Kortokjen Mour eo Am ilo Ien eo Ejelok Beleõm

“Eo emaroñe katak in en bõke.”​​​—MATU 19:​12, UBS.

1, 2. (a) Ewi wãwen an Jisõs, Paul, im ro jet lemnak kin mour eo an ro im ejelok beleir? (b) Etke jet rej lemnak bwe mour eo an juõn armij ilo ien eo ejelok belen ejjab juõn jerammõn?

 EJELOK berre bwe mour in mare ej juõn ian jerammõn ko relap jen Anij ñan armij. (Ken. 19:​14) Meñe eindrein, elõñ dri Kristian ro im ejelok beleir rej bareinwõt lañliñ im mõnõnõ. Juõn brother etan Harold eo 95 yiõ drettan im ejelok belen, ej ba: “Meñe ij lañliñ ñe ij bed ibben ro jet im kwalok karuwainene, ak ñe ij make iaõ, ijjab buromõj. Ilo mol, ej juõn jerammõn ñan iõ bwe ejelok beleiõ.”

² Emol, Jisõs Kraist im dri jilik Paul rar jimor konono kin ro im ejelok beleir, im Paul ear kwalok bwe men in ej juõn menin letok ak jerammõn jen Anij, einwõt mour in mare. (Riit Matu 19:​11, 12, UBS; 1 Dri Korint 7:​7, UBS.) Bõtab, ejjab aolep ro im ejelok beleir rar kãlet bwe en eindrein. Jet ien emaroñ bin ñan an ro  jet lo juõn rejetair emmõn. Ak ñan ro jet im rar mare iomin elõñ yiõ ko, tokelik ear ejelok beleir kinke rar jibil ak kinke eo beleir ear mij. Inem, etke jemaroñ ba bwe mour eo an juõn armij ilo ien eo ejelok belen ej bareinwõt juõn jerammõn? Im ewi wãwen dri Kristian ro remaroñ kortokjen mour eo air ilo ien eo im ejelok beleir?

Juõn Menin Letok Ejejuan

3. Ta maroñ ko ewor ibben dri Kristian ro ejelok beleir?

³ Juõn eo ejelok belen elaplok an ien im maroñ ñan kõmmani ta ko ekõnan jen juõn eo im ewor belen. (1 Kor. 7:​32-​35) Kin men in, armij eo emaroñ kalaplok ijo kwonan ilo jerbal in kwalok nan, kalaplok yokwe eo an ñan ro jet, im druaklok wõt ñan Jeova. Eñin unin elõñ dri Kristian ro rar kile tokjen ko remaroñ bõki ñe ejelok beleir, inem rar beek bwe ren jab kijer in kabuk rejetair. Ro jet remaroñ kar kõnan mare, bõtab ke ear oktak wãwen ko ibbeir, rar jar im kalmõnlõkjen kake im rar kile bwe kin jibañ eo an Jeova, remaroñ lo lañliñ ilo mour eo air meñe ejelok beleir. Kin men in, rar kõmman air jokãlet bwe ren jab belele.

4. Etke dri Kristian ro im ejelok beleir remaroñ kile bwe raurõk ilo air jerbal ñan Anij?

⁴ Dri Kristian ro im ejelok beleir rejelã bwe rejjab aikwij mare bwe ren aurõk ibben Jeova im drolul eo an. Anij ej yokwe kij kajjojo. (Matu 10:​29-​31) Ejelok jabrewõt men ak jabrewõt armij emaroñ kejibil kij jen yokwe eo an Anij. (Rom 8:​38, 39) Jekron ñe ewor beled ak jaab, kij kajjojo jej aurõk ilo ad jerbal ñan Anij.

5. Ta eo juõn ej aikwij kõmmane bwe en bõk tokjen ko remmõn ñe ejelok belen?

⁵ Meñe eindrein, juõn ej aikwij kate ñan kortokjen ien in ejelok belen bwe en maroñ kile ewi joñan aurõkin jerammõn in. Ewi wãwen aolep dri Kristian ro rainin im ejelok beleir remaroñ kortokjen ien ko air? Jen etali jet joñõk ko rekõketak an dri Kristian ro etto im lale ta eo jemaroñ katak jen ir.

Ñe Emmõn Drettõm im Ejelok Beleõm

6, 7. (a) Ta jerammõn eo jiroñ ro nejin Pilip im ejelok beleir rar bõke ilo air jerbal ñan Jeova? (b) Ewi wãwen Timote ear kortokjen mour eo an ilo ien eo ekar ejelok belen, im ta jerammõn ko ear bõki kin an kar mõnõnõ in jerbal ñan Anij ke ear juõn likao?

