‘Jerbal ko An Rej Lorlok E’

THEODORE JARACZ, eo ear uan Kumi eo Ej Tel Dri Kennan ro an Jeova, ear jemlok mour eo an ion lõl ilo jiboñin Wõnje, Juun 9, 2010. Ear 84 an yiõ im ear mour iben lio belen etan Melita iomin 53 yiõ. Ro jet im rej mour wõt ilo baamle eo an ej lio jein, leo mañden, im ruo mañden kõra.

Ear lotak ilo Jeptõmba 28, 1925, ilo Pike County, Kentucky, ilo Amerika. Brother Jaracz ear wujleplok mour eo an ñõn Jeova ke ear 15 an yiõ, ilo Okõj 10, 1941. Ruo yiõ tokelik ke ear 17 an yiõ, ear bõk jerbal in pioneer, im jen ien in ear wõnmanlok ilo jerbal in kwalok nan full-time enañin 67 yiõ ko.

Ilo 1946, ke ear 20 yiõ ridtõn, Brother Jaracz ear ber ilo kilaj eo kein ka jiljilimjuõn ilo jikuul eo ñõn mejinede ro. Elikin an kadrioijlok jen jikuul in, kar jilkinlok Brother Jaracz ñõn Cleveland, Ohio, ilo Amerika, bwe en jerbal einwõt juõn eo ej lolok congregation ko. Ilo 1951, kar jilkinlok e bwe en lolorjake jerbal ko ilo ra eo ilo Australia. Ilo yearbook eo an Dri Kennan ro an Jeova ilo 1983, ear kwalok bwe Brother Jaracz “ear lap an kõkãtõk brother im sister ro ilo aolepen ailiñ in kin an kijejeto ilo an lolorjake karõk ko an rolul in im kin an tel ilo jerbal in kwalok nan.”

Elikin an kar jeblak ñõn Amerika, Brother Jaracz ear mareik Melita Lasko ilo Tijemba 10, 1956. Elikin wõt air mare rar bõk jerbal in itoitak im lolok congregation ko ilo elõñ jikin ko ilo Amerika. Ilo jemlokõn lok 1974, kar kir Brother Jaracz bwe en ber ilo Kumi eo Ej Tel Dri Kennan ro an Jeova.

Jenaj kememej wõt Brother Jaracz einwõt juõn dri korijeran Jeova ekijejeto im tiljek, im ear wujleplok aolepen buruen ñõn makõtkit ko an rolul eo an Jeova. Ear juõn eman elap an yokwe im kea kin kõra eo belen, bareinwõt juõn eo ekajur ilo tõmak im ear likit aikwij ko an ro jet imanin aikwij ko an mõke. (1 Kor. 13:​4, 5) An itoklimo kin ro jet, ear alikar ilo an kar kõnan bwe aolep armij ren emõn air kõmõn ñõn dron im tiriamokake dron. Bareinwõt, an lukkun yokwe im itoklimo kin armij ro ear alikar ilo an kar kijejeto ilo jerbal in kwalok nan.

Meñe jej lukkun buromõj kin joko in an dri jerbal in ekijejeto jen baamle eo ilo Betel im rolul in jimjãn jimjãtin eo ibelakin lõl, jej mõnõnõ kin aolep jerbal ko retiljek an Brother Jaracz iomin elõñ yiõ ko. Elap ar liki bwe ear ‘tiljek ñõn mij im naj lelok ñõn e belin eo belin mour.’ (Rev. 2:​10) Jej bareinwõt jela bwe aolep ‘jerbal ko an rej lorlok e.’​—Rev. 14:13.