Etan Jeova ilo Komlal in Engadine

ST. MORITZ. Emwij ke am roñ kin jikin in? Jikin in ej juõn hotel ebuñbuñ ilo Switzerland ilo Komlal in Engadine. Bõtab St. Moritz ej juõn wõt ian jikin ko raibujuij ekkã an armij ro itok ñan e, im ej bed ilo ibulõn tol ko etair Alps ilo Switzerland iturinlok wõt ailiñ in Italy. Ilo ijin, jikin eo rej naetan Swiss National Park ej bareinwõt bed ie. Elap an aibujuij aolep menin edrek im menin mour ko ijin, im men in ej bõktok nebar ñan Dri Kõmmanman eo ad, Jeova. (Sam 148:​7-​10) Ebar wor imõn etto ko im rej jutak wõt jen kar ebeben eo kein ka 17.

Ilo elõñ ian mõkein, ewor juõn men kwonaj loe im emaroñ kaitoklimoik yuk. Kwomaroñ lo jeje ko kin etan Anij ikiin mõkein, einwõt ilo tulõñin kejem in dreloñ ko. Iomin elõñ ebeben ko, ekar juõn manit bwe armij  ro ren kainõknõk inabijin moko imweir kin elõñ kain jeje ko, rej jei ikiin mweo, ak ñe jab rej jeje ilo dreka ko. Kwomaroñ loe pijain mwin ilo bukwon in Bever im emwij je nan kein ie. Ukok in jeje kein ej ba: “Ilo yiõ eo 1715. Jeova ej jinoin, im Jeova ej jemlokõn. Aolep men rej walok ikijen Anij, im ejelok men eban walok elañe ejjab e.” Aet, jeje in etto in ej kajerbale etan Anij ruo alen.

Kwomaroñ bar lo juõn jeje im etolok wõt an bed ilo bukwon in Madulain. Jeje in ej ba: “Sam 127. Elañe Jeova ear jab kalek mweo, ejelok tokjen an kar dri jerbal ro kate ir kaleke. Lucius Rumedius. Ilo yiõ eo 1654.”

Etke armij rej kwalok kin ãt in etan Anij ilo bukwon kein? Ilo tõre ko im ear jino jibillok jet armij jen kabuñ in Catholic, Baibel eo ear walok ilo juõn kajin etan Romansh im rej kajerbale ilo Engadine. Ilo mol, book eo in moktata im rar ukote ilo kajin in. Kin air emakõt kin men ko rar riiti jen Nan in Anij, elõñ armij ro ilo bukwon kein rar jab baj je wõt etair ikiin moko imweir, ak rar bareinwõt je etan Anij im jet eon ko ilo Baibel me ej walok etan Anij.

Aet, jeje kein rej bedwõt ñan rainin im rej kwalok im nebar etan Jeova jen kar etto. Dri lotok ro im ro rej jokwe ilo bukwon kein rej ruwainene ñan kalaplok air katak kin Jeova Anij, ilo air lolok bar juõn em im ej kwalok kin ãt eo etan,Imõn Kwelok eo an Dri Kennan ro an Jeova ilo Bever.

[Etan eo Ej kõmman ilo peij 7]

© Stähli Rolf A/age fotostock