Wõnmanlok Wõt im Bukõt Mokta “Kwojarjar eo An”

“A komin bukot mokta ailiñ in Anij, im kwojarjar eo An; im naj koorlok men kein otemjej ñõn kom.”​—MATU 6:​33.

1, 2. Ta in kwojarjar eo an Anij, im ej berber ion ta?

 “AKOMIN bukot mokta ailiñ in Anij.” (Matu 6:​33) Dri Kennan ro an Jeova ranin elap air jela kin nan in kakabilek in Jisõs Kraist ear kwaloke ilo Katak eo an ion Tol eo. Ilo aolepen wãwen ar mour, jej kajeoñ kalikar bwe jej yokwe kien Ailiñ in im jekõnan tiljek ñõne. Bõtab jej aikwij bar lemnok kin nan ko jet ilo eon in, ke ej ba “im kwojarjar eo An.” Ta in kwojarjar eo an Anij, im ta melelen ñõn bukot mokta kwojarjar eo an?

² Ilo kajin eo jinoin, nan ko kar ukot “kwojarjar” jene kar bareinwõt ukoti ñõn “ekajet jime” ak “wãnik.” Kin men in, kwojarjar eo an Anij ejime im wãnik ekkar ñõn kien ko an. Kinke Jeova ej dri Kõmõnmõn eo, ej tellokin ñõn an karõk kien ko ikijen men ko remõn im nana ak kin men ko rejime im bwir. (Rev. 4:​11) Bõtab, kwojarjar eo an Anij ejjab kitibuj juõn lajrõk in kien ko rebin im lõñ. Jen men in, ej berber ion kain Anij rõt Jeova im karkar eo an elap kin ekajet jime, ekoba karkar ko jet an relap einwõt yokwe, meletlet, im kajur. Inem kwojarjar eo an Anij ej ekkejellok iben ankilan im karõk eo an im ej kitibuj men ko ekõnan bwe ro rej korijer ñõn e ren kõmõni.

3. (a) Ta melelen ñõn bukot mokta kwojarjar eo an Anij? (b) Etke jej kejbãrok kien ko rewãnik an Jeova?

 ³ Ta melelen ñõn bukot mokta kwojarjar eo an Anij? Ej melelen ar kõmõnmõn ankilan Anij bwe jen maroñ kabuñburuen. Ar bukot kwojarjar eo an ej kitibuj ar kate kij ñõn mour ekkar ñõn kien ko an rewãnik im jab kien ko ar mõke. (Riit Dri Rom 12:2.) Wãwen mour in ej kitibuj kõtan eo ar iben Jeova. Kin men in, yokwe ej karkar eo me ej kamakõt kij ñõn ar kate in kabuñburuen Jeova ilo ar bokake kien ko an, im ejjab kin ar mijõk in bõk kaje. Jej kile bwe eñin men eo ejime ñõn ar kõmõne kinke ej karõk eo an Anij ñõn kij. Einwõt Jisõs Kraist, Kiñ eo an Ailiñ in Anij, jej aikwij yokwe men ko rekwojarjar.​—Hib. 1:​8, 9.

4. Etke eaurõk ñõn ar bukot kwojarjar eo an Anij?

⁴ Ewi joñõn an aurõk ñõn ar bukot kwojarjar eo an Jeova? Lemnok mõk kin men in: Melejoñ eo ilo jikin kallip in Iden ear berber ion elañe Adam im Iv renaj kar kõtãik ir iomin kien ko an Jeova ak jab. (Jen. 2:​17; 3:5) Airro kar likjõp in kõmõne men in ear bõktok iñtan im mij ion ajiri ro nejiir. (Rom 5:​12) Ijo turãjet, Nan eo an Anij ej ba: ‘Eo ej lore wãnik im joij, ej lo mour, wãnik im nebar.’ (Ken. 21:21) Aet, ilo ar bukot mokta kwojarjar eo an Anij, jenaj maroñ ejaak juõn kõtan emõn iben Jeova im enaj tellok kij ñõn ar bõk lomor.​—Rom 3:​23, 24.