⁶ Dri kwalok nan eo Pilip ear wor emen nejin jiroñ ro im ejelok beleir. Rar kijejeto ilo jerbal in kwalok nan einwõt jemeir. (Jerb. 21:​8, 9) Jerbal in dri kanan ear juõn ian menin letok ko rekabwilõñlõñ jen kajur eo an Anij, im kõrã rein emen rar kajerbal menin letok in, im men in ear kajejjet kitien kanan eo ilo Joel 2:​28, 29, UBS.

⁷ Timote ear juõn likao eo ear kortokjen mour eo an ilo ien eo ear ejelok belen. Jen ke  ear niñniñ, jinen im jibwin, etair Eunis im Lois rar katakin e kin “jeje ko rokwojarjar.” (2 Tim. 1:5; 3:​14, 15) Bõtab, rein remaroñ kar erom dri Kristian ro ilo kar lolok eo an Paul kein kajuõn ñan kabijukneir ilo Listra, bwelen ilo yiõ eo 47. Ruo yiõ ko tokelik, ilo lolok eo an Paul kein karuo ñan Listra, Timote ear juõn likao. Elder ro ilo Listra im Aikoniõm rar nebare Timote, meñe ear juõn likao im ej kab dreloñtok ilo mol eo. (Jerb. 16:​1, 2) Inem Paul ear kir Timote bwe en itoitak ibben im lolok congregation ko jet. (1 Tim. 1:​18; 4:​14) Jejjab lukkun jelã elañe Timote ear mare tokelik. Bõtab, jejelã bwe ke ear juõn likao, ear lukkun mõnõnõ in etal ibben Paul. Ear mõnõnõ ilo an jerbal einwõt juõn mijenede im elder eo ejelok belen iomin elõñ yiõ ko.​​​—Pil. 2:​20-​22.

8. Ta eo ear kamaroñ Jon Mark bwe en jibarek mejenkajik ko me rar kamõnõnõik Jeova, im ta jerammõn ko ear bõki kin an kar kõmmane men in?

⁸ Jon Mark ear bareinwõt kortokjen mour eo an ke ear juõn likao im ejelok belen. E im jinen, etan Meri, kab leo nukin etan Barnebas rar ro moktata im rar uan congregation eo ilo Jerusalem. Mark emaroñ kar rittolok ilo juõn baamle emweie kinke ear wor imweir make im ear wor air dri jerbal. (Jerb. 12:​12, 13) Bõtab, meñe emaroñ kar mweie ilo an kar rittolok, Mark ear jab utiej buruen im ear jab lemnak kin e make. Bareinwõt, ear jab mõkaj in mare ak jino juõn baamle. Kin an kar kobalok ibben dri jilik ro ear jino kõnan jibarek jerbal in mijenede. Inem ear kanuij in mõnõnõ in etal ibben Paul im Barnebas einwõt dri jibañ eo airro ilo ien eo rar jino jerbal in mijenede. (Jerb. 13:⁠5) Elikin men in ear itoitak ibben Barnebas, im tokelik ear jerbal ibben Piter ilo Babilõn. (Jerb. 15:39; 1 Pit. 5:​13) Jejjab jelã elañe Mark ear mare tokelik. Bõtab, ej juõn joñõk emmõn einwõt juõn eo ear mõnõnõ in jibañ ro jet im kalaplok ijo kwonan ilo jerbal eo an Anij.

9, 10. Ta jerbal ko rebellok ñan dri Kristian ro emmõn drettair im ejelok beleir ñan kalaplok ijo kwonair ñan Anij? Kwalok juõn wanjoñõk.

⁹ Rainin, elõñ ro emmõn drettair rej bareinwõt mõnõnõ in kortokjen mour ko air ilo ien eo ejelok beleir ñan air kalaplok ijo kwonair ilo jerbal eo an Anij. Einwõt Mark im Timote, rein rej kile bwe ilo an ejelok beleir, men in ej kamaroñ ir bwe ren ‘lukkun lelok ir make ñõn jerbal eo an Iroij im ejjelok menin kamad.’ (1 Kor. 7:​35, UBS) Elukkun emmõn men in kinke remaroñ bõk kwonair ilo elõñ kain jerbal ko ñan Jeova. Ñan wanjoñõk, remaroñ pioneer, jerbal ilo jikin ko im elap aikwij dri kwalok ro ie, katak bar juõn kajin, jibañ ilo jerbal in ekkal Imõn Kwelok ko ak Ra ko, im jerbal ilo ra ko. Likao ro remaroñ bareinwõt bed ilo Jikuul in Baibel ñan Lõmaro Ejelok Beleir. Elañe emmõn drettõm im ejelok beleõm, kwoj ke kortokjen wãwen kein rebellok ñan yuk?

