Anij Ej Kajerbal Kajur eo an ñan Jibañ Kij Anjo Ion Jabrewõt Melejoñ

“I maroñ in kõmõn men otemjej ilo Eo ej kakajur iõ.”​​—PIL. 4:​13.

1. Etke armij ro an Jeova rej jelmae elõñ kain melejoñ ko?

 EKKÃ an armij ro an Jeova iion elõñ kain melejoñ ko. Jet melejoñ ko rej walok kin likjap ko ad make, ak jen jukjuk im ber in jej mour ie. Melejoñ ko jet rej walok kin an ro jet kijdrate ro rej karejar ñan Anij. (Jen. 3:​15) Jen jinoin bwebwenato an armij, Anij ear jibañ ro dri karejeran ñan jutak bin nae armij ro rar matõrtõr ir kin tõmak eo air im jumae ijjibed ko jen ro jet. Bareinwõt ear jibañ ir ñan kijenmij iomin jabrewõt kain melejoñ ko. Anij ej kajerbal kajur eo an ñan jibañ kij kõmman eindrein.

Jutak Bin Nae Ro Rej Matõrtõr Kabuñ

2. Ta mejenkajik eo an ro rej matõrtõr kabuñ, im ewi wãwen rej kõmmane men in?

² Ro rej matõrtõr kabuñ ekkã air jumae ak kokkure armij ro kin kabuñ ak tõmak ko air. Mejenkajik eo air ej ñan jolok kabuñ ko an armij ro, im bõprae an ajeded tõmak ko air, ak kokkure tiljek eo air. Jet ien rej kajju im jumae ak jet ien rej etaoik ir. Baibel eo ej keiri Setan ñan juõn laiõn elej im juõn serpent epoison.​​​—Riit Sam 91:​13, UBS.

3. Ewi wãwen Setan ej kokkure kij einwõt juõn laiõn elej im juõn serpent epoison?

³ Setan ej einwõt juõn laiõn elej. Elõñ alen ear kokkure armij ro an Jeova ilo an kalbuji ir, lej ñan ir, im kamoiki makitkõt ko an kabuñ eo air. (Sam 94:​20) Yearbook ko me rej kwalok kin makitkõt ko an Dri Kennan ro an Jeova rej kwalok elõñ bwebwenato ko kin air iion wãwen kein renana. Kumi in dri nana ro rar kokkure armij ro an Jeova ilo elõñ ailiñ ko. Dri tel in kabuñ ko ak dri utiej ro ilo kien rar kajerbal jet ian rein ñan kõmmane men in. Wãwen kein relej rar kõmman bwe jet ren bwijrak air karejar ñan Jeova. Devil eo ej  bareinwõt kokkure armij ro an Jeova einwõt juõn serpent epoison ilo an kabiloik lemnak ko air im mone ir bwe ren kõmmani men ko ekõnan. Ej kajerbal wãwen in ñan kamõjnoik ir ak bwe ren karmijeteik tõmak eo air. Bõtab, Anij ej kajerbal kajur eo an ñan jibañ bwe jen jutak bin nae wãwen kein ruo Setan ej kajerbali ñan kokkure kij.

4, 5. Ta wãwen eo emmõntata jemaroñ kõmmane ñan bojak wõt ñe jenaj iion matõrtõr, im etke? Kwalok juõn wanjoñok.

⁴ Jejjab maroñ kabojaklok iman kin matõrtõr ko ilo ad antonelok elõñ wãwen ko jenaj jelmae ilju im jeklaj. Ilo mol, jejjab jelã kin kain matõrtõr rõt ko renaj walok. Eñin unin ejelok tokjen ad inebata kin men ko me remaroñ jab walok. Bõtab, eor juõn men jemaroñ kõmmane im ej wãwen eo emmõntata. Enañin aolep ro im rar iion matõrtõr rar anjo kin air kar kalomõnlokjen kin joñok ko an ro rar tiljek ilo Baibel eo im kin katak ko an Jisõs im joñok eo an. Men in ear maroñ kamulõllok yokwe eo air ñan Jeova. Tokjen men in, rar maroñ jutak bin nae jabrewõt melejoñ rar jelmaiki.

