Ej Or Wõt Ien ñõn Ar Korijer ñõn Anij

Ilo Málaga, juõn jikin me ej ber ilo Spein, juõn jinen im nejin etairro jimor ej Ana, rar baptais ilo Tijemba 19, 2009. Rar uan 2,352 armij ro im rar bõk buñten ne in ilo Spein ilo yiõ eo 2009. Bõtab, eor juõn men ejejuan kin rein ruo, im ear kin joñõn ridtair. Juõn iairro ear 107 an yiõ, im eo juõn kar 83 yiõ ridtõn!

Ta eo ear kamakõt irro ñõn airro wujleplok mour eo airro ñõn Jeova im baptais? Ilo yiõ ko ilo 1970, juõn ian Dri Kennan ro an Jeova im ej jokwe iturin Ana eo ej 83 yiõ ridtõn, ekkã an kar kirtok e ñõn ber ilo ien Katak Baibel eo an Congregation ilo mweo imõn. Jen ien ñõn ien, Ana ear ber ilo ien kein. Bõtab, ear jab kõmõn wõnmanlok ko kin an kar boub ilo jikin jerbal eo an.

Enañin joñoul yiõ ko tokelik, jet ian ajiri ro nejin Ana rar jino katak Baibel im tokelik erom dri korijer ro an Jeova. Juõn iair etan, Mari Carmen, ear kaitoklimoen im jibõñ jinen bwe en bar mõnõnõ in katak Baibel. Inem, jibwin Mari Carmen, Ana eo eridtolok, ear bareinwõt jino an kwalok an itoklimo in katak Baibel eo. Tokelik, joñoul uan baamle in rar bõk buñten ne eo ñõn air baptais.

Ilo ran in baptais eo airro, rein jinen im nejin, rar lukkun obrõk kin lõñliñ. Ana eo ej 107 yiõ ridtõn, ear ba,“Jeova ear lukkun joij ñõn iõ ilo an kõtlok bwe in jela kajen.” Lio nejin ear ba, “Mokta jen an itok jukjuk im ber eo ekãl, ikõnan korijer ñõn Jeova ilo aõ kõmõnmõn ankilan im kwalok nan kin nuuj eo emõn joñõn wõt aõ maroñ.”

Men eo im ej bõktok elap lõñliñ ñõn rein ruo ejoko beleir ej ilo air ber ilo kwelok ko. Juõn ian elder ro ilo congregation eo airro ej ba, “Rejañin joko jen juõn ian kwelok ko. Ien otemjej rej pojõk in uak ilo ien Katak in Imõniaroñroñ eo.”

Joñok in airro emõn ej kakememej kij kin juõn kõra ejoko belen etan Anna ilo Baibel eo, eo im “e jab ilok jen tempel, a ej kabuñ ñõn Anij ilo jitlok im jar ko boñ im ran.” Men in ear tellok e ñõn an bõk jerammõn eo ñõn lo niñniñ eo Jisõs. (Luk 2:​36-​38) Anna ear maroñ korijer ñõn Jeova, meñe ear 84 yiõ ridtõn, im eindrein iben Ana ro ruo ilo bwebwenato in.

Eor ke ro nukõm im rej mõnõnõ in roñjake ennan eo jen Baibel eo? Ak kwonañin ke iion juõn eo eridto im ej mõnõnõ in roñjake yuk ñe kwoj kwalok nan ilo mweo imõn? Rein remaroñ einwõt kõra rein ruo ilo bwebwenato in kinke ej or wõt ien ñõn air korijer ñõn Anij eo emol, Jeova.

[Caption on page 25]

“Jeova ear lukkun joij ñõn iõ”

[Caption on page 25]

“Mokta jen an itok jukjuk im ber eo ekãl, ikõnan korijer ñõn Jeova”