Kauwatata eo ñõn Ar Kowãnik Kij Mõke

5. Ta men eo ekauwatata jej aikwij kejbãrok kij jene?

⁵ Ilo letter eo an ñõn dri Kristian ro ilo Rom, Paul ear kwalok kin juõn men ekauwatata me kij aolep jej aikwij kejbãrok kij jene elañe jekõnan lo tõbrõk ilo ar bukot mokta kwojarjar eo an Anij. Ikijen dri Ju ro mõtõn, Paul ear ba: “Ij kennan kin ir, bwe eor kijejeto ñõn Anij ibeir, a e jab ekar ñõn jela. Bwe kin air jaje wãnik an Anij, im bukot bwe ren kabin air mõke wãnik, r’ar jab kõtaik ir ñõn wãnik an Anij.” (Rom 10:​2, 3) Ekkar ñõn Paul, dri korijer rein rar jab melele kin kwojarjar eo an Anij kinke rar boub in kowãnik ir mõke. *

6. Kain lemnok rõt eo jej aikwij kejbãrok kij jene, im etke?

⁶ Juõn wãwen emaroñ kõmõn bwe jen lorõk ilo aujir in ej ikijen ar keiri kij iben ro jet ilo ar korijer ñõn Anij. Ar bõk lemnok rõt in emaroñ kõmõn bwe en tarjen joñõn ar liki meletlet eo ar im kõmõn ko ar rejime. Ilo mol, elañe jej eindrein, jej kwalok bwe jej meloklok kin kwojarjar eo an Jeova. (Gal. 6:​3, 4) Unin ar kõmõni men ko rejime en kar kin ar yokwe Jeova. Jibarbar ko ar ñõn kowãnik kij mõke ej kariõp ar ba bwe jej yokwe Jeova.​—Riit Luk 16:15.

7. Ewi wãwen an kar Jisõs kwalok abañ eo kin ro rej kowãnik ir mõke?

⁷ Jisõs ear inebata kin “ro rej mõke liki ir bwe rej jime, im kejekron ro jet.” Ear kwalok abañ eo kin ro rej kowãnik ir mõke ikijen wanjoñok in: “Ruo armij rej wõnliñ iloan tempel bwe ren jar; juõn dri Parisi, im eo juõn dri tel owõj. Dri Parisi ej mõke jutõk im jar ein drein, O Anij, ij ba kom mol, bwe ña I jab einwõt armij ro jet, dri koaroñ, dri jab wãnik, dri lũñ, ak einwõt dri tel owõj in. Ij jitlok alen ruo ilo wik, ij lelok ken ka joñoul ian men otemjej ij jebareki. A dri tel owõj, e jutõk etolok, e jab kõnan reilok mejen ñõn lõñ, a ej ubrare ubõn im ba, O Anij, kwon tiriamokake iõ dri jerawiwi. Ij ba ñõn kom, Armij in ej wõnlõllok ñõn mweo imõn ewãnik jen eo juõn: bwe naj kõtaik ro otemjej rej mõke koutiej ir, im naj koutiej eo ej mõke kõtaik e.”​—Luk 18:​9-​14.

 Kauwatata eo ñõn Ar Kõmõn bwe Jen “Wãnik jen Joñõn Emõn”

8, 9. Ta melelen ñe jej “wãnik jen joñõn emõn,” im men in emaroñ tel kij ñõn ta?

⁸ Bar juõn men ekauwatata jej aikwij kejbãrok kij jene ej ber ilo Ekklisiastis 7:​16: “Kwon jab wãnik jen joñõn emõn; im kwon jab mõke kõmõn yuk meletlet jen joñõn emõn; etke kwon mõke kokkure yuk?” Ilo eon 20, ej wõnmanlok wõt im kwalok kin un eo jej aikwij kejbãrok kij jen ar bõk lemnok in: “Emol ejelok juõn armij dru wãnik ion lõl, eo ej kõmõn emõn, im e jab bwir.” Armij eo im ej “wãnik jen joñõn emõn” ej kajutõk kien ko an mõke kin men ko rejime im bwir im ekajete ro jet ekkar ñõn kien kein. Bõtab, ej likjõp in kile bwe ilo an kõmõne men in, ej kaurõklok kien ko an elaplok jen kien ko an Anij, im men in ej kalikar an jab wãnik iman mejen Anij.