¹⁰ Juõn brother etan Mark ear jino pioneer ke ear likao wõt. Ear bed ilo Jikuul in Baibel ñan Lõmaro Ejelok Beleir. Ear bareinwõt bõk kwonan ilo elõñ kain jerbal ko ñan Jeova ibelakin lal. Ilo an ememejlok yiõ ko 25 ear jerbal in full-time ilo mol eo, ej ba: “Iar kajeoñ in kõketak aolep ro uan congregation eo. Iar kwalok nan ibbeir, lolok im kõketak ir, kirtok ir bwe ren kejota imweo imõ, im kõmman ien ko rekalimomo me rej kakajurlok jimjerã eo am ibben Jeova. lap an men kein kalañliñ iõ.” Einwõt an alikar ilo nan kein an Mark, jej bõk elap lañliñ ilo ad lelok ien im maroñ ko ad ñan jibañ ro jet. Elañe jej kate kij joñan wõt ad maroñ ilo jerbal ko ñan Jeova, enaj kebellok elõñ wãwen ko ñan ad jibañ ro jet. (Jerb. 20:​35) Rainin, elõñ men ko ro im emmõn drettair remaroñ kõmmani ilo jerbal ñan Iroij, jekron ta ko rej itoklimo kaki, joñan kabel ko air, ak ewi joñan air jelã kilen mour.​​​—1 Kor. 15:⁠58.

11. Ta jet ian tokjen ko juõn emaroñ bõki ñe ejjab kijer in mare?

¹¹ Meñe elõñ ro im emmõn drettair rekõnan mare tokelik, ak ewor un ko remmõn ñan air jab kijer in mare. Enaj emmõnlok elañe juõn eo emmõn drettan ej kõttar mae ien edriklok kõnan eo an ñan babu ibben bar juõn. Kwoj  aikwij ien ñan kalaplok am jelã kin kwe make im jelãlok kilen mour bwe kwon maroñ kãlet juõn rejetam emmõn im ekkar ñan kwe. Bujen in mare ej juõn bebe elap an aurõk, im juõn ej aikwij kautieje toõn wot an mour.​​​—Ekk. 5:​2-5.   

Ien eo Kwoj Ritto im Ejelok Beleõm

12. (a) Ewi wãwen Anna ear emakõt elikin an kar mij leo belen? (b) Ta jerammõn eo ear iione?

¹² Anna, eo kar kwalok kake ilo Gospel eo an Luk, emaroñ kar lukkun buromõj ke leo belen ear mij elikin jiljilimjuõn wot yiõ ko in airro mare. Jejjab lukkun jelã elañe ear wor nejiiro ak elañe ear lemnak in bar mare. Bõtab, Baibel eo ej kwalok bwe ear ejelok belen Anna ke ear 84 yiõ drettan. Jen eon ko ilo Baibel, jemaroñ kile bwe Anna ear kortokjen wãwen ko reoktak ibben ñan an druaklok wõt ñan Jeova. Ear ekkeini an bed ilo tempel eo im “ej kabuñ ñõn Anij ilo jitlok im jar ko boñ im ran.” (Luk 2:​36, 37) Anna ear aikwij kate wõt e im beek ilo buruen bwe jimjerã eo an ibben Jeova en aurõktata ilo mour eo an. Tokelik Jeova ear kejerammõn e. Ear jerammõn kinke ear lo Jisõs ke ear niñniñ im ear maroñ kwalok ñan ro jet kin Messaia eo im wãwen eo enaj kar lomoren ir.​​​—Luk 2:​38.

13. (a) Ta eo ej kalikar bwe Dorkas ear boub in jibañ ro uan congregation eo? (b) Ewi wãwen kar kejerammõn Dorkas kin jerbal ko an rejoij im remmõn?

