Kajitõk ko jen Ro Rej Riit

Jisõs ear jiroñ ro rar roñjake: “Komij aikwij in webben einwõt an Jememi ilõñ webben.” Ewi wãwen armij ro ranin remaroñ “webben”?​—Matu 5:​48, UBS.

Ñõn ar lo uak in kajitõk in jej aikwij melele kin ewi wãwen Baibel eo ej kajerbal nan in “webben.” Ñe Baibel eo ej kwalok kin an juõn men webben, ejjab aolep ien ej ilo wãwen eo elikieo im ejejit. Emol bwe Jeova wõt ekanuij webben. Armij ak men ko remaroñ webben, bõtab ejjab melelen bwe rej webben einwõt Anij. Nan in Hibru im Grik ko ilo Baibel im kar ukote nan eo “webben”, ekkã an melelen “likieo,” “ridto ilo lemnok,” ak “ejelok likjõp” ekkar ñõn kakien ko an juõn eo eutiej. Ñe jej konono, ekkã ar kajerbal nan in ilo wãwen ko jet. Ñõn wanjoñok, jet ien jej ba, “ewebben bebe eo rar kõmõne.”

Kar kõmõnmõn Adam im Iv bwe ren webben ilo mwil, lemnok, im ilo enbwin. Rar webben ekkar ñõn wãwen eo Dri Kõmõnmõn eo air ear karõke ke ear kõmõnmõn ir. Kin air kar jab bokake, rar luji mour webben eo kar air mokta, im men in ear jelet ajiri ro nejiir. Kin men in, ikijen Adam, jerawiwi, jab webben, im mij rar jededlok ñõn armij otemjej.​—Rom 5:​12.

Ke Jisõs ear kwalok ilo Katak eo an ion Tol eo, ear kalikar bwe armij ro rejjab webben remaroñ webben bõtab ilo wãwen ko jet. Ilo katak eo an, ear karõk kien ko kin yokwe eo ewebben ak elikieo. Eñin yokwe eo Anij ej kwalok ñõn armij ro. Jisõs ear ba: “Komin yokwe ro dri kijirãte kom, im jar kin ro rej matõrtõr kom; Bwe komin ro nejin Jememiuij i lõñ: bwe Ej kõtak al ion ro renana im ion ro remõn, im kowut ion ro rewãnik im ion ro re jab wãnik.” (Matu 5:​44, 45) Ilo an dri kalor ro an Jisõs kwalok yokwe in, renaj kajeoñwe joñok eo ewebben an Anij.

Ranin, Dri Kennan ro an Jeova ibelakin lõl in rej kate ir ñõn kejbãrok kien in elap ilo air kwalok yokwe ñõn ro jet. Rej kõnan jibõñ aolep armij ro jen ailiñ, kil, im kabuñ ko reoktõk jen dron bwe ren bõk jelalokjen eo emol jen Baibel eo. Kiõ, Dri Kennan ro an Jeova rej katak iben elõñlok jen 7,000,000 armij ro ilo 236 ailiñ ko im rej itoklimo in katak kin Baibel eo.

Jisõs ear kajitõk: “Elañe komij yokwe ro rej yokwe kom, ta jinekjij ñõn kom? Dri tel owõj re jab kõmõn einwõt ke? Im elañe komij yokyokwe ro jeõmi im jãtõmi wõt, ewi elap ami kõmõn jen ro jet? Dri ailiñ ko re jab kõmõn einwõt ke?” (Matu 5:​46, 47) Dri Kristian ro remol rejjab kwalok kaljiklok ñõn armij ro jekron ewi joñõn jelalokjen eo air, ak ailiñ ta eo rej itok jene, im rejjab kwalok wõt yokwe ñõn ro rej kwalok joij ñõn ir. Jen air eindrein, rej jibõñ ro rejeramel im ro renañinmij, ro redrik im ro reridto. Ikijen wãwen kein, dri Kristian ro remaroñ kajeoñwe yokwe eo an Jeova, kin men in jemaroñ ba bwe rej webben ilo wãwen in.

Jenaj ke maroñ bõk mour webben eo Adam ear luji? Aet, ikijen ar tõmak ilo katok in binmour eo an Jisõs, armij otemjej rej bokake renaj lukkun webben ilo Ien Iroij eo an Kraist iomin juõn tausan yiõ ko, ñe ‘Nejin Anij ej kokkure jerbal ko an devil.’​—1 Jon 3:8.