⁹ Ar “wãnik jen joñõn emõn,” ak ‘jibadrek bwe jen kanuij emmõn,’ ekkar ñõn bar juõn ukok in Baibel, emaroñ kõmõn ar berre wãwen eo Jeova ej kamarmire men ko. Bõtab, jej aikwij kememej bwe elañe jej ekajete bebe ko rewãnik an Jeova, ilo mol jej likit kien ko ar kin men ko rejime im bwir ilõñin kien ko an Jeova. Ej einwõt ñe jej ekajete Jeova ekkar ñõn kien ko ar mõke. Bõtab, ej tellokin wõt Jeova ñõn an karõk kien ko kin men ko rejime im bwir im jab kij!​—Rom 14:10.

10. Einwõt wanjoñok eo kin Job, ta eo emaroñ kõmõn bwe jen ekajete Anij?

¹⁰ Meñe ejelok juõn iar ekõnan ekajete Anij, ak jab wãppen eo ar emaroñ kamakõt kij ñõn ar kõmõne men in. Emaroñ biruru an men in walok elañe jej lo juõn men im jej watõke bwe ejjab jime ak ñe jej iñtan kin wãwen ko rebin jej iioni. Eman eo etiljek Job ear kõmõne men in ebwir. Kar kwalok kin Job einwõt juõn armij “e wãppen im wãnik, im e ar mijõk Anij, im jeorlok jen nana.” (Job 1:1) Ak tokelik Job ear iion elõñ jorran ko im ear watõki bwe rejjab jime. Men in ear kõmõn bwe en “mõke kowãnik e, im jab Anij.” (Job 32:​1, 2) Kar aikwij kajime lemnok in an ebwir. Inem jejjab aikwij bwilõñ elañe jet ien jej iion juõn wãwen einlok wõt in. Elañe men in ej walok, ta eo emaroñ jibõñ kij ñõn kajime lemnok eo ar?

Ejjab Aolep Ien Jejela kin Aolep Melele Ko

11, 12. (a) Elañe jej lo bwe juõn men ejjab jime, ta eo jej aikwij kememeje? (b) Etke juõn emaroñ bõk lemnok eo bwe wanjoñok eo an Jisõs kin dri jerbal ro ej kwalok kin juõn men ejjab jime?

¹¹ Men eo moktata jej aikwij kememeje ej bwe ejjab aolep ien jejela kin aolep melele ko. Eñin men eo ear walok ñõn Job. Ear jab jela kin kwelok ko ilõñ an enjel ro nejin Anij, ijo Setan ear kinak e. (Job 1:​7-​12; 2:​1-6) Job ear jab kile bwe Setan eo ej unjen jorran ko ear iioni. Ilo mol, ejjab lukkun alikar elañe Job ear jela kin wõn Setan! Kin men in, ear bwir ilo an kar naruõn Anij kin jorran ko rar walok. Aet, ebiruru ñõn ar bõk lemnok eo ebwir ñe jejjab jela kin aolep melele ko.

¹² Lemnok kin wanjoñok eo an Jisõs kin  dri jerbal ro ilo juõn jikin kallip vain. (Riit Matu 20:​8-​16.) Ilo wanjoñok in, Jisõs ej kemelele bwe meñe dri jerbal ro an juõn iroij rej jerbal aolepen ran eo ak iomin juõn wõt auõ, wõnair ej joñõn wõt juõn. Ewi am lemnok kin men in? Ejime ke? Bwelen kwoj buromõj kake dri jerbal ro im rar jerbal iomin det ilo aolepen ran eo. Inem kwomaroñ bõk lemnok eo bwe ej tellokin an dri jerbal rein bõk juõn wõnan elaplok! Elañe kwar bõk lemnok in, kwomaroñ watõke iroij eo einwõt juõn eo ejelok an yokwe im ejjab jime an jerbal. Bareinwõt, ikijen uak eo an ñõn dri jerbal ro im rar aol ñõn e, kwomaroñ bõk lemnok eo bwe ejjab jime an iroij eo kajerbal maroñ eo an. Bõtab, jejela ke kin aolep melele ko?

