Lemnak kin Men ko Emwij an Jeova Kõmmani ñan Kwe

EJJABTO elikin an Jisõs kar jerkakbiji, ruo ian dri kalor ro an rar ilok ilo ial eo air lok jen Jerusalem ñan Emmeõs. Book in Luk ej ba: “Ke rej konono wõt Jisõs make ear kebaklok ir im ilok ibbeirlok, rar loe, bõtab rar jab kile.” Inem, Jisõs ear ba ñan ir: “ ‘Ta ne komro ej bwebwenato kake ilo ial ne ami lok?’ Im rar bwijrak im mejen buromõj.” Etke rar buromõj? Dri kalor ro rar kõtõmene bwe ilo ien eo Jisõs enaj kar lomoren dri Israel ro jen air bed iomin kajur eo an dri Ailiñ ko, bõtab men in ear jab walok im Jisõs ear mij. Eñin unin rar buromõj.​​​—Luk 24:​15-​21, UBS; Jerb. 1:⁠6.

Jisõs ear kemeleleik dri kalor ro ruo kin “men otemjej emwij je kin e, ijjino jen book ko an Moses im jeje ko an ri kanan ro otemjej.” Aet, elõñ men ko raurõk im rekõketak rar jejjet kitieir ilo ien eo Jisõs ear bed ion lal im kõmmane jerbal in kwalok eo an! Ke dri kalor ro rar roñjake an Jisõs kemelele, rar jino lõñliñ im jako air mejen buromõj. Tokelik ilo joten ran eo, rar ba: “Ta ear jab mãnãn burued ke ear konono ibberro ilo ial eo tok im kemeleleik Jeje ko ñõn kijro ke?” (Luk 24:​27, 32, UBS) Ta eo jej katak jen wãwen an kar dri kalor ro an Jisõs emakõt?

Ewi wãwen Ad Emakõt Ñe Ejjab Jejjet Men ko Jej Kõtõmene Kaki?

Dri kalor ro ruo ilo ial eo airro lok ñan Emmeõs rar buromõj kinke ear jab jejjet men ko rar kõtõmene kaki. Rar bõk eñjake eo ej walok ilo Jabõn Kennan Ko 13:12: “Kõtõmene, ñe e rumijtok, ej kõmõn bwe buruen e nañinmij.” Eindrein bareinwõt, jet iad me eto ad karejar ñan Jeova ilo tiljek iomin elõñ yiõ ko, jaar lemnak bwe ‘iñtan eo elap’ enaj kar itok wõt etto. (Matu 24:21; Rev. 7:​14) Jejelã bwe ñe ejjab jejjet kitien men eo jaar kõtõmene kake, jej buromõj.

Bõtab, kememej bwe dri kalor ro ruo rar bar mejen mõnõnõ elikin an kar Jisõs jibañ ir ñan airro lemnak kin kanan ko emwij air jejjet kitieir, ekoba kanan ko rar jejjet ilo ran ko air. Jemaroñ drebij wõt ad lõñliñ im kijenmij wõt kin men ko rej kaburomõj kij ilo ejja wãwen in wõt. Juõn Kristian elder etan Michael me ear jelmae wãwen in, ear ba: “Kwon jab lemnak kin men ko Jeova ejañin kõmmani. Jen am eindrein, kwon lemnak  wõt kin men ko emwij an kõmmani.” Emol, ej juõn nan in kakabilek ekanuij emmõn!

Men ko Emwij an Jeova Kõmmani

Lemnak kin jet ian men ko rekabwilõñlõñ Jeova emwij an kajejjeti. Jisõs ear ba: “Eo ej tõmak iõ enaj kõmmõni jerbal ko ij kõmmõni, aet, enaj kõmmõni jerbal ko rellablok.” (Jon 14:​12, UBS) Ranin, dri karejar ro an Anij rej kajejjet jerbal eo elap kar jiroñ dri Kristian ro ñan air kõmmane. Elõñlok jen jiljilimjuõn million ro im rej reimanlok ñan air elã jen iñtan eo elap. Lemnak mõk, elõñ dri karejar ro an Jeova rej kijejeto ilo elõñ ailiñ ko ibelakin lal, juõn men ejañin kar walok mokta! Emwij an Jeova kajejjet nan in kanan ko an Jisõs bwe rein renaj kõmmani “jerbal ko rellablok” jen jerbal eo ear kõmmane.

Bar ta ko jet emwij an Jeova kõmmani ñan kij? Ear kõmman bwe armij ro emol burueir ren maroñ ilo kõkkar drioijtok jen lal in ebwoktak im nana im lo ainemõn im burukuk ibben dri kabuñ ro an Jeova kin kõtan eo air ibben. (2 Kor. 12:​1-4) Bõk ien ñan ad kalomõnlokjen kin jet ian jerammõn ko jemaroñ bõki jen men in. Ñan wanjoñok, kõmman etale ko kin men in ilo am kajerbal book ko ilo mweo imõm ak ilo laibrãre eo ilo Imõn Kwelok eo. Kajerbal Lajrõk in book ko Jet an Rolul in (Watch Tower Publications Index), ak lale ilo Laibrãre in book ko ilo computer eo am (Watchtower Library). Roñjake drama ko kin bwebwenato ko ilo Baibel eo. Kalomõnlokjen kin men ko kwar roñ im loi ilo kwelok eo elap ej kab jemlok. Bareinwõt, lemnak kin kõmao ko rekõketak ibben dri Kristian ro jeid im jatid. Elap wõt an Jeova lukkun joij ikijen an letok katak ko jen Baibel ñan kakajurlok tõmak eo ad im kin juõn rolul in jimjãn jimjãtin rej yokwe dron. Aet, ej juõn jerammõn elap!

Dri jeje sam eo Devid, ear ba: “O Jeova aõ Anij, elõñ men in bwilõñ, jerbal ko kwar kõmõne, kab lemnok ko Am ñõn kim.” (Sam 40:⁠5) Aet, ikijen ad lemnak kin men ko remmõn emwij an Jeova kõmmani ñan kij im kalomõnlokjen kin an yokwe kij, men in enaj kakajur kij ñan kijenmij im tiljek wõt ilo ad jerbal kin aolepen buruer ñan eo Jemed ilõñ, Jeova.​​​—Matu 24:⁠13.

[Pija ilo peij 31]

Jisõs ear jibañ dri kalor ro an ñan air lemnak kin men ko emwij an Jeova kar kõmmani ñan ir

[Pija ilo peij 32]

Kalomõnlokjen kin men ko kwar roñ im loi ilo kwelok eo elap ej kab jemlok