⁵ Lemnak kin joñok eo an ruo jeid im jatid kõrã ilo ailiñ in Malawi. Juõn jarlepju in dri nana rar mõn ir, wutik jen air nuknuk, im ba bwe renaj kokkure ir elañe rejjab wia card ñan kãlet kumi in kien ta eo rej rejetake. Rar mone irro im ba bwe ro ilo Betel rar ebbõk air card. Kar ta uak eo airro? Rar ba: “Jeova Anij wõt kimij karejar ñan e. Inem meñe ro ilo Betel rar wiaik card kein, ejjab melelen bwe kimro naj bar wiaiki. Kimro ban karmijete tõmak eo amro, meñe kom naj mõn kimro!” Elikin air kar beran in ba nan kein, rar kõtlok irro.

6, 7. Ewi wãwen Jeova ej kakajur ro dri karejeran ñan anjo ion matõrtõr?

⁶ Dri jilik Paul ear kile bwe dri Kristian ro ilo Tessalonika rar mõnõnõ in bõk nan eo meñe rar iion “iñtan elap,” ak rar lõñliñ wõt kinke kajur eo an Anij ear bed ibbeir. (1 Tes. 1:⁠6) Emol, elõñ dri Kristian ro ilo ien ko etto im ilo ran kein rar iion elap matõrtõr im rar anjo ioir. Meñe men kein rar walok ilo juõn ien ekanuij in bin ñan ir ak rar ainemõn wõt. Ainemõn ej juõn ian kadkad ko rej walok jen an kajur eo an Anij jerbal ilo mour ko ad. (Gal. 5:​22) Tokjen men in, kadkad in ear jibañ ir ñan kejbãrok burueir im lemnak ko air. Aet, Jeova ej kajerbal kajur eo an elap ñan kakajur ro dri karejaran ñan kijenmij iomin melejoñ ko rebin im kõmmani bebe ko remeletlet ñe ej walok abañ ko. *

⁷ Armij ro rej kalimjek ro dron Jeova rar bwilõñ kin air maroñ drebij wõt air tiljek meñe rej iion matõrtõr ko relap. Rar kile bwe kajur eo an Anij ear jerbal ibbeir. Dri jilik Piter ej kakajur kij kin nan kein: ‘Elañe rej kajirere kake kom kin etan Kraist, komij mõnõnõ, bwe kajur eo an Anij ej ber iomi.’ (1 Pit. 4:​14) Anij ej buñburuen kin ad kejbãrok kien ko an rekwojarjar ñe jej iion matõrtõr. (Matu 5:​10-​12; Jon 15:​20) Elap ad lõñliñ kin ad jelã bwe jej kabuñburuen Jeova!

Jumae Ijjibed ko jen Ro Jet

8. (a) Ta eo ear kamaroñ Joshua im Keleb ñan jumae ijjibed ko jen ro jet? (b) Ta eo jemaroñ katak jen joñok eo an Joshua im Keleb?

⁸ Men eo elap an bin im dri Kristian ro rej aikwij kijenmij kake ej ijjibed ko jen ro jet. Bõtab, jemaroñ anjo jen armij ro rej kajirere kake kij, konono nae kij, ak kajeoñ jibed kij ñan lor kõnan ko air. Unin ej kinke kajur eo an Jeova elaplok an kajur jen lemnak im wãwen ko an armij ro ilo lal in. Ñan wanjoñok, ta eo ear kamaroñ Joshua im Keleb bwe ren jab errã ilo lemnak ko an dri iaroñroñ ro joñoul me rar jilkinlok ir bwe ren wate enen Kenean? Kin air kar lor tel eo jen kajur eo an  Anij, ear ‘einjuõnlok air lemnak’ jen ro jet.​​​—Riit Bwinbwin 13:30; 14:​6-​10, 24, UBS.

9. Etke dri Kristian ro rejjab aikwij mijak in oktak jen armij ro?

⁹ Anij ear kajerbal kajur eo an ñan kakajur dri jilik ro an Jisõs bwe ren bokake Anij elaplok jen air bokake ro me enañin aolep rar watõk im kautiej ir einwõt dri kaki in kabuñ eo emol. (Jerb. 4:​21, 31; 5:​29, 32) Enañin aolep rar kõnan lor men ko armij ro ibelakiir rar kõmmani bwe ren jab jumaik ir. Bõtab, ekkã an kar dri Kristian ro remol jutak bin wõt kin men eo ejimwe. Anij ear kajerbal kajur eo an ñan jibañ ir bwe ren jab mijak in oktak jen ro jet. (2 Tim. 1:⁠7) Jen etale juõn wanjoñok kin wãwen jejjab aikwij ebwer kin ijjibed ko jen ro jet.