¹³ Juõn kõrã etan Dorkas, ãt eo juõn Tabita, ear jokwe ilo Joppa im ej bed iturinlok wõt Jerusalem. Jemaroñ ba bwe ejelok belen ilo tõrein kinke Baibel eo ejjab kalikare. Dorkas “eobrõk kin jerbal ko remõn im mweien tiriamo.” Ear keke elõñ nuknuk ko ñan kõrã ro ejako beleir im bareinwõt ro jet, im rein rar kanuij kaurõk e kin men in. Inem ke ear nañinmij im mij ilo jidimkij, aolep ro uan congregation eo rar kirtok Piter im eowore bwe en kejerkakbiji kõrã in ejitenburu ibbeir. Ke ear jededlok ennan eo iaolepen Joppa bwe emwij an jerkakbiji, elõñ rar erom dri tõmak. (Jerb. 9:​36-​42) Dorkas emaroñ kar jibañ jet ian rein ikijen jerbal ko an rejoij.

14. Ta eo ej kamakõt dri Kristian ro im ejelok beleir ñan air druaklok wõt ñan Jeova?

¹⁴ Einwõt Anna im Dorkas, elõñ ro ilo congregation ko rainin remaroñ ritto im ejelok beleir. Juõn ian un ko ej kinke jet rejañin lo juõn rejetair emmõn im ekkar. Bar juõn un ej kinke rar jibil ak eo beleir ear mij. Dri Kristian ro im ejelok beleir elaplok air jelã atartar ion Jeova, kinke ejelok juõn beleir me remaroñ kwalok burueir ñan e. (Ken. 16:⁠3) Silvia, juõn jeid im jatid kõrã im ejelok belen, ear jerbal ilo ra eo elõñlok jen 38 yiõ ko, im ej ba bwe men in ej juõn jerammõn. Ear ba: “Jet ien ij aikwij juõn bwe en kõketak iõ. Ij kajitõk ibbã make, ‘Wõn eo enaj kõketak iõ?’ ” Bõtab ej wõnmanlok im ba: “Ilo aõ liki bwe Jeova ejelã ta eo ij aikwiji elaplok jen iõ, men in ej jibañ iõ bwe in druaklok wõt ñan e. Im ien otemjej ej kõketak iõ, jet ien ilo wãwen ko im iar jab kõtõmene kaki.” Ñe jej druaklok wot ñan Jeova, ien otemjej ej kalikar an kaurõke kij ilo wãwen ko rekanuij joij.

15. Ewi wãwen dri Kristian ro im ejelok beleir remaroñ kalaplok yokwe eo air ñan ro jet?

¹⁵ Ien eo im ejelok beled ej kebellok juõn ien emmõn ñan ad ‘kalaplok buruer’ ak kalaplok yokwe eo ad ñan ro jet. (Riit 2 Dri Korint 6:​11-​13.) Jolene, juõn jeid im jatid kõrã me ejelok belen im 34 yiõ in an bed ilo jerbal in full-time ñan Jeova, ear ba: “Iar kajeoñ kate iõ bwe in jimjerãik elõñ kain armij ro, jab ro wõt drettaõ. Ilo ien eo im ejelok belen, juõn emaroñ lelok ien im maroñ ko an ñan Jeova, baamle eo an, ro jein im jatin ilo congregation eo, im ro dri turin. Ilo aõ rittolok, elaplok aõ mõnõnõ bwe ejelok beleiõ.” Kij aolep jej kamolol ro im ejelok beleir kin wãwen air jibañ ro rebwijwõla, ro renañimij, ro ewor nejiir im ejelok beleir, jodrikdrik ro, im ro jet ilo congregation eo. Emol, ñe jej kwalok yokwe ñan ro jet, men in ej kamõnõnõik kij. Kwomaroñ ke ‘kalaplok buruõm’ ak kalaplok yokwe eo am ñan ro jet?

 Ro im Rar Beek bwe En Ejelok Beleir

16. (a) Etke Jisõs ear beek bwe en ejelok belen? (b) Ewi wãwen an kar Paul kortokjen mour eo an ilo ien eo ear ejelok belen?

¹⁶ Jisõs ear beek bwe en ejelok belen kinke ear aikwij kapoj im lolorjake jerbal in kwalok nan eo an. Ear lap an itoitak ñan jikin ko rettolok, ear jerbal jen jimmarok ñan lukwõn boñ, im tokelik ear ajelok mour eo an ñan armij ro ilo an kar mij. Kinke ear ejelok belen, ear maroñ kõtõbraki jerbal ko an. Dri jilik Paul ear itoitak ñan ijoko rettolok im ear jelmae elap jumae im wãwen ko jet rebin ilo jerbal in kwalok nan. (2 Kor. 11:​23-​27) Jejjab jelã elañe ear wor belen Paul kar mokta, bõtab jejelã bwe elikin kar jitoñ e ñan jerbal in dri jilik, ear ejelok belen. (1 Kor. 7:​7, UBS; 9:⁠5) Jisõs im Paul rar rejañ ro jet ñan kajeoñwe joñõk ko air elañe remaroñ bwe ren kalaplok ijo kwonair ilo jerbal in kwalok nan. Mekarta, irro jimor rar jab kamo an jabrewõt dri karejeran Anij mare.​​​—1 Tim. 4:​1-3.

