre, juõn bukwon ilo itueañin Brazil, ear walok juõn kwelok elap kin abañ ko rej jelet armij ro. Elõñ tausan armij ro jen 135 ailiñ ko rar ber ilo kwelok in. Ilo ien kakije ko, juõn kumi in dri Kennan ro jen juõn congregation ilo Porto Alegre rar kebake elõñ ian dri lotok rein bwe ren maroñ kwalok nan ibeir kin ennan eo ilo Baibel ikijen Ailiñ eo. Ewi wãwen air kar konono ibeir?

Juõn pioneer etan Elizabete ej kememej im ba, “Kimar kajerbale buk eo etan Nuuj eo Emõn ñõn Armij Ro Jen Ailiñ ko Otemjej.” Ear wõnmanlok wõt im ba: “Elõñ ian dri lotok ro rejañin kar roñ kin nuuj eo emõn kin Ailiñ eo, ak rar mõnõnõ in roñjake. Kimar konono iben armij ro jen Bolivia, China, France, India, Israel, im Nigeria. Ear or ibem buk ko ilo kajin eo an jet ian dri lotok ro, im rar mõnõnõ in bõk air buk.”

Ilo Mexico juõn pioneer etan Raúl ear bareinwõt kajerbale buk in im ear lo elap tõbrõk. Ilo jet ien ko remotlok, ear kebake juõn lõlap 80 an yiõ im ej juõn dri Arab, eo ej kab mij lio belen. Elikin an kar lõlap in riiti peij eo ilo buk eo me ej kwalok kin ennan eo an Ailiñ eo ilo kajin Arab, ear toor drenin kemjalal kinke ear lukkun lõñliñ. Etke? Kalimur eo an Anij bwe enaj ejelok bar mij ekkar ñõn Reveles̃õn 21:​3, 4, ear lukkun jelet buruen ke ear riiti ilo kajin eo an mõke. Ilo bar juõn ien, ke ear kwalok nan ilo ien ko remõntok, Raúl ear iion juõn eman in Portugal. Eman in ear bareinwõt luji juõn eo ejitenburu iben ilo mij, ladrik eo nejin. Raúl ear lelok bwe en riiti peij eo ilo kajin Portugese ilo buk eo. Elikin an riiti, eman eo ear mõnõnõ in kalaplok an jela kin Baibel eo ilo an kar kõnan katak Baibel.

Raúl ear kajerbal buk eo, Nuuj eo Emõn ñõn Armij Ro Jen Ailiñ ko Otemjej ñõn an kwalok nan iben ro rej konono ilo kajin Armenia, China, Belle, French, Germany, Hindi, Korea, Mixe, Persia, Russia, im Zapotec. Ear ba: “Iar kile joñõn an aurõk ñõn kajerbale buk in ñe ij kwalok nan. Ear jibõñ iõ ñõn tõbar buruen armij ro meñe ijjab konono kajin eo air.”

Ke ej lõñlok armij ro rej itoitak im emakõt ñõn ailiñ ko jet, ejelok berre jenaj iion elõñ armij ro rej konono bar juõn kajin. Im jemaroñ kajerbal ien kein rebellok ñõn kwalok kin ennan eo kin Ailiñ eo ñõn rein ilo ar kajerbal buk eo Nuuj eo Emõn ñõn Armij Ro Jen Ailiñ ko Otemjej. Kwoj ke bõk buk in ibõm ñe kwoj kwalok nan?

[Kamelele eo Itulal]

Ejelok ilo kajin Majõl.

[Pija ilo peij 32]

Raúl ej kajerbal buk eo me ej jibõñ e ñõn tõbar buruen armij ro