10. Ta melejoñ eo ebin jet dri Kristian ro remaroñ jelmae?

¹⁰ Jet jodrikdrik ro remaroñ jelmae juõn melejoñ ebin elañe rejelã bwe eo mõttair ear kõmmane juõn men enana. Remaroñ lemnak bwe eo mõttair enaj drike ir ñe renaj kajelaik elder ro. Im kin air bõk lemnak in rej drebij wõt men eo na ibbeir meñe rejelã bwe ejjab jimwe. Eo ear kõmman jerawiwi emaroñ bareinwõt jibed ro mõttan bwe ren noje men eo enana ear kõmmane. Ilo mol, abañ in ejjab walok wõt ñan jodrikdrik ro. Jet ritto ro rej bareinwõt lo bwe ebin ñan air kebak elder ro ilo congregation eo ñan kwalok bwid eo an eo mõttair ak eo ilo baamle eo air. Bõtab, ta eo dri Kristian ro remol ren kar aikwij kõmmane ñe rej iion kain ijjibed rõt in?

11, 12. Ta wãwen eo emmõntata ñan uake juõn eo ilo congregation im ej kajitõk ibbam bwe kwon jab kwalok bwid eo an? Etke?

¹¹ Lemnak kin wãwen in. Bwelen juõn likao etan Alex ejelã bwe Steve, leo mõttan ilo congregation eo ekkã an aluij pija in kelwan. Alex ej ba ñan Steve bwe elap an inebata kin men eo ej kõmmane ak Steve ejjab lukkun roñjake e. Ke Alex ej rejañ e bwe en konono ibben elder ro kin abañ eo an, Steve ej ba bwe elañe ej watõk e lukkun mõttan, inem eban kajelaik elder ro kin men eo ej kõmmane. Alex ej aikwij ke mijak ñe ejako airro mõttaik dron? Emaroñ lemnak bwe elder ro reban tõmak e elañe Steve ejjab kwalok mol. Bõtab, elañe Alex ej ikõñ wõt im jab ba jabrewõt, men in eban kamarmir abañ eo im Steve emaroñ luji kõtan eo an ibben Jeova. Alex ej aikwij kememej bwe “mijõk armij ej bõktok juõn jen; a eo ej liki Jeova, ejelok an uota.” (Ken. 29:​25) Bar ta eo Alex emaroñ kõmmane? Emaroñ bar kebake Steve im jab ãliklik in kajju konono ibben kin abañ eo an, bõtab en kõmmane men in ilo joij im yokwe. Ej aikwij beran ñan kõmmane men in. Bwelen ilo ien in Steve enaj mõnõnõ in konono kin abañ eo an. Alex ej aikwij bar rejañ Steve bwe en ilen konono ibben elder ro im jiroñ e bwe elañe ej rumij kake, inem enaj kajelaik elder ro.​​​—Liv. 5:⁠1.

 ¹² Elañe kwonaj aikwij kamarmir kain abañ rõt in, eo mõttam emaroñ jab mõnõnõ ibbam ilo jinoin. Bõtab tokelik emaroñ kile bwe kwoj eindrein kinke kwoj kõnan jibañ e. Elañe eo ear kõmman jerawiwi ej mõnõnõ in bõk jibañ, inem enaj kamolol yuk kin am beran im mol ñan e im eban meloklok men in. Ak ijo turãjet, elañe ej illu ibbam kinke kwar kajitõk ibben elder ro bwe ren jibañ e, ej ke kain armij rõt eo in im kwoj kõnan bwe en mõttam? Elaplok an aurõk bwe jen kabuñburuen Jeova, Eo Jerar emmõntata. Elañe jej likit Jeova moktata, ro im rej yokwe e renaj kautiej yuk kin am mol im renaj erom ro jeram remol. Jen jab najikin Devil eo ilo congregation eo kinke enaj bõprae an kajur eo an Anij jerbal ilo mour ko ad. Kin men in, jen kõtlok bwe en tel kij ilo ad kate kij ñan kejbãrok erreo eo an congregation eo.​​​—Ep. 4:​27, 30.