17. Ewi wãwen jet rainin rar lor joñõk ko an Jisõs im Paul, im etke jejelã bwe Jeova ej kaurõk ro im rej karmijeteik kõnan ko air?

¹⁷ Rainin, jet rej bareinwõt beek bwe en ejelok beleir bwe ren maroñ kalaplok ijo kwonair ilo jerbal ko air ñan Jeova. Harold, eo kar kwalok kake ilo jinoin katak in, ear mõnõnõ ilo an kar jerbal ilo ra eo elõñlok jen 56 yiõ ko. Ej ba, “Elikin joñoul yiõ in aõ jerbal ilo ra eo, elõñ dri belele ro rar aikwij bwijrak jen air jerbal ilo ra eo kinke eo beleir enañinmij ak bwe ren maroñ lale ritto ro jemeir ak jineir. Emij jinõ im jema. Elukkun emmõn ibba jerbal ilo Ra eo, im iar jab kõnan kabuk rejetaõ kinke men in emaroñ kõmman bwe in aikwij bwijrak jen jerbal in aõ.” Ejja eindrein, elõñ yiõ ko remotlok, juõn eo eto an pioneer etan Margaret ear ba: “Joñan aõ kar boub ilo jerbal in kwalok nan, iar jab mare meñe imaroñ kar elañe iar kõnan. Iar kajerbale ien in ejelok beleiõ ñan boub wot ilo kwalok nan, im elap an men in kamõnõnõik iõ.” Jeova ejamin meloklok jabrewõt eo im ej karmijeteik kõnan ko an ñan kabuñ eo emol.​​​—Riit Aiseia 56:​3-5, UBS.

Kortokjen Ien In im Ejelok Beleõm

18. Ewi wãwen ro jet remaroñ kõketak im rejetak dri Kristian ro im ejelok beleir?

¹⁸ Ej tellokin ad nebar im kõketak aolep dri Kristian ro im ejelok beleir me rej kate ir joñan wot air maroñ ilo air karejar ñan Jeova. Jej yokwe im kaurõk ir kajjojo im elap ad kamolol kin jibañ ko air relap iloan congregation eo. Rein rejamin aikwij buromõj elañe jej erom einwõt ro ‘jeir im jãtir man im kõrã, ak jemeir, ak jineir, ak ro nejiir,’ ilo tõmak.​​​—Riit Mark 10:​28-​30.

19. Ta ko kwomaroñ kõmmani ñan kortokjen mour eo am ilo ien eo ejelok beleõm?

¹⁹ Jekron ta un eo unin an ejelok beleõm, kimij kejatrikrik bwe joñõk kein ilo Baibel eo kab ilo ran kein ren kalikar ñan yuk bwe emaroñ lap tõbrak im mõnõnõ ilo mour eo am. Mour eo an juõn ilo ien eo ejelok belen emaroñ einwõt juõn menin letok im ear kõtõmene, ak jet ien men in emaroñ itok ilo an jab kõtõmene. Jet ien emõkaj an kaurõke menin letok in, ak jet ien ej bõk ien ñan an lo joñan aurõkin. Men in ej am wõt bebe, ekkar ñan wãwen am lemnak. Ta ko kwomaroñ kõmmani ñan kortokjen mour eo am ilo ien eo ejelok beleõm? Druaklok wõt ñan Jeova, boub wõt ilo jerbal eo an Anij, im kalaplok yokwe eo am ñan ro jet. Einwõt mour in mare, ien in me ejelok beled emaroñ juõn jerammõn elañe jej kaurõke einwõt an Anij kaurõke, im elañe jej kortokjen.

Kwoj Kememej Ke?

• Etke jemaroñ ba bwe ej juõn jerammõn ñe ejelok belen juõn armij?

• Etke ej juõn jerammõn ñe ro emmõn drettair rejjab kijer in mare?

• Ta wãwen ko rebellok ñan dri Kristian ro im ejelok beleir ñan air druaklok wõt ñan Jeova im kalaplok yokwe eo air ñan ro jet?

[Kajitõk ko ñan katak]

[Caption on page 18]

Kwoj ke kortokjen aolep wãwen ko rebellok ñan yuk ñan kalaplok ijo kwonam ilo jerbal ko an Anij?