13. Ta lemnok eo juõn jemaroñ bõke ikijen wanjoñok eo an Jisõs kin dri jerbal ro ilo jikin kallip eo?

¹³ Jen etale wanjoñok in ilo bar juõn wãwen. Ejelok berre bwe iroij eo ilo wanjoñok in ear jela bwe aolep eman rein rar aikwij najirik baamle ko air. Ilo ran ko an Jisõs, kar kõllãik wõnan dri jerbal ro ilo jikin kallip eo aolep ran. Baamle ko air rar atartar ion wõnair. Inem lemnok kin wãwen eo iben ro im iroij eo ear lo ir ke ej ebak an jota im kin men in rar maroñ jerbal iomin juõn wõt auõ. Bwelen wõnan air jerbal iomin juõn wõt auõ ejabwe ñõn air najirik baamle eo air, bõtab rar kwalok air mõnõnõ in jerbal ke rar kõtar aolepen ran eo. (Matu 20:​1-7) Ejjab air bwir kin unin air kar jab maroñ jerbal aolepen ran eo. Ejelok jabrewõt men ilo bwebwenato in ej kalikar bwe rein rar kajeoñ in bõprae air jerbal. Baj lemnok mõk elañe kwar aikwij kõtar aolepen ran eo im kwojela bwe baamle eo am ej atartar ion wõnan kõllã eo am. Enaj kar lap am kamolol bwe kwar maroñ lo juõn am jerbal, im kwonaj kar lukkun bwilõñ ñõn bõk juõn wõnan ebwe ñõn am najirik baamle eo am!

14. Ta men eo eaurõk jej katak jen wanjoñok eo kin jikin kallip vain eo?

¹⁴ Kiõ jen bar etale men eo iroij eo ear kõmõne. Ear jab drik jen joñõn eo ear kõllãik aolep dri jerbal ro an. Jen men in, ear watõk ir aolep bwe ej tellokir ñõn jerbal im bõk wõnair ñõn kabwe aikwij ko air mõke im an baamle eo air. Kin an lõñ ro im rej kabuk air jerbal, iroij eo emaroñ kar kortokjen ien in ñõn an kõllãik dri jerbal ro kin joñõn jããn eo elap an drik. Bõtab, ear jab kõmõne men in. Ear bwe joñõn wõnan aolep dri jerbal ro an ñõn air najirik baamle ko air. Ar lukkun etale melele kein emaroñ ukot lemnok eo ar kin kõmõn ko an iroij eo. Bebe eo an ear kwalok kin yokwe eo an im ear jab kajerbal maroñ eo an le jen joñõn. Ta eo jemaroñ katak jen men in? Ilo ar etale wõt jet ian melele ko, men in emaroñ kõmõn bwe jen bõk lemnok eo ebwir. Aet, wanjoñok in ej kalikar kin utiejen ak emõnin kwojarjar eo  an Anij, eo ejjab berber wõt ion kien ko im wãwen eo ej tellokin ñõn an armij eo bõke.

Lemnok eo Ar Emaroñ Bwir ak Eor Joñõn Ar Melele

15. Etke emaroñ bwir lemnok eo ar ak or joñõn melele ko iber kin men eo ejime?

¹⁵ Ñe jej bõk lemnok eo bwe wãwen eo jej iione ejjab jime, men eo kein karuo jej aikwij kememeje ej bwe lemnok eo ar emaroñ bwir ak eor joñõn ar melele. Men in emaroñ eindrein kin jab wãppen eo ar, mõnit ko ar, ak ar kaljiklok. Bareinwõt, kin an ejelok iber maroñ eo ñõn jela kin unin an armij ro kõmõni men ko im ta eo ej ber ilo burueir, men in ej kõmõn bwe en or joñõn melele ko iber. Bõtab, ejjab eindrein iben Jeova im Jisõs.​—Ken. 24:12; Matu 9:4; Luk 5:​22.

16, 17. Ke Devid ear jerawiwi iben Bat-shiba, etke Jeova ear jab ekajete irro ekkar ñõn kien eo an kin lũñ?

¹⁶ Jen etale bwebwenato eo kin Devid ke ear lũñ iben Bat-shiba. (2 Sam. 11:​2-5) Ekkar ñõn Kien Moses, ear tellokin airro mij. (Liv. 20:10; Dut. 22:22) Meñe Jeova ear kajeik irro, ak ear jab kamarmire wãwen eo ekkar ñõn kien ko an mõke. Men in Jeova ear kõmõne, ear ke juõn men ebwir? Jeova ear ke kaljiklok im kejekron kien ko An rewãnik? Eñin kar lemnok eo an jet ian ro im rej riiti Baibel eo.

¹⁷ Bõtab, Jeova ear lelok kien in kin lũñ ñõn dri ekajet ro rejjab wãppen, ro im rejjab maroñ jela ta eo ej ber ilo buruen armij ro. Meñe ear jab or maroñ in ibeir, ak kien in ear kõmõn bwe en jab oktaktak wãwen air ekajete armij ro. Ijo turãjet, Jeova ejela ta eo ej ber ilo buruen armij ro. (Jen. 18:25; 1 Kron. 29:17) Inem jen jab bõk lemnok eo bwe Jeova ej aikwij lor kien eo me ear kõmõne ñõn an dri ekajet ro rejjab wãppen kajerbale. Elañe ear eindrein, inem ej einwõt ñe jej jibed juõn armij ejjab bilo ñõn an kõnõk mejen bilo eo me kar kõmõne ñõn dri bilo ro. Jeova ear jela ta eo ej ber ilo buruen Devid im Bat-shiba im ear lo bwe ear mol airro ukwelok. Kin men in, Jeova ear ekajete irro ilo juõn wãwen ej kwalok tiriamokake im yokwe.

Wõnmanlok Wõt im Bukot Kwojarjar eo an Jeova

18, 19. Ta eo enaj jibõñ kij bwe jen jab ekajete Jeova ekkar ñõn kien ko ar mõke kin men ko rejime im bwir?

¹⁸ Inem elañe jet ien jej bõk lemnok eo bwe ejjab jime men eo Jeova ear kõmõne, bwelen ilo juõn bwebwenato jej riiti ilo Baibel eo ak jej iione ilo mour eo ar, jen jab ekajete Anij ekkar ñõn kien ko ar mõke kin men ko rejime im bwir. Kememej bwe ejjab aolep ien jejela kin aolep melele ko im emaroñ bwir lemnok eo ar ak or joñõn melele eo ar. Jen jab meloklok bwe “illu an armij e jab jerbale kwojarjar an Anij.” (Jem. 1:​19, 20) Ilo wãwen in, ‘buruer ejamin ñõrñõre Jeova.’​—Ken. 19:3.

¹⁹ Jen einwõt Jisõs ilo ar kile bwe ej tellokin wõt Jeova ñõn an karõk kien ko kin men ko rewãnik im remõn. (Mark 10:17, 18) Jen kate kij ñõn bõk ‘jelãlokjen eo emol’ kin kien ko an. (Rom 10:2, UBS; 2 Tim. 3:7) Ilo ar lor kien kein im mour ekkar ñõn ankilan Jeova, jej kwalok bwe jej bukot mokta “kwojarjar eo An.”​—Matu 6:​33.

[Kamelele eo Itulal]

Kwoj Ke Kememej?

• Etke eaurõk ñõn bukot kwojarjar eo an Jeova?

• Ta men ko ruo rekauwatata jej aikwij kejbãrok kij jeni?

• Ewi wãwen jemaroñ bukot mokta kwojarjar eo an Anij?

[Kajitõk ko ñan katak]

[Pija ilo peij 9]

Ta eo jej katak jen wanjoñok eo an Jisõs kin lõmaro ruo rar jar ilo tempel eo?

[Pija ilo peij 10]

Ear ke juõn men ejjab jime ñõn kõllã wõnan dri jerbal ro rar jerbal iomin 1 wõt auõ kin ejja wõnan eo wõt kar kõllãik ro rar jerbal aolepen ran eo?