Kijenmij Iomin Jabrewõt Kain Melejoñ Ko

13. Kain melejoñ rõt ko armij ro an Jeova rej jelmaiki, im etke men kein rej walok?

¹³ Elõñ kain melejoñ ko rej walok einwõt jabwe ak ejelok jããn, ejako jerbal eo am, walok juõn lañ, mij juõn eo im ejitenburu ibbed, ad bõk juõn nañinmij elap, im ko jet. Kinke jej mour ilo “ien ko renana,” jej kõtõmene bwe ejjabto kij aolep jenaj aikwij iion melejoñ ko rebin. (2 Tim. 3:⁠1) Jen jab lelñoñ im jaje ta eo jen kõmmane ñe men in ewalok. Anij enaj kajerbal kajur eo an ñan kakajur kij ñan kijenmij iomin jabrewõt kain melejoñ ko.

14. Ta eo ear kakajur Job ñan kijenmij iomin melejoñ ko ear jelmaiki?

¹⁴ Job ear iion elõñ kain melejoñ ko. Ear jako an mweie, mij ajiri ro nejin, luji ro mõttan, bõk juõn nañinmij elap, im lio belen ear jako an liki Jeova. (Job 1:​13-​19; 2:​7-9) Bõtab, Job ear lo juõn eo emol an kar kainemõn e etan Ilaihu. Ear ba ñan Job: “Kwon bwijrõk, im lemnok kin jerbal ko an Anij, menin bwilõñ.” (Job 37:​14) Nan kein an Ilaihu rar einlok wõt nan ko an Jeova ñan Job. Ta eo ear jibañ Job ñan kijenmij iomin melejoñ ko ear jelmaiki? Im ta eo emaroñ jibañ kij ñan kijenmij kin melejoñ ko jej iioni? Ej ikijen ad kememej im kalomõnlokjen kin joñan an Jeova kajur im wãwen ko relõñ rej walok kin an kajerbal kajur eo an. (Job 38:​1-​41; 42:​1, 2) Bwelen jej kememej jet ien ko ilo mour eo ad ke jaar lo wãwen an Jeova kar kwalok an itoklimo kin kij kajjojo. Ej itoklimo wõt in jibañ kij.

15. Ta eo ear kakajur Paul ñan kijenmij wõt iomin melejoñ ko ear jelmaiki?

¹⁵ Kin tõmak eo an dri jilik Paul, ear iion elõñ kain melejoñ ko rebin im kauwatata bõtab ear kijenmij wõt. (2 Kor. 11:​23-​28) Ta eo ear jibañ Paul bwe en kate wõt e im jab ebwer ke ear jelmaik melejoñ ko rebin? Ikijen an kar jar im atartar wõt ion Jeova. Iomin ien ko Paul ear iion melejoñ ko mae ien eo rar mõn e kin tõmak eo an, ear je:  “Iroij e ar jutõk iba im kakajur iõ; bwe kin ña kwalok in en kanuij alikar im dri ailiñ ko otemjej ren roñjake: im emwij kõtlok iõ jen loñin laiõn eo.” (2 Tim. 4:​17) Kin men in, kinke ear iion melejoñ ko, Paul ear maroñ kakajur dri tõmak ro mõttan bwe ejelok unin air aikwij “inebata kin jabrewõt.”​​​—Riit Dri Pilippai 4:​6, 7, 13.

16, 17. Kwalok juõn wanjoñok kin wãwen an Jeova kakajur armij ro an ñe rej jelmae abañ ko rainin.

¹⁶ Juõn pioneer etan Roxana, ej juõn ian ro im emwij an lo bwe Jeova ej jibañ ro dron. Ke ear kajitõk ibben booj eo an ñan kakije jen jikin jerbal bwe en maroñ bed ilo juõn kwelok elap, leo ear illu im ba bwe ñe enaj etal enaj jolok e jen jikin jerbal. Jekron ak Roxana ear etal ñan kwelok eo elap, im ear jar im akwelap bwe ren jab jolok e jen jikin jerbal eo an. Elikin an jar ear emmõn an mour. Bõtab, ilo ran in Mande eo, elikin kwelok elap eo, booj eo an ear jolok Roxana jen jerbal einwõt an kar ba. Roxana ear lukkun inebata kinke ej aikwij jerbal ñan an kabwe aikwij ko an baamle eo an, meñe edrik wõnãn. Bõtab ear bar jar, im ear lemnak bwe elañe Anij ear jibañ e ikijen katak ko jen Baibel ilo kwelok eo elap, inem enaj bar jibañ e ñan kabwe aikwij ko an. Ke ear etetallok ñan mweo imõn, ear lo juõn jain ej ba “Kimij Kabuk dri Jerbal,” im ear kanne peba ñan jerbal eo ak jerbal eo ej ñan ro ewor air iminene in kajerbal mijjin in keke. Booj eo ear kile bwe ejelok an iminene kin jerbal eo bõtab ear wõnmanlok wõt im kajerbale, im wõnãn ear enañin ruo alen laplok jen kar jerbal eo an mokta. Roxana ear lo bwe Jeova ear uake jar eo an. Bõtab, jerammõn eo elaptata ear loe ej bwe ear maroñ jaketo jaketak nuuj eo emmõn ñan jet ian dri jerbal ro mõttan. Im emen iair ekoba booj eo an rar tõmaki katak ko ilo Baibel im baptais.

¹⁷ Jet ien jemaroñ lemnak bwe Jeova ejjab uaki jar ko ad, ak bwelen eto an uake jar ko ak ejjab uak ilo wãwen eo jej kõtõmene kake. Bõtab eor unin im Jeova wõt ejelã, im bwelen ilo ran ko tokelik jenaj melele. Meñe eindrein, jemaroñ liki bwe Jeova ejamin kejekron armij ro an retiljek.​​​—Hib. 6:​10.

Anjo Ion Melejoñ ko im Menin Kabo Ko

18, 19. (a) Etke jejjab bwilõñ ñe jej iion melejoñ ko im menin kabo ko? (b) Ta eo emaroñ jibañ yuk ñan anjo ion melejoñ ko?

¹⁸ Armij ro an Jeova rejjab bwilõñ ñe rej iion menin kabo ko, men ko rej kabwer ir, matõrtõr, im ijjibed ko jen ro jet. Ilo mol elap an armij ro ilo lal in kijdrate kij. (Jon 15:​17-​19) Ak, Anij ej kajerbal kajur eo an ñan jibañ kij bwe jen anjo ion jabrewõt melejoñ ko jej iioni ilo ad karejar ñan e. Jeova eban kõtlok bwe jen iion melejoñ elap jen ad maroñ. (1 Kor. 10:​13) Jeova ejamin ilok jen kij. (Hib. 13:⁠5) Ad bokake nan ko an ilo Baibel eo ej menin kejbãrok ñan kij im kakajur kij. Bareinwõt, Anij emaroñ kamakõt dri tõmak ro jet ñan jibañ kij ilo ien eo elap ad aikwij jibañ.

¹⁹ Jen wõnmanlok wõt im kabukot tel eo jen kajur eo an Anij ikijen ad jar im katak Baibel ibbed make. Jen ‘kakajur kij kin kajur otemjej ekar ñõn maroñ in aibujuij eo An, ñõn kijenmij otemjej im meanwõr ilo lõñliñ.’​​​—Kol. 1:​11.

[Kamelele eo Itulal]

Ewi Wãwen Kwonaj Uak?

• Ewi wãwen kwomaroñ bojak wõt ñan jutak bin ñe jej iion matõrtõr?

• Ta eo kwoj aikwij kõmmane ñe juõn ej jiroñ yuk ñan jab kwalok ruõn?

• Ta eo jemaroñ liki Jeova kake elañe jej iion elõñ kain abañ ko?

[Kajitõk ko ñan katak]

[Pija ilo peij 28]

Ta eo jemaroñ katak jen joñok eo an Joshua im Keleb?

[Pija ilo peij 29]

Ewi wãwen kwomaroñ jibañ eo mõttam im ear kõmman jerawiwi?