Kajitõk ko jen Ro Rej Riit

Ilo Jenesis 6:​3, UBS, Anij ear ba: “Ijamin kõtlok bwe armij ren mour ñõn indrio; rej drien mij. Jen kiõ im ilok ejamin aitoklok air mour 120 yiõ.” Jeova ear ke kõmõn joñõn aitokõn mour eo an armij ro ñõn 120 yiõ ko, im eñin ke aitokõn ien eo Noa ear kwalok nan kin an naj itok Ibijliplip eo?

Uak eo ñõn kajitõk kein ruo ej jaab.

Mokta jen Ibijliplip eo, elõñ armij ro rar mour iomin elõñ buki yiõ ko. Noa ear 600 an yiõ ke Ibijliplip eo ear walok, im ear mij ke ear 950 yiõ ridtõn. (Jen. 7:6; 9:​29) Jet ian ro im rar lotak elikin Ibijliplip eo rar bareinwõt mour elõñlok jen 120 yiõ ko, einwõt Arpaksad, eo ear mij ke ear 438 an yiõ, im Shila, ke ear 433 an yiõ. (Jen. 11:​10-​15) Bõtab, ilo ien ko an Moses, joñõn aitokõn mour ko an armij ro ear driklok ñõn 70 ak 80 yiõ ko. (Sam 90:​10) Inem Jenesis 6:3 ear jab karõk bwe joñõn aitokõn mour ko an armij ro enaj iomin 120 yiõ ko.

Inem, nan ko ilo eon eo rej ke jen Anij ñõn Noa bwe en kakkil ro jet kin ien kokkure eo im enaj itok 120 yiõ ko jen ien eo? Jaab. Elõñ ien ko Anij ear konono ñõn Noa. Elikin eon ko joñoul ilõlin eon in ilo bwebwenato eo, ej wõnmanlok im ba: “Anij e ar ba ñõn Noa, Jemlokõn kõniek otemjej ej itok imaõ; bwe lõl e obrõk kin koaroñ.” Ilo yiõ ko tokelik, ear rerelok an Noa kõmõne jerbal eo an elap ñõn kalek wa eo, im ilo ien in: “Jeova e ar ba ñõn Noa, Kwe im nukõm otemjej komin itok ñõn loan wa eo.” (Jen. 6:​13; 7:⁠1) Im eor jet ien ko  Jeova ear kajelaik Noa kin jet melele ko.​​​—Jen. 8:​15; 9:​1, 8, 17.

Bõtab, eoktõk ñe jej riit Jenesis 6:3 kinke ejjab kwalok etan Noa ak ba bwe Anij ear konono ñõn e. Emaroñ bwe eon in ej baj kwalok wõt kin karõk ak bebe eo an Anij. (Keiri Jenesis 8:​21.) Eaurõk ñõn ar kile bwe ilo bwebwenato ko kin men ko rar walok mokta jen ien ko an Adam, jej lo nan kein einwõt: “Anij e ar ba . . . ” (Jen. 1:​6, 9, 14, 20, 24) Ealikar bwe Jeova ear jab konono ñõn juõn armij ion lõl kinke ejañin kar kõmõnmõn armij ro ilo ien eo.

Kin men in, ekkar bwe jen bõk lemnok eo bwe Jenesis 6:3 ej kwalok kin karõk eo an Anij ñõn kokkure jukjuk im ber eo enana ion lõl. Jeova ear kalikar bwe enaj kajejit bebe in an 120 yiõ ko jen ien eo, meñe Noa ejañin kar jela kake. Bõtab, etke ear karõke ñõn joñõn ien in? Etke ear aikwij kõtar?

Dri jilik Piter ear kwalok kin jet un ko: “Meanwõr an Anij e ar kõtar ir ilo ran ko an Noa, iomin ien kapojõk wa eo, im ilo e emwij lomoren eiet, drualitõk armij, kin dren.” (1 Pit. 3:​20) Aet, ke Anij ear kwalok kin bebe eo an ikijen 120 yiõ ko, ear or wõt men ko kar aikwij kõmõni. Enañin 20 yiõ ko tokelik, ear jino or ro nejin Noa im lio belen. (Jen. 5:​32; 7:⁠6) Lõmaro jilu nejiiro rar ridtolok im mare, im men in ear kalaplok oran baamle eo an Noa ñõn “drualitõk armij” ro. Inem rar aikwij kalek wa eo me ear juõn jerbal ejjab biruru ñe jej lemnok kin joñõn kilepin wa eo im joñõn baamle eo an Noa. Aet, an Anij kwalok meanwõr iomin 120 yiõ ko ear kõtlok bwe men kein ren tõbrõk im bwe en maroñ lomoren armij ro, men in ear kõmõn bwe drualitõk armij ro retiljek ren bõk lomor jen “dren” eo ak Ibijliplip eo.

Baibel eo ejjab kalikar kin yiõ eo Jeova ear kajelaik Noa kin Ibijliplip eo. Ak kinke lõmaro nejin rar lotak, ridtolok, im mare ilo ien eo, bwelen ear or mõtõn 40 ak 50 yiõ ko mokta jen Ibijliplip eo. Inem Jeova ear ba ñõn Noa: “Jemlokõn kõniek otemjej ej itok imaõ.” Ear wõnmanlok im ba bwe Noa ear aikwij kalek juõn wa ekilep im dreloñ iloan iben baamle eo an. (Jen. 6:​13-​18) Iomin yiõ ko mokta jen Ibijliplip eo, Noa ear kwalok juõn joñok emõn kin wãnik ilo wãwen an mour. Bareinwõt, ear jerbal einwõt juõn “dri kwalok ekwojarjar,” eo ear keañ kin nan in kakkil eo bwe Anij enaj kokkure aolep ro renana im rar jab mour ekkar ñõn kien ko an Anij ilo ien eo. Noa ear jab jela kin ñãt eo men in enaj walok, ak ear jela bwe emol an naj itok. Im jejela bwe ear walok.​​​—2 Pit. 2